K’oxlanb’il naq li jun tzuul a’in sa’ Egipto, a’an li Tzuul Sinai.

18–24 abril

Exodo 18–20

“Taqab’aanu jo’nimal li xye li Qaawa’ ”

Li Hermana Michelle Craig kixye, “Jo’ xtzolom li Jesukristo tiik chixpaab’ankil a’an, naru nekek’ul eemusiq’ankil ut k’utb’esinb’il na’leb’ choq’ eere li wan rilom rik’ineb’ lix taqlahom ut li yiib’anb’il choq’ eere” (“Musiq’ejil seeb’al,” Jolomil ch’utub’aj-ib’ re octubre 2019). Tz’iib’a ut yu’ami li na’leb’ nachal sa’ laa k’a’uxl naq nakawil Exodo 18–20.

Tz’iib’a li nakak’oxla

K’a’jo’ xk’ihaleb’ li sachb’a-ch’oolej li ke’ril laj Israelita sa’ xb’eenikeb’ chalen chaq Egipto toj li Tzuul Sinai—li tz’aqal kixk’utb’esi lix nimajwal wankilal, rahom, ut ruxtaan li Qaawa’. A’b’anan, li osob’tesink li kawresinb’il xb’aan li Qaawa’ choq’ reheb’, nim wi’chik chiru yal rach’ab’ankileb’ chiru li preexil ut xk’eeb’aleb’ xwa ut ruk’a. A’an kiraj naq te’ok choq’ xtenamit re li sumwank, li “reechanihom” ut jun li “santil tenamit” (Exodo 19:5–6). Sa’ li kutan a’in, li rosob’tesihom li sumwank a’in moko re ta yal jun li tenamit. Li Dios naraj naq chixjunileb’ li ralal xk’ajol te’ok choq’ xtenamit re li sumwank, naq “relik chi yaal te’rab’i xyaab’ xkux ut te’xpaab’ lix Sumwank” (Exodo 19:5), xb’aan naq a’an “naruxtaana ru chi junelik eb’ li neke’rahok re ut neke’xpaab’ lix chaq’rab’ ” (Exodo 20:6).

Li na’leb’ re xtzolb’aleb’ li loq’laj hu aajunes

Exodo 18:13–26

Naru nintenq’an “chixk’amb’al” li iiq sa’ xb’aanunkil lix k’anjel li Qaawa’.

Naq nakawil li raatin laj Jetro, lix yuwa’ li rixaqil laj Moises, k’oxla chan ru tatwanq jo’eb’ li “winq seeb’eb’ xch’ool” sa’ li raqal 21. Chan ru tattenq’anq “chixk’amb’al” li riiqeb’ laj jolominel sa’ li Iglees? (raqal 22). Chan ru taayu’ami li na’leb’ a’in sa’ lix yalb’al aaq’e chirilb’aleb’ li komon?

K’oxla ajwi’ ma wan naq nakatk’anjelak chi q’axal wi’chik chiru laa metz’ew, jo’ kixb’aanu laj Moises? Chan ru tatxtenq’a li raatin laj Jetro sa’ laa yu’am?

Chi’ilmanq ajwi’ Mosiah 4:27; Henry B. Eyring, “El Cuidador,” Liahona, noviembre 2012, 121–124.

Naqab’aanu lix k’anjel li Qaawa’ naq naqileb’ li qakomon.

Exodo 19:3–6

Lix tenamit re li sumwank, a’an reechanihom li Qaawa’.

K’a’ru naraj naxye li wank jo’ “reechanihom” li Qaawa’? (Exodo 19:5). Li Awa’b’ej Russell M. Nelson kixch’olob’ k’a’ru naraj naxye li aatin a’an: “Sa’ li Najter Chaq’rab’, li aatin li jaltesinb’il ru jo’ eechanihom, a’an segullah sa’ li aatinob’aal Hebreo, li naraj naxye “nim xwankil,” malaj “b’ihomal.” … Jwal usaatinanb’ilo naq eechanihom nayehe’ qe xb’aaneb’ lix moos li Qaawa’ ” (“Los hijos del convenio,” Liahona, julio 1995, 38). K’a’ru naxb’aanu choq’ aawe li nawom naq rik’in xpaab’ankil laa sumwank, nakatwan jo’ “eechanihom”?

Chi’ilmanq ajwi’ Gerrit W. Gong, “Tz’aqonk sa’ li sumwank,” Jolomil ch’utub’aj-ib’ re octubre 2019.

Exodo 19:10–11, 17

Re xk’ulb’al li santilal, tento taqakawresi qib’.

Li Qaawa’ kixye re laj Moises naq eb’ li ralal xk’ajol laj Israel tento te’xkawresi rib’ re naq “toxe’xk’ul chaq li Dios” (Exodo 19:10–11, 17) ut te’ok sa’ sumwank rik’in (chi’ilmanq Exodo 19:5). K’a’ru nakab’aanu re xkawresinkil aawib’ chixk’ulb’al li santilal sa’ laa yu’am, jo’ li xik sa’ li santil ochoch malaj li tz’aqonk sa’ li loq’laj wa’ak? K’a’ru naru taab’aanu re xkawresinkil aawib’ chi tz’aqal choq’ reheb’ a’an? K’oxla xkomoneb’ chik li santil k’anjel li neke’xpatz’ li kawresink-ib’, ut k’oxla k’a’ru nakak’ul rik’ineb’ a’ yaal jo’ chanru lix kawresinkil aawib’.

