“Li rey aj Josias,” Eb’ li Esilal sa’ li Najter Chaq’rab’ (2022)
“Li rey aj Josias,” Eb’ li Esilal sa’ li Najter Chaq’rab’
Li rey aj Josias
Jun seraq’ chirix xpaab’ankileb’ lix taqlahom li Qaawa’
Waqxaqib’ chihab’ wan re laj Josias naq ki’ok choq’ rey sa’ xb’een Juda. Chaab’il rey a’an ut kixra li Qaawa’. Kiraj xtenq’ankil lix tenamit, eb’ laj Israelita, chixpaab’ankil li Qaawa’ ut chixkanab’ankil xloq’oninkileb’ li pak’b’il dios. Naq kiniman, a’an ut lix tenamit ke’ok chirak’ob’resinkil li santil ochoch ut chirutz’u’ujinkil.
2 Reyes 22:1–2; 2 Kronikas 34:3–7
Naq yookeb’ chixkab’lankil li santil ochoch, laj Jilkias, li taqenaqil aj tij, kixtaw xhuhil li chaq’rab’, jun b’otb’ookil hu wan wi’ li loq’laj hu.
Jun li moos kixyaab’asi li hu choq’ re laj Josias. Laj Josias kirab’i li aatin ut kiraho’ xch’ool xb’aan naq lix tenamit ink’a’ neke’ab’in chiru li Qaawa’. Kixpej lix t’ikr re xk’utb’al naq ra xch’ool.
A’an kixye re laj Jilkias naq tixpatz’ re li Qaawa’ k’a’ru tento te’xb’aanu. Laj Jilkias ut lix moos li rey ke’rula’ani li xJulda. A’an jun profeet ixq, jun aj jolominel tiik chi paab’ank li musiq’anb’il xb’aan li Dios. A’an kixye naq li Qaawa’ sa xch’ool rik’in laj Josias xb’aan naq yoo chixtenq’ankil lix tenamit chi ab’ink. Li Qaawa’ kixyeechi’i re li rey aj Josias naq tixnumsi xyu’am sa’ tuqtuukilal.
Li rey aj Josias kiraj naq lix tenamit te’xb’aanu li ke’xyeechi’i chiru li Qaawa’. Kixpatz’ reheb’ naq te’xninq’ehi li Paswa re naq taajultiko’q reheb’ chan ru naq li Qaawa’ kirach’ab’eb’ laj Israelita junxil aran Egipto.