Laj Adan ut li xEva, xb’aan laj Douglas M. Fryer

10–16 enero

Genesis 3–4; Moises 4–5

Lix t’anik laj Adan ut li xEva

Naq nakatzol Genesis 3–4 ut Moises 4–5, k’oxla k’a’ru naraj li Qaawa’ xk’utb’al chawu. Tz’iib’aheb’ li na’leb’ a’an jo’ ajwi’ li musiq’ejil na’leb’ nakak’ul, ut k’oxlaheb’ chiru li xamaan.

Tz’iib’a li nakak’oxla

Sa’ xtiklajik, maare chanchan naq moko chaab’il ta li resil laj Adan ut li xEva. Ke’isiik chaq laj Adan ut li xEva sa’ li awimq Eden. Ke’kanab’aak sa’ jun ruchich’och’ natam wi’ li rahilal ut li kamk (chi’ilmanq Genesis 3:16–19). Ke’isiik chaq ajwi’ chiru rilob’aal lix Choxahil Yuwa’. A’b’anan, b’antiox re lix k’ojlajik wi’chik li yaal rik’in li profeet aj Jose Smith, naqanaw naq li resil laj Adan ut li xEva moko ra ta; naxk’e b’an li qayo’onihom—ut aajel ajwi’ ru sa’ li na’leb’ kixk’uub’ li Dios choq’ reheb’ li ralal xk’ajol.

K’a’jo’ xch’ina-usal chaq li awimq Eden. A’b’an toj wan li k’a’ru ajb’il chaq ru xb’aan laj Adan ut li xEva. Ke’raj ru k’iik—laa’o ajwi’ naqaj ru a’an. Ki’ajman naq xb’een te’elq chaq sa’ li awimq Eden re naq te’ruuq chi ok sa’ li b’e re sutq’iik rik’in li Dios ut re wulak jo’ chanru a’an. Ki’ajman naq te’yale’q rix, te’ok sa’ majelal, te’xtzol xjalb’al xk’a’uxl, ut te’xpaab’ li Kolonel. Lix tojb’al rix li maak xb’aan li Kolonel tixtenq’aheb’ chi k’iik ut chixk’ulb’al “li sahil ch’oolejil re lix tojb’al qix” (Moises 5:11). Chi jo’kan, naq nakawil resil lix t’anik laj Adan ut li xEva, maak’e reetal li ch’a’ajkilal, k’e b’an reetal li k’a’ru us—maak’e reetal naq ke’isiik chaq sa’ lix hilob’aal na’aj, k’e b’an reetal li loq’al naru taqak’ul b’antiox reheb’.

Li na’leb’ re xtzolb’aleb’ li loq’laj hu aajunes

Genesis 3:1–7; Moises 4; 5:4–12

Aajel ru li t’ane’k sa’ li na’leb’ kixk’uub’ li Dios re xtojb’aleb’ rix li ralal xk’ajol.

Naq ke’t’ane’ laj Adan ut li xEva, ki’ok li kamk re tz’ejwalej ut re musiq’ej sa’ li ruchich’och’. Ki’ok ajwi’ li yalb’a-ix, li rahilal, ut li maak. Anchal naab’al li rahilal naqak’ul xb’aan li t’ane’k. A’b’an ki’ajman ru li t’ane’k sa’ li na’leb’ kixk’uub’ li qaChoxahil Yuwa’ re xtojb’aleb’ rix ut xtaqsinkileb’ xloq’al li ralal xk’ajol sa’ xk’ab’a’ “li mayej re li Junaj Yo’lajenaq chiru li Yuwa’b’ej” (Moises 5:7). Naq nakawil Genesis 3:1–7; Moises 4; 5:4–12, k’a’ru nakataw li nakatxtenq’a chixtawb’al ru li t’ane’k ut chan ru naq lix tojb’al rix li maak xb’aan li Kristo nanumta sa’ xb’een? Eb’ li patz’om a’in maare te’xk’e aana’leb’:

• K’a’ru ke’xk’ul laj Adan ut li xEva naq ke’t’ane’? K’a’ru nink’ul laa’in?

• K’a’ut naq laj Adan ut li xEva ke’xq’axtesi xmayejeb’? K’a’ru neke’reetali li mayej a’an? K’a’ru nintzol rik’in li raatin li anjel sa’eb’ li raqal a’in?

• K’a’ut naq “ke’saho’ xch’ool” laj Adan ut li xEva chirix naq ke’t’ane’? K’a’ru nintzol sa’ li esil a’in chirix li na’leb’ kixk’uub’ li Dios re xtojb’al wix rik’in li Jesukristo?

B’antiox re lix Hu laj Mormon ut xkomoneb’ chik li k’utb’esinb’il na’leb’ re li qakutankil, wan xkomon chik li qanawom chirix li t’ane’k. K’oxla li k’a’ru kixk’ut laj Lehi chiru lix junkab’al chirix laj Adan ut li xEva sa’ 2 Nefi 2:15–27. K’a’ru kixk’ut laj Lehi li naxch’olob’ k’a’ru kik’ulman sa’ li awimq Eden, ut k’a’ut naq aajel ru?

Chi’ilmanq ajwi’ 1 Korintios 15:20–22; Mosiah 3:19; Alma 12:21–37; Tzol’leb’ ut Sumwank 29:39–43; Eb’ lix Raqalil li Paab’aal 1:3; Dallin H. Oaks, “Li nimla k’uub’anb’il na’leb’,” Jolomil ch’utub’aj-ib’ re abril 2020; Dallin H. Oaks, “Taawanq chixka’pak’alil chixjunil li k’a’aq re ru,” Jolomil ch’utub’aj-ib’ re abril 2016; Jeffrey R. Holland, “Raqleb’ aatin, rahok, uxtaan tz’aqal sa’ junajil,” Jolomil ch’utub’aj-ib’ re abril 2015.