Exodo 20

Aj uxtaan li Dios.

Naq nakawil Exodo 20, k’e reetal b’ar wan reheb’ li Lajeeb’ chi Taqlahom li nakapaab’ chi us, ut b’ar wan reheb’ li nakatmajelo’ wi’. Naru taasik’ ru jun taqlahom li taayal aaq’e chixyu’aminkil, ut taatz’il rix li taqlahom a’an sa’eb’ li loq’laj hu (chi’ilmanq li K’utul Raqal reheb’ li Loq’laj Hu malaj li aatin re li jolomil ch’utub’aj-ib’ (chi’ilmanq Eb’ li jolomil na’leb’ sa’ conference.ChurchofJesusChrist.org). Naq yookat chixtz’ilb’al rix, k’e reetaleb’ li osob’tesink li neke’chal rik’in xpaab’ankil li taqlahom a’an. Chan ru nak’utb’esiman li ruxtaan ut lix rahom li Dios choq’ aawe sa’eb’ li osob’tesink a’an?

Chi’ilmanq ajwi’ Carole M. Stephens, “Wi nikineera, teepaab’ lin chaq’rab’,” Jolomil ch’utub’aj-ib’ re octubre 2015.

Exodo 20:1–7

Aajel ru naq tink’e li Dios sa’ xb’een chixjunil sa’ inyu’am.

Rilb’al Exodo 20:1–7 maare tatxk’e chixk’oxla k’a’ru li aajel ru sa’ laa yu’am—maare taatz’iib’aheb’. K’a’ruheb’ li “dios” malaj li “yiib’anb’il jalam-uuch” (Exodo 20:3–4) li maare nakak’e sa’ xb’een li Dios? Chan ru naq xk’eeb’al li Qaawa’ sa’ xb’een chixjunil tatxtenq’a rik’in li k’a’ru aajel ru sa’ laa yu’am? K’a’ru taawaj xb’aanunkil re xjayalinkil laa yu’am rik’in laa Choxahil Yuwa’ ut rik’in li Jesukristo?

Chi’ilmanq ajwi’ Dallin H. Oaks, “No tendrás dioses ajenos,” Liahona, noviembre 2013, 72–75.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 18:8–12.Chan ru kitenq’aak laj Jetro xb’aan lix nawom xch’ool laj Moises chirix lix kolom li Dios? K’a’ruheb’ li xninqal ru k’a’aq re ru ak xb’aanu li Dios choq’ re li qajunkab’al? Ani aj-e taqaye resileb’? Chan ru taqak’uula li na’leb’ a’an choq’ reheb’ li qalal qak’ajol?

Exodo 18:13–26.Eb’ li raqal a’in maare tixtenq’a laa junkab’al chixk’oxlankil lix k’anjeleb’ lee jolominel sa’ li Iglees: li obiisp, eb’ laj jolominel reheb’ li saaj, malaj eb’ laj k’utunel sa’ li Tzoleb’aal reheb’ li Kok’al. Ma wan xk’anjeleb’ li anchal “q’axal kaw” (Exodo 18:18) choq’ re jun ajwi’ li kristiaan? K’a’ru naru taqab’aanu re xtenq’ankil sa’ xk’anjel?

Exodo 20:3–17.K’oxla chan ru tex’aatinaq chirixeb’ li Lajeeb’ chi Taqlahom sa’ laa junkab’al. Naru taatz’iib’aheb’ li taqlahom li wankeb’ sa’ Exodo 20:3–17 chiru lajeeb’ chi kok’ hu. Toja’ naq laa junkab’al tixtusub’eb’ sa’ wiib’ ch’uut: (1) roxloq’inkil li Dios ut (2) xraab’aleb’ li qas qiitz’in (chi’ilmanq ajwi’ Mateo 22:36–40). Naru teesik’ ru jun malaj wiib’ reheb’ li taqlahom wulaj wulaj chiru li xamaan a’in re teetz’il rix. Chan ru naq xpaab’ankil li taqlahom a’in naxkawob’resi li qajunkab’al? K’a’ru kixb’aanu li Kolonel re xpaab’ankil?

Exodo 20:12.Re xtawb’al ru Exodo 20:12, maare xb’een wa teetaw k’a’ru naraj naxye li aatin “oxloq’ink.” Toja’ naq jo’ junkab’al teetz’iib’a li k’a’ru naru taqab’aanu re roxloq’inkileb’ li qana’ qayuwa’. Naru teeb’icha jun li b’ich chirix roxloq’inkileb’ li qana’ qayuwa’, maare “Tikto tinb’aanu” (B’ichleb’aal choq’ reheb’ li Kok’al, 71), toja’ naq teeroksi li na’leb’ li xetz’iib’a re xtz’iib’ankil jun chik raqal re li b’ich.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Paab’eb’ li taqlahom,” B’ichleb’aal choq’ reheb’ li Kok’al, 68–69.

Xkawresinkil aawib’ chi tzolok

Taw jo’q’e naru tattzoloq. Wan naq us wi’chik xtzolb’aleb’ li loq’laj hu naq maa’ani taa’aatinanq aawe. K’oxla jo’q’e tattzoloq, ut k’e aach’ool chi tzolok sa’ li hoonal a’an wulaj wulaj.

Xjalam-uuch laj Moises rik’inb’ li Lajeeb’ chi Taqlahom, xb’aan laj Sam Lawlor