Jueces 4–5

Li xDebora li profeet ixq

Jun aj jolominel li kixtenq’aheb’ laj Israel chixpaab’ankil li Qaawa’

li xDebora li profeet ixq

Li xDebora a’an chaq jun profeet ixq, jun tiik aj jolominel reheb’ laj Israelita li kimusiq’aak xb’aan li Qaawa’. Lix tenamit ke’xkanab’ xpaab’ankileb’ lix taqlahom li Qaawa’, ut eb’ laj Kanahanita ke’awa’b’ejin sa’ xb’eeneb’. Chirix jun may chihab’, eb’ laj Israelita ke’ok chixpatz’b’al xtenq’ li Qaawa’.

Jueces 4:1–5

li xDebora natijok

Li Qaawa’ kirab’iheb’ lix tij. A’an kixye re li xDebora naq tixch’utub’ jun teep aj pleet aj Israelita re naq te’xpleetiheb’ laj Kanahanita.

Jueces 4:6

li xDebora na’aatinak rik’ineb’ laj pleet

K’iheb’ laj pleet ut li b’eleb’aal ke’wan sa’ xteepaleb’ laj Kanahanita. Ke’xuwak aj Israelita, a’b’an li xDebora ink’a’ kixuwak. Kixnaw naq te’tenq’aaq xb’aan li Qaawa’.

Jueces 4:3, 7

laj Barak naxpatz’ re li xDebora naq taachalq

A’an laj Barak li kijolomink re lix teep aj pleet aj Israelita. Ink’a’ kiraj pleetik. A’ut kixk’oxla naq wi li xDebora taarochb’eeni li teep aj pleet, te’kole’q rix xb’aan li Qaawa’. Li xDebora kixye naq taaxik. Kixye rik’in profeetil aatin naq jun ixq tixq’ax ru laj Sisera, laj jolominel reheb’ lix teepeb’ laj Kanahanita.

Jueces 4:8–9

li xDebora ut lix teep aj pleet sa’ xb’een li tzuul

Eb’ laj Israelita ke’xch’utub’ rib’ sa’ xb’een jun li tzuul, ut eb’ laj Kanahanita ke’xch’utub’ rib’ sa’ li ru taq’a. Li xDebora kixye re laj Barak naq te’kub’eeq chaq sa’ xb’een li tzuul. Kixye naq li Qaawa’ taa’ochb’eeninq reheb’.

Jueces 4:12–14

eb’ li b’eleb’aal neke’k’ame’ xb’aan li kaq-sut-iq’

Li Qaawa’ kixtaqla li hab’, ut lix b’eleb’aaleb’ laj Kanahanita ke’k’ame’ xb’aan li ha’. Ke’kam naab’al reheb’ laj Kanahanita, a’ut laj Sisera ki’eelelik.

Jueces 4:15, 17; 5:4–5, 19–22

li xJahel naxb’oq laj Sisera sa’ xmuheb’aal t’ikr

Kiwan jun ixq aran sa’ jun muheb’aal t’ikr, li xJahel xk’ab’a’. Kiril naq yoo chi eelelik laj Sisera ut kixye re naq tixmuq rib’ sa’ xmuheb’aal t’ikr. Li xJahel kixnaw naq a’an jun aj jolominel re lix teepeb’ laj Kanahanita, ut kixkamsi re naq ink’a’ tixrahob’tesi xkomoneb’ chik li kristiaan.

Jueces 4:15–21

li xDebora naril jun tenamit tuqtu

Kitz’aqlok ru lix profeetil aatin li xDebora. Laj Sisera kikamsiik xb’aan jun ixq kaw xmetz’ew. Li xDebora kixb’icha jun li b’ich re xtenq’ankileb’ laj Israelita chixjultikankil naq a’an li Qaawa’ li kikolok reheb’. Eb’ laj Israelita ke’xpaab’eb’ li taqlahom ut ke’wan sa’ tuqtuukilal chiru 40 chihab’.

Jueces 5:1, 24–27, 31