Xjalam-uuch li xRebeka, xb’aan li xDilleen Marsh

21–27 febrero

Genesis 24–27

Xk’ojob’ankil wi’chik li sumwank

Naq nakawil Genesis 24–27, k’e reetal li na’leb’ naxk’e li Musiq’ej sa’ laa k’a’uxl. Patz’ rik’in tijok naq taanaw k’a’ru aj-e li na’leb’ a’an sa’ laa yu’am.

Tz’iib’a li nakak’oxla

Lix sumwank li Dios rik’in laj Abraham naxye naq sa’ xk’ab’a’ laj Abraham ut eb’ li ralal xk’ajol, “te’osob’tesimanq chixjunil li junkab’al re li ruchich’och’ ” (Abraham 2:11). Ink’a’ kitz’aqlok ru li yeechi’ihom a’an sa’ junpaat; relik chi yaal, chixjunil li Santil Hu, a’an resil lix tz’aqlojikeb’ ru lix yeechi’ihom li Dios. Li Dios kirak’ob’resi li sumwank a’an rik’in lix junkab’al laj Isaak ut li xRebeka. Rik’in li ke’xk’ul, laa’o naqataw qana’leb’ chirix li tz’aqonk sa’ li sumwank a’an. Rik’in lix b’aanuhomeb’, naqak’e reetal li chaab’il ch’oolej, li kuyuk, ut li paab’ank chirixeb’ li osob’tesink naxyeechi’i li Dios. Naqataw ajwi’ naq jwal us xkanab’ankil li “juyb’il tzakemq” re li ruchich’och’ (Genesis 25:30) re naq taqak’uleb’ li osob’tesink naraj li Dios xk’eeb’al qe ut reheb’ li qalal qak’ajol.

Li na’leb’ re xtzolb’aleb’ li loq’laj hu aajunes

Genesis 24

Li sumlaak q’axal aajel ru sa’ lix junelikil k’uub’anb’il na’leb’ li Dios.

Sa’ li kutankil a’in, wankeb’ li ink’a’ neke’xk’oxla li sumlaak, malaj li neke’xye naq moko sa ta. Maawa’ a’an lix na’leb’ laj Abraham—choq’ re a’an, jwal aajel ru naq taasumlaaq laj Isaak, li ralal. K’a’ut naq aajel ru choq’ re? Naq nakawil Genesis 24, k’oxla li sumlaak ut k’a’ut naq aajel ru sa’ lix k’uub’anb’il na’leb’ li Dios re li kolb’a-ib’. Naru ajwi’ taawil li raatin li Elder D. Todd Christofferson “K’a’ru aj-e li sumlaak, k’a’ru aj-e li junkab’al” (Jolomil ch’utub’aj-ib’ re abril 2015) ut taak’oxla k’a’ut naq “jun li junkab’al li xaqxo sa’ xsumlajik jun li winq ut jun li ixq, a’an li na’ajej b’ar wi’ lix na’leb’ li Dios na’usaak.”

Eb’ li patz’om a’in maare tate’xtenq’a chixk’oxlankil xkomoneb’ chik li na’leb’ sa’ li ch’ol a’in:

Genesis 24:1–14. K’a’ru kixb’aanu laj Abraham ut lix moos re naq li Dios tixtenq’aheb’ chixtawb’al li rixaqil laj Isaak?

Genesis 24:15–28, 55–60. K’a’ru li chaab’ilal li wan rik’in li xRebeka li taawaj xyu’aminkil?

K’a’ chik li na’leb’ nakataw?

Chi’ilmanq ajwi’ Tzol’leb’ ut Sumwank 131:1–4; “Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org.

Genesis 25:29–34

Naru ninsik’ ru xsahob’resinkil inch’ool anajwan anajwan, malaj li k’a’ru q’axal wi’chik nim xloq’al.

