Li xSara ut laj Isaak, xb’aan laj Scott Snow

14–20 febrero

Genesis 18–23

“Ma ch’a’aj k’a’ruhaq chiru li Qaawa’?”

Naq nakayal aaq’e chixtenq’ankileb’ li kok’al, k’oxla roksinkileb’ li na’leb’ re xtzolb’aleb’ li kok’al ak ninqeb’ ut li toj ka’ch’ineb’ wankeb’ sa’ li hu a’in.

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li kok’al chixwotzb’al li neke’xnaw chirix Genesis 18–23, k’uteb’ xjalam-uuch li k’a’ru wan sa’ li ch’ol a’in, ut patz’ reheb’ naq te’xwotz k’a’ru najultiko’ reheb’ chirix li seraq’.

Xk’utb’al li tzol’leb’: Kok’al toj ka’ch’ineb’ xyu’am

Genesis 18:9–14; 21:1–7

Naru ninpaab’ naq li Dios tixk’e li naxyeechi’i.

Us ta li Dios kixyeechi’i re xSara ut laj Abraham naq taawanq jun xka’ch’ineb’, naq ak yookeb’ chi tixk, chanchan naq ink’a’ chik taak’ulmanq a’an. Chan ru taawoksi li seraq’ a’an re xtenq’ankileb’ li kok’al chixpaab’ankil naq li Dios junelik tixk’e li naxyeechi’i?

Kok’ k’anjel naru chi b’aanumank

• Wotz chi k’osb’il ru naq li Dios kixyeechi’i re laj Abraham ut xSara naq taawanq xka’ch’ineb’ ut naq kik’ulman ajwi’ a’an (chi’ilmanq Genesis 17:15–19; 18:9–14; 21:1–7). Malaj patz’ re junaq sumal re li teep naq te’xtiqib’ rib’ jo’ laj Abraham ut xSara ut te’xwotz li seraq’. Tenq’aheb’ li kok’al chixtawb’al ru naq laj Abraham ut xSara ak tiixeb’ re naq taaruuq raj taawanq xka’ch’ineb’. Ye li patz’om wan sa’ Genesis 18:14 reheb’ li kok’al, “Ma ch’a’aj k’a’ruhaq chiru li Qaawa’?” Ch’olob’ naq li Qaawa’ naru chixb’aanunkil li naxyeechi’i us ta chanchan naq jwal ch’a’aj.

• Yeechi’i k’a’ruhaq reheb’ li kok’al li taab’aanu sa’ xraqik li tzolok (maare taakanab’eb’ chixb’onb’al jun jalam-uuch). Sa’ li tzolok, jultika reheb’ li k’a’ru xayeechi’i ut chirix a’an b’aanu li xayeechi’i. Ch’olob’ naq li Qaawa’ junelik naxk’e li naxyeechi’i.

• Patz’ reheb’ li kok’al naq te’xwotz junaq seraq’ b’ar wi’ ke’royb’eni junaq k’a’aq re ru jwal neke’raj. B’ichahomaq jun li b’ich li naxch’olob’ xyaalal lix yeechi’ihom li Dios, maare “Paab’eb’ li taqlahom” (B’ichleb’aal choq’ reheb’ li Kok’al, 69–70). Tenq’aheb’ li kok’al chixk’eeb’al reetal k’a’ru naxyeechi’i qe li Dios wi tiiko chi paab’ank.

• K’ut xjalam-uuch jun kub’iha’ malaj li loq’laj wa’ak (chi’ilmanq Hu reheb’ li Jalam-uuch re li Evangelio, 103, 104, 107, 108). Tenq’aheb’ li kok’al chixtzolb’al k’a’ru naqayeechi’i re li Dios ut k’a’ru naxyeechi’i qe li Dios naq nakub’e qaha’ ut naqatzeka li loq’laj wa’ak. (Chi’ilmanq Leales a la Fe, 28–30.)

Genesis 22:1–14

Laj Abraham ki’ab’in chiru li Qaawa’.

Kich’a’ajko’ chiru laj Abraham xpaab’ankil li taqlahom naq tixmayeja li ralal. Tz’il rix chan ru taawoksi li seraq’ a’in re xwaklesinkil xch’ooleb’ li kok’al chi ab’ink chiru li Dios us ta ch’a’aj malaj ink’a’ neke’xnaw k’a’ru aj-e li taqlahom.

