Xjalam-uuch laj Abraham ut li xSara, xb’aan li xDilleen Marsh

7–13 febrero

Genesis 12–17; Abraham 1–2

“Aj taaqenel re li tiikilal”

Naq nakawil resil laj Abram ut xSaray (moqon ke’nawe’ ru jo’ laj Abraham ut li xSara) ut lix junkab’aleb’, k’oxla li na’leb’ nakatzol rik’ineb’. Tz’iib’a li naru taab’aanu re naq “tatwanq choq’ aj taaqenel re li tiikilal” (Abraham 1:2).

Tz’iib’a li nakak’oxla

Xb’aan li sumwank li kixk’uub’ li Dios rik’in, “lix yuwa’eb’ li tiikeb’ chi paab’ank” (Tzol’leb’ ut Sumwank 138:41) ut “ramiiw li Dios” (Santiago 2:23) kixk’ab’a’in laj Abraham. Sa’ li kutan a’in, k’iila millon neke’roxloq’i jo’ tz’aqal xxe’ xtoon, ut k’iila mil chik k’ulb’ileb’ choq’ ralal xk’ajol xb’aan xjalajikeb’ xch’ool sa’ lix evangelio li Jesukristo. A’ut toj kiwan xmajelal lix junkab’al laj Abraham—lix yuwa’, li kixkanab’ paab’ank chiru li tz’aqal Dios, kixyal xmajeyankil laj Abraham chiruheb’ li pak’b’il dios. Us ta kiwan chi jo’kan, laj Abraham kiraj “wank choq’ aj taaqenel re li tiikilal” (Abraham 1:2), ut li resil lix yu’am naxk’ut naq li Dios kixk’ulub’a li rajom. Lix yu’am laj Abraham, a’an reetalil naq maak’a’ naxye k’a’ru ak xqak’ul sa’ li qajunkab’al, toj naru taqataw li qayo’onihom.

Li na’leb’ re xtzolb’aleb’ li loq’laj hu aajunes

Abraham 1:1–19

Li Dios tinrosob’tesi naq wan inpaab’aal ut naq tiik ru li rajom inch’ool.

Jo’ naab’al qe laa’o, sutsu chaq laj Abraham xb’aan li maa’usilal, a’b’an toj kiraj wank chi tiik xch’ool. Li Awa’b’ej Dallin H. Oaks kixk’ut k’a’ut naq aajel ru naq tiik ru li rajom qach’ool: “Aajel ru xsachb’al chixjunil li rajom qach’ool chi maakob’k, a’b’an toj wan chik li na’ajman choq’ re li junelik yu’am. Re taaruuq taqataw li qeechanihom re junelik, taawanq rajom qach’ool chi k’anjelak re xk’ulb’al li na’ajman ru re wank jo’ li ani wan chi junelik. … Wi ch’a’aj tana’ a’in—ut relik chi yaal, ch’a’aj choq’ qe chiqajunilo—tento too’ok chirajb’al li na’ajman re wank chi jo’kan, toja’ naq taqatz’aama chiru li qaChoxahil Yuwa’ li nokoxra naq tooxtenq’a rik’in li naqeek’a [chi’ilmanq Moroni 7:48]” (“El Deseo,” Liahona, mayo 2011, 44–45). Naq nakawil Abraham 1:1–19, k’e reetal chan ru naq k’utb’il lix na’leb’ li Awa’b’ej Oaks sa’eb’ li raqal a’in. Maare tate’xtenq’a li patz’om a’in:

• K’a’ru kiraj ut kixsik’ laj Abraham? K’a’ru kixb’aanu re xk’utb’al lix paab’aal?

• K’a’ru nakawaj laa’at? Ma wan li k’a’ru tento taab’aanu re xsaqob’resinkil ru li rajom aach’ool?

• K’a’ru li ch’a’ajkilal kixk’ul laj Abraham xb’aan naq tiik ru li rajom xch’ool? K’a’ru kixb’aanu li Dios re xtenq’ankil?

• Ma wan li na’leb’ sa’eb’ li raqal a’in choq’ re li ani wan xkomon sa’ xjunkab’al li ink’a’ naraj li tiikilal?

Chi’ilmanq ajwi’ Mateo 7:7; “La liberación de Abraham” (video), ChurchofJesusChrist.org.

Abraham 2:10–11

Ani nak’ehe’ sa’ ajl sa’ li sumwank re laj Abraham?

Naq li Qaawa’ kixk’uub’ lix sumwank rik’in laj Abraham, kixyeechi’i naq taakanaaq li sumwank a’in choq’ reheb’ li ralal xk’ajol laj Abraham, malaj li “riyajil,” ut naq “jo’ k’ihaleb’ li neke’k’uluk re li Evangelio a’in … te’k’ehe’q sa’ ajl jo’ aawiyajil” (Abraham 2:10–11). A’in naraj naxye naq li yeechi’inb’il sa’ li sumwank re laj Abraham, a’an yeechi’inb’il re chixjunileb’ li komon sa’ li Iglees anajwan, maak’a’ naxye ma laa’o tz’aqal ralal xk’ajol laj Abraham malaj k’ulb’ilo sa’ xjunkab’al xb’aan li kub’iha’ ut xjalajik qach’ool sa’ lix evangelio li Jesukristo (chi’ilmanq Galatas 3:26–29; Tzol’leb’ ut Sumwank 132:30–32). Re took’ehe’q sa’ ajl jo’ riyajil laj Abraham, tento te’qapaab’ li chaq’rab’ ut li k’ojob’anb’il k’anjel re li evangelio.

