laj Moises, laj Aaron, ut laj Farahon

Xjalam-uuch laj Moises ut laj Aaron sa’ rochochil laj Farahon, xb’aan laj Robert T. Barrett

28 marzo–3 abril

Exodo 7–13

“Chijultiko’q eere li kutan a’in, li kex’el wi’ chaq sa’ Egipto”

Naq nakawil ut nakak’oxla li na’leb’ sa’ Exodo 7–13, tz’iib’a li na’leb’ nachal sa’ laa k’a’uxl. Sa’ xb’aanunkil a’in chi kok’ aj xsa’, jwal taawab’i wi’chik lix hasb’ li Santil Musiq’ej.

Tz’iib’a li nakak’oxla

Yoo chi tamk li rahilal sa’ Egipto, a’b’an laj Farahon toj ink’a’ kiraj rach’ab’ankileb’ laj Israelita. A’ut li Dios ink’a’ kixkanab’ xk’utb’al lix wankilal ut xq’unb’esinkil xch’ool laj Farahon “naq laa’in li Qaawa’ ” ut “maajun wank sa’ ruchich’och’ kama’ laa’in” (Exodo 7:5; 9:14). Laj Moises ut eb’ laj Israelita ke’ril lix k’utb’esinkil lix wankilal li Dios sa’ xk’ab’a’eb’ chi sachsookeb’ xch’ool. Relik chi yaal naq eb’ li eetalil a’in ke’xk’ut xyaalal lix paab’aaleb’ chirix li Dios ut kixkawob’resiheb’ xch’ool chixtaaqenkil lix profeet li Dios. Ak numenaqeb’ b’eleeb’ li ninqi rahilal ut maji’ ach’ab’anb’ileb’ laj Israelita, a’b’an li xlaje rahilal—lix kamikeb’ li xb’een yo’lajenaqeb’, jo’ ajwi’ li xb’een ralal laj Farahon—a’an kixk’e xraqik lix preexileb’. Maare kik’ulman chi jo’kan jo’ reetalil naq wanko sa’ musiq’ejil preexil, wan jun ajwi’ li b’e naru too’eeleliq wi’. Maak’a’ naxye k’a’ru ak xqayal xb’aanunkil, juntaq’eet li wanko wi’ rik’in li ke’wan wi’ li ralal xk’ajol laj Israel. Ka’ajwi’ lix mayej li Jesukristo, li Xb’een Yo’lajenaq—lix kik’el li Karneer li maak’a’ xmaak—naru tooxkol.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Exodus 7–11

Naru ninsik’ xq’unob’resinkil li waam.

Maare maajun wa taatz’eqtaana li rajom li Dios jo’ kixb’aanu laj Farahon. A’b’an, wan naq moko q’un ta li qaam jo’ tento raj taawanq, jo’kan naq wan li na’leb’ li naru naqatzol rik’in li kixb’aanu laj Farahon sa’ Exodo 7–10. Naq nakawil resileb’ li ninqi rahilal sa’eb’ li ch’ol a’in, k’a’ru nakak’oxla chirix li kixb’aanu laj Farahon? Ma nakak’e reetal naq nakawu ajwi’ aawaam chi jo’q’ehaq? K’oxla li na’leb’ nakatzol sa’eb’ li ch’ol a’in chirix xq’unal li aamej.

K’e reetal naq lix jaltesinkil ru Exodo 7:3, 13; 9:12; 10:1, 20, 27; 11:10 xb’aan laj Jose Smith naxye naq maawa’ li Qaawa’ li kikawob’resink re li raam laj Farahon—a’an junes laj Farahon li kikawob’resink re.

K’a’ru nakatzol sa’eb’ li raqal a’in chirix xq’unob’resinkil laa waam? 1 Nefi 2:16; Mosiah 3:19; Alma 24:7–8; 62:41; Eter 12:27.

Chi’ilmanq ajwi’ Michael T. Ringwood, “Inclinación y disposición a creer,” Liahona, noviembre 2009, 100–102.

Exodo 12:1–42

Li Paswa nareetali lix tojb’al rix li maak xb’aan li Jesukristo.

Re te’kole’q laj Israelita chiru li xlaje rahilal, li yeeb’il resil sa’ Exodo 11:4–5, ki’ajman naq te’xtaaqe chi tz’aqal li na’leb’ li kixk’e li Qaawa’ re laj Moises sa’ Exodo 12, a’ jun santil k’anjel li nawb’il ru jo’ li Paswa. Chi eetalinb’il, li Paswa naxk’ut chiqu naq jo’ li Qaawa’ kixkoleb’ laj Israelita chiru li moosil aran Egipto, a’an naru ajwi’ tooxkol chiru xmoosil li maak. K’a’ru nakawil sa’ li na’leb’ ut eb’ li eetalil re li Paswa li nakatxk’e chixk’oxla li Jesukristo ut lix tojb’al rix li maak? K’a’ru neke’xk’ut li na’leb’ ut li eetalil a’in chirix xk’ulb’al li usilal li wan sa’ lix tojb’al rix li maak? K’a’ru nareetali lix k’eeb’al li kik’el chiru roqechal li okeb’aal?(raqal 7). K’a’ru naraj naxye “wanq eexaab’ cheroq ut wanq eexuq’ sa’ eeruq’ ”? (raqal 11).

