“Laj Daniel ut lix matk’ li rey,” Eb’ li Esilal sa’ li Najter Chaq’rab’ (2022)
“Laj Daniel ut lix matk’ li rey,” Eb’ li Esilal sa’ li Najter Chaq’rab’
Daniel 2
Laj Daniel ut lix matk’ li rey
Lix muqmuukil na’leb’ li Dios choq’ re li rey
Li rey aj Babilonia kiwan jun xmatk’ li kik’ehok re chi k’oxlak. Kixtaqla naq eb’ laj tij ut laj q’e te’xye k’a’ru naraj naxye li matk’.
Li rey ink’a’ kixye reheb’ k’a’ru lix matk’. A’an kixye naq wi ta wan xwankilaleb’ laj tij ut laj q’e, te’ruuq raj chixyeeb’al re k’a’ru kixmatk’i ut k’a’ru naraj naxye.
Eb’ laj tij ut laj q’e ke’xye re li rey naq ink’a’ te’ruuq raj chixk’utb’al xyaalal li matk’ wi ta ink’a’ tixye reheb’ k’a’ru lix matk’. Ke’xye naq maa’ani taaruq raj chixb’aanunkil. Kijosq’o’ li rey ut kixye naq tixkamsi chixjunileb’ laj q’e sa’ li awa’b’ejihom, jo’ ajwi’ laj Daniel ut eb’ li ramiiw.
Naq laj k’aak’alenel kichal re xchapb’al laj Daniel ut eb’ li ramiiw, laj Daniel kixpatz’ xhoonal re naq truuq tixk’utb’esi xyaalalil lix matk’ li rey. Laj Daniel kixnaw naq li Dios naxnaw ru ut naril chixjunil, jo’eb’ ajwi’ li matk’. Laj Daniel kixpatz’ reheb’ li ramiiw naq te’tijoq rochb’een.
Li Dios kixk’ut chiru laj Daniel lix matk’ li rey ut kixye re k’a’ru naraj naxye. Laj Daniel kixb’antioxi re li Dios naq xsume lix tij a’an ut eb’ li ramiiw, ut naq kixkol xyu’ameb’. Toja’ naq kiwulak rik’in li rey re xk’utb’esinkil xyaalalil lix matk’.
Laj Daniel kixye naq sa’ lix matk’ li rey kiwan jun nimla estatua li kisache’ xb’aan jun pek li k’okb’il chaq sa’ li tzuul. Li estatua kireetaliheb’ lix awa’b’ejihom li ruchich’och’. Li pek li k’okb’il chaq sa’ li tzuul kireetali li rawa’b’ejihom li Dios li tixnujob’resi li ruchich’och’. Li rey kixnaw naq yaal li kixye laj Daniel.