27 diciembre–2 enero

Moises 1; Abraham 3

“A’in lin k’anjel ut lin loq’al”

Naq nakawil ru li k’a’ru kixye li Dios re laj Moises ut laj Abraham, k’oxla k’a’ru tixye reheb’ li kok’al. Chan ru taatenq’aheb’ chireek’ankil lix rahom li Dios choq’ reheb’?

Tz’iib’a li nakak’oxla

Xkanab’ankileb’ chi wotzok

Maare jun li b’ich tixtenq’aheb’ li kok’al chixjultikankil li yookeb’ chixtzolb’al. K’e chi eek’ank malaj tz’uyi b’ayaq li b’ich “Laa’in jun ralal li Dios” (B’ichleb’aal choq’ reheb’ li Kok’al, 2─3) ut eb’ li kok’al te’xq’ehi k’a’ru b’ichul. Tenq’aheb’ li kok’al chixk’oxlankil li “tenq’ank, tzolok,” ut “b’eek” neke’xb’aanu li xna’ xyuwa’ ut jalaneb’ chik kristiaan rik’ineb’.

Xk’utb’al li tzol’leb’: Kok’al toj ka’ch’ineb’ xyu’am

Moises 1:1–4, 6

Laa’in jun ralal li Dios.

K’a’ru nakatzol sa’ Moises 1:1─4, 6 chirix laa wanjik rik’in li qaChoxahil Yuwa’? Chan ru taatenq’aheb’ li kok’al chixtzolb’al k’a’ru naraj naxye li wank jo’ ralal xk’ajol li Dios?

Kok’ k’anjel naru chi b’aanumank

• Yaab’asi reheb’ li kok’al li kixye li Dios re laj Moises: “Laa’at li walal” (Moises 1:4). B’oq jun ch’ina al chi xaqliik chiruheb’ lix komon ut patz’ reheb’ naq te’xka’suti li taaye: “[Xk’ab’a’ li ch’ina al], laa’at jun ralal li Dios.” B’aanu a’an rik’in chixjunileb’ li kok’al.

• K’uteb’ xjalam-uuch kok’al ut patz’ ma ralal xk’ajoleb’ li Dios chixjunileb’ li kok’al a’an. Ye wi’chik naq chiqajunil ralalo li Dios. Patz’ reheb’ li kok’al naq te’ril rib’ sa’ lem ut te’xch’olob’ xyaalal naq a’aneb’ ajwi’ ralal xk’ajol li Dios.

• B’ichahomaq “Laa’in jun ralal li Dios” (B’ichleb’aal choq’ reheb’ li Kok’al, 2–3). Patz’ reheb’ li kok’al naq te’b’onoq sa’ li perel re kok’ k’anjel re li xamaan a’in, ut oksi re aatinak chirix li yaal naxk’ut li b’ich a’in.

  

  Li Kristo ut li Yo’ob’tesink, xb’aan laj Robert T. Barrett

Abraham 3:22–28

Kinwan chaq rik’in lin Choxahil Yuwa’ naq maji’ ninyo’la sa’ ruchich’och’.

Xnawb’al naq kiwan chaq qayu’am naq maji’ nokoyo’la sa’ ruchich’och’ naru nokoxtenq’a chixsik’b’al ru li k’a’ru nakana chi junelik. Naq nakatzol Abraham 3:22–28, k’oxla chan ru taak’ut chiruheb’ li kok’al b’ar neke’chal chaq.

Kok’ k’anjel naru chi b’aanumank

• Oksi “Acerca del Antiguo Testamento” (sa’ Relatos del Antiguo Testamento) re aatinak rik’ineb’ li kok’al chirix li yu’am naq maji’ nokochal sa’ ruchich’och’. Chirix a’an, patz’ reheb’ li kok’al naq te’xwotz li seraq’ a’an aawik’in. K’a’ut naq li qaChoxahil Yuwa’ kooxtaqla chaq sa’ li ruchich’och’? Tenq’aheb’ li kok’al chixtawb’al xsumenkil a’an sa’ Abraham 3:25.

• B’ichahomaq sa’ komonil jun li b’ich na’aatinak chirix lix k’uub’anb’il na’leb’ li Dios, jo’ “Tintaaqe li kixk’uub’ choq’ we” [B’ichleb’aal choq’ reheb’ li Kok’al, 86–87]). Tenq’aheb’ chixtawb’al ru li na’leb’ sa’ raatinul li b’ich.

