“14–20 febrero. Genesis 18–23: “Ma ch’a’aj k’a’ruhaq chiru li Qaawa’?” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)
“14–20 febrero. Genesis 18–23,” Kim, Taaqehin—Choq’ reheb’ li komon ut li junkab’al: 2022
Li xSara ut laj Isaak, xb’aan laj Scott Snow
14–20 febrero
Genesis 18–23
“Ma ch’a’aj k’a’ruhaq chiru li Qaawa’?”
Il ru ut k’oxla Genesis 18–23, ut tz’iib’a li nakak’oxla. Naru nakawoksi li na’leb’ sa’ li tusleb’ aatin a’in re xtzolb’aleb’ li ch’ol a’in, ut maare tatmusiq’aaq ajwi’ chixsik’b’al jalan chik li esil sa’eb’ li loq’laj hu li xkawresi li Qaawa’ choq’ aawe.
Tz’iib’a li nakak’oxla
Lix yu’am laj Abraham, b’ar wi’ kixnumsi li rahilal jo’ ajwi’ li sahilal, a’an reetalil jun li na’leb’ li kik’utb’esiman chiru laj Abraham—naq wanko sa’ ruchich’och’ re taayale’q qix, “re rilb’al ma taqab’aanu chixjunil li k’a’aq re ru li b’arwan tixtaqlaheb’ wi’ li Qaawa’ li qaDios” (Abraham 3:25). Ma kixk’ut laj Abraham naq wan xpaab’aal? Ma kikana chi tiik sa’ xpaab’ankil lix yeechi’ihom li Dios naq maak’a’jo’ xk’ihaleb’ li ralal xk’ajol te’wanq, us ta ak tiix a’an ut li xSara ut toj maak’a’eb’ xkok’al? Ut naq kiyo’la laj Isaak, ma kikana laj Abraham chi tiik chi paab’ank naq kitaqlaak chixmayejankil li alalb’ej a’in li kitz’aqob’resiik wi’ ru li yeechi’inb’il xb’aan li Dios sa’ li sumwank? Yaal naq kikana chi tiik chi paab’ank laj Abraham. Laj Abraham kixpaab’ li Dios, ut li Dios kixnaw naq chi jo’kan tixb’aanu laj Abraham. Sa’ Genesis 18–23 wankeb’ resil lix yu’am laj Abraham ut xkomoneb’ chik li naru neke’xk’e chiqak’oxla li qametz’ew chixpaab’ankil lix yeechi’ihom li Dios, chi eelelik chiru li maa’usilal re maajun wa chik taqil, ut chixpaab’ankil li Dios, maak’a’ naxye jo’ nimal li mayej li tento taqak’e.
Li na’leb’ re xtzolb’aleb’ li loq’laj hu aajunes
Li Qaawa’ naxtz’aqob’resi ru lix yeechi’ihom sa’ li kutan k’oxlanb’il xb’aan a’an.
Ninqeb’ lix yeechi’ihom li Qaawa’ reheb’ li tiikeb’ chi paab’ank, a’ut naq wan li qach’a’ajkilal, wan naq naqapatz’ chan tab’i’ ru te’qak’ul li yeechi’ihom a’an. Maare laj Abraham ut li xSara ke’patz’ok ajwi’ chi jo’kan. K’a’ru nakatzol rik’in li ke’xnumsi? Maare taatikib’ li tzolok rik’in rilb’al li kixyeechi’i li Qaawa’ re laj Abraham sa’ Genesis 17:4, 15–22. K’a’ru ke’xb’aanu laj Abraham ut li xSara? (chi’ilmanq ajwi’ Genesis 17:23 jo’ jaltesinb’il ru xb’aan laj Jose Smith; Genesis 18:9–12). K’a’ru kixb’aanu li Qaawa’ re xtenq’ankileb’ chixpaab’ankil li k’a’ru xyeechi’i reheb’? (chi’ilmanq Genesis 18:14).
K’a’ru nakataw sa’eb’ li raqal a’in li naxnimob’resi laa paab’aal? K’a’ru ak xanumsi laa’at—malaj li ani nakanaw ru—li xnimob’resi laa paab’aal naq li Qaawa’ tixtz’aqob’resi ru li xyeechi’i aawe sa’ li kutan k’oxlanb’il xb’aan a’an?
Chi’ilmanq ajwi’ Tzol’leb’ ut Sumwank 88:68.
Li Qaawa’ nokoxtaqla chi eelelik chiru li maa’usilal.
K’a’ru nakatzol chirix li eelelik chiru li maa’usilal naq nakawil resil laj Lot ut lix junkab’al? K’a’ru naxtoch’ aach’ool chirix li ke’xb’aanu ut ke’xye li anjel re xtenq’ankil laj Lot ut lix junkab’al chi eelelik chiru xsachik lix tenamiteb’? (chi’ilmanq Genesis 19:12–17). Chan ru naq li Qaawa’ nakatxtenq’a laa’at ut laa junkab’al chi eelelik malaj chixkolb’al eerib’ chiru li maa’usilal sa’ li ruchich’och’?
Re xtawb’al xkomon chik li na’leb’ chirix lix maa’usilal li tenamit Sodoma ut Gomora, chi’ilmanq Esekiel 16:49–50 ut Jude 1:7–8.
Chi’ilmanq ajwi’ Genesis 19:9–15 jo’ jaltesinb’il ru xb’aan laj Jose Smith.
Eelelik chaq sa’ Sodoma ut Gomora, xb’aan laj Julius Schnorr von Carolsfeld
K’a’ru lix maak li rixaqil laj Lot?
Li Elder Jeffrey R. Holland kixye:
“Li rixaqail laj Lot ink’a’ yal ki’ilok chi ixb’ej; sa’ xch’ool kiraj sutq’iik aran. Toj maji’ elenaq chaq sa’ xnub’aal li tenamit, ak kiraj xyalb’al wi’chik li wank sa’ Sodoma ut Gomora. … Maak’a’ xpaab’aal. Ink’a’ kixpaab’ naq li Qaawa’ taaruuq tixk’e re li k’a’ru chaab’il wi’chik chiru li ak wan re. …
“Reheb’ chixjunil ninye, “Jultikaq eere li rixaqal laj Lot” [Lukas 17:32]. Li paab’aal aajel ru choq’ re li k’a’ru chalel. Li paab’aal naxk’ojob’ rib’ sa’ xb’een li ak xnume’, a’b’an moko nakana ta aran. Li paab’aal naroyb’eni naq k’a’jo’aq xnimal ru li kawresinb’il choq’ qe xb’aan li Dios, ut naq li Jesukristo a’an “li xyuwa’il aj tij re li sahilal chalel” (Hebreos 9:11)” (“Lo mejor aún está por venir,” Liahona, enero 2010, 16–21).
Naq kiwan xch’ool laj Abraham chixmajeyankil li ralal, a’an wan choq’ reetalil li Dios ut li Ralal.
Ink’a’ naqanaw tz’aqal k’a’ut naq li Dios kixtaqla laj Abraham chixmayejankil laj Isaak; a’b’an naqanaw naq kixb’aanu re xyalb’al rix lix paab’aal chirix li Dios (chi’ilmanq Genesis 22:12–19). Naq nakawil Genesis 22:1–19, k’a’ru nakatzol sa’ li k’a’ru kixnumsi laj Abraham?
Kiwan xch’ool laj