“Li profeet aj Samuel,” Eb’ li Esilal sa’ li Najter Chaq’rab’ (2022)
“Li profeet aj Samuel,” Eb’ li Esilal sa’ li Najter Chaq’rab’
1 Samuel 2–3
Li profeet aj Samuel
Jun ch’ajom b’oqb’il xb’aan li Qaawa’
Chiru k’iila chihab’, maak’a’ xprofeet li Qaawa’ re xb’eresinkileb’ laj Israelita. Ruuchil a’an, ke’jolomin aj raqol aatin sa’ Israel chiru k’iila chihab’. Sa’ li kutan a’an, xAna kixk’am laj Samuel, lix yum, rik’in laj Eli, laj tij ut laj raqol aatin re Israel. Laj Samuel kixtenq’a laj Eli sa’ li santil ochoch.
Wiib’eb’ li ralal laj Eli ke’tenq’ank ajwi’ sa’ li santil ochoch, a’b’an ke’relq’aheb’ li mayej q’axtesinb’il choq’ re li Qaawa’. Ke’wan li ke’xye resil a’in re laj Eli, a’b’an maak’a’ kixb’aanu laj Eli.
Chi q’eq, laj Samuel kirab’i jun xyaab’ kuxej li kixb’oq xk’ab’a’. Sa’ xch’ool naq a’an laj Eli, jo’kan naq laj Samuel kiwulak rik’in. A’b’an maawa’ laj Eli li kib’oqok re. Laj Eli kixye re laj Samuel naq taawarq wi’chik.
Laj Samuel kirab’i li xyaab’ kuxej xkab’ sut. Koxxpatz’ re laj Eli k’a’ru naraj. A’b’an moko a’an ta laj Eli nab’oqok xk’ab’a’. Laj Eli kixye re laj Samuel naq taawarq wi’chik.
Laj Samuel kirab’i li xyaab’ kuxej rox sut. Xko’o wi’chik rik’in laj Eli ut kixpatz’ k’a’ru naraj. Anajwan chik, laj Eli naxnaw naq a’an li Qaawa’ li na’aatinak rik’in laj Samuel. Laj Eli kixye re laj Samuel naq taawarq wi’chik. Laj Eli kixye re naq wi li Qaawa’ tixb’oq wi’chik, laj Samuel taarab’i.
Laj Samuel kirab’i wi’chik li xyaab’ kuxej. Laj Samuel kixpatz’ re li Qaawa’ naq taa’aatinaq, ut a’an taarab’i. Li Qaawa’ kixye re laj Samuel naq moko us ta naq laj Eli kixkanab’eb’ li ralal aj maak chi tenq’ank sa’ li santil ochoch. Ink’a’ chik te’ruuq chi tenq’ank aran lix junkab’al laj Eli.
Sa’ eq’la, laj Eli kixpatz’ re laj Samuel k’a’ru xye li Qaawa’. Laj Samuel kixye re. Laj Eli kixnaw naq li Qaawa’ ki’aatinak rik’in xtz’uumal re laj Samuel.
Kipuktesiman li esil chiru li ch’och’ Israel. Li tenamit ke’xnaw naq sik’b’il ru laj Samuel choq’ profeet xb’aan li Qaawa’.