“Li profeet aj Enok,” Eb’ li Esilal sa’ li Najter Chaq’rab’ (2022)
“Li profeet aj Enok,” Eb’ li Esilal sa’ li Najter Chaq’rab’
Genesis 5; Moises 6–7
Li profeet aj Enok
Li paab’aal chirix li Qaawa’ kixkol jun tenamit
Li Qaawa’ Jesukristo kixpatz’ re laj Enok naq tixye re li tenamit naq te’xjal xk’a’uxl. A’b’an laj Enok kixk’oxla naq moko seeb’ ta chi aatinak. Kixk’oxla naq maare maajun taa’ab’inq re.
Li Qaawa’ kixye naq tixk’e xmetz’ew ut tixkol rix laj Enok, us ta wankeb’ li ink’a kiwulak chiruheb’ li na’leb’ kixk’ut laj Enok.
Lix yeechi’ihom li Qaawa’ kixk’e xkawilal xch’ool laj Enok. Laj Enok ki’ab’in chiru li Qaawa’ ut kixtzoleb’ li tenamit rik’in wankilal. Kik’utuk chirix li Jesukristo, li jalb’a-k’a’uxlej, li kub’iha’, ut li Santil Musiq’ej. Ke’wan li ke’xpaab’ li raatin laj Enok ut ke’raj xtaaqenkil li Qaawa’.
K’eeb’il xliceens laj Enok xb’aan li Qaawa’ re kub’sink ha’. Chixjunileb’ li ke’xpaab’ li raatin laj Enok ke’kub’e xha’ ut ke’nach’o rik’in li Qaawa’. Maajun neb’a’ sa’ xyanqeb’ xb’aan naq ke’ril rib’ chirib’il rib’. Sion kiyehe’ reheb’, xb’aan naq ke’wan sa’ komonil rik’in rahok ut tiikilal.
Sa’ jun li kutan, li Qaawa’ kixk’utb’esi chiru laj Enok chixjunil li taak’ulmanq sa’ ruchich’och’. Laj Enok kiril lix yu’am, lix kamik, ut lix waklijik li Jesukristo chi yo’yo. Laj Enok kixtzol naq sa’ roso’jikeb’ li kutan, li evangelio taak’ojob’aaq wi’chik. Kiril ajwi’ li xkab’ xk’ulunik li Jesus.
Moqon, chixjunileb’ sa’ li tenamit Sion ke’xpaab’ li raatin laj Enok ut ke’xjal xk’a’uxl. Ke’ril rib’ chirib’ileb’ rib’ ut ke’wan sa’ tuqtuukilal, jo’kan naq li Qaawa’ kixxokeb’ re naq te’wanq rik’in.