Chera eerib’ cherib’il eerib’, xb’aan li xEmma Donaldson Taylor

24–30 enero

Moises 7

“Ut li Qaawa’ Sion kixye re lix tenamit”

Tikib’ xkawresinkil aawib’ rik’in rilb’al Moises 7. Kim, Taaqehin—Choq’ reheb’ li komon ut li junkab’al naru nakatxtenq’a chixtawb’al ru li ch’ol a’in, ut eb’ li na’leb’ a’in naru nakate’xtenq’a chixtzolb’aleb’ li kok’al.

Tz’iib’a li nakak’oxla

Xkanab’ankileb’ chi wotzok

Oksi wiib’ oxib’ k’asal re naq eb’ li kok’al te’xwotz k’a’ru neke’xnaw chirix li profeet aj Enok, jo’ ajwi’ li xe’xtzol sa’ li xamaan xnume’. Wi us choq’ aawe, k’ut jun jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

Xk’utb’al li tzol’leb’: Kok’al toj ka’ch’ineb’ xyu’am

Moises 7:18

Li Dios naraj naq taqara qib’ chiqib’il qib’.

Eb’ li raqal a’in neke’xch’olob’ k’a’ru lix chaab’ilal li tenamit Sion. Chan ru taatenq’aheb’ li kok’al chixtikib’ankil xsik’b’aleb’ li chaab’ilal a’an?

Kok’ k’anjel naru chi b’aanumank

• Wotz li seraq’ chirix lix tenamit laj Enok wan sa’ “Enoc” (sa’ Relatos del Antiguo Testamento), malaj kanab’eb’ li kok’al chixwotzb’al li seraq’ rik’in roksinkil xjalam-uuch laj Enok wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Naru ajwi’ nekeb’icha li xkab’ raqal re li b’ich “Jun li profeet” (B’ichleb’aal choq’ reheb’ li Kok’al, 58–59) re xjultikankil li seraq’.

• Tenq’aheb’ li kok’al chixk’oxlankil k’a’ru naru nab’aanuman rik’in li ch’ol aatin “junajeb’ xch’ool ut xk’a’uxl” (Moises 7:18). Ch’olob’ naq li ch’ol aatin a’in naraj naxye naq eb’ li kristiaan sa’ lix tenamit laj Enok neke’xra rib’ chirib’ileb’ rib’. Patz’ reheb’ naq te’roksi li perel re kok’ k’anjel re li xamaan a’in re te’xyiib’ xjalam-uuch chan ru te’xk’ut xrahom.

• B’ichahomaq jun li b’ich chirix xraab’al qib’ chiqib’il qib’, jo’ “Naq nawan rahok” (Eb’ li B’ich, 190). K’ameb’ chaq jalam-uuch li te’reetaliheb’ li ch’ol aatin sa’ li b’ich re xtenq’ankileb’ li kok’al chixtzolb’al li raatinul. Patz’ reheb’ li kok’al naq te’xwotz chan ru te’xk’ut xrahomeb’ chirib’ileb’ rib’ sa’ li Tzoleb’aal reheb’ li Kok’al ut sa’eb’ li rochoch. Chirix a’an te’xb’aanu li xe’xwotz.

Tento taqayal qaq’e chi wank chi “junaj qach’ool ut qak’a’uxl” (Moises 7:18).

Moises 7:28–33

Li Dios naxraheb’ li ralal xk’ajol.

Naru nakatenq’aheb’ li kok’al chixtzolb’al naq li qaChoxahil Yuwa’ ut li Jesukristo nokohe’xra ut neke’ril li k’a’ru naqab’aanu.

Kok’ k’anjel naru chi b’aanumank

• Tenq’aheb’ li kok’al chixk’oxlankil k’a’ru nak’ehok xsahil xch’ool li qaChoxahil Yuwa’. Yaab’asi Moises 7:28 choq’ reheb’ li kok’al, ut ch’olob’ naq li qaChoxahil Yuwa’ kiraho’ xch’ool xb’aan naq jwaj xiikil xmaakeb’ li kristiaan (che’ilmanq li raqal 32–33).

