27 diciembre–2 enero

Moises 1; Abraham 3

“A’in lin k’anjel ut lin loq’al”

Naq nakawil li kixye li Dios re laj Moises ut laj Abraham, k’oxla k’a’ru naxye ajwi’ aawe laa’at.

Tz’iib’a li nakak’oxla

Li Santil Hu natikla rik’in li aatin “Sa’ xtiklajik chaq li Dios kixyo’ob’tesi li choxa ch’och’ ” (Genesis 1:1). A’b’an k’a’ru kiwan naq toj maji’aq nayo’ob’tesiik a’an? Ut k’a’ut naq li Dios kixyo’ob’tesi chixjunil a’an? Rik’in xtz’uumal re li profeet aj Jose Smith, li Qaawa’ kixsumeheb’ li patz’om a’in.

A’an kixk’e qe li resil jun lix k’utb’esinb’il matk’ laj Abraham, b’ar wi’ kiril naq koowan jo’ musiq’ej “rub’elaj naq kiwan li ruchich’och’ ” (chi’ilmanq Abraham 3:22–28). Li Qaawa’ kixk’e ajwi’ qe jun musiq’anb’il xjaltesinkil ru li waqib’ ch’ol sa’ xtiklajik li hu Genesis, a’an lix Hu laj Moises yeeb’il re—li ink’a’ natikla rik’in “sa’ xtiklajik.” Natikla b’an rik’in jun seraq’ chirix li k’a’ru kixnumsi laj Moises li nokoxtenq’a chixtawb’al ru li seraq’ chirix li Yo’ob’tesink. Us xtikib’ankil xtzolb’al li Najter Chaq’rab’ sa’eb’ li loq’laj hu a’in re roso’jikeb’ li kutan, xb’aan naq neke’aatinak chirixeb’ li aajel ruhil patz’om li tooxtenq’a sa’ li tzolok: Ani li Dios? Aniho laa’o? K’a’ru lix k’anjel li Dios, ut k’a’ru li qak’anjel sa’ a’an? Naru naqileb’ li ch’ol sa’ xtiklajik li hu Genesis jo’ li kixye li Qaawa’ re laj Moises re xsumenkil lix tz’aam: “Chawuxtaana ru laa moos, at Dios, ut chaye we chirix li ruchich’och’ a’in, ut eb’ li ani wankeb’ chi sa’, ut jo’kan ajwi’ chirix li choxa” (Moises 1:36).

Li na’leb’ re xtzolb’aleb’ li loq’laj hu aajunes

Moises 1

Jo’ jun ralal li Dios, toj sa’ choxa taawulaq inb’e.

Li Awa’b’ej Dieter F. Uchtdorf kixye, “Naab’al re lix sachik li qana’leb’ sa’ li yu’am a’in nachal yal xb’aan naq ink’a’ naqataw ru aniho laa’o” (“El reflejo en el agua” [Transmisión de la capacitación del Sistema Educativo de la Iglesia, 1 noviembre, 2009], ChurchofJesusChrist.org). Li qaChoxahil Yuwa’ naxnaw a’in, ut laj Satanas naxnaw ajwi’. Naq xb’een wa ki’aatinak li Dios rik’in laj Moises, a’an kixye “laa’at li walal” ut “laa’at wankat choq’ xjalam-uuch li Junaj Yo’lajenaq chiwu” (Moises 1:4, 6). Chi junpak’al chik, laj Satanas kixye “ralalat li winq” re laj Moises (Moises 1:12). Chan raj ru laa yu’am wi ta nakak’oxla naq laa’at yal “jun ralal [malaj xrab’in] li winq” jo’ naraj laj Satanas? Chan ru na’osob’tesiik laa yu’am naq nakanaw ut najultiko’ aawe naq laa’at jun ralal li Dios?

Ma wan junaq raqal malaj aatin sa’ Moises 1 li naxk’e chanaw naq wan aaloq’al?

Li Kristo ut li Yo’ob’tesink, xb’aan laj Robert T. Barrett

Moises 1:12–26

Naru tintz’eqtaana lix wankil laj Satanas.

Jo’ k’utb’il sa’ Moises 1, us ta naqak’ul ninqi musiq’ejil na’leb’, toj too’aaleeq. Relik chi yaal, laj Satanas naxyal qaalenkil re naq taawiib’anq qach’ool chirix li xqanumsi malaj xqatzol rik’in li musiq’ejil na’leb’. Naq nakawil li kixye laj Moises re laj Satanas sa’eb’ li raqal 12–26, k’a’ru nakatzol li tatxtenq’a re naq tatkanaaq chi tiik sa’ lix nawom aach’ool? K’a’ru nakatxtenq’a chixtz’eqtaanankil li aaleek xb’aan laj Satanas? (che’ilmanq li raqal 15 ut 18).

Rik’in li nakatzol, naru taak’uub’ chan ru taatz’eqtaana li aaleek. Maare taachoy li aatin a’in: “Naq nink’ul li aaleek re , ruuchil a’an, laa’in .”

Chi’ilmanq ajwi’ Mateo 4:1–11; Helaman 5:12; Gary E. Stevenson, “Minaab’alaq’i,” Jolomil ch’utub’aj-ib’ re octubre 2019; “Soy un hijo de Dios” (video), ChurchofJesusChrist.org.

Moises 1:27–39; Abraham 3

Lix k’anjel ut lix loq’al li Dios, a’an intenq’ankil chixk’ulb’al li junelik yu’am.

