Na’leb’ re xk’oxlankil

Lix junkabʼal laj Israel

Sa’ li yamyookil ch’och’ li wan sa’ rokeb’aal li saq’e rik’in Kanahan, laj Jakob kiroyb’eni rilb’al wi’chik laj Esau, lix lut. 20 chihab’ chaq naq ke’ril rib’ laj Jakob ut laj Esau, laj Esau kixyeechi’i xkamsinkil. Chiru chixjunil li q’ojyin, laj Jakob kiwan sa’ yalok-u chiru li Dios re xtz’aamankil naq taa’osob’tesiiq. Xb’aan lix paab’aal, lix kuyum, ut xkawilal xch’ool laj Jakob, li Dios kixsume lix tz’aam. Sa’ li q’ojyin a’an, laj Jakob kixk’ul Israel choq’ xk’ab’a’, jun k’ab’a’ej li naraj naxye “a’an nakana rik’in li Dios” (Genesis 32:28; chi’ilmanq ajwi’ Genesis 32:24–32).¹

Chixk’atq li nima’ Jabok, laj Jakob kixk’ul Israel choq’ xk’ab’a’.

A’in li xb’een sut natawman li k’ab’a’ej Israel sa’ li Santil Hu, ut nakana li k’ab’a’ej a’an toj sa’ xraqik li hu ut toj sa’ li kutankil a’in. Moqon ki’oksiman li k’ab’a’ej choq’ re naab’al li tenamit. Kiwan kab’laju li ralal laj Israel, ut eb’ li ralal xk’ajol nawb’ileb’ ru jo’ “xjunkab’al laj Israel, “xteepal laj Israel,” “li ralal xk’ajol laj Israel,” ut “eb’ aj Israelita.”

Chalen chaq junxil, k’a’jo’ xnimal lix yaalalil choq’ reheb’ li ralal xk’ajol laj Israel naq a’aneb’ ralal xk’ajol li kab’laju xteepal laj Israel. Choq’ reheb’, nim xwankil lix xe’toonileb’ sa’ li sumwank ke’wan wi’. Li apostol aj Pablo kixye naq a’an wan “sa’ xteepal laj Benjamin” (Romanos 11:1). Laj Lehi kixtaqlaheb’ li ralal chixtawb’aleb’ li perel ch’iich’ bronce, xb’aan naq chiruheb’ li perel ch’iich’ a’an wan “jun resilal lix xe’toonileb’ lix yuwa’ ” (1 Nefi 5:14; chi’ilmanq ajwi’ 1 Nefi 3:3). Laj Lehi kixk’e reetal naq a’an ralal xk’ajol laj Jose, ut li nawom naq okenaqeb’ sa’ xjunkab’al laj Israel kixtenq’aheb’ li ralal xk’ajol laj Lehi chiru k’iila chihab’ (chi’ilmanq Alma 26:36; 3 Nefi 20:25).

Sa’ li Iglees anajwan, maare nakawab’i resil Israel chi jo’ka’in: “lix ch’utub’ankil Israel.” Naqab’icha “At xDios Israel, “Xyo’onihom laj Israel, ut “Ex xb’eenil aj Israel.”² Aran, ink’a’ yooko chi aatinak malaj b’ichank chirix li najter awa’b’ejihom Israel chi moko li tenamit Israel re li kutan a’in. Yooko b’an chi aatinak chirix li ani ch’utub’anb’il chaq sa’ xtenamitul li ruchich’och’ toj sa’ lix Iglees li Jesukristo. Yooko chi aatinak chirix li ani nakana rik’in li Dios, li anchal xch’ool naxsik’ ru li rosob’tesihom a’an, ut li nakub’e xha’ ut na’ok sa’ lix tenamit li Dios re li sumwank.

Laa wosob’tesinkil xb’aan li yuwa’b’ejil aj k’anjel naxye naq laa’at okenaqat sa’ jun reheb’ lix teepal laj Israel. K’a’jo’ xchaab’ilal li na’leb’ a’in. Li wank sa’ lix junkab’al laj Israel naraj naxye naq okenaqat sa’ sumwank rik’in li qaChoxahil Yuwa’ ut li Jesukristo. Naraj naxye naq, jo’ laj Abraham, laa’at “tatwanq choq’ osob’tesink” chiruheb’ li ralal xk’ajol li Dios (Genesis 12:2; Abraham 2:9–11). Jo’ kixye laj Pedro, naraj naxye naq “laa’ex sik’b’il eeru choq’ loq’laj iyaj, laa’ex aj tij sa’ xk’anjel li nimajwal Rey, santil tenamitex; laa’ex jun tenamit b’oqb’il chi ok sa’ li reechanihom li Dios re naq teepuktesi li xninqal ru xb’aanuhom li kib’oqok chaq eere chixkanab’ankil li aak’ab’ re ok sa’ li xchaq’alil ru saqenk” (1 Pedro 2:9). Naraj naxye naq laa’at “nakatkana rik’in li Dios” naq nakapaab’ laa sumwank rik’in a’an.

Eb’ li raqalil

1. Wankeb’ xkomon chik lix yaalalil li k’ab’a’ej Israel, jo’ “li Dios nataqlan” malaj “li Dios napleetik malaj nakana.”

2. Eb’ li B’ich, 5, 167, ut 203.

Xjalam-uuch lix junkab’al laj Jakob chiru li toon che’, xb’aan laj Keith L. Beavers