• Kanab’eb’ li kok’al chixyiib’ankil jun xnaq’ uhej ra xch’ool chiru jun li hu, ut jun sa xch’ool junpak’al chik. Ye junjunq li chaab’il b’aanuhom, maare li tijok, ut junjunqeb’ li ink’a’ chaab’il, maare li tik’ti’ik, ut patz’ reheb’ li kok’al naq te’xtaqsi li xnaq’ uhej sa xch’ool malaj li ra xch’ool re xk’utb’al k’a’ raj ru taareek’a li qaChoxahil Yuwa’ rik’in li k’a’ru naqasik’ ru xb’aanunkil.

• Patz’ reheb’ jun siir li kok’al naq te’xb’aanu jun li b’atz’unk b’ar wi’ te’reetali li k’a’aq re ru nasaho’ wi’ xch’ool li qaChoxahil Yuwa’. Patz’ reheb’ li jun siir chik naq te’xq’ehi k’a’ru yookeb’ chixb’aanunkil. Wotz rik’ineb’ li kok’al junaq na’leb’ xawil li taasaho’q raj wi’ xch’ool li qaChoxahil Yuwa’.

Moises 7:59–67

Li Jesus taak’ulunq wi’chik sa’ li ruchich’och’.

Sa’ lix k’utb’esinkil matk’, laj Enok kiril roso’jikeb’ li kutan, jo’ ajwi’ li xkab’ xk’ulunik li Kolonel. Chan ru taatenq’aheb’ li kok’al chiroyb’eninkil li xkab’ xk’ulunik li Kolonel?

Kok’ k’anjel naru chi b’aanumank

• Ye reheb’ li kok’al naq wan jun chaab’il kristiaan taak’ulunq chirula’aninkileb’. K’a’ raj ru te’xb’aanu re royb’eninkil? Wotz li kixye li Qaawa’ re laj Enok sa’ Moises 7:60: “Tink’ulunq sa’ roso’jikeb’ li kutan.” Chan ru naru naqakawresi qib’ choq’ re lix k’ulunik li Jesus?

• K’uteb’ xjalam-uuch li Kolonel naq kixk’utb’esi rib’ chiruheb’ li kristiaan (chi’ilmanq Hu reheb’ li Jalam-uuch re li Evangelio, 60, 82, 83, and 84). K’a’ru yookeb’ chixb’aanunkil li kristiaan sa’eb’ li jalam-uuch? K’a’ ta wi’ ru ke’reek’a li kristiaan naq ke’xnaw ru li Jesus? Kanab’eb’ li kok’al chixwotzb’al k’a’ raj ru te’reek’a naq taak’ulunq wi’chik li Jesus.

• B’ichahomaq jun li b’ich chirix li xkab’ xk’ulunik li Kolonel, maare “Naq taak’ulunq li Kolonel” (B’ichleb’aal choq’ reheb’ li Kok’al, 46–47), ut patz’ reheb’ li kok’al k’a’ru neke’xk’oxla naq taak’ulmanq naq taak’ulunq li Jesus.

Xk’utb’al li tzol’leb’: Kok’al ak ninqeb’

Moises 7:18–21, 62–63, 68–69

Naru nokowan chi junaj qu jo’ li tenamit Sion.

Naq nakattzolok chirix Sion, k’oxlaheb’ li reetalil li junajil aawilom. Chan ru taatenq’aheb’ li kok’al chi wank chi junaj ruheb’ jo’ lix tenamit laj Enok?

Kok’ k’anjel naru chi b’aanumank

• Patz’ reheb’ li kok’al naq te’xsik’ chaab’il na’leb’ chirix lix tenamit laj Enok, li nawb’il ajwi’ ru jo’ Sion, naq te’ril ru Moises 7:18. Tz’iib’aheb’ li na’leb’ a’an chiru li pizarron ut patz’ reheb’ li kok’al naq te’xtz’iib’a rub’eleb’ li aatin a’an, li k’a’aq re ru naru neke’xb’aanu re juntaq’eeto’k rik’in lix tenamit laj Enok. Chirix naq te’xwotz a’an, patz’ reheb’ li kok’al k’a’ru te’xb’aanu re naq eb’ lix junkab’al te’juntaq’eeto’q rik’in Sion. Maare te’xtaw xna’leb’eb’ sa’ 4 Nefi 1:15–18.

