“21–27 marzo. Exodo 1–6: “Jultik we insumwank,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)

“21–27 marzo. Exodo 1–6,” Kim, Taaqehin—Choq’ reheb’ li komon ut li junkab’al: 2022

Jalam-uuch

laj Moises ut li toon chi k’ix li naxamnak

Laj Moises ut li toon chi k’ix li naxamnak, xb’aan laj Harry Anderson

21–27 marzo

Exodo 1–6

“Jultik we insumwank”

Naq nakatikib’ li tzolok, tz’aama naq taataw li na’leb’ sa’ Exodo 1–6 li tatxtenq’a sa’ laa yu’am ut sa’ laa k’anjel sa’ li rawa’b’ejihom li Dios.

Tz’iib’a li nakak’oxla

Kikole’ xjunkab’al laj Jakob xb’aan xb’oqb’aleb’ chi xik sa’ Egipto. A’b’an chirix xnumik k’iila cient chihab’, eb’ li ralal xk’ajol ke’k’ehe’ choq’ loq’b’il moos ut ke’rahob’tesiik xb’aan jun laj Farahon “li maak’a’ naxnaw chirix laj Jose” (Exodo 1:8). Xb’aan a’in, maare ke’ok laj Israelita chixpatz’b’al k’a’ut naq li Dios kixkanabeb’ chi jo’kan, a’ lix tenamit re li sumwank. Ma toj jultik re li sumwank li kixk’uub’ rik’ineb’? Ma toj k’eeb’ileb’ sa’ ajl sa’ li tenamit re li sumwank? Ma naxk’e reetal naq rahob’tesinb’ileb’?

Maare wan naq nakapatz’ ajwi’ a’in. Maare nakapatz’, ma naxnaw li Dios li k’a’ru yookin chixnumsinkil sa’ inyu’am? Ma narab’i intz’aam? Li seraq’ sa’ Exodo chirix lix kolb’al laj Israel chiruheb’ laj Egipto naxsumeheb’ li patz’om a’in chi saqen ru: ink’a’ nasach lix tenamit li Dios sa’ xch’ool. Jultik re lix sumwank qik’in ut tixtz’aqob’resi ru sa’ li kutan tixk’oxla a’an ut jo’ chanru tixk’oxla a’an (chi’ilmanq Tzol’leb’ ut Sumwank 88:68). “Texinkol rik’in xnimal inwankil,” chan. “Laa’inin li Qaawa’ lee Dios li texwisi sa’ ruq’eb’ laj Egipto” (Exodo 6:6–7).

Ch’olob’anb’il k’a’ru wan sa’ li hu Exodo sa’ “Exodo” sa’ li K’utul Raqal reheb’ li Loq’laj Hu.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Exodo 1–2

Li Jesukristo a’an aj Kolol we.

Jun na’leb’ li nim xwankil sa’ li hu Exodo, a’an naq li Dios wan xwankil chirach’ab’ankil lix tenamit chiru li preexil. Li preexil li ke’wan wi’ laj Israelita sa’ Exodo 1, a’an reetalil li preexil wanko wi’ xb’aan li maak ut li kamk (chi’ilmanq 2 Nefi 2:26–27; 9:10; Alma 36:28). Ut laj Moises, aj kolol reheb’ laj Israelita, a’an reetalil ut xmuhil li Jesukristo (chi’ilmanq Deuteronomio 18:18–19; 1 Nefi 22:20–21). K’oxla li na’leb’ a’in naq nakawil Exodo 1–2 Maare taak’e reetal naq laj Moises jo’ ajwi’ li Jesus ke’kole’ chiru li kamk naq toj ka’ch’ineb’ xyu’am (chi’ilmanq Exodo 1:22–2:10; Mateo 2:13–16) ut naq ke’wan sa’ li yamyookil ch’och’ naq toj maji’ neke’ok sa’ xk’anjeleb’ (chi’ilmanq Exodo 2:15–22; Mateo 4:1–2). K’a’ chik ru nakatzol sa’ Exodo chirix li preexil sa’ musiq’ej? chirix lix kolom li Kolonel?

Chi’ilmanq ajwi’ D. Todd Christofferson, “Redención,” Liahona, mayo 2013, 109–112.

Laj Moises sa’ li kaxlan aj, © Providence Collection/licensed from goodsalt.com

Exodo 3–4

Li Dios naxk’e xwankilal li ani naxb’oq chixb’aanunkil lix k’anjel.

Sa’ li kutan a’in naqanaw naq nimla profeet ut aj jolominel laj Moises. A’b’an laj Moises ink’a’ naxk’oxla chi jo’kan naq kib’oqe’ xb’aan li Qaawa’. “Anihin laa’in,” chan laj Moises, “re naq tinxik rik’in laj Farahon?” (Exodo 3:11). A’b’an li Qaawa kixnaw ani laj Moises—ut chan ru toj taawanq. Naq nakawil Exodo 3–4, k’e reetal chan ru naq li Qaawa’ kixwaklesi xch’ool laj Moises ut kixtuqub’ xk’a’uxl. K’a’ru nakawil sa’eb’ li ch’ol a’in li naru tatxtenq’a naq naka’ch’ino’ aach’ool? Chan ru naq li Qaawa’ naxnimob’resi xwankilaleb’ lix moos re naq te’xb’aanu li rajom? (chi’ilmanq Moises 1:1–10, 24–39; 6:31–39, 47). Ma aawilom li Dios chixb’aanunkil lix k’anjel aawik’in malaj rik’ineb’ laa was aawiitz’in?