Sa’ xkutankil laj Abraham, li xb’een yo’lajenaq sa’ li junkab’al kixk’ul xk’ulub’il chi jolomink ut chi eechanink, a’an li xb’eenil alalb’ejil nayeeman re. Nim wi’chik li reechanihom li alalb’ej a’an rik’in xna’ xyuwa’, ut teneb’anb’il ajwi’ sa’ xb’een a’an xch’olaninkil li jun siir chik sa’ xjunkab’al.

Naq nakawil Genesis 25:29–34, k’oxla k’a’ut naq laj Esau kiwan xch’ool chixk’ayinkil lix xb’eenil alalb’ejil re naq tixk’ul li tzakemq. Ma wan li na’leb’ nakataw choq’ aawe sa’ li esil a’an? Ma wan li “juyb’il tzakemq” li yookat chixsik’b’al ru ruuchileb’ li osob’tesink li q’axal ninqeb’ xwankil choq’ aawe? K’a’ru yookat chixb’aanunkil re xk’eeb’al reetaleb’ ut xb’antioxinkileb’ li osob’tesink a’an?

Chi’ilmanq ajwi’ Mateo 6:19–33; 2 Nefi 9:51; M. Russell Ballard, “Lo más importante es lo que perdura,” Liahona, noviembre 2005, 41–44.

Genesis 26:1–5

Ki’ak’ob’resiman li sumwank re laj Abraham rik’in laj Isaak.

Ki’ajman naq li sumwank li kixk’uub’ li Dios rik’in laj Abraham taakaanaq rik’ineb’ li ralal xk’ajol, jo’kan naq aajel ru naq lix sumwank laj Abraham ut li xSara taanumsimanq re laj Isaak, laj Jakob, ut xkomoneb’ chik li ralal xk’ajoleb’ li tiikeb’ chi paab’ank. Naq nakawil Genesis 26:1–5, k’e reetaleb’ li osob’tesink sa’ lix sumwank li Dios. K’a’ru nakatzol chirix li Dios sa’eb’ li raqal a’an?

Genesis 26:18–25, 32–33

Li Jesukristo a’an lix yo’leb’aal li yo’yookil ha’.

Maare taak’e reetal naq aajeleb’ ru li yo’leb’aal ha’ sa’ li Najter Chaq’rab’. Aajeleb’ ru xb’aan naq lix k’ihaleb’ li esil ke’k’ulman sa’ li chaqi ch’och’. Naq nakawil resileb’ lix yo’leb’aal ha’ laj Isaak sa’ Genesis 26, k’oxla k’a’ru nareetali li ha’ sa’eb’ li loq’laj hu. K’a’ru li na’leb’ li nakataw chirixeb’ li musiq’ejil yo’leb’aal li “yo’yookil ha’ ” (chi’ilmanq Jwan 4:10–15). Chan ru naq yookat chixb’ekb’al li musiq’ejil yo’leb’aal ha’ sa’ laa yu’am? Chan ru naq li Kolonel, a’an yo’yookil ha’ choq’ aawe? K’e reetal naq “ke’b’ut’e’k” li yo’leb’aal ha’ xb’aaneb’ laj Filisteo (chi’ilmanq Genesis 26:18). Ma wan li k’a’ru naxram ruheb’ li yo’yookil ha’ sa’ laa yu’am?

Jun li yo’leb’aal ha’ sa’ Berseba, b’ar wi’ laj Abraham ut laj Isaak ke’xb’ekeb’ li yo’leb’aal ha’.

Genesis 27

Ma ink’a’ us li ke’xb’aanu li xRebeka ut laj Jakob naq ke’xb’alaq’i laj Isaak?

