Xjalam-uuch laj Noe naq na’el sa’ li jukub’ kab’l, xb’aan laj Sam Lawlor

31 enero–6 febrero

Genesis 6–11; Moises 8

“Laj Noe kixtaw usilal sa’ rilob’aal li Qaawa’ ”

Li tzolok chirixeb’ li xul sa’ li jukub’ re laj Noe ut li najt xteramil kab’l re Babel maare taawulaq chiruheb’ li kok’al. A’b’an jultikaq aawe naq eb’ li seraq’, a’an re xtzolb’aleb’ li yaal junelik nakana. Rik’in tijok, k’eheb’ reetal li yaal naraj li Dios naq te’xtzol li kok’al.

Tz’iib’a li nakak’oxla

Xkanab’ankileb’ chi wotzok

Naq maji’ nakat-ok chi aatinak chirixeb’ li seraq’ wankeb’ sa’ Genesis 6–11 ut Moises 8 rik’ineb’ li kok’al, k’eheb’ xhoonal chixwotzb’al chirib’ileb’ rib’ k’a’ru neke’xnaw chirix laj Noe ut li jukub’ malaj li najt xteramil kab’l re Babel.

Xk’utb’al li tzol’leb’: Kok’al toj ka’ch’ineb’ xyu’am

Genesis 6:14–22; 7–8; Moises 8:16–30

Xtaaqenkil li profeet tinrosob’tesi laa’in ut lin junkab’al.

Naq eb’ li kok’al yooqeb’ chixtzolb’al xtaaqenkil li profeet, te’osob’tesiiq ut te’kole’q rix sa’ musiq’ej, jo’ naq lix junkab’al laj Noe ke’kole’ rix chiru li b’uut’iha’.

Kok’ k’anjel naru chi b’aanumank

• Rik’in aawaatin, wotz li seraq’ chirix laj Noe ut li jukub’ (chi’ilmanq “Noe,” sa’ Relatos del Antiguo Testamento; chi’ilmanq ajwi’ “Jun li profeet,” B’ichleb’aal choq’ reheb’ li Kok’al, 58–59, raqal 3). Tenq’aheb’ li kok’al chireetalinkil li seraq’—maare rik’in roksinkil junaq k’anjeleb’aal re xyiib’ankil junaq jukub’ malaj b’eek jo’eb’ li xul naq ke’ok sa’ li jukub’.

• Yaab’asi reheb’ li kok’al Moises 8:19–20, ut jultika k’a’ru kixtaqla li Qaawa’ naq tixb’aanu laj Noe. Tenq’aheb’ li kok’al chixtawb’al ru naq laj Noe kiwan choq’ profeet ut naq lix junkab’al kikole’ chiru li b’uut’iha’ xb’aan naq ke’xtaaqe. Patz’ reheb’ li kok’al ma neke’xnaw ani li profeet wan sa’ qakutankil. K’ut xjalam-uuch li profeet, ut tenq’aheb’ li kok’al chixka’sutinkil lix k’ab’a’.

• K’ameb’ jalam-uuch malaj k’a’a’q re ru li te’reetali lix k’utum li profeet sa’ qakutankil, maare xjalam-uuch li loq’laj hu malaj li santil ochoch. Patz’ reheb’ li kok’al naq te’xchap jun reheb’ li jalam-uuch ut te’xye k’a’ru neke’xnaw chirix. Ch’olob’ chiruheb’ k’a’ru nareetali li jalam-uuch. Patz’ reheb’ naq te’xyiib’ xjalam-uucheb’ re te’xk’ut chan ru neke’ab’in chiru xk’utum li profeet. Wotz lix nawom aach’ool chirix li osob’tesiik nachal xb’aan xtaaqenkil li profeet.

Genesis 9:15–16

Li Dios tixk’e qe li k’a’ru naxyeechi’i.

Aajel ru naq eb’ li kok’al te’xnaw naq li Dios naxk’e qe li k’a’ru naxyeechi’i, mas wi’chik naq neke’xkawresi rib’ re te’xb’aanu li sumwank rik’in a’an naq te’kub’eeq xha’.

Kok’ k’anjel naru chi b’aanumank

• Patz’ reheb’ li kok’al naq te’xyiib’ xjalam-uuch li kaqla. Yaab’asi Genesis 9:15–16, ut patz’ reheb’ li kok’al naq te’rab’i li aatin taajultiko’q we. Patz’ reheb’ naq te’xtaqsi chi kutankil lix kaqla naq te’rab’i li aatin. Ch’olob’ naq li kaqla neke’xjultika qe lix yeechi’ihom li Dios choq’ qe.