Kok’ k’anjel naru chi b’aanumank

• K’ut xjalam-uuch laj Abraham ut laj Isaak (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut ye li seraq’ chirix laj Abraham ut laj Isaak (chi’ilmanq ajwi’ “Abraham y el sacrificio de Isaac,” sa’ Relatos del Antiguo Testamento). K’ut xjalam-uuch li Jesukristo ut ye reheb’ li kok’al chan ru naq li seraq’ chirix laj Abraham ut laj Isaak naru naxjultika qe lix mayej li qaChoxahil Yuwa’ ut li Jesukristo choq’ qe.

• B’aanuhomaq jun b’atz’unk b’ar wi’ li kok’al tento te’xb’aanu k’a’ruhaq ch’olob’anb’il chiruheb’. Naru teeroksi jun xjalam-uuch li Kolonel chi muqmu sa’ li tzoleb’aal jo’ xcha’al li b’atz’unk. K’a’ru naxpatz’ qe li qaChoxahil Yuwa’ naq taqab’aanu? Tenq’aheb’ li kok’al chixtawb’al ru naq xpaab’ankil lix taqlahom tooxtenq’a chi q’ajk chi wank rik’in li Jesukristo.

Xk’utb’al li tzol’leb’: Kok’al ak ninqeb’

Genesis 18:9–14; 21:1–7

Li Qaawa’ naxk’e li naxyeechi’i, us ta chanchan naq ch’a’aj.

Kiyeeman re laj Abraham ut xSara naq taawanq jun xka’ch’ineb’, a’b’an chanchan naq ink’a’ taaruuq—laj Abraham jun cient chihab’ wan re, ut xSara 90 chihab’ wan re (chi’ilmanq Genesis 17:17). Li Dios kixb’aanu li kixyeechi’i, ut li seraq’ a’in naru naxtenq’aheb’ li kok’al chixkawob’resinkil lix paab’aaleb’ chirix lix yeechi’ihom li Dios choq’ reheb’.

Kok’ k’anjel naru chi b’aanumank

• Tz’iib’a chixjunileb’ li aatin re li xb’een ch’ol aatin re Genesis 18:14 chiru perel hu, ut k’e junjunq reheb’ li kok’al. Patz’ reheb’ naq te’xtus ruheb’ li aatin jo’ chanru naq wan sa’ li raqal. Yaab’asi Genesis 18:9–14; 21:1–7 reheb’ li kok’al re te’xtaw jun seraq’ jo’ li re xSara ut laj Abraham naq li Qaawa’ kixb’aanu li chanchan naq jwal ch’a’aj. K’a’ru naqatzol sa’ li seraq’ chirix xSara ut laj Abraham li naru nokoxk’e chixpaab’ lix yeechi’ihom li Dios?

• K’uteb’ xjalam-uuch seraq’ sa’eb’ li loq’laj hu b’ar wi’ li Dios kixb’aanu li k’a’ru chanchan naq ch’a’aj (chi’ilmanq Hu reheb’ li Jalam-uuch re li Evangelio, 7, 8, 25, 26). Patz’ reheb’ li kok’al naq te’xwotz k’a’ru neke’xnaw chirixeb’ li seraq’ neke’k’utman sa’eb’ li jalam-uuch ut tenq’aheb’ chirilb’al chan ru naq li Qaawa’ kixb’aanu li kixyeechi’i. Wotz chan ru naq li Qaawa’ naxk’e li naxyeechi’i aawe sa’ laa yu’am malaj sa’ xyu’ameb’ kristiaan nakanaweb’ ru (re rilb’al reetalil a’an, chi’ilmanq Malakias 3:10; Jwan 14:26–27; Tzol’leb’ ut Sumwank 89:18–21). Kanab’eb’ li kok’al chixwotzb’al li seraq’ neke’xnaw.

Genesis 19:15–26

Naru nin’eelelik chiru li maa’usilal.

