Laj Jakob ut laj Esau

Wiib’ li ras riitz’in ut jun li xb’een alalb’ejil

Laj Isaak ut xRebeka ke’wan li ralal luteb’, laj Jakob ut laj Esau. Seeb’ chi yohob’k laj Esau. Ch’olch’o ru xyu’am laj Jakob naq kiwan, ut kixtaaqe li Qaawa’.

Genesis 25:20–28

Laj Esau, a’an li xb’een yo’lajenaq. A’an li alalb’ej li xb’een yo’lajenaq li ki’osob’tesiik rik’in li xb’een alalb’ejil xb’aan xyuwa’. Rik’in li xb’een alalb’ejil a’an tixb’eresi li junkab’al ut taareechani xkomon chik li ch’och’ ut li xul re truuq taaril chi us li junkab’al. A’b’an laj Esau kiril rib’ mas wi’chik chiru rilb’al lix junkab’al, ut ink’a’ ki’ab’in chiru xna’ xyuwa’ ut li Qaawa’.

Genesis 25:25, 32; 26:34–35

Sa’ jun li kutan, laj Esau kiq’aj chaq chi yohob’k. Yoo xtz’okajik ut kixtz’aama chiru laj Jakob naq tixk’e xwa. Li Qaawa’ kiraj naq laj Jakob tixk’ul li xb’een alalb’ejil xb’aan naq moko k’ulub’ej ta laj Esau. Laj Jakob kixpatz’ re laj Esau naq tixk’e li xb’een alalb’ejil re jo’ reeqaj li wa. Laj Esau kiwan sa’ aatin, ut kixk’e li xb’een alalb’ejil re laj Jakob.

Genesis 25:23, 29–34; Hebreos 11:20

Li xRebeka ut laj Isaak ke’raj naq te’usaaq lix kok’al. Raheb’ xch’ool xb’aan naq laj Esau toj naxsik’ ru xb’aanunkil li kiraj a’an ut ink’a’ li kiraj li Qaawa’.

Genesis 26:34–35

Kitix ut kimutz’irk laj Isaak. Naq maji’ nakam, a’an kixpatz’ re laj Esau naq tixkamsi ut tixk’uub’ jun li xul re tixtzeka xsahil.

Genesis 27:1–4

Li xRebeka kixnaw naq xwulak xq’ehil naq laj Isaak tixk’e li osob’tesink re li xb’een alalb’ejil.

Genesis 27:5

Li xRebeka kixpatz’ re laj Jakob naq tixxok wiib’ li xul re naq a’an truuq tixk’uub’ li tzakemq naq maji’ taaq’ajq laj Esau. Toja’ naq laj Jakob tixk’ul li osob’tesink.

Genesis 27:6–17

Laj Jakob kixtiqib’ rib’ chanchan laj Esau ut kixk’am li tzakemq re xyuwa’. Laj Isaak kirosob’tesi laj Jakob rik’in li xb’een alalb’ejil. Naq kiq’aj laj Esau, kijosq’o’ rik’in laj Jakob. A’b’an laj Jakob kixk’ul li xb’een alalb’ejil xb’aan naq a’an kixpaab’ lix taqlahom li Qaawa’ ut laj Esau ink’a’ kixpaab’.

Genesis 27:18–29