Exodo 1–2

Li k’uula’al aj Moises

Xkolb’aleb’ rix laj Israelita

Lix junkab’al laj Jakob ki’ok choq’ nimla tenamit sa’ Egipto. A’aneb’ laj Israelita xk’ab’a’eb’. Laj Farahon, li rey re Egipto, kixxuwa naq sa’ junaq kutan k’a’jo’aq xk’ihaleb’ laj Israelita ut te’numtaaq sa’ xb’een Egipto, jo’kan naq ke’xk’eheb’ sa’ preexil.

Exodo 1:7–14

Toja’ naq laj Farahon kixtaqla xkamsinkileb’ chixjunil li teelom aj Israelita li toje’ xe’yo’la. Ke’xuwak laj Israelita.

Exodo 1:15–22

Jun na’b’ej aj Israelita, xYokebed xk’ab’a’, kixk’oxla chan ru tixkol li ralal. Kixk’e lix k’uula’al sa’ jun chakach ut kixmuq sa’ li ninqi pim chixk’atq li nima’ Nilo. Li xMiriam, li ranab’ li k’uula’al, kixk’aak’ale.

Exodo 2:1–4

Naq yoo chi atink sa’ li nima’, lix rab’in laj Farahon kixtaw li chakach. Kiril naq yoo chi yaab’ak li k’uula’al aj Israelita ut kiraj xk’iresinkil choq’ xyum a’an. Li xMiriam kiwulak rik’in lix rab’in laj Farahon ut kixpatz’ ma naru tixk’am jun ixq aj Israelita re xch’olaninkil li k’uula’al.

Exodo 2:5–6

Li xMiriam kixk’am xYokebed, lix na’, rik’in lix rab’in laj Farahon. Lix rab’in laj Farahon kixye naq tixtoj li xYokebed re naq tixch’olani li k’uula’al.

Exodo 2:8–9

Kiniman li k’uula’al aj Israelita. Lix rab’in laj Farahon kixk’iresi jo’ tz’aqal xyum a’an. Laj Moises kixk’e choq’ xk’ab’a’.

Exodo 2:10