Xjalam-uuch laj Noe naq na’el sa’ li jukub’ kab’l, xb’aan laj Sam Lawlor

31 enero–6 febrero

Genesis 6–11; Moises 8

“Laj Noe kixtaw usilal sa’ rilob’aal li Qaawa’ ”

Kok’ aj xsa’ neke’k’utman wiib’ oxib’ li musiq’ejil na’leb’ sa’ jun li seraq’ re li loq’laj hu. Naq nakawil resil li nimla b’uut’iha’ ut li najt xteramil kab’l re Babel, sik’ aamusiq’ankil re xtawb’al li na’leb’ choq’ re laa yu’am.

Tz’iib’a li nakak’oxla

K’a’jo’ rajlankileb’ li ak xe’musiq’aak xb’aan li resil laj Noe ut li nimla b’uut’iha’. A’b’an jwal aajel ru li esil a’in sa’ li qakutankil. Naq li Jesukristo kixye chan ru tooyo’leq re xnawb’al jo’q’e taak’ulunq wi’chik, a’an kixye, “Aʼbʼan joʼ chanru kiwan saʼ xkutankil laj Noe, joʼkanaq ajwiʼ taawanq saʼ xkʼulunik li Ralal li Winq” (Jose Smith—Mateo 1:41). Jo’kan ajwi’, ch’olob’anb’il lix kutankil laj Noe rik’in li aatin “po’jenaq” ut “nujenaq rik’in li raaxiik’,” chanchan ajwi’ li qakutankil laa’o (Genesis 6:12–13; Moises 8:28). Jo’kan ajwi’, nim xwankil li resil li najt xteramil kab’l re Babel, b’ar wi’ nayeeman resil li q’etq’etil li kik’amok re li sachk ut li jachok-ib’ sa’ xyanqeb’ li ralal xk’ajol li Dios.

Ninqeb’ xwankil li najter esil a’in xb’aan naq neke’xk’ut chiqu naq wanjenaq li maa’usilal chalen chaq xtiklajik. A’ut k’a’jo’ wi’chik naxk’ut k’a’ru taqab’aanu re toonumtaaq sa’ xb’een. Laj Noe “kixtaw usilal sa’ rilob’aal li Qaawa’ ” (Moises 8:27) us ta li maa’usilal wan chixsutam. Eb’ lix junkab’al laj Jared ut li ras ke’xsik’ li Qaawa’, ut a’an kixb’eresiheb’ chaq chi elk sa’ li maa’usilal sa’ Babel (chi’ilmanq Eter 1:33–43). Wi ink’a’ nakanaw chan ru xkolb’al aawix ut laa junkab’al sa’ li kutan a’in re po’b’il na’leb’ ut raaxiik’, li na’leb’ sa’eb’ li esil a’in naru tatxtenq’a.

Li na’leb’ re xtzolb’aleb’ li loq’laj hu aajunes

Genesis 6; Moises 8

Wan li musiq’ejil kole’k sa’ xtaaqenkil lix profeet li Qaawa’.

B’antiox re li evangelio li k’ojob’anb’il wi’chik, wan xkomon chik li qanawom chirix laj Noe chiru li wan sa’ li Najter Chaq’rab’. Sa’ lix musiq’anb’il jaltesinkil ru Genesis 6 xb’aan laj Jose Smith, li wan sa’ Moises 8, naqil naq laj Noe kiwan jo’ nimla profeet chiru li Dios. Kik’ojob’aak ut kitaqlaak chixjultikankil lix evangelio li Jesukristo, kib’eek ut ki’aatinak rik’in li Dios, ut kisik’e’ ru re xk’ojob’ankil wi’chik li ralal xk’ajol li Dios sa’ ruchich’och’ chirix li b’uut’iha’ (chi’ilmanq ajwi’ Enseñanzas de los Presidentes de la Iglesia: José Smith [2007], 109, 211). K’a’ru nakatzol rik’in laj Noe chirixeb’ li profeet?

Naq nakawil resil lix kutankil laj Noe, maare taak’e reetal li k’a’ru juntaq’eet rik’in li qakutankil. A’in junjunq reheb’:

• Moises 8:18, 20–21, 23–24 (tz’eqtaananb’ileb’ lix moos li Dios)

• Moises 8:21 (li q’emal ut li ruchich’och’il na’leb’)

• Moises 8:22 (li maa’usilal atawanb’il ut k’oxlanb’il)

• Moises 8:28 (li po’b’il na’leb’ ut li raaxiik’)

K’a’ru neke’xk’ut li profeet sa’ li kutankil a’in chirix lix evangelio li Jesukristo li naru tixkol rix laa junkab’al? Naq nakawil li kixk’ul laj Noe, k’a’ru namusiq’an aawe chixtaaqenkileb’ lix profeet li Qaawa’ anajwan?

Chi’ilmanq ajwi’ Mosiah 13:33; Tzol’leb’ ut Sumwank 21:4–7.

Genesis 9:8–17

Eb’ li eetalil nokohe’xtenq’a chixk’oxlankileb’ li qasumwank rik’in li Qaawa’.

