3–9 enero

Genesis 1–2; Moises 2–3; Abraham 4–5

“Sa’ xtiklajik chaq kixyo’ob’tesi li Dios li choxa ut li ch’och’ ”

Naq yooqat chixtzolb’al Genesis 1–2, Moises 2–3, ut Abraham 4–5, k’oxlaheb’ li kok’al ut tz’ileb’ rix li na’leb’ li taatenq’anq reheb’ chixtawb’aleb’ ru li ch’ol a’in.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xye k’a’ru reheb’ lix yo’ob’tesihom li qaChoxahil Yuwa’ ut li Jesukristo neke’xb’antioxi. Li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru tixtenq’aheb’.

Xk’utb’al li tzol’leb’: Kok’al toj ka’ch’ineb’ xyu’am

Moises 2

Li Jesus kixyoʼobʼtesi li ruchichʼochʼ.

Lix nawomeb’ li kok’al chirix li yo’ob’tesink naru naxtenq’aheb’ chireek’ankil lix rahom li Dios ut lix rahomeb’ a’an choq’ re li ruchich’och’. K’a’ru taab’aanu re naq li tzolok chirix li yo’ob’tesink musiq’anb’ilaq?

Kok’ k’anjel naru chi b’aanumank

• K’ut chiruheb’ li kok’al jalam-uuch li neke’reetali li yo’ob’tesink (jo’ ch’olob’anb’il sa’ Moises 2; chi’ilmanq ajwi’ “Jesus crea la tierra,” sa’ Relatos del Antiguo Testamento), ut tenq’aheb’ chixk’oxlankil kok’ k’anjel te’rochb’eeni wi’ li jalam-uuch. Maare te’xmoch’ob’ li ruq’ re reetalinkil li ch’och’ malaj te’reek’asi lix tel jo’ xb’oolam li ha’ (chi’ilmanq Moises 2:9–10). Wotz lix nawom aach’ool naq li Jesukristo kixb’aanu chixjunil a’an xb’aan naq a’an ut li qaChoxahil Yuwa’ nokohe’xra.

• B’ichahomaq jun li b’ich chirix li k’a’aq re ru kixyo’ob’tesi li Jesukristo choq’ qe, maare “Li ch’och’ ch’ina-us” (B’ichleb’aal choq’ reheb’ li Kok’al, 123). Patz’ reheb’ li kok’al naq te’xyiib’ xjalam-uuch li k’a’aq re ru naxye li b’ich naq ke’yo’ob’tesiman.

  

  Li yo’ob’tesink, xb’aan li xJoan Hibbert Durtschi

Moises 2:26–27

Yo’ob’tesinb’ilin laa’in jo’ xjalam-uuch li Dios.

Naq eb’ li kok’al te’xtaw ru naq ke’yo’ob’tesiik jo’ xjalam-uuch li Dios, te’ok ajwi’ chixtawb’al ru naq te’roxloq’i lix junxaqalil ut xjunxaqalileb’ li ras riitz’in.

Kok’ k’anjel naru chi b’aanumank

• Tenq’aheb’ li kok’al chixyeeb’al “Ut laa’in, li Dios, kinyo’ob’tesi li winq jo’ injalam-uuch laa’in” k’iila sut (Moises 2:27). Ch’olob’ naq li qaChoxahil Yuwa’ kixyo’ob’tesi li qajunxaqalil re naq chanchanaq li re a’an. Patz’ reheb’ li kok’al naq te’xk’ut xcha’al lix junxaqalileb’ naq taaye xk’ab’a’, malaj b’icha junaq li b’ich chirix li qajunxaqalil, maare “Jolom, xb’een tel, xb’een aq, oqej” (B’ichleb’aal choq’ reheb’ li Kok’al, 129).

• Patz’ reheb’ li kok’al naq te’xk’utb’esi k’a’ru neke’ru chixb’aanunkil rik’in lix junxaqalileb’, ut eb’ lix komon te’xq’ehi k’a’ru yookeb’. Patz’ reheb’ li kok’al naq te’xwotz k’a’ut naq neke’xb’antioxi lix junxaqalil.