Ink’a’ naqanaw k’a’ut naq li xRebeka ut laj Jakob ke’xb’aanu a’in re naq taa’osob’tesiiq laj Jakob. Tento taqak’e reetal naq moko tz’aqal ta li Najter Chaq’rab’ li wan qik’in anajwan (chi’ilmanq Moises 1:23, 41). Maare junxil ke’wan xkomon chik li na’leb’ li tooxtenq’a raj chixtawb’al ru li k’a’ru naxk’e qak’a’uxl. A’b’anan, naqanaw naq li Dios kiraj naq taa’osob’tesiiq laj Jakob xb’aan laj Isaak, xb’aan naq kik’utb’esiman chiru li xRebeka naq laj Jakob taajolominq sa’ xb’een laj Esau (chi’ilmanq Genesis 25:23). Chirix naq laj Isaak kixk’e reetal naq kirosob’tesi laj Jakob sa’ xna’aj laj Esau, a’an kixye naq laj Jakob “osob’tesinb’ilaq chi junelik” (Genesis 27:33)—a’an naxk’ut naq kitz’aqlok ru li rajom li Dios.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 24:2–4, 32–48.Laj Abraham kixpatz’ re lix moos naq tixtaw jun rixaqil laj Isaak, ut li moos ki’ok sa’ aatin naq jo’kan tixb’aanu. Chan ru kixk’ut lix moos laj Abraham naq wan xch’ool chixpaab’ankil lix sumwank? Chan ru taqataaqe lix b’aanuhom a’an?

Genesis 24:15–28, 55–60.Jo’ junkab’al, naru teerileb’ li raqal a’in re xtawb’al k’a’ut naq kiwan xk’ulub’ li xRebeka chi sumlaak rik’in laj Isaak chi junelik. Waklesi xch’ooleb’ laa komon re te’xsik’ ru jun chaab’ilal neke’xtaw rik’in li xRebeka li te’raj xkawresinkil sa’ xyu’ameb’.

Genesis 25:19–34; 27.Re xtawb’al xkomon eena’leb’ chirix li resil naq laj Jakob kixk’ul lix xb’eenil alalb’ejil laj Esau, naru taatz’iib’aheb’ ch’ol aatin re “Jacob y Esau” (sa’ Relatos del Antiguo Testamento) chiruheb’ kok’ hu. Laa junkab’al naru te’xyal xk’eeb’aleb’ li aatin sa’ tz’aqal xtusulal ru.

Naq yooqex chi aatinak chirix li xb’eenil alalb’ejil kixk’ayi laj Esau, naru ajwi’ tex’aatinaq chirix li k’a’ru jwal nim xwankil sa’ lee junkab’al; maare a’an lee wanjik rik’in lee Choxahil Yuwa’ ut rik’in li Jesukristo. Laa junkab’al naru ajwi’ te’xtaw li jalam-uuch malaj yalaq chik k’a’ru li nareetali li k’a’ru nim xwankil chi junelik. Kanab’eb’ chixch’olob’ankil k’a’ut naq xe’xsik’ ru a’an.

Genesis 26:3–5.Re xtenq’ankil laa junkab’al chixtawb’al ru li sumwank re laj Abraham, naru taapatz’ reheb’ naq te’xtaw li k’a’ru yeechi’inb’il sa’eb’ li raqal a’in. K’a’ut naq aajel ru naq taawanq qanawom chirixeb’ li yeechi’ihom a’in sa’ li qakutankil? (chi’ilmanq “Na’leb’ re xk’oxlankil: Li sumwank,” sa’ li hu a’in).

Genesis 26:18–25, 32–33.K’a’ut naq aajel ru li yo’leb’aal ha’? K’a’ut naq li Jesukristo a’an chanchan jun li yo’leb’aal ha’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sik’ li us,” Eb’ li B’ich, 151.

Xkawresinkil aawib’ chi tzolok

Kanab’ sa’ laa k’a’uxl jun li raqal reheb’ li loq’laj hu. Li Elder Richard G. Scott kixye, “Naq naqatzol jun raqal sa’eb’ li loq’laj hu, na’ok a’an choq’ jun qochb’een li ink’a’ nokoxkanab’ chirix xnumik li kutan” (“El poder de las escrituras,” Liahona, noviembre 2011, 6).

Laj Esau naxk’ayi lix xb’eenil alalb’ejil re laj Jakob, xb’aan laj Glen S. Hopkinson