“11–17 abril. Li Paswa: “Tixsach chi junajwa xwankil li kamk,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)

“11–17 abril. Li Paswa,” Kim, Taaqehin—Choq’ reheb’ li komon ut li junkab’al: 2022

Jalam-uuch

isinb’il li pek chiru rokeb’aal li muqleb’aal

Xjalam-uuch li muqleb’aal yamyo xsa’, xb’aan li xMaryna Kriuchenko

11–17 abril

Li Paswa

“Tixsach chi junajwa xwankil li kamk”

Naq nakawil resil ut nakak’oxla lix tojb’al rix li maak xb’aan li Kolonel chiru li xamaan a’in, maare taatz’iib’a li nakak’oxla ut nakaweek’a chirix lix mayej sa’ laa diaro malaj sa’ li hu a’in.

Tz’iib’a li nakak’oxla

Lix yu’am li Jesukristo “naxe’enk re chixjunil lix wanjikeb’ li winq” (“Li Yo’yookil Kristo, Lix Ch’olob’ahomeb’ li Apostol,” ChurchofJesusChrist.org). K’a’ru naraj naxye a’an? Naraj naxye naq lix yu’am li Kolonel wan xwankil sa’ xb’een lix junelikil eechanihom chixjunileb’ li ak chalenaqeb’ malaj li toj te’chalq sa’ li ruchich’och’ a’in. Naru xyeeb’al naq lix yu’am ut lix k’anjel li Jesukristo, li kixtz’aqob’resi rib’ naq kiwakli chi yo’yo sa’ li xb’eenil domingo re li Paswa, naxjunaji chixjunileb’ li ralal xk’ajol chalen chaq xtiklajik: Eb’ li ke’yo’la naq maji’ nak’ulun li Kristo ke’royb’eni rik’in paab’aal (chi’ilmanq Jakob 4:4) ut eb’ li ke’yo’la chirix neke’ilok chi ixb’ej rik’in paab’aal. Naq naqileb’ li seraq’ ut li profeetil aatin sa’ li Najter Chaq’rab’, ink’a’ naqataw lix k’ab’a’ li Jesukristo, a’b’anan naqil reetalil lix paab’aaleb’ ut royb’enihomeb’ li najter aj paab’anel chirix li Mesias ut laj Tojol rixeb’. Chi jo’kan, laa’o li b’oqb’ilo chi ilok chi ixb’ej naru taqeek’a qakomonil rik’ineb’ li ke’ilok chi uub’ej. Relik chi yaal, li Jesukristo kiriiqani “li qamaak chiqajunilo” (Isaias 53:6; tiqb’il xkawil li aatin), ut “chixjunileb’ te’wanq wi’chik xyu’am sa’ xk’ab’a’ li Kristo” (1 Korintios 15:22; tiqb’il xkawil li aatin).

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Li Najter Chaq’rab’ naxch’olob’ xyaalal lix mayej li Kolonel re xtojb’al rix li maak.

K’iheb’ li raqal sa’ li Najter Chaq’rab’ li neke’xk’ut xyaalal lix k’anjel ut lix mayej li Kolonel. Arin wan junqaqeb’ li raqal a’an: Naq nakawileb’ ru li raqal a’in, k’a’ru naxk’ut li Musiq’ej chawu chirix li Kolonel?