Re xtzolb’al xkomon chik li na’leb’ chirix lix yu’am ut lix k’anjel laj Moises, chi’ilmanq “Moises” sa’ li K’utul Raqal reheb’ li Loq’laj Hu.

Exodo 5–6

Li rajom li Qaawa’ taatz’aqloq ru sa’ li kutan k’oxlanb’il xb’aan.

Laj Moises kixaqli chi kaw xch’ool chiru laj Farahon, jo’ taqlanb’il xb’aan li Dios, ut kixye re naq taarach’ab’eb’ laj Israelita, a’b’an laj Farahon ink’a’ kiraj xb’aanunkil. Kixnimob’resi b’an li aalal iiq li wan sa’ xb’eeneb’. Maare laj Moises ut eb’ laj Israelita ke’xpatz’ k’a’ut naq toj neke’kana sa’ preexil, us ta laj Moises yoo chixb’aanunkil li taqlanb’il xb’aan li Dios (chi’ilmanq Exodo 5:22–23).

Ma xaweek’a jun sutaq naq xab’aanu li rajom li Dios, a’b’an ink’a’ x’el chi chaab’il? Il Exodo 6:1–8, ut k’e reetal li kixye li Qaawa’ re xtenq’ankil laj Moises chi kuyuk. Chan ru nakatxtenq’a li Qaawa’ chixb’aanunkil li rajom?

Exodo 6:3

Ani li Jehova?

Jehova, a’an jun reheb’ lix k’ab’a’ li Jesukristo naq toj maji’ nachal sa’ ruchich’och’. Lix jaltesinkil ru Exodo 6:3 xb’aan laj Jose Smith naxye naq eb’ li profeet aj Abraham, aj Isaak, ut aj Jakob ke’xnaw ru li Qaawa’ jo’ Jehova. Naq naqil li aatin “li Qaawa’ ” sa’ li Najter Chaq’rab’, kok’ aj sa’, a’an li Jehova. Sa’ Exodo 3:13–15, li k’ab’a’ej “LAA’ININ” na’aatinak ajwi’ chirix li Jehova (chi’ilmanq ajwi’ Tzol’leb’ ut Sumwank 38:1; 39:1).

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 1–2.Ke’wan li ixq k’a’jo’ xnimaleb’ ru sa’ lix k’anjel li Dios chixwaklesinkil jun aj kolol reheb’ laj Israelita. Jo’ junkab’al, naru teeril li seraq’ chirix li xSifra ut li xPuha (Exodo 1:15–20); li xJochebed ut li xMiriam, lix na’ ut li ranab’ laj Moises (Exodo 2:2–9; Numeros 26:59); lix rab’in laj Farahon (Exodo 2:5–6, 10); ut li xSefora, li rixaqil laj Moises(Exodo 2:16–21). K’a’ru ke’xb’aanu li ixq a’in re xtiikisinkil chi uub’ej lix k’anjel li Dios? Ma naru naqil reetalil lix k’anjel li Kristo sa’ li ke’xnumsi? Naru ajwi’ taach’utub’ xjalam-uucheb’ li ixq sa’ lee junkab’al ut taawotz’ xseraq’eb’. Chan ru ak xoo’osob’tesiik xb’aaneb’ li tiikil ixq? Li raatin li Awa’b’ej Russell M. Nelson “Jun tz’aamahom reheb’ li ixq” (Jolomil ch’utub’aj-ib’ re octubre 2015) naru texxtenq’a sa’ li seraq’ a’in.

Exodo 3:1–6.Naq laj Moises kinach’ok rik’in li toon k’ix naxamnak, li Qaawa’ kixye re naq taarisi lix xaab’ re xk’utb’al li oxloq’. Chan ru taqak’ut li oxloq’ sa’eb’ li santil na’ajej? K’a’ru naru taqab’aanu re xk’uub’ankil li qochoch choq’ santil na’ajej, b’ar wi’ taakanaaq lix Musiq’ li Qaawa’? Chan ru taqak’ut li oxloq’ sa’ xkomoneb’ chik li santil na’ajej?

Exodo 4:1–9.Li Qaawa’ kixk’e xwankil laj Moises chixb’aanunkil oxib’ li sachb’a-ch’oolej jo’ reetalil chiruheb’ li ralal xk’ajol laj Israelita naq taqlanb’il xb’aan li Qaawa’. K’a’ru neke’xk’ut li eetalil a’in chiqu chirix li Jesukristo?

Exodo 5:2.K’a’ru naraj naxye naq “naqanaw ru” li Qaawa’? Chan ru taqanaw ru? (chi’ilmanq Alma 22:15–18). Chan ru naq xnawb’al ru naxkawob’resi li rajom qach’ool chi ab’ink chiru? (chi’ilmanq ajwi’ Jwan 17:3; Mosiah 5:13).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li oxloq’ink,” B’ichleb’aal choq’ reheb’ li Kok’al, 12.

Xkawresinkil qib’ chi tzolok

Tz’iib’a li nakatzol sa’ jun li diario. Maare us xtz’iib’ankil sa’ junaq laa diario eb’ li k’oxlahom, na’leb’, patz’om, malaj musiq’anb’il na’leb’ nachal sa’ laa k’a’uxl naq yookat chi tzolok.