Chirix naq ke’k’utb’esiman lix yo’ob’tesihom li Dios chiru, laj Moises kixtz’aama a’in re li Qaawa’: “Ye we … k’a’ut naq wan li k’a’aq re ru a’in” (Moises 1:30). K’a’ru nakaweek’a chirix li kixsume li Qaawa’ sa’ Moises 1:31–39?

Laj Abraham kixk’ul ajwi’ li na’leb’ chi k’utb’esinb’il, li tz’iib’anb’il sa’ Abraham 3. K’a’ru nakataw sa’eb’ li raqal 22–26 li tixsume lix patz’om laj Moises?

K’oxla xkomon chik li na’leb’ ke’xtzol laj Moises ut laj Abraham sa’ k’utb’esinb’il matk’: chirix li Dios, chirixeb’ rib’, ut chirixeb’ lix yo’ob’tesihom li Dios ut k’a’ut naq kixyo’ob’tesiheb’. K’a’ru neke’xk’e li na’leb’ a’in chaweek’a chawix laa’at ut chirix li ruchich’och’?

Chi’ilmanq ajwi’ Dieter F. Uchtdorf, “Ustedes son importantes para Él,” Liahona, noviembre 2011, 19–22; Temas del Evangelio, “Vida preterrenal,” topics.ChurchofJesusChrist.org.

Abraham 3:22–23

Ma ka’ajwi’ laj Abraham li “kisik’man ru rub’elaj naq xyo’la”?

“Naq maji’ nokoyo’la sa’ ruchich’och’, li Dios kixk’ojob’eb’ li musiq’ej re te’xb’aanu junaq k’anjel chiru lix yu’ameb’ sa’ ruchich’och’. A’an li k’ojob’ank chi junxilaj yeeb’il re. … Chixjunileb’ li komon sa’ li Iglees ke’k’ojob’aak chi junxilaj, ink’a’ ka’ajwi’ li Kolonel ut eb’ lix profeet” (Temas del Evangelio, “Preordenación,” topics.ChurchofJesusChrist.org).

Chan ru xqak’ul lix hu laj Moises ut lix hu laj Abraham?

Lix hu laj Moises, a’an xtiklajik lix musiq’anb’il jaltesinkil ru li Santil Hu xb’aan laj Jose Smith. Lix hu laj Abraham kik’utb’esiik chiru laj Jose Smith naq yoo chixtz’ilb’al rix jun najter hu chalenaq chaq Egipto. Eb’ li hu a’in, li wankeb’ anajwan sa’ li Q’ol Nim Xtz’aq, neke’xye resil laj Moises, laj Abraham, ut xkomoneb’ chik li profeet li moko neke’tawman ta sa’ li Santil Hu. Re xtawb’al xkomon chik li na’leb’ chirixeb’ li hu a’in, chi’ilmanq “Traducción de José Smith de la Biblia” (Temas de la historia de la Iglesia, ChurchofJesusChrist.org/study/history/topics) ut “Traducción e historicidad del libro de Abraham” (Temas del Evangelio, topics.ChurchofJesusChrist.org).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Moises 1:2–6; Abraham 3:11–12.Naru taapatz’ re laa junkab’al naq te’xsik’ li aatin sa’ li b’ich “Laa’in jun ralal li Dios” (B’ichleb’aal choq’ reheb’ li Kok’al, 2–3) li naxk’am rib’ rik’in li na’leb’ sa’eb’ li raqal a’in.

Moises 1:4, 30–39.Ma taawulaq cheru rilb’al junqaqeb’ “lix yiib’ahom li ruq’ ” li Dios? (raqal 4). Maare teerileb’ li raqal a’in chirix kab’l malaj rub’eleb’ li chahim sa’ q’ojyin. Toja’ naq teeye k’a’ut naq li Dios kixyo’ob’tesi li ruchich’och’ ut chan ru naq tootz’aqonq sa’ “lix k’anjel ut lix loq’al” (raqal 39).

Moises 1:18.Ma wan qana’leb’ re taqatenq’a qib’ chiqib’il qib’ “chixtz’ilb’al rix” li Dios ut laj Satanas? (Chi’ilmanq ajwi’ Moroni 7:12–18; Tzol’leb’ ut Sumwank 50:23–24.)

Abraham 3:24–26.Naru taak’e jun ch’ina k’anjel re laa junkab’al re te’xk’ut naq naru te’xtaaqe li na’leb’ taaye. Maare a’an xyiib’ankil jun ch’ina so’sol ch’iich’ rik’in hu malaj xk’uub’ankil li wa. K’a’ru neketzol rik’in li ch’ina k’anjel a’in li naxk’ut k’a’ru aj-e li qayu’am, jo’ naxye sa’eb’ li raqal a’in?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Laa’in jun ralal li Dios,” B’ichleb’aal choq’ reheb’ li Kok’al, 2–3.

Xkawresinkil aawib’ chi tzolok

Sik’ li yaal sa’ li evangelio. Wan naq yeeb’ileb’ chi ch’olch’o li na’leb’ re li evangelio sa’ li loq’laj hu; wan naq yeeb’ileb’ sa’ junaq jaljookil ru aatin malaj seraq’. Patz’ aawib’, “K’a’ru li junelikil na’leb’ li nak’utman sa’eb’ li raqal a’in?”

Laj Moises nanumta sa’ xb’een laj Satanas, xb’aan laj Joseph Brickey