• Yiib’ xjalam-uuch li junxaqalil chiru hu ut setiheb’ lix cha’al. Jek’iheb’ li hu reheb’ li kok’al ut te’k’anjelaq sa’ komonil re te’xch’utub’ ut te’xtus li junxaqalil. Patz’ reheb’ li kok’al naq te’xwotz k’a’ru naru neke’xb’aanu rik’in li junjunq xcha’alil li junxaqalil. Wotz lix nawom aach’ool naq li qajunxaqalil kiyo’ob’tesiman jo’ xjalam-uuch li Dios.

Moises 3:2–3

Li hilob’aal kutan sant.

Eb’ li kok’al li neke’xtzol xsantob’resinkil li hilob’aal kutan naq toj kok’eb’ jwal ch’olch’o wi’chik naq te’xpaab’ li taqlahom a’in naq neke’k’i ut neke’laatz’o’ ru sa’eb’ xk’anjel.

Kok’ k’anjel naru chi b’aanumank

• Yaab’asi Moises 3:2–3, ut patz’ reheb’ li kok’al naq te’rab’i chi us k’a’ru kixb’aanu li Dios sa’ xwuq li kutan. K’ameb’ xjalam-uuch (malaj yiib’omaqeb’ xjalam-uuch) li k’a’aq re ru naqab’aanu sa’ domingo re xsantob’resinkil, ut li k’a’aq re ru naqab’aanu sa’ xkomoneb’ chik li kutan. Patz’ reheb’ li kok’al naq te’xch’utub’eb’ li jalam-uuch sa’ wiib’ ch’uut, jun re li domingo ut jun chik re xkomon li kutan. Ch’olob’ xyaalal k’a’ut naq aajel ru xsantob’resinkil li hilob’aal kutan.

• Wiib’ oxib’ kutan rub’elaj li tzolok, patz’ re jun ch’ina al ut xna’ xyuwa’ naq te’xkawresi rib’ re xwotzb’al k’a’ru neke’xb’aanu sa’ rochocheb’ re xsantob’resinkil li hilob’aal kutan. Patz’ reheb’ xkomon li kok’al naq te’xwotz k’a’ru neke’xb’aanu sa’ lix junkab’aleb’.

Xk’utb’al li tzol’leb’: Kok’al ak ninqeb’

Moises 2

Li Jesukristo kixyo’ob’tesi li ruchich’och’ chi b’eresinb’il xb’aan li qaChoxahil Yuwa’.

Oksi Moises 2 re xtenq’ankileb’ li kok’al chirilb’al naq li ruchich’och’ kiyo’ob’tesiman jo’ kiraj li Dios sa’ lix k’uub’anb’il na’leb’ li . Naq nakawileb’ li ch’ol a’in, k’a’ru li na’leb’ nachal sa’ laa k’a’uxl li naru naxkawob’resi xnawom xch’ooleb’ li kok’al chirix li yo’ob’tesink?

Kok’ k’anjel naru chi b’aanumank

• Tenq’aheb’ li kok’al chixk’oxlankil jo’q’e xe’xb’aanu junaq k’anjel chi ch’olob’anb’il xb’aan junaq chik kristiaan. Maare xe’xk’uub’ junaq xtib’el wa chi ch’olob’anb’il xb’aan xna’ xyuwa’ malaj li ras. Tz’iib’a Ani kiyo’ob’tesink re li ruchich’och’? chiru li pizarron ut patz’ reheb’ li kok’al naq te’xsik’ xsumenkil sa’ Moses 2:1. Ch’olob’ xyaalal naq li Jesukristo kixyo’ob’tesi li ruchich’och’ chi b’eresinb’il xb’aan li qaChoxahil Yuwa’.

• K’e jun raqal re Moises 2 reheb’ li junjunq chi kok’al li na’aatinak chirix jun kutan sa’ li yo’ob’tesink, ut patz’ reheb’ naq te’xyiib’ xjalam-uuch li ke’xyo’ob’tesi li qaChoxahil Yuwa’ ut li Jesukristo sa’ li kutan a’an. Patz’ reheb’ li kok’al naq te’xtaqsi chi kutankil lix jalam-uucheb’ ut te’xaqliiq jo’ chanru xtusulaleb’ li kutan re li yo’ob’tesink, ut chirix a’an patz’ reheb’ naq te’xk’ut chiru xkomoneb’ li kok’al k’a’ru xk’ulman sa’ li kutan xe’tz’aq. K’a’ru naqatzol chirix li qaChoxahil Yuwa’ ut li Jesukristo sa’ li seraq’ chirix li yo’ob’tesink?

