“Li profeet aj Josue,” Eb’ li Esilal sa’ li Najter Chaq’rab’ (2022)
“Li profeet aj Josue,” Eb’ li Esilal sa’ li Najter Chaq’rab’
Deuteronomio 10; 31; 34; Josue 1; 3–6; 10–11; 21; 24
Li profeet aj Josue
Jun chik yalok-ix rub’elaj naq te’ok sa’ li yeechi’inb’il ch’och’
Li Qaawa’ kixb’oq laj Josue chi ok choq’ profeet chirix naq kixoke’ laj Moises toj sa’ choxa. Naq ke’kana laj Israelita chire li nima’ Jordan, li Qaawa’ kixye naq ak xwulak hoonal naq te’ok sa’ li yeechi’inb’il ch’och’.
Deuteronomio 34:1–9; Josue 1:1–4; Alma 45:19
Li yeechi’inb’il ch’och’ wan sa’ Kanahan, a’b’an maa’useb’ li kristiaan ak wankeb’ aran. Li Qaawa’ kixye re laj Josue naq chiwanq xkawilal xch’ool. Chi tenq’anb’il xb’aan li Qaawa’, eb’ laj Israelita te’ruuq chi numtaak sa’ xb’een li ch’och’ Kanahan.
Laj Josue kixch’utub’ jun teep aj pleet. Li Qaawa’ kixye reheb’ naq te’xk’ameb’ li perpookil pek wan wi’ li Lajeeb’ chi Taqlahom ut xkomoneb’ chik li loq’laj tz’iib’ahom. Eb’ laj tij ke’xk’am li santil k’a’aq re ru a’in sa’ jun li kaax, a’an li kaax re li sumwank nayeeman re. Toja’ naq li teep aj pleet ke’xkawresi rib’ chixq’axb’al ru li nima’ Jordan. Cham li nima’ ut sa’ junpaat naxik.
Deuteronomio 10:5; 31:25–26; Josue 1:10–11; 3:1–11
Laj Josue kixyeechi’i reheb’ laj Israelita naq te’tenq’aaq xb’aan li Qaawa’ chixq’axb’al ru li nima’.
Laj Josue kixpatz’ reheb’ kab’laju chi aj tij naq te’xk’am li kaax re li sumwank ut naq te’ok sa’ li ha’. Naq eb’ laj tij ke’xk’e li roq sa’ li nima’, kixjach rib’ li ha’.
Eb’ laj Israelita ke’xq’ax ru li nima’ chiru chaqi ch’och’. Laj Josue kixpatz’ reheb’ laj Israelita naq te’xxok kab’laju chi pek sa’ li nima’ Ke’xtuub’ li pek choq’ jun eetalil li tixk’eheb’ chi jultiko’k reheb’ laj Israelita li sachb’a-ch’oolej kixb’aanu li Qaawa’ choq’ reheb’.
Laj Josue kixk’am xb’e li teep aj pleet aj Israelita toj sa’ li ch’och’ Kanahan. Ke’wulak sa’ li tenamit Jeriko. Kaweb’ rib’ ut najt xterameb’ lix xaqxookil tz’akil li tenamit. Li Qaawa’ kixk’ut chiru laj Josue chan ru naq te’numtaaq sa’ xb’een li tenamit. Kixye naq eb’ laj Israelita tento te’b’eeq chixsutam Jeriko rajlal kutan chiru waqib’ kutan. Laj Josue ki’ab’in chiru li Qaawa’.
Laj Josue kixye reheb’ laj tij naq te’xk’am li kaax re li sumwank chiruheb’ laj Israelita. Rajlal kutan, li teep aj pleet ke’b’eek chixsutam Jeriko, ut wuqub’ chi tij ke’xyaab’asi lix trompeet. Ch’anch’ookeb’ chixjunileb’ chik aj Israelita.
Sa’ xwuq li kutan, wuqub’ sut naq li teep aj pleet ke’b’eek chixsutam Jeriko. Naq eb’ laj tij ke’xyaab’asi lix trompeet, laj Josue kixye reheb’ laj Israelita naq te’xjap re. Sa’ junpaat ke’ok chi t’ane’k lix xaqxookil tz’ak Jeriko, ut lix teep aj pleet aj Josue ke’xchap li tenamit.
Li Qaawa’ kixtenq’aheb’ laj Israelita, jo’ kixyeechi’i naq tixb’aanu. Lix teep aj pleet aj Josue ke’numta sa’ xb’een li ch’och’ Kanahan, ut eb’ laj Israelita ke’reechani li ch’och’. Laj Josue kixjultika reheb’ lix sachb’a-ch’oolej ut lix yeechi’ihom li Qaawa’. Kixpatz’ reheb’ laj Israelita naq te’k’anjelaq chiru li Qaawa’.