• Aatinanqex chirixeb’ lix yeechi’ihom li Dios, jo’ naq tooruuq chi q’ajk rik’in li qaChoxahil Yuwa’ wi naqataaqe li Jesukristo, malaj naq li Dios tixtaqla chaq li Santil Musiq’ej chixk’ojob’ankil qach’ool. Ch’olob’ xyaalal naq li Dios junelik naxk’e qe li k’a’ru naxyeechi’i.

• Oksiheb’ jalam-uuch re raatinankileb’ li kok’al chirixeb’ li sumwank neke’qab’aanu rik’in li Dios, maare xjalam-uuch junaq ch’ina al nakub’e xha’, li loq’laj wa’ak, ut jun santil ochoch (chi’ilmanq Hu reheb’ li Jalam-uuch re li Evangelio, 104, 108, 120).

Genesis 11:1–9

Jun ajwi’ li b’e nak’amok sa’ li choxa, ut a’an li Jesukristo.

Li kristiaan sa’ Babel ke’xk’oxla naq te’ruuq chi wulak sa’ choxa rik’in jun najt xteramil kab’l sa’ xna’aj xyu’aminkil lix evangelio li Jesukristo. Chan ru taatenq’aheb’ li kok’al chixtawb’al ru naq ka’ajwi’ rik’in xtaaqenkil li Kolonel tooruuq chi q’ajk rik’in li qaChoxahil Yuwa’?

Kok’ k’anjel naru chi b’aanumank

• Rik’in aawaatin wotz li seraq’ chirix li najt xteramil kab’l malaj yaab’asi li seraq’ wan sa’ “La Torre de Babel” (sa’ Relatos del Antiguo Testamento). Patz’ reheb’ li kok’al naq te’xwotz k’a’ru neke’xnaw chirix li seraq’.

  

  Xjalam-uuch li najt xteramil kab’l re Babel, xb’aan laj David Green

• Kanab’eb’ li kok’al chixyiib’ankil jun najt xteramil kab’l rik’in k’a’aq re ru. Chirix a’an, k’ut chiruheb’ jun xjalam-uuch li Kolonel ut patz’ reheb’ b’ar wan li b’e re q’ajk rik’in li qaChoxahil Yuwa’— xyiib’ankil junaq najt xteramil kab’l malaj li Jesukristo? Patz’ reheb’ li kok’al naq te’xye k’a’ru te’xb’aanu re xtaaqenkil li Kolonel.

Xk’utb’al li tzol’leb’: Kok’al ak ninqeb’

Genesis 6:14–22; 7–8; Moises 8:16–30

Xtaaqenkil li profeet tinrosob’tesi laa’in ut lin junkab’al.

Eb’ li kok’al yookeb’ chi k’iik sa’ jun po’jenaq ruchich’och’, jo’ chaq sa’ xkutankil laj Noe. Li k’a’ru kixk’ul laj Noe naru naxkawob’resi xch’ooleb’ re naq te’xtaw xkolb’aleb’ rix sa’ musiq’ej wi neke’xtaaqe li profeet.

Kok’ k’anjel naru chi b’aanumank

• Tenq’aheb’ li kok’al chixsik’b’al ru jun raqal sa’ Genesis 6:14–22; 7–8 li naru te’reetali sa’ jalam-uuch. Oksi lix jalam-uucheb’ re xk’utb’al chiruheb’ li seraq’ chirix laj Noe. Patz’ reheb’ li kok’al naq te’xwotz k’a’ru neke’xtzol sa’ li seraq’.

• K’ut xjalam-uuch laj Noe (chi’ilmanq Hu reheb’ li Jalam-uuch re li Evangelio, 7–8) ut li profeet sa’ qakutankil. Tenq’aheb’ li kok’al chirilb’al Moises 8:16, 19–20, 23–24 re te’xtaw k’a’ru kixk’ut laj Noe ut toj neke’xk’ut ajwi’ anajwan laj jolominel sa’ li Iglees. Chan ru naq noko’osob’tesiik naq neke’qapaab’ li k’utum a’an?

