“24–30 enero. Moises 7: “Ut li Qaawa’ Sion kixye re lix tenamit,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)
“24–30 enero. Moises 7,” Kim, Taaqehin—Choq’ reheb’ li komon ut li junkab’al: 2022
Li rahok cherib’il eerib’, xb’aan li xEmma Donaldson Taylor
24–30 enero
Moises 7
“Ut li Qaawa’ Sion kixye re lix tenamit”
Naq nakawil ut nakak’oxla Moises 7, tz’iib’a li na’leb’ naxk’e li Musiq’ej sa’ laa k’a’uxl. Xb’aanunkil a’in naxk’ut naq nakab’antioxi aab’eresinkil xb’aan li Qaawa’ ut naq nakawaj naq junelik tatxb’eresi.
Tz’iib’a li nakak’oxla
Chalen chaq xtiklajik, naab’aleb’ ke’xyal xb’aanunkil li kixb’aanu laj Enok ut lix tenamit: xxaqab’ankil jun tenamit b’ar wi’ maak’a’ li neb’a’il chi moko li rahob’tesink. Jo’ xtenamit li Dios, laa’o ajwi’ naqaj a’an. Xxaqab’ankil Sion naqaye re, ut rochb’een xtenq’ankileb’ li neb’a’ ut xxaqab’ankil li tuqtuukilal, noko’ok sa’ sumwank, nokowan sa’ tiikilal, ut noko’ok sa’ junajil chiqib’il qib’ ut rik’in li Jesukristo, “lix Rey Sion” (Moises 7:53). Toj yooko chixxaqab’ankil Sion sa’ li kutan a’in, jo’kan ut naq aajel ru xpatz’b’al: K’a’ru ke’xb’aanu laj Enok ut lix tenamit re xxaqab’ankil? Chan ru naq “junajeb’ xch’ool ut junajeb’ xk’a’uxl” (Moises 7:18) us ta natam lix maa’usilaleb’ li tenamit chixsutameb’? Wankeb’ k’iila na’leb’ sa’ Moises 7 chirix Sion, ut jun reheb’ li nim xwankil choq’ reheb’ laj Santil Paab’anel sa’ Roso’jikeb’ li Kutan, a’an naq Sion maawa’ ka’ajwi’ jun tenamit—a’an ajwi’ li k’a’ru wan sa’ li aamej ut li musiq’ej. Jo’ kixye li Qaawa’, li Sion a’aneb’ “li saqeb’ ru xch’ool” (Tzol’leb’ ut Sumwank 97:21). Chi jo’kan, re xxaqab’ankil Sion, maare taqatikib’ sa’ li qaam ut sa’ li qajunkab’al.
Li na’leb’ re xtzolb’aleb’ li loq’laj hu aajunes
Lix b’aanuhom laj Enok naxk’ut chiqu chan ru taqaxaqab’ Sion sa’ li qayu’am.
Tz’iib’anb’il sa’ Moises 7 chan ru naq lix tenamit li Dios ke’xxaqab’ Sion, ut a’an naru tixk’e qana’leb’ ut xkawilal qach’ool anajwan sa’ lix yalb’al qaq’e chixb’aanunkil ajwi’ a’an. Maare taatz’iib’a chi tzoltzo li k’a’ru nakatzol chirix Sion sa’ Moises 7:16–21, 27, 53, 62–69.
