“Li xEster, rixaqil li rey,” Eb’ li Esilal sa’ li Najter Chaq’rab’ (2022)
“Li xEster, rixaqil li rey,” Eb’ li Esilal sa’ li Najter Chaq’rab’
Ester 2–5; 7–9
Li xEster, rixaqil li rey
Kaw xch’ool us ta wan li xiwxiw
Laj Judio kiyeeman re junjunqeb’ laj Israelita. Li xEster, a’an aj Judio ut kiwan rochoch sa’ Persia. Ke’kam xna’ xyuwa’, jo’kan naq laj Mardokeo, li rech alal kixk’ul sa’ rochoch. Kib’oqe’ sa’ lix nimla ochoch li rey rochb’een xkomoneb’ chik li saaj ixq re li awa’b’ejihom. Li rey kiraj rixaqil, ut kixsik’ ru xEster.
Li rey kiwan xmoos, laj Aman xk’ab’a’, li kixk’ul naab’al xwankilal. Laj Aman kixtenq’a li rey chixjolominkil li awa’b’ejihom. Li rey kixtaqla naq chixjunileb’ te’xhupub’ rib’ chiru laj Aman.
A’b’an laj Mardokeo moko kixhupub’ ta rib’ chiru laj Aman. K’a’ajwi’ chiru li Qaawa’ tixhupub’ rib’. Kijosq’o’ laj Aman. Kiraj xk’eeb’al xtojb’a-maak laj Mardokeo ut chixjunileb’ laj Judio.
Laj Aman kixye re li rey naq eb’ laj Judio moko neke’xpaab’ ta xchaq’rab’ li rey. Jo’kan naq li rey kixkanab’ laj Aman chixxaqab’ankil jun ak’ chaq’rab’: sa’ jun li kutan, te’kamsiiq chixjunileb’ laj Judio.
Laj Mardokeo kixpatz’ re xEster naq taa’aatinaq rik’in li rey. Li rey truuq tixjal xchaq’rab’ laj Aman ut tixkoleb’ laj Judio. A’b’an kixuwak xEster. Wan naq li rey naxkamsi li ani nachal chiraatinankil chi maak’a’ xb’oqb’al.
Laj Mardokeo kixpatz’ re xEster naq tixk’oxlaheb’ laj Judio li te’kamsiiq. Laj Mardokeo kixye naq maare li Qaawa’ kixk’e xEster sa’ rochoch li rey re naq tixkoleb’ laj Judio.
Li xEster kixnaw naq tento taa’aatinaq rik’in li rey, us ta maare taakamsiiq. Li xEster kixpatz’ re chixjunileb’ laj Judio ut eb’ lix moos naq te’xkuy xsa’ rochb’een.
Chirix naq kixkuy xsa’ chiru oxib’ kutan, xEster kixkawresi rib’ ut kiwulak chiru li rey.
Naq kiwulak chiru li rey, li rey kixtaqsi lix xuq’. A’an naraj naxye naq sa xch’ool chirilb’al xEster ut ink’a’ tixkamsi. Kixpatz’ k’a’ru naraj. Li xEster kixye re li rey naq xiwxiw wan wi’ lix tenamit. Xmaak lix chaq’rab’ laj Aman, xEster ut chixjunileb’ laj Judio sa’ li awa’b’ejihom te’kamsiiq.
Li rey kijosq’o’ rik’in laj Aman ut kixkamsi. Li rey kixxaqab’ jun ak’ chaq’rab’ re xkolb’aleb’ rix laj Judio. Anajwan, te’ruuq chixkolb’aleb’ rix wi yalaq ani tixyal xrahob’tesinkileb’.
Lix paab’aal xEster chirix li Qaawa’ ut lix kawilal xch’ool sa’ aatinak chiru li rey kixkol xtenamit. Ruuchil li kamk ut li rahilal, kiwan jun nimla wa’ak. Ke’ninq’ehin laj Judio.