Chi’ilmanq ajwi’ Tzol’leb’ ut Sumwank 89:21.

eb’ li kristiaan neke’xk’ul li loq’laj wa’ak

Li loq’laj wa’ak nokoxtenq’a chixk’oxlankil aj Kolol qe, li Jesukristo.

Exodo 12:14–17, 24–27; 13:1–16

Li loq’laj wa’ak nikinixtenq’a chixk’oxlankil inkolb’al xb’aan li Jesukristo.

Li Kolonel kiraj naq junelik taajultiko’q reheb’ laj Israelita naq a’an kikolok reheb’, toj sa’ ajwi’ li kutan naq ink’a’ chik jultik reheb’ li preexil ke’wan wi’. Jo’kan naq kixtaqlaheb’ chiroxloq’inkil li Paswa chi hab’. Naq nakawil li kixye sa’ Exodo 12:14–17, 24–27; 13:1–16, k’oxla li k’a’ru yookat chixb’aanunkil re naq jultikaq aawe laa wosob’tesinkil xb’aan li Dios. Chan ru taak’uula li jultikahom a’an choq’ reheb’ laa walal aak’ajol? (chi’ilmanq Exodo 12:14, 26–27).

K’a’ru nakawil rik’in li ninq’e re li Paswa li chanchan li loq’laj wa’ak? K’a’ru nakawil chirix li Paswa li nakatxk’e chixk’oxla li loq’laj wa’ak ut chixk’e reetal naq nim xwankil? K’oxla k’a’ru taab’aanu re naq “junelik taajultiko’q” li Jesukristo aawe (Moroni 4:3; 5:2; chi’ilmanq ajwi’ Lukas 22:7–8, 19–20).

Naru taak’oxla ajwi’ xkomon chik li na’leb’ li naraj li Qaawa’ naq taajultiko’q aawe; chi’ilmanq, Helaman 5:6–12; Moroni 10:3; Tzol’leb’ ut Sumwank 3:3–5, 10; 18:10; 52:40.

Chi’ilmanq ajwi’ Jwan 6:54; “Recordarle siempre” (video), ChurchofJesusChrist.org; “El sacramento de la Cena del Señor,” sa’ Enseñanzas de los Presidentes de la Iglesia: Howard W. Hunter (2015), 207–216.

family study icon

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 7–12.Chirix rilb’al resileb’ li rahilal li kixtaqla li Qaawa’ sa’ xyanqeb’ laj Egipto re xk’utb’esinkil lix wankilal, sa’ junkab’al naru teeye chan ru naq li Qaawa’ naxk’utb’esi lix wankilal sa’ li kutankil a’in.

Exodo 8:28, 32; 9:27–28, 34–35.Eb’ li raqal a’in naru texxtenq’a chi aatinak chirix junelik xb’aanunkil li naqayeechi’i xb’aanunkil. Sa’ junkab’al, naru tex’aatinaq chirixeb’ li kristiaan nekenaw ru li xe’xb’aanu li k’a’ru xe’xye naq te’xb’aanu.

Exodo 12:1–42.Chirix rilb’al Exodo 12:1–42, naru teetz’iib’a chiru kok’ hu li k’a’ru teeb’aanu jo’ junkab’al re xk’oxlankil rajlal lix tojb’al rix li maaak xb’aan li Jesukristo. Lix kik’el li karneer li kik’eeman chiru li roqechal li okeb’aal (chi’ilmanq li raqal 23) kireetali li Kolonel, jo’kan naq naru teek’e li kok’ hu a’in chiru roqechal jun okeb’aal sa’ lee rochoch. Naru teeyal li tzakemq re li Paswa, jo’ li wa ink’a’ yuub’il (li galleet malaj li wa) ut li k’ahil ichaj (li perejil malaj li kaqxe’), ut teetz’il rix chan ru naq li Paswa nokoxtenq’a chi jultiko’k qe naq li Dios kixkoleb’ lix tenamit. Li wa ink’a’ yuub’il kixjultika reheb’ naq ink’a’ ke’ru chiroyb’eninkil naq taasiipooq lix waheb’ sa’ reelelikeb’. Li k’ahil ichaj kixjultika reheb’ lix k’ahil li preexil ke’wan wi’.

Exodo 12:14, 24–27.Naru teerileb’ li raqal a’in jo’ junkab’al naq maji’ nekek’ul wi’chik li loq’laj wa’ak. K’a’ru neke’xye li raqal a’in chirix li loq’laj wa’ak? K’a’ru taqab’aanu re naq sa’ xk’ulb’al li loq’laj wa’ak, taajultiko’q qe chixjunil li kixb’aanu li Kolonel choq’ qe?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Re xkʼoxlankil li Kʼajolbʼej,” Eb’ li B’ich, 115.

Xkawresinkil qib’ jo’ aj k’utunel

K’ut li k’anjeleb’aal. Patz’ re laa junkab’al naq te’xxok li k’a’aq re ru natenq’ank reheb’ chixtawb’al ru li na’leb’ nekeril sa’ li loq’laj hu. Maare li k’a’aq re ru q’un ut kaw naru tixtenq’a laa junkab’al chi aatinak chirix xq’unal ut xkawil li aamej.

jun junkab’al aj Hebreo rik’in li tzakemq re li Paswa

Xjalam-uuch li ninq’e re li Paswa, xb’aan laj Brian Call