• Patz’ reheb’ li kok’al naq te’rajla jarub’ sut na’el li aatin “Sion” sa’ Moises 7:18–21, 62–63, 68–69. Rajlal sut naq na’el li aatin, tenq’aheb’ li kok’al chixk’eeb’al reetal k’a’ru naxye li raqal chirix Sion (chi’ilmanq ajwi’ sa’ li K’utul Raqal reheb’ li Loq’laj Hu, “Sion”). Chan ru naru toowanq chi mas wi’chik jo’eb’ li kristiaan sa’eb’ li raqal a’in?

• Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankil chan ru naru neke’wan chi “junajeb’ xch’ool ut xk’a’uxl” (chi’ilmanq Moises 7:18).

Moises 7:28–37

Li Dios nayaab’ak chirixeb’ li ralal xk’ajol.

Chan ru taatenq’aheb’ li kok’al chixk’eeb’al reetal naq li Dios wan xk’a’uxl chiqix ut chirix li k’a’ru naqab’aanu?

Kok’ k’anjel naru chi b’aanumank

• Patz’ reheb’ li kok’al k’a’ raj ru taak’ehoq re li Dios chi yaab’ak (chi’ilmanq Moises 7:28–31). Patz’ reheb’ li kok’al naq te’xsik’ xsumenkil sa’ Moises 7:32–33, 37. K’a’ru neke’xk’ut li raqal a’in chirix li nareek’a li Dios choq’ reheb’ li ralal xk’ajol? Chan ru taqanaw ma nokoxra li Dios? Wotz lix nawom aach’ool chirix lix rahom li Dios choq’ qe.

• Kut jun b’oolx li kenq’ malaj jun li b’olotz’ re jun ch’ina al. Patz’ re naq tixchoy li ch’ol aatin “Naru tink’e chi saho’k xch’ool li Dios …” ut chirix a’an tixkut li b’oolx malaj li b’olotz’ re jun chik ch’ina al. Teeb’aanu a’an toj reetal naq chixjunileb’ li kok’al te’tz’aqonq.

Moises 7:60–67

Li Jesukristo taachalq wi’chik sa’ roso’jikeb’ li kutan.

Naq nakattzolok chirix li xkab’ xk’ulunik li Qaawa’ sa’ Moises 7:60–67, k’oxla chan ru taak’ut a’an chiruheb’ li kok’al chi sa aach’ool.

Kok’ k’anjel naru chi b’aanumank

• Ilomaq ru Moises 7:60–67 sa’ komonil, ut tenq’aheb’ li kok’al chixk’eeb’al reetal k’a’ru naxye li Qaawa’ naq taak’ulmanq sa’ roso’jikeb’ li kutan. Patz’ reheb’ b’ar wan reheb’ li k’a’aq re ru a’an yookeb’ royb’eninkil ut k’a’ut.

• Patz’ reheb’ li kok’al naq te’aatinaq chirix junaq hoonal b’ar wi’ ke’royb’eni junaq kristiaan chi wulak malaj chi q’ajk sa’ kab’l. K’a’ru ke’reek’a? K’a’ru ke’xb’aanu re xkawresinkileb’ rib’? Chan ru taqakawresi qib’ re rilb’al wi’chik li Jesus?

• K’ut xjalam-uuch li xkab’ xk’ulunik li Kolonel (chi’ilmanq Hu reheb’ li Jalam-uuch re li Evangelio,  66). Kanab’eb’ li kok’al chixyiib’ankil xjalam-uuch li xkab’ xk’ulunik li Qaawa’ rik’in li xe’ril sa’ Moises 7:60–67.

Xb’oqb’aleb’ chi tzolok sa’ kab’l

Chan ru taawaklesiheb’ xch’ool li kok’al ut eb’ lix junkab’al re naq te’tzoloq sa’ li Najter Chaq’rab’ sa’ kab’l? Eb’ li kok’al maare te’xwotz li jalam-uuch xe’xyiib’ malaj xe’xb’on sa’ li Tzoleb’aal reheb’ li Kok’al sa’ li q’ojyin re junkab’al.

Xkawresinkil qib’ jo’ aj k’utunel

Tenq’aheb’ li kok’al chi wank chi aj aj. “Naq nakatzoleb’ li kok’al, k’anab’eb’ chi yiib’ank, chi b’onok, chi tz’iib’ak, ut chi yo’ob’tesink. Eb’ li k’a’aq re ru a’in maawa’ ka’ajwi’ re sahob’resink ch’oolej—aajeleb’ b’an ru choq’ re li tzolok” (chi’ilmanq Li k’utuk jo’ li Kolonel, 25).