|
Raqal |
K’a’ru nakatzol chirix Sion? |
K’a’ru naxye chirix lix yalb’al aaq’e re xxaqab’ankil Sion? |
|---|---|---|
Raqal | K’a’ru nakatzol chirix Sion? “Junajeb’ xch’ool ut junajeb’ xk’a’uxl” li tenamit re Sion. | K’a’ru naxye chirix lix yalb’al aaq’e re xxaqab’ankil Sion? Tento naq junajaqo jo’ junkab’al ut jo’ Iglees. |
Raqal | K’a’ru nakatzol chirix Sion? “Chirix xnumikeb’ li kutan, [Sion] kik’ame’ taqe’q sa’ choxa.” | K’a’ru naxye chirix lix yalb’al aaq’e re xxaqab’ankil Sion? Lix xaqab’ankil Sion timil timil nak’ulman. |
Raqal | K’a’ru nakatzol chirix Sion? | K’a’ru naxye chirix lix yalb’al aaq’e re xxaqab’ankil Sion? |
Raqal | K’a’ru nakatzol chirix Sion? | K’a’ru naxye chirix lix yalb’al aaq’e re xxaqab’ankil Sion? |
Tento naq yalb’ileb’ xq’e lix tenamit li Dios re naq “junajeb’ xch’ool ut junajeb’ xk’a’uxl.”
Sa’ Moises 7:18–19 nayeeman chan ru xch’ooleb’ li tenamit re Sion, jo’ ke’k’ab’a’iik xb’aan li Qaawa’. K’a’ut naq aajeleb’ ru li na’leb’ a’in re xxaqab’ankil Sion? Jo’ ch’olob’anb’il sa’ li ch’ol a’in, chan ru naq jalan wi’ Sion rik’ineb’ li jun siir chik chi ch’uut sa’ ruchich’och’? Naq nakak’oxla li patz’om a’in, maare taak’oxla li raatin li Jesukristo sa’ li raqal 53: “Laa’in li Mesias, lix Rey Sion.” K’a’ru naraj naxye naq li Jesukristo wan choq’ li qaRey? Chan ru nokoxtenq’a chi chaab’ilo’k jo’ li tenamit re Sion?
Chi’ilmanq ajwi’ Filipenses 2:1–5; 4 Nefi 1:15–18; Tzol’leb’ ut Sumwank 97:21; 105:5.
Tento naq yalb’il qaq’e re naq “junaj li qach’ool ut junaj li qak’a’uxl” (Moises 7:18).
K’a’ru kik’ulman rik’in lix tenamit laj Enok?
Eb’ li aatin “kik’ame’ taqe’q” (Moises 7:21, 23), “kiwan chi waklesinb’il” (Moises 7:24), “ke’xoke’ ” (Moises 7:27), ut “elenaq” (Moises 7:69) neke’aatinak chirix Sion ut lix tenamit laj Enok naq ke’jaltesiman xjunxaqalil ut ke’k’ame’ taqe’q sa’ choxa. Eb’ li neke’jaltesiik ru “ink’a’ te’xyal li rahilal chi moko li kamk” sa’ tz’ejwalej (K’utul Raqal reheb’ li Loq’laj Hu, “Jaltesinb’il junxaqalil,” “Sion”; chi’ilmanq ajwi’ 3 Nefi 28:4–9, 15–18, 39–40).
Li Dios nayaab’ak chirixeb’ li ralal xk’ajol.
Wankeb’ li neke’xk’oxla naq najt wan li Dios ut naq maak’a’ naraj re li naqak’ul sa’ li qayu’am. A’b’an laj Enok kiril sa’ k’utb’esinb’il matk’ naq li Dios yoo chi yaab’ak chirixeb’ li ralal xk’ajol. Naq nakawil Moises 7:28–40, k’e reetal k’a’ut naq kiyaab’ak li Dios. Sa’ lix k’utb’esinb’il matk’ laj Enok, li wan sa’ Moises 7:41–69, k’a’ru nakataw li naxk’ut naq li Dios, a’an “aj uxtaan ut chaab’il xch’ool chi junelik”? (Moises 7:30; che’ilmanq li raqal 43, 47, ut 62).
Sa’ roso’jikeb’ li kutan li Dios tixch’utub’eb’ li sik’b’ileb’ ru xb’aan.