Li seraq’ chirix laj Lot ut lix junkab’al naq ke’eelelik chiru li maa’usilal sa’ lix tenamiteb’ naru naxtenq’aheb’ li kok’al chi eelelik chiruheb’ li yib’ aj na’leb’ sa’eb’ lix yu’am.

Eelelik chaq sa’ Sodoma ut Gomora, xb’aan laj Julius Schnorr von Carolsfeld

Kok’ k’anjel naru chi b’aanumank

• Re xk’osb’al ru Genesis 19:15–26, ch’olob’ naq lix junkab’al laj Lot kiwan sa’ jun tenamit aj maak, ut eb’ li anjel ke’xye re naq te’elq aran. Ilomaq li raqal 15–17, 26, ut tenq’aheb’ li kok’al chixk’oxlankil k’a’ raj ru naraj naxye “eelelik” chiru li ink’a’ us ut “mat-ilok chawix” sa’ li qakutankil (raqal 17).

• K’ut xjalam-uuch li Kolonel ut patz’ reheb’ li kok’al naq te’xk’e jun yokb’ b’ar wi’ wan li jalam-uuch naq yooqeb’ chixwotzb’al li na’leb’ te’xb’aanu re eelelik chiru li maak ut nach’ok rik’in li Kristo.

• Aatinanqex chirix junaq hoonal naq li ramiiweb’ tixb’oqeb’ raj chixb’aanunkil li k’a’ru neke’xnaw naq ink’a’ us. Chan ru “too’eeleliq” chiru li k’a’aq re ru a’an? K’a’ raj ru taqaye re li qamiiw?

Genesis 22:1–14

Li qaChoxahil Yuwa’ kixtaqla chaq li Ralal, li kixmayeja rib’ sa’ qak’ab’a’.

Naq tat-aatinaq chirix lix k’ulub’ahom laj Abraham chixmayejankil laj Isaak, k’e reetal reek’ahomeb’ li kok’al. Oksi li seraq’ a’in re xtenq’ankileb’ li kok’al chixkawob’resinkil lix rahom choq’ re lix mayej li Kolonel.

Kok’ k’anjel naru chi b’aanumank

• Re xtenq’ankileb’ li kok’al chixtawb’al ru li seraq’ sa’ Genesis 22:1–14, yaab’asiheb’ li raqal ut patz’ reheb’ naq te’xyiib’ xjalam-uuch li yookat chixyaab’asinkil. K’a’ut naq kich’a’ajko’ chiru laj Abraham xpaab’ankil lix taqlahom li Qaawa’ naq tixmayeja laj Isaak? K’a’ru naqatzol chirix laj Abraham sa’ li seraq’ a’in?

• Oksiheb’ xjalam-uuch laj Abraham ut laj Isaak ut li Jesus chiru krus (chi’ilmanq Hu reheb’ li Jalam-uuch re li Evangelio 9, 57) re xjuntaq’eetankil li seraq’ sa’ Genesis 22 rik’in lix mayej li Kolonel (chi’ilmanq Mateo 27:26–37). K’a’ru naqatzol chirix li qaChoxahil Yuwa’ ut li Jesukristo sa’ li seraq’ chirix laj Abraham ut laj Isaak ut lix k’eeb’al li Jesus chiru Krus?

• K’ut li video “De tal manera amó Dios al mundo” (ChurchofJesusChrist.org), malaj b’ichahomaq sa’ komonil jun li b’ich chirix lix mayej li Kolonel, maare “Kixtaqla li Ralal” (B’ichleb’aal choq’ reheb’ li Kok’al, 21–22). Patz’ reheb’ li kok’al naq te’xye chan ru naq lix mayej li Jesus naxk’ut lix rahom li qaChoxahil Yuwa’ choq’ qe.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz reheb’ lix junkab’al jun seraq’ b’ar wi’ ke’osob’tesiik xb’aan li Dios chirix naq ke’ab’in chiru lix taqlahom.

Xkawresinkil qib’ jo’ aj k’utunel

Waklesiheb’ xch’ool chi oxloq’ink. Wi na’ajman ru, jultika reheb’ li kok’al naq tento te’oxloq’inq. Naru taab’aanu a’an chi b’ichanb’il malaj taak’ut junaq xjalam-uuch li Jesus.