Moises 1:39

Lin Choxahil Yuwa’ naraj naq tinwulaq wi’chik chi wank rik’in a’an.

Chan ru naq li na’leb’ sa’ Moises 1:39 narosob’tesi laa yu’am? K’a’ru taab’aanu re naq eb’ li kok’al te’xk’ul ajwi’ li osob’tesiik a’an?

Kok’ k’anjel naru chi b’aanumank

• Yaab’asi, “a’in lin k’anjel” ut “lix yu’am chi junelik li winq” li wankeb’ sa’ Moises 1:39, ut tenq’aheb’ li kok’al chixka’sutinkileb’. Ye reheb’ li kok’al k’a’ru li k’anjel nakab’aanu wulaj wulaj. K’ut chiruheb’ naq lix k’anjel li qaChoxahil Yuwa’ a’an qatenq’ankil chixk’ulb’al li junelik yu’am, li naraj naxye naq toowulaq jo’ a’an ut toowanq wi’chik rik’in a’an.

• B’oq junaq na’b’ej yuwa’b’ej chi wulak sa’ li tzoleb’aal ut tixwotz k’a’ru nareek’a naq li ralal nawulak sa’ kab’l (maare naq na’el sa’ eskweel malaj naraqe’ chaq xmision). Oksi li na’leb’ a’an re xk’utb’al chiruheb’ li kok’al naq li qaChoxahil Yuwa’ naraj chi tz’aqal naq tooq’ajq rik’in a’an.

Xk’utb’al li tzol’leb’: Kok’al ak ninqeb’

Moises 1:4, 30, 37–39; Abraham 3:22–28

Laa’in jun ralal li Dios, ut a’an naraj intenq’ankil chi q’ajk rik’in a’an.

Moises 1:4, 37–39 ut Abraham 3:22–28 neke’xk’ut li yaal chirix li qawanjik rik’in li Dios ut k’a’ut naq kooxtaqla chaq sa’ li ruchich’och’. K’oxla chan ru taatenq’aheb’ li kok’al chitxtzolb’al li na’leb’ a’in.

Kok’ k’anjel naru chi b’aanumank

• Yaab’asi Moises 1:4, 37–39 ut Abraham 3:24–25 reheb’ li kok’al. K’e xhoonaleb’ re naq te’patz’oq ut te’xwotz li aatin nawulak chiruheb’ sa’eb’ li raqal. K’a’ru naqatzol sa’eb’ li raqal a’an chirix li qaChoxahil Yuwa’? chiqix laa’o?

• K’ut chiruheb’ li kok’al xjalam-uucheb’ lix yo’ob’tesihom li qaChoxahil Yuwa’. Yaab’asi Moises 1:30, ut ch’olob’ naq laj Moises kixpatz’ re li Dios k’a’ruheb’ aj-e li yo’ob’tesihom a’an. Tenq’aheb’ li kok’al chixsik’b’al sa’ li raqal 39 k’a’ru kixsume li Dios. Ch’olob’ xyaalal naq li rajom li Dios a’an xtenq’ankileb’ chixjunil li kok’al chixk’ulb’al li junelik yu’am.

• Tenq’aheb’ li kok’al chixk’oxlankil jo’q’e tento raj “te’xb’aanu chixjunil li k’a’aq re ru li b’arwan tixtaqlaheb’ wi’ li Qaawa’ lix Dios” (Abraham 3:25). Patz’ reheb’ naq te’xtzol malaj te’aatinaq chirix li te’xb’aanu raj. Chan ru tooxtenq’a li Kolonel naq ink’a’ us li naqasik’ ru xb’aanunkil?

Moises 1:12–26

Naru tinnumtaaq sa’ xb’een li aaleek naxk’e laj Satanas.

Naq yooqat chixtzolb’al Moises 1:12–26, k’e reetal k’a’ru kixb’aanu laj Moises re numtaak sa’ xb’een laj Satanas. Chan ru naq lix b’aanuhom laj Moises tixtenq’aheb’ li kok’al naq neke’aaleek?