Li Najter Chaq’rab’	Li Ak’ Chaq’rab’
Li Najter Chaq’rab’ Sakarias 9:9	Li Ak’ Chaq’rab’ Mateo 21:1–11
Li Najter Chaq’rab’ Sakarias 11:12–13	Li Ak’ Chaq’rab’ Mateo 26:14–16
Li Najter Chaq’rab’ Isaias 53:4	Li Ak’ Chaq’rab’ Mateo 8:16–17; 26:36–39
Li Najter Chaq’rab’ Isaias 53:7	Li Ak’ Chaq’rab’ Markos 14:60–61
Li Najter Chaq’rab’ Salmos 22:16	Li Ak’ Chaq’rab’ Jwan 19:17–18; 20:25–27
Li Najter Chaq’rab’ Salmos 22:18	Li Ak’ Chaq’rab’ Mateo 27:35
Li Najter Chaq’rab’ Salmos 69:21	Li Ak’ Chaq’rab’ Mateo 27:34, 48
Li Najter Chaq’rab’ Salmos 118:22	Li Ak’ Chaq’rab’ Mateo 21:42
Li Najter Chaq’rab’ Isaias 53:9, 12	Li Ak’ Chaq’rab’ Mateo 27:57–60; Markos 15:27–28
Li Najter Chaq’rab’ Isaias 25:8	Li Ak’ Chaq’rab’ Markos 16:1–6; Lukas 24:6
Li Najter Chaq’rab’ Daniel 12:2	Li Ak’ Chaq’rab’ Mateo 27:52–53

Saqen wi’chik ru li profeetil aatin ut li na’leb’ chirix li Kolonel sa’ lix Hu laj Mormon. K’oxla chan ru naq kawob’resinb’il laa paab’aal xb’aaneb’ li raqal jo’eb’ a’in: 1 Nefi 11:31–33; 2 Nefi 25:13; Mosiah 3:2–11.

Naru tintaw tuqtuukilal ut sahil ch’oolejil rik’in lix tojb’al rix li maak xb’aan li Kolonel.

Chalen chaq xtiklajik, sa’ xk’ab’a’ lix mayej re xtojb’al rix li qamaak, li Jesukristo naxyeechi’i tuqtuukilal ut sahil ch’oolejil re chixjunileb’ li te’chalq rik’in (chi’ilmanq Moises 5:9–12). Naru taawileb’ li raqal a’in sa’ li loq’laj hu li neke’xch’olob’ xyaalal li tuqtuukilal ut li sahil ch’oolejil li yeechi’inb’il xb’aan, ut sa’ rilb’aleb’, k’oxla chan ru taak’ul li tuqtuukilal ut li sahil ch’oolejil li naxk’e li Jesukristo: Salmos 16:8–11; 30:2–5; Isaias 12; 25:8–9; 40:28–31; Jwan 14:27; 16:33; Alma 26:11–22.

Chi’ilmanq ajwi’ Dallin H. Oaks, “K’eeb’il qametz’ew xb’aan lix tojb’al rix li maak xb’aan li Jesukristo,” Jolomil ch’utub’aj-ib’ re octubre 2015; Sharon Eubank, “Li Kristo: Li saqen li nalemtz’un sa’ q’ojyin,” Jolomil ch’utub’aj-ib’ re abril 2019; “Sachso ninkana,” Eb’ li B’ich, 118.

Xnimal ru kutan Golgota, xb’aan laj J. Kirk Richards

Sa’ xk’ab’a lix tojb’al rix li qamaak, li Jesukristo wan xwankil re intenq’ankil chi numtaak sa’ xb’een li maak, li kamk, li yale’k-ix, ut li majelal.

Sa’eb’ li loq’laj hu, eb’ li profeet neke’xch’olob’ xyaalal lix wankilal li Jesukristo chiqakolb’al chiru li maak ut li kamk, ut chiqatenq’ankil re toonumtaaq sa’ xb’een li qach’a’ajkilal ut li qamajelal. K’a’ru ak xb’aanuhom li Jesukristo sa’ laa yu’am? K’a’ut naq nim xwankil li Jesukristo sa’ laa yu’am? K’oxlaheb’ li patz’om a’in naq nakawileb’ li raqal a’in, ut tz’iib’a li nakak’oxla ut li nakaweek’a chirix li Kolonel:

Chi’ilmanq ajwi’ Walter F. González, “Lix toch’om li Kolonel,” Jolomil ch’utub’aj-ib’ re octubre 2019.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 12:1–28.Sa’ xninq’ehinkil li Paswa, naru tex’aatinaq chirix li xetzol sa’ junkab’al chirix li Paswa sa’ xtiklajik li po a’in. K’a’ut naq nim xwankil naq lix mayej li Kolonel kik’ulman sa’ xq’ehil li Paswa?

