3–9 enero

Genesis 1–2; Moises 2–3; Abraham 4–5

“Sa’ xtiklajik chaq kixyo’ob’tesi li Dios li choxa ut li ch’och’ ”

Us ta ak xawil resil li Yo’ob’tesink, toj wan li naru taatzol sa’ li loq’laj hu. Tz’aama naq li Santil Musiq’ej tatxtenq’a chixtawb’al xkomon chik aana’leb’.

Tz’iib’a li nakak’oxla

K’a’jo’ xchaq’alil ru li ruchich’och’, jo’kan naq ch’a’aj xk’oxlankil naq sa’ xtiklajik “maak’a’ wan chaq chiru,” “maak’a’ xsa’ ut sachenaq” (Genesis 1:2; Abraham 4:2). Li resil li Yo’ob’tesink naxk’ut chiqu naq li Dios naru tixtuqub’ ru li k’a’ru maak’a’ xtuqub’ankil. Us xnawb’al a’an naq moko tuqtu ta li qayu’am. Li qaChoxahil Yuwa’ ut li Jesukristo, a’aneb’ aj Yo’ob’tesinel, ut maji’ choyb’il lix k’anjeleb’. Naq q’ojyin ru li qayu’am, naru te’xkutanob’resi. Naq yoo li kaq-sut-iq’ sa’ li qayu’am, naru te’xch’anab’. Neke’taqlan sa’ xb’een li yiib’anb’il wi’ li k’a’aq re ru, ut wi laa’o ajwi’ too’ab’inq chiruheb’, naru te’xtz’aqob’resi qu re toowulaq jo’ tento raj toowanq. A’in ajwi’ li wank chi yo’ob’tesiik sa’ xjalam-uuch li Dios, sa’ rilob’aal a’an (chi’ilmanq Genesis 1:26). Naru toowulaq jo’ chanru a’an: k’eeb’il ut taqsinb’il qaloq’al ut qachoxahilal.

Re xtzolb’al k’a’ru wan sa’ li hu Genesis, chi’ilmanq “Genesis” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Genesis 1:1–25; Moises 2:1–25; Abraham 4:1–25

Chi b’eresinb’il xb’aan li qaChoxahil Yuwa’, li Jesukristo kixyo’ob’tesi li ruchich’och’.

Li Elder D. Todd Christofferson kixye, “Us ta ink’a’ naqanaw chi tz’aqal chan ru xyiib’aman, naqanaw naq xb’aanuman chi k’uub’anb’il, ut naq li Dios Yuwa’b’ej kixb’eresi, ut li Jesukristo kixb’aanu” (“K’a’ru aj-e li sumlaak, k’a’ru aj-e li junkab’al,” Jolomil ch’utub’aj-ib’ re abril 2015). Us ta ink’a’ naqanaw chi tz’aqal chan ru xyiib’aman li ruchich’och’, k’oxla li k’a’ru nakatzol chirix li Yo’ob’tesink rik’in li xk’utb’esi li Dios sa’ Genesis 1:1–25; Moises 2:1–25; ut Abraham 4:1–25. K’a’ru juntaq’eeteb’ wi’ li raqal a’in? K’a’ru jalaneb’ wi’? K’a’ru nakak’oxla chirix li qaChoxahil Yuwa’ ut li Jesukristo naq yookat chi tzolok chirix li Yo’ob’tesink?

Chi’ilmanq ajwi’ Tzol’leb’ ut Sumwank 101:32–34.

Li Yo’ob’tesink, xb’aan li xJoan Hibbert Durtschi

Genesis 1:27–28; 2:18–25; Moises 3:18, 21–25; Abraham 5:14–19

Li sumlaak wan wiʼ jun winq rikʼin jun ixq, aʼan kʼojobʼanbʼil xbʼaan li Dios.

“Ke’sumub’aak laj Adan ut li xEva choq’ re li yu’am a’in jo’ ajwi’ choq’ re li junelik q’e kutan xb’aan lix wankil li junelikil tijonelil” (Russell M. Nelson, “Lecciones que aprendemos de Eva,” Liahona, enero 1988). K’a’ut naq aajel ru xnawb’al a’an? K’oxla li na’leb’ a’in naq nakawil Genesis 1:27–28; 2:18–25; Moises 3:18, 21–25; ut Abraham 5:14–19. Wi nakawaj xtawb’al xkomon chik aana’leb’ chirix li sumlaak jo’ naraj li Dios, ileb’ ut k’oxlaheb’ li raqal li tz’iib’anb’ileb’ rub’el a’in. K’a’ru eek’asinb’ilat chixb’aanunkil xb’aan li nakatzol re xkawob’resinkil laa sumlajik malaj re xkawresinkil aawib’ chi sumlaak junaq kutan?

Chi’ilmanq ajwi’ Mateo 19:4–6; 1 Korintios 11:11; Linda K. Burton, “Sa’ komonil tootaqe’q,” Jolomil ch’utub’aj-ib’ re abril 2015; “Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org.

Genesis 2:2–3; Moises 3:2–3; Abraham 5:2–3

Li Dios kirosob’tesi ut kixsantob’resi li hilob’aal kutan.