Li raqal 62 naxye k’a’ru taak’ulmanq sa’ roso’jikeb’ li kutan. K’oxla k’a’ru neke’raj xyeeb’al li aatin a’in: “li tiikilal tintaqla chalen chaq sa’ choxa,” “li yaal tintaqla chalen chaq sa’ li ch’och’,” “li tiikilal ut li yaal tink’e chixmesunkil li ruchich’och’ chanchan rik’in b’uut’iha’.” K’a’ru neke’xk’ut li aatin a’in chawu chirix lix k’anjel li Dios sa’ roso’jikeb’ li kutan?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Moises 7:18–19.Re xtenq’ankil laa junkab’al chixtawb’al ru k’a’ru naraj naxye “junajeb’ xch’ool,” maare taayiib’ jun aamej rik’in hu ut taaset sa’ kok’ hu, re naq chixjunileb’ sa’ li junkab’al te’xk’ul jun li ch’ina hu. Te’xtz’iib’a lix k’ab’a’eb’ chiru, toja’ naq te’xyiib’ wi’chik li aamej sa’ komonil. Naq yookex chixyiib’ankil li aamej, maare tex’aatinaq chirix lee rahom cherib’il eerib’.
-
Moises 7:28–31, 35.K’a’ru naqatzol chirix li Dios sa’eb’ li raqal a’in?
-
Moises 7:32.K’a’ut naq li Dios kixk’e xtaql li qach’ool? K’a’ raj ru taqaye re li ani nareek’a naq lix taqlahom li Dios naxram ru xtaql li qach’ool? Li na’leb’ sa’ 2 Nefi 2:25–27 naru chetenq’ankil.
-
Moises 7:59–67.Naq nekeril Moises 7:59–67 jo’ junkab’al, k’ehomaq reetal li kixye li Qaawa’ re laj Enok chirix roso’jikeb’ li kutan—naq li Dios “tixch’utub’eb’ chaq li sik’b’ileb’ ru xb’aan” (raqal 62), ut naq te’wanq “ninqi rahilal sa’ xyanqeb’ laj maak” (raqal 66). Chan ru toopaab’anq ut tooyo’oninq us ta natam li maa’usilal sa’ li kutankil a’in? Sa’ aatinak chirix a’in, maare taawil li raatin li Elder Ronald A. Rasband: “Chik’ojob’aaq eech’ool, ex was wiitz’in. Yaal, wanko sa’ jun li kutan xuwajel, a’b’an naq nokokana sa’ xb’ehil li sumwank, ink’a’ tento tooxuwaq. Nekexwosob’tesi naq rik’in xb’aanunkil a’an, ink’a’ te’ch’a’ajko’q eech’ool xb’aan li kutan wanko wi’ malaj xb’aaneb’ li rahilal neke’chal sa’ lee yu’am. Nekexwosob’tesi naq teesik’ xaqliik sa’eb’ li na’ajej sant ut ink’a tex’eek’asiiq. Nekexwosob’tesi naq teepaab’eb’ lix yeechi’ihom li Jesukristo, naq yo’yo a’an, ut naq yoo chiqak’aak’alenkil ut naq xaqxo chiqak’atq” (“Minumta eek’a’uxl,” Jolomil ch’utub’aj-ib’ re octubre 2018).
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil “Naq nawan rahok,” Eb’ li B’ich, 190.
Xkawresinkil qib’ jo’ aj k’utunel
K’e reetal li nak’ulman. Naq nakak’e reetal li k’a’ru yoo chi k’ulmank sa’ xyu’ameb’ laa kok’al, k’a’jo’ naq taak’eemanq chawu xk’eeb’aleb’ xna’leb’. Li raatineb’ ut lix patz’omeb’ li kok’al chiru li kutan naru ajwi’ tate’xtenq’a chixtzolb’aleb’. (Chi’ilmanq Li k’utuk jo’ li Kolonel, 16.)
Najaltesiik ru li tenamit Sion, xb’aan laj Del Parson