Kok’ k’anjel naru chi b’aanumank

• Wotz li k’a’ru kixk’ul laj Moises sa’ Moises 1:12–26 rik’in aawaatin, malaj patz’ re junaq ch’ina al naq tixwotz a’an (chi’ilmanq ajwi’ li video “Soy un hijo de Dios” sa’ [ChurchofJesusChrist.org]). Patz’ reheb’ li kok’al naq te’xtz’il rixeb’ li raqal a’an re te’xtzol chan ru naq laj Moises kinumta sa’ xb’een laj Satanas. (Wi neke’raj xtenq’, k’e li raqal 13, 15, 18, 20–22, 26.)

• K’am jun siir li k’anjeleb’aal (malaj xjalam-uuch k’anjeleb’aal), ut tz’iib’a chiru li junjunq chi k’anjeleb’aal jun na’leb’ re numtaak sa’ xb’een li aaleek (maare tijok, b’ichank, rilb’aleb’ li loq’laj hu, malaj tenq’ank). Patz’ reheb’ li kok’al naq te’xchap junaq reheb’ li k’anjeleb’aal ut te’xye jo’q’e tooxtenq’a li na’leb’ wan chiru. Ilomaq sa’ komonil li raqal 25–26, ut ch’olob’ xyaalal naq li Dios tooxtenq’a chi numtaak sa’ xb’een li aaleek.

Abraham 3:22–28

Kinwan chaq rik’in lin Choxahil Yuwa’ naq maji’ ninyo’la sa’ ruchich’och’.

Eb’ li raqal a’in li neke’xye naq laj Abraham kiril chaq li qayu’am naq maji’ nokoyo’la sa’ ruchich’och’ naru naxtenq’aheb’ li kok’al chixsumenkileb’ li patz’om “B’ar nikinchal chaq?” ut “K’a’ut naq wankin arin?” Chan ru taatenq’aheb’ chixtawb’al xsumenkileb’?

Kok’ k’anjel naru chi b’aanumank

• Chiru li pizarron, tz’iib’aheb’ patz’om sumenb’ileb’ sa’ Abraham 3:22–28, maare K’a’ru xk’ulman chaq sa’ li qayu’am naq maji’ nokoyo’la? Ani xwan chaq aran? K’a’ut naq xyo’ob’tesiman li ruchich’och’? Patz’ reheb’ li kok’al naq te’rileb’ li raqal re xtawb’aleb’ xsumenkil li patz’om.

• Wi wan junaq k’uula’al sa’ laa teep, patz’ reheb’ lix na’ xyuwa’ naq te’xk’am sa’ li tzoleb’aal ut te’xwotz li neke’reek’a chirix xk’ulunik li k’uula’al sa’ li ruchich’och’. (Naru ajwi’ nakak’ut xjalam-uuch junaq k’uula’al.) Ye reheb’ li kok’al b’ar xwan chaq xmusiq’ li k’uula’al naq maji’ nachal sa’ ruchich’och’. K’a’ut naq aajel ru naq li k’uula’al a’in tixtzol naq a’an jun ralal li Dios?

• B’ichahomaq li b’ich chirix lix na’leb’ li Dios choq’ qe , maare “Yo’yo lin Dios ninnaw” malaj “Tintaaqe li kixk’uub’ choq’ we” (B’ichleb’aal choq’ reheb’ li Kok’al, 8, 86–87). Patz’ reheb’ li kok’al naq te’xyiib’ xjalam-uuch li raatinul li b’ich. Patz’ reheb’ naq te’roksi lix jalam-uuch re xk’utb’al chirib’ileb’ rib’ li na’leb’ neke’xye li b’ich.

Xb’oqb’aleb’ chi tzolok sa’ kab’l

K’oxla chan ru naq li tzolok xeb’aanu sa’ li Tzoleb’aal reheb’ li Kok’al naru naxwakl

esi xch’ooleb’, naxtenq’aheb’, malaj naxtiikisiheb’ li kok’al chi tzolok sa’eb’ li rochoch. Maare taapatz’ reheb’ li kok’al naq te’xwotz li perel re kok’ k’anjel re li xamaan a’in reheb’ lix junkab’al.

Xkawresinkil qib’ jo’ aj k’utunel

Eb’ li kok’al neke’tzolok chi jalan jalanq ru. Eb’ li kok’al neke’xyal xsahil li tzolok rik’in jalan jalanq numsihom. B’aanu li k’a’ru taatenq’anq reheb’ chireek’asinkileb’ rib’, chiroksinkileb’ chixjunil lix seeb’aleb’, ut chixyalb’al ak’il k’a’aq re ru. (Chi’ilmanq Li k’utuk jo’ li Kolonel, 25–26.)