Li Dios kixsantob’resi li hilob’aal kutan, ut naxpatz’ naq taqak’uula xsantilal. Li Elder David A. Bednar kixye naq li hilob’aal kutan, a’an re li Dios, jun loq’laj kutan xaqab’anb’il re taqaloq’oni a’an ut re te’qak’ul ut te’qak’oxla lix yeechi’ihom q’axaleb’ ninq ut loq’ (chi’ilmanq “Eb’ li yeechi’ihom q’axaleb’ ninq ut loq’,” Jolomil ch’utub’aj-ib’ re octubre 2017). Chan ru taawoksi li aatin a’in ut Genesis 2:2–3; Moises 3:2–3; malaj Abraham 5:2–3 re xch’olob’ankil k’a’ut naq nakawoxloq’i li hilob’aal kutan? K’a’ru ak xatrosob’tesi wi’ li Qaawa’ xb’aan xsantob’resinkil lix hilob’aal kutan?

Chi’ilmanq ajwi’ Isaias 58:13–14; Tzol’leb’ ut Sumwank 59:9–13; “El día de reposo es una delicia” (video), ChurchofJesusChrist.org.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 1:1–25; Moises 2:1–25; Abraham 4:1–25.K’a’ru taab’aanu re naq te’saho’q xch’ool laa junkab’al naq textzoloq chirix li Yo’ob’tesink? Maare taak’ameb’ chirix kab’l re teesik’ li k’a’ru yo’ob’tesinb’il sa’ jalan jalanq xtasalil li Yo’ob’tesink—eb’ li chahim, eb’ li toon che’, malaj eb’ li xul. Naru ajwi’ taak’ut xjalam-uuch li k’a’ru kiyo’ob’tesiman, ut taapatz’ re laa junkab’al naq te’xtusub’eb’ ru chirix naq teeril li resil li Yo’ob’tesink sa’ komonil. K’a’ru neke’xk’ut chiqu li yo’ob’tesihom a’in chirix li qaChoxahil Yuwa’ ut li Jesukristo?

Genesis 1; Moises 2; Abraham 4.Re tzolok chirix li Yo’ob’tesink, naru taapatz’ re laa junkab’al naq te’ril Genesis 1 malaj Moises 2, ut naq te’rajla jarub’ sut naxye li Dios naq “chaab’il” lix yo’ob’tesihom. Rik’in li na’leb’ a’an, chan ru tento taqileb’ lix yo’ob’tesihom li Dios—ut chan ru tento taqil qib’? K’a’ru naqatzol rik’in li k’a’ru tz’iib’anb’il chirix li Yo’ob’tesink sa’ Abraham 4?

Genesis 1:26–27; Moises 2:26–27; Abraham 4:26–27.K’a’ut naq nim xwankil xnawb’al naq yo’ob’tesinb’ilo sa’ xjalam-uuch li Dios? Naq naqanaw li na’leb’ a’an, k’a’ru naqeek’a chiqix, chirixeb’ li qas qiitz’in, ut chirix li Dios?

Wi wankeb’ aakok’al toj ka’ch’ineb’, naru teeril Moises 2:27 ut teeb’aanu li ch’ina b’atz’unk a’in: K’ut xjalam-uuch li qaChoxahil Yuwa’ ut li Jesukristo, maare li jalam-uuch 90 sa’ li Hu reheb’ li Jalam-uuch re li Evangelio (2009), ut patz’ re laa junkab’al naq chi junjunqil te’xk’ut chi ru’uj ruq’ jun xcha’al lix junxaqalil li qaChoxahil Yuwa’ malaj li Jesukristo. Toja’ naq chixjunileb’ chik tex’k’ut chi ru’uj ruq’ b’ar wan li cha’alej a’an chiru lix junxaqalileb’ a’an.

Genesis 1:28; Moises 2:28; Abraham 4:28.“Lix taqlahom li Dios naq eb’ li ralal xk’ajol te’k’ihanq ut te’xnujob’resi li ruchich’och’, toj xaqxo xwankil” (“Li Junkab’al: Jun Jek’inb’il Aatin choq’ re li Ruchich’och’,” ChurchofJesusChrist.org). Eb’ li komon sa’ li junkab’al naru te’xyal xch’olob’ankil li naqapaab’ chirix li taqlahom a’in, chanchan naq yookeb’ chixyeeb’al re li ani ink’a’ naxnaw malaj ink’a’ naxpaab’ li na’leb’ a’an.

Genesis 1:28; Moises 2:28; Abraham 4:28.K’a’ru naraj naxye li “awa’b’ejink … sa’ xb’een li junjunq li k’a’ru yo’yo li na’eek’an chiru li ch’och’ ”? (chi’ilmanq ajwi’ Tzol’leb’ ut Sumwank 59:16–21). Jo’ junkab’al, chan ru taqab’aanu li teneb’anb’il sa’ qab’een sa’ rilb’al chi us li ruchich’och’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Raab’ilin xb’aan li Dios sa’ choxa,” B’ichleb’aal choq’ reheb’ li Kok’al, 16–17

Xkawresinkil qib’ jo’ aj k’utunel

Juntaq’eetaheb’ li loq’laj hu rik’in li qayu’am. Chirix rilb’al ru jun raqal sa’ li loq’laj hu, patz’ re laa junkab’al naq te’xb’aanu sa’ xyu’ameb’ li k’a’ru naxye. K’a’ru naxye Moises 3:1–3 li tooxtenq’a chiroxloq’inkil li hilob’aal kutan rajlal xamaan? (Chi’ilmanq Li k’utuk jo’ li Kolonel, 21.)

Li Yo’ob’tesink, xb’aan li xAnnie Henrie Nader