“Li Qaawa’ na’aatinak rik’in laj Elias,” Eb’ li Esilal sa’ li Najter Chaq’rab’ (2022)
“Li Qaawa’ na’aatinak rik’in laj Elias,” Eb’ li Esilal sa’ li Najter Chaq’rab’
Li Qaawa’ na’aatinak rik’in laj Elias
Rab’inkil lix yaab’ xkux li Qaawa’
Li rey aj Ajab kixye re li ixqi rey xJesabel naq li Qaawa’ kinumta sa’ xb’eeneb’ laj tij re laj Bahal. Kijosq’o’ li xJesabel ut kixye naq taakamsiiq li profeet aj Elias.
Re xkolb’al rib’, laj Elias ki’el chaq sa’ li tenamit Israel. Kib’eek chiru 40 chi kutan ut 40 chi q’ojyin, yoo chixkuyb’al xsa’. Toja’ naq kiwulak sa’ li tzuul Sinai ut kixtaw jun ochoch pek kixmuq wi’ rib’. Li Qaawa’ kixye re laj Elias naq taataqe’q sa’ li tzuul re naq taruuq chiraatinankil laj Elias.
Ki’apun jun kawil iq’ ut kixjoreb’ li pek chixsutam li ochoch pek. Chirix a’an, kichiq’chot li ch’och’ xb’aan jun hiik. Toja’ naq kitikla jun nimla xam. Laj Elias kirab’i li nimla choqink li kichal xb’aan li iq’, li hiik, ut li xam. A’b’an moko xwan ta lix yaab’ xkux li Qaawa’ sa’ li choqink a’an.
Toja’ naq laj Elias kirab’i jun xyaab’ kuxej q’un na’aatinak. Kixnaw naq a’an li Qaawa’. Li Qaawa’ kixpatz’ re laj Elias k’a’ut naq wan aran.
Laj Elias kixye naq xmuq rib’ re xkolb’al rib’. Ak ke’kamsiik chixjunileb’ li profeet, ut li tenamit ke’xtz’eqtaana li Qaawa’.
Li Qaawa’ kixk’ojob’ xch’ool laj Elias ut kixye re naq toj wankeb’ naab’al laj Israelita li neke’xloq’oni li Qaawa’. Li Qaawa’ kixye re laj Elias naq taasutq’iiq sa’ ochoch ut naq tixkawresi jun chik li profeet. Li ak’ profeet, a’an laj Eliseo xk’ab’a’.