“Li xRahab ut eb’ laj muqmuukil k’ehol eetal,” Eb’ li Esilal sa’ li Najter Chaq’rab’ (2022)
“Li xRahab ut eb’ laj muqmuukil k’ehol eetal,” Eb’ li Esilal sa’ li Najter Chaq’rab’
Li xRahab ut eb’ laj muqmuukil k’ehol eetal
Jun b’aanuhom li naxkol jun li junkab’al
Jun ixq, xRahab xk’ab’a’, kiwan rochoch sa’ Jeriko naq maji’ nanumtaak xb’aaneb’ laj Israelita. A’an kirab’i naq li Qaawa’ kixjach ru li palaw choq’ reheb’ laj Israelita. Li xRahab kixnaw naq li Qaawa’ tixtenq’aheb’ laj Israelita chixpleetinkil lix tenamit. Maa’useb’ li tenamit sa’ Jeriko.
Li profeet aj Josue kixjolomi li teep aj pleet aj Israelita. Kixtaqla wiib’ laj muqmuukil k’ehol eetal toj sa’ Jeriko. A’b’an ke’ile’ laj muqmuukil k’ehol eetal, ut li rey re Jeriko kixtaqlaheb’ laj k’aak’alenel chixchapb’aleb’.
Eb’ laj muqmuukil k’ehol eetal ke’ok sa’ rochoch li xRahab. Li xRahab kixye naq tixtenq’aheb’, ut kixmuqeb’ sa’ xb’een li kab’l.
Eb’ lix k’aak’alenel li rey ke’xsik’eb’ laj muqmuukil k’ehol eetal sa’ rochoch li xRahab, a’b’an ink’e’ ke’xtaweb’. Chirix naq xkoheb’, li xRahab kixpatz’ reheb’ laj muqmuukil k’ehol eetal naq te’xkol rix lix junkab’al naq te’chalq lix teep aj pleet chixpleetinkil Jeriko. Eb’ laj muqmuukil k’ehol eetal ke’xye re li xRahab naq kolb’ilaq rix lix junkab’al. Toja’ naq li xRahab kixkut jun k’aam chirix lix ventaan re naq te’eeleliq aran laj muqmuukil k’ehol eetal.
Eb’ laj muqmuukil k’ehol eetal ke’sutq’i rik’in li profeet aj Josue ut ke’xye re li teep aj pleet aj Israelita naq maajun te’xrahob’tesi sa’ rochoch li xRahab. Moqon, naq eb’ laj Israelita ke’xpleeti Jeriko, ink’a’ ke’xrahob’tesi xjunkab’al li xRahab. Lix kawilal xch’ool li xRahab kixkol rix lix junkab’al. Lix junkab’al ki’oken rik’in xtenamit li Qaawa’.