Wankeb’ k’iila reetalileb’ li sumwank re li evangelio (chi’ilmanq Genesis 9:12). K’oxla chan ru naq li wa ut li ha’ re li loq’laj wa’ak, malaj lix ha’il li kub’iha’, nokoxtenq’a chixk’oxlankil li choxahil na’leb’ chirixeb’ li qasumwank. Jo’ naxye sa’ Genesis 9:8–17, k’a’ru nakak’oxla naq nakawil jun li kaqla? K’a’ chik ru nakatzol sa’ Genesis 9:21–25 jo’ jaltesinb’il ru xb’aan laj Jose Smith? K’a’ut naq li Dios naraj naq taajultiko’q aawe a’an ut eb’ laa sumwank?

Chi’ilmanq ajwi’ Gerrit W. Gong, “Junelik xjultikankil A’an,” Jolomil ch’utub’aj-ib’ re abril 2016.

Genesis 11:1–9

Ka’ajwi’ tinwulaq sa’ choxa wi tintaaqe li Jesukristo.

Li najter tenamit Babel, malaj Babilonia, na’oksiman rajlal re reetalinkil li maa’usilal ut li ruchich’och’il na’leb’ (chi’ilmanq Apokalipsis 18:1–10; Tzol’leb’ ut Sumwank 133:14). Naq nakawil Genesis 11:1–9, k’oxla lix na’leb’ li profeet aj Mormon, li kixtz’iib’a naq a’an laj Satanas li kik’ehok “sa’ xch’ooleb’ li tenamit xyiib’ankil jun li kab’l najt tz’aqal xteram re te’wulaq sa’ choxa” (Helaman 6:28; che’ilmanq ajwi’ li raqal 26–27). K’a’ruheb’ li q’usum nakataw choq’ aawe sa’ li resil li najt xteramil kab’l re Babel?

Chi’ilmanq ajwi’ Salmos 127:1.

Xjalam-uuch li najt xteramil kab’l re Babel, xb’aan laj David Green

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 6–8.Chan ru taawoksi li resil laj Noe ut lix jukub’ kab’l re xk’utb’al chiru laa junkab’al naq xtaaqenkil li profeet naxk’e xkolb’al qix sa’ musiq’ej? (chi’ilmanq “Noe,” sa’ Relatos del Antiguo Testamento). Maare jo’ junkab’al teeyiib’ jun ch’ina jukub’ rik’in hu malaj kok’ kaaxukuut. Naq nekeril Genesis 6–7, naru taajuntaq’eeta li kole’k naxk’e li jukub’ rik’in li kole’k sa’ xtaqeenkil li profeet. Naru tex’aatinaq chirix li b’eresihom toje’ k’eeb’il xb’aan li profeet, ut teetz’iib’a li raatin chiru lee jukub’.

K’a’ chik ru naxk’e li Dios qe li chanchan li jukub’ kab’l kikole’ wi’ lix junkab’al laj Noe? Naru teetaw eena’leb’ sa’eb’ li hu a’in, ut wankeb’ ajwi’ xkomon chik: 2 Nefi 9:7–13; Tzol’leb’ ut Sumwank 115:5–6; ut li raatin li Awa’b’ej Russell M. Nelson “Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib’ re octubre 2018).

Moises 8:17.K’a’ru naraj naxye naq lix Musiq’ li Qaawa’ “tixyal xq’e” qik’in? (chi’ilmanq 1 Nefi 7:14; Tzol’leb’ ut Sumwank 1:33). Ma ak xyal xq’e li Musiq’ej qik’in sa’ li qayu’am?

Genesis 9:8–17.Maare taawulaq chiruheb’ li kok’al xyiib’ankil xjalam-uuch malaj xb’onb’al jun li kaqla naq yookat chixch’olob’ankil k’a’ru nareetali (chi’ilmanq ajwi’ Genesis 9:21–25 jo’ jaltesinb’il ru xb’aan laj Jose). Naru ajwi’ taaye k’a’ru nokoxtenq’a chixk’oxlankileb’ li qasumwank, jo’ li loq’laj wa’ak, li nokoxtenq’a chixk’oxlankil li qasumwank re li kub’iha’ naq taqataaqe li Jesukristo (chi’ilmanq Tzol’leb’ ut Sumwank 20:75–79).

Genesis 11:1–9.Maare us rilb’al Eter 1:33–43 naq yookex chi tzolok chirix li najt xteramil kab’l re Babel sa’ Genesis 11. K’a’ru naqatzol rik’in lix junkab’al laj Jared ut li ras li tooxtenq’a chixtawb’al li musiq’ejil xkolb’al qix sa’ li qajunkab’al, us ta li maa’usilal li wan sa’ ruchich’och’? K’a’ chik ru naqatzol rik’in laj Noe ut lix junkab’al naq ke’xnumsi ajwi’ li ch’a’ajkilal a’an? (chi’ilmanq Moises 8:13, 16–30).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Jun li profeet,” B’ichleb’aal choq’ reheb’ li Kok’al, 58–59 (rox raqal).

Xkawresinkil aawib’ chi tzolok

Wotz laa na’leb’. Naq nakawotz li na’leb’ nakatzol sa’eb’ li loq’laj hu, taatenq’aheb’ laa komon ut taanimanq laa nawom. K’a’ru li na’leb’ re li loq’laj hu li nakaweek’a naq taawotz rik’in laa junkab’al, eb’ laa wamiiw, malaj laa wech komon sa’ li teep?

Xjalam-uuch lix jukub’ kab’l laj Noe, xb’aan laj Adam Klint Day