Re xtzolb’al k’a’ru ki’uxman sa’ xraqikeb’ xkutankil xyu’am li Kolonel, chi’ilmanq “La Semana Santa” sa’ https://www.veniracristo.org/pascua/. Re xtawb’aleb’ li raqal re li loq’laj hu chirix k’a’ru ki’uxman sa’ xraqikeb’ xkutankil xyu’am li Kolonel, chi’ilmanq “Xjunajileb’ li Kaahib’ chi Evangelio” sa’ li K’utul Raqal reheb’ li Loq’laj Hu.

Isaias 53.Rilb’al li profeetil aatin chirix li Jesukristo sa’ Isaias 53 naru tixtenq’a laa junkab’al chixtawb’al ru lix mayej li Kolonel re xtojb’al rix li qamaak. B’ar wankeb’ li raqal li neke’xtoch’ xch’ool laa junkab’al? Sa’ junkab’al, naru teewotz lix nawom eech’ool chirix lix tojb’al rix li maak xb’aan li Kolonel.

“Testigos especiales de Cristo.”Sa’ li aplicacion Biblioteca del Evangelio ut sa’ ChurchofJesusChrist.org wankeb’ li video, “Testigos especiales de Cristo” xk’ab’a’eb’, b’ar wi’ eb’ li komon sa’ li Xb’eenil Awa’b’ejil ut lix Molameb’ li Kab’laju chi Apostol neke’xch’olob’ xyaalal li Jesukristo. Jo’ junkab’al, naru teerileb’ li video a’in ut tex’aatinaq chirix li na’leb’ neketzol chirix li Jesukristo rik’in xtz’uumaleb’ re lix moos sik’b’ileb’ ru. Jo’ junkab’al, yehomaq chan ru teewotz lix nawom eech’ool chirix li Kristo. Maare teeb’oq lee ramiiw chi wulak sa’ iglees sa’ li domingo a’in re li Paswa.

Eb’ li loq’laj b’ich.Jwal nim xwankil li b’ichank re xjultikankil li Kolonel ut xb’oqb’al li Musiq’ej sa’ li qochoch. Sa’ junkab’al, naru teewotz malaj teeb’icha li b’ich chirix li Paswa malaj li Jesukristo, maare “Kristo anajwan xwakli” (Eb’ li B’ich, 122) malaj “Ma yaal naq li Jesus xwakli?” (B’ichleb’aal choq’ reheb’ li Kok’al, 45). Re xtawb’al xkomoneb’ chik li b’ich ut b’ich reheb’ li kok’al, sik’eb’ sa’ li tusleb’aal na’leb’ sa’ Eb’ li B’ich ut B’ichleb’aal choq’ reheb’ li Kok’al.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ma yaal naq li Jesus xwakli?” B’ichleb’aal choq’ reheb’ li Kok’al, 45.

Xkawresinkil qib’ jo’ aj k’utunel

Yu’ami lix evangelio li Jesukristo. “Re k’utuk jo’ chanru li Kristo [sa’ laa wochoch], li q’axal aajel ru a’an … xyu’aminkil li evangelio chi anchal aach’ool. … A’an a’in li tz’aqal b’e re taaruuq taawanq aawik’in li Santil Musiq’ej. Moko aajel ta ru naq tz’aqalaq aawe aawu, yal tento xyalb’al aaq’e chi yaal—ut xsik’b’al lix kuyb’al laa maak rik’in lix tojb’al rix li maak xb’aan li Kolonel wi nakattichk’ok” (Li k’utuk jo’ li Kolonel, 13).