Elk chaq sa’ Eden, xb’aan li xAnnie Henrie Nader

Genesis 3:16; Moises 4:22

K’a’ru naraj naxye naq laj Adan “taataqlanq sa’ xb’een” li xEva?

Xb’aan naq ink’a’ neke’xtaw ru li raatinul li raqal a’in, wankeb’ li neke’xk’oxla naq maak’a’ reek’ naq li b’eelomej tixrahob’tesi li rixaqil. Sa’ li qakutan, eb’ lix profeet li Qaawa’ neke’xk’ut chiqu naq li b’eelomej najolomin rik’in tiikilal sa’ li ochoch, a’ut junaqik xwankil li rixaqil jo’ rochb’een (chi’ilmanq “Li Junkab’al: Jun Jek’inb’il Aatin choq’ re li Ruchich’och’ ” [ChurchofJesusChrist.org]). Li Elder Dale G. Renlund ut li Hermana Ruth Lybbert Renlund ke’xch’olob’ naq jun b’eelomej li tiik xch’ool “tixsik’ k’anjelak chiru li ras riitz’in; tixk’e reetal lix majelal ut tixpatz’ xkuyb’al xmaak; taab’antioxinq sa’ junpaat; tixk’oxla li rajomeb’ lix komon; tixk’ul sa’ xb’een li teneb’ank re “xk’eeb’al li kʼaʼru naʼajman ru re li yuʼam aʼin, ut xkʼeebʼal xkolbʼalebʼ rix” lix junkabʼal; taaroxloq’i chi tz’aqal li rixaqil. … Taarosob’tesi lix junkab’al” (The Melchizedek Priesthood: Understanding the Doctrine, Living the Principles [2018], 23).

Moises 5:4–9, 16–26

Li Dios tixk’ulub’a lin mayej wi tinq’axtesi chi anchal inch’ool ut chi wank inpaab’aal.

Laj Adan ut li xEva ke’xtzol naq li mayej re k’atb’il xul nareetali lix mayej li Kristo re xtojb’al qix, ut “ke’xk’e chi nawmank chixjunil li k’a’aq re ru [a’in] chiruheb’ li ralal ut eb’ lix rab’in” (Moises 5:12). Naq nakawil Moises 5:4–9, 16–26, k’e reetal li ke’xk’oxla li ralaleb’, laj Kain ut laj Abel, chirix xq’atesinkil li mayej. K’a’ut naq li Qaawa’ kixk’ulub’a xmayej laj Abel, a’b’an ink’a’ li re laj Kain?

K’a’ru natxpatz’ li Qaawa’ naq taamayeja laa’at? Ma wan li na’leb’ sa’ Moises 5:4–9, 16–26 li naxjal li nakak’oxla chirixeb’ li mayej a’an?

Chi’ilmanq ajwi’ Salmos 4:5; 2 Korintios 9:7; Omni 1:26; 3 Nefi 9:19–20; Moroni 7:6–11; Tzol’leb’ ut Sumwank 97:8; Jeffrey R. Holland, “K’ehomaq reetal lix Karneer li Dios,” Jolomil ch’utub’aj-ib’ re abril 2019.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Genesis 3; Moises 4.K’a’ru taab’aanu re xtenq’ankil laa junkab’al chixtawb’al ru lix t’anik laj Adan ut li xEva? Naru taawisi reetalileb’ li jalam-uuch sa’ Adan y Eva” (sa’ Relatos del Antiguo Testamento), ut taaseteb’. Sa’ junkab’al, teetusub’eb’ li jalam-uuch naq yookex chi aatinak chirix li k’a’ru ke’xk’ul laj Adan ut li xEva. K’a’ru nink’ul laa’in? Naru taawisi reetalileb’ li jalam-uuch “The Fall” (ChurchofJesusChrist.org)

Moises 4:1–4.K’a’ru naqatzol sa’eb’ li raqal a’in chirix li Dios, li Jesukristo, ut laj Satanas? K’a’ut naq aajel ru li xtaql ch’oolej sa’ li na’leb’ kixk’uub’ li Dios, ut k’a’ut naq laj Satanas naraj xsachb’al?

Moises 5:5–9.K’a’ru kixtaqla li Dios naq te’xb’aanu laj Adan ut li xEva re naq te’xk’oxla rajlal li Kolonel? K’a’ru naxk’e li Dios re qatenq’ankil chixk’oxlankil rajlal li Kolonel?

Moises 5:16–34.K’a’ru naraj naxye li wank jo’ “aj ilol re li qiitz’in”? K’a’ru taqab’aanu re naq taqil qib’ chiqib’il qib’ chi us sa’ li qajunkab’al?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinsik’ ru li us,” B’ichleb’aal choq’ reheb’ li Kok’al, 82–83

Xkawresinkil aawib’ chi tzolok

Oksiheb’ li tenq’ sa’eb’ li loq’laj hu. Naq nakatzoleb’ li loq’laj hu, ileb’ li ch’olob’anel aatin, li K’utul Raqal reheb’ li Loq’laj Hu, ut xkomoneb’ chik li tenq’ re xtawb’al xkomon laa na’leb’.

Eetalil, xb’aan laj Walter Rane