Genesis 12:1–3; 13:15–16; 15:1–6; 17:1–8, 15–22; Abraham 2:8–11

Li sumwank re laj Abraham nikinrosob’tesi laa’in ut lin junkab’al.

Chixjunileb’ li komon sa’ li Iglees neke’k’ehe’ sa’ ajl sa’ li sumwank re laj Abraham, jo’kan naq maare taak’oxla sa’ laa ch’ool k’a’ut naq nim xwankil a’an sa’ laa yu’am. Tz’iib’a li nakak’oxla chirixeb’ li patz’om a’in:

Chan ru tinrosob’tesi laa’in ut lin junkab’al li k’a’ru yeechi’inb’il sa’ Abraham 2:8–11? (chi’ilmanq ajwi’ Genesis 12:1–3; 13:15–16).

K’a’ru nintzol chirix li sumwank re laj Abraham sa’ Genesis 15:1–6; 17:1–8, 15–22?

K’a’ru eekasinb’ilin chixb’aanunkil re xk’eeb’al chi tz’aqob’resiik ru li yeechi’ihom naq “te’osob’tesimanq chixjunil li junkab’al re li ruchich’och’ ”? (Abraham 2:11).

Maare taak’e reetal naq li ruchich’och’il osob’tesink yeechi’inb’ileb’ re laj Abraham ut li xSara, jo’ li ch’och’ choq’ reechanihomeb’ ut maak’a’jo’ xk’ihaleb’ li ralal xk’ajol, chanchaneb’ ajwi’ li osob’tesink re li junelik q’e kutan. A’an li eechanihom sa’ li choxahil awa’b’ejihom (chi’ilmanq Tzol’leb’ ut Sumwank 132:29) ut li sumlaak ut li wank sa’ junkab’al chi junelik (chi’ilmanq Tzol’leb’ ut Sumwank 131:1–4; 132:20–24, 28–32). “Sa’ li santil ochoch,” kixye li Awa’b’ej Russell M. Nelson, “naqak’ul li xninqal ru osob’tesink, jo’ riyajil laj Abraham, laj Isaak, ut laj Jakob” (“El recogimiento del Israel disperso,” Liahona, noviembre 2006, 80).

Chi’ilmanq ajwi’ Genesis 15:9–12 jo’ jaltesinb’il ru xb’aan laj Jose Smith; 17:3–12; K’utul Raqal reheb’ li Loq’laj Hu, “Sumwank re laj Abraham”; “Na’leb’ re xk’oxlankil: Li sumwank,” sa’ li hu a’in.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 13:5–12.K’a’ru kixb’aanu laj Abraham re xxaqab’ankil li tuqtuukilal sa’ xjunkab’al? Jo’ junkab’al, naru teeyal xxaqab’ankil li tuqtuukilal jo’ laj Abraham rik’in xyeeb’al chan raj ru teetuqub’ ru li wech’ok-ib’ li maare taawanq sa’ lee junkab’al.

Genesis 13:16; 15:2–6; 17:15–19.Chan ru taatenq’a laa junkab’al chixtawb’al ru li yeechi’inb’il xb’aan li Dios sa’eb’ li raqal a’in—naq us ta toj maak’a’ ralal xk’ajoleb’ laj Abraham ut li xSara, te’wanq xk’ihal jo’ chanru xk’ihal xpoqsil li ruchich’och’, li chahim sa’ choxa, malaj li samahib’ chire li palaw? (chi’ilmanq ajwi’ Genesis 22:17). Maare taak’ut jun sek’ chi samahib’ chiru laa junkab’al, teerileb’ li chahim, malaj taak’ut li jalam-uuch li wank sa’ li tusleb’ aatin a’in. Chan ru taqapaab’ li k’a’ru naxyeechi’i li Dios us ta ch’a’aj choq’ qe xtawb’al ru?

Genesis 14:18–20.K’a’ru naqatzol chirix laj Melkisedek sa’ Genesis 14:25–40 jo’ jaltesinb’il ru xb’aan laj Jose Smith? (chi’ilmanq ajwi’ Alma 13:13–19). Chan ru “taqaxaqab’ li tiikilal” jo’ kixb’aanu laj Melkisedek? (raqal 36). K’a’ chik ru naxtoch’ aach’ool chirix lix k’anjel laj Melkisedek?

Laj Melkisedek kirosob’tesi laj Abram, xb’aan laj Walter Rane

Genesis 16.Rilb’al li resil li xAgar naru texxtenq’a chixk’eeb’al reetal chan ru nokoxtenq’a li Qaawa’ naq nokorahob’tesiik. Naru taaye naq “Ismael” naraj naxye “Dios narab’i.” Ma naru taqaye jo’q’e xoorab’i ut xooxtenq’a li Qaawa’ naq xoorahob’tesiik? (chi’ilmanq Genesis 16:11).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinpaab’ li evangelio,” B’ichleb’aal choq’ reheb’ li Kok’al, 72.

Xkawresinkil qib’ jo’ aj k’utunel

Chatwanq rik’ineb’ ut chawab’iheb’. Li hoonal q’axal chaab’il re k’utuk natikla jo’ xpatz’om malaj xk’a’uxl jun li komon sa’ li junkab’al. K’eheb’ li komon sa’ laa junkab’al chixnaw rik’in laa waatin ut rik’in laa b’aanuhom naq wan aach’ool chirab’inkileb’. (Chi’ilmanq Li k’utuk jo’ li Kolonel, 16.)

Li Dios kixyeechi’i naq tixk’ihob’resiheb’ li ralal xk’ajol laj Abraham ut li xSara “jo’aqeb’ xk’ihal li chahim sa’ choxa” (Genesis 22:17). Xk’oxlankil lix yeechi’ihom li Dios, xb’aan li xCourtney Matz.