Moises 2:26–27

Laj Adan ut xEva ke’yo’ob’tesiik jo’ xjalam-uuch li Dios.

Li ruchich’och’ tixk’e naab’al li na’leb’ ink’a’ us reheb’ li kok’al chirix lix junxaqalileb’. Li tzol’leb’ sa’ Moises 2:26–27, a’an jun chaab’il tenq’ re roxloq’onkil ut rilb’al li qajunxaqalil.

Kok’ k’anjel naru chi b’aanumank

• Ilomaq Moises 2:26–27 sa’ komonil. K’a’ru neke’xk’ut li raqal a’an chirix li qajunxaqalil?

• Yiib’ xjalam-uuch li junxaqalil chiru li pizarron ut patz’ reheb’ li kok’al naq te’xsik’ ru junaq xcha’al li tib’elej ut te’xtz’iib’a chixk’atq a’an k’a’ut naq neke’xb’antioxi li cha’alej a’an. Wotz laa b’antioxihom chirix laa junxaqalil ut ch’olob’ xyaalal naq kooyo’ob’tesiik jo’ xjalam-uuch li Dios.

Genesis 2:2–3

Li hilob’aal kutan a’an sant.

Eb’ li kok’al maare tento te’xch’olob’ chiruheb’ li ramiiw k’a’ut naq jalan lix b’aanuhomeb’ sa’ li kutan domingo. Genesis 2:2–3 naxk’ut k’a’ut naq li hilob’aal kutan a’an jun santil kutan. K’a’ru taab’aanu re xtenq’ankileb’ li kok’al chixtawb’al ru ut chixch’olob’ankil li tzol’leb’ a’in?

Kok’ k’anjel naru chi b’aanumank

• Chan ru naq xsantob’resinkil li hilob’aal kutan naxk’ut li qarahom ut qoxloq’ihom chiru li qaChoxahil Yuwa’ ut li Jesukristo? Tenq’aheb’ li kok’al chixyeeb’al li te’xye raj re jun li ramiiw re xch’olob’ankil k’a’ut naq neke’roxloq’i li qaChoxahil Yuwa’ ut li Jesukristo sa’ li kutan domingo. Ye reheb’ naq naru neke’roksi Genesis 2:2–3.

• K’e xhoonaleb’ li kok’al re te’xtz’iib’a chixjunil li naru neke’xb’aanu re xsantob’resinkil li hilob’aal kutan. Patz’ reheb’ li kok’al naq te’xwotz li xe’xtz’iib’a, ut waklesi xch’ooleb’ chixtz’iib’ankil xkomon naq te’rab’i li xe’xtz’iib’a xkomoneb’ li kok’al. Ye reheb’ li kok’al naq te’xk’am li xe’xtz’iib’a sa’ rochocheb’ ut te’ril naq te’raj xnawb’al k’a’ru naru te’xb’aanu sa’ li hilob’aal kutan.

Xb’oqb’aleb’ chi tzolok sa’ kab’l

Tenq’aheb’ li kok’al chixk’oxlankil chan raj ru te’xb’aanu junaq ch’ina k’anjel rik’ineb’ lix junkab’al jo’ li xe’xb’aanu sa’ li tzoleb’aal. Maare taatenq’aheb’ chixtz’iib’ankil chiru hu re naq taanaq sa’ xch’ooleb’.

Xkawresinkil qib’ jo’ aj k’utunel

Tenq’aheb’ li kok’al chiroksinkil lix chaab’il k’a’uxleb’. Naq eb’ li kok’al neke’xkab’la, neke’xyiib’ xjalam-uuch, malaj neke’xb’on li k’a’aq re ru sa’ li seraq’ malaj li na’leb’ yookeb’ chixtzolb’al, naab’al sut neke’xjultika chi chaab’il. Waklesi xch’ooleb’ chixwotzb’al sa’ xjunkab’aleb’ li k’a’ru neke’xyiib’. (Chi’ilmanq Li k’utuk jo’ li Kolonel, 25.)