• Wotz junaq na’leb’ toje’ kixk’ut li profeet. Patz’ reheb’ li kok’al naq te’xtz’iib’a chiru kok’ hu jun na’leb’ kixk’ut li profeet, ut tenq’aheb’ chixlatz’b’aleb’ li kok’ hu chi q’otq’o. Chan ru naq juntaq’eeteb’ li k’utum a’in rik’in li jukub’ kixyiib’ laj Noe?

Genesis 9:15–17

Tento te’qajultika li qasumwank.

Naq nakub’e qaha’, noko’ok sa’ sumwank rik’in li Dios naq taqapaab’ lix taqlahom. Sa’ Genesis 9:15–17, nayeeman naq li kaqla naxjultika li sumwank rik’in li Dios. Eb’ li raqal a’an naru naxtenq’aheb’ li kok’al chixsik’b’al chan ru te’xjultika lix sumwank rik’in li Dios.

Kok’ k’anjel naru chi b’aanumank

• K’ut chiruheb’ li kok’al junaq k’a’ru aawe li naxjultika li k’a’ru nim xwankil sa’ laa yu’am, maare jun matq’ab’ re sumlaak, jun jalam-uuch, malaj jun li diario. Kanab’eb’ li kok’al chixwotzb’al ajwi’ li reheb’. Ilomaq sa’ komonil Genesis 9:15–17 (chi’ilmanq ajwi’ Genesis 9:21–25, jo’ jaltesinb’il ru xb’aan laj Jose Smith). K’a’ru naraj li qaChoxahil Yuwa’ naq taanaq sa’ qach’ool naq taqil li kaqla?

• Jultika reheb’ li kok’al li sumwank ke’xb’aanu naq ke’k’ub’e xha’ ut li neke’rak’ob’resi rajlal naq neke’xtzeka li loq’laj wa’ak (chi’ilmanq Mosiah 18:8–10; Tzol’leb’ ut Sumwank 20:77, 79). Patz’ reheb’ li kok’al naq te’xyiib’ xjalam-uuch malaj te’xyiib’ k’a’ruhaq li tixjultika lix sumwank reheb’.

Genesis 11:1–9

Jun ajwi’ li b’e nak’amok sa’ li choxa, ut a’an li Jesukristo.

Eb’ li kristiaan sa’ li kutankil a’in maare ink’a’ te’xyal xyiib’ankil junaq najt xteramil kab’l re wulak sa’ choxa, a’b’an naab’aleb’ neke’xyal xsik’b’al li tuqtuukilal ut li sahil ch’oolejil sa’ jalan chik li b’e chiru li kixk’ut li Jesukristo. Chan ru taawoksi li seraq’ chirix li najt xteramil kab’l re Babel re xk’utb’al li na’leb’ a’in?

Kok’ k’anjel naru chi b’aanumank

• Patz’ reheb’ li kok’al naq te’xwotz k’a’ru neke’xnaw chirix li nim xteramil kab’l re Babel (chi’ilmanq Genesis 11:1–9). Jo’ naxye sa’ Helaman 6:28, k’a’ut naq eb’ li kristiaan ke’xyiib’ li najt xteramil kab’l re Babel? K’a’ut naq moko kik’anjelak ta li najt xteramil kab’l re wulak sa’ choxa? K’a’ raj ru taqaye reheb’ li kristiaan aran Babel?

• Patz’ reheb’ li kok’al naq te’xsik’ 2 Nefi 31:20–21 ut Helaman 3:28 re te’xtaw chan ru toowulaq sa’ choxa. Ye lix nawom aach’ool chirix lix waklijik chi yo’yo li Jesukristo.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla chan ru naq te’xk’ut chiruheb’ lix junkab’al li seraq’ xe’ril sa’ li Tzoleb’aal reheb’ li Kok’al. Maare te’roksi li jalam-uuch xe’xyiib’ malaj te’roksi li perel re kok’ k’anjel re li xamaan a’in.

Xkawresinkil qib’ jo’ aj k’utunel

K’e aach’ool chixtawb’al ru xch’ooleb’ li kok’al nakatzoleb’. Naq taatzoleb’ li kok’al, k’e reetal lix patz’omeb’, lix na’leb’eb’, ut li seraq’ malaj na’leb’ wan xyaalal choq’ reheb’. Eb’ li k’a’aq re ru a’an tate’xtenq’a chixnawb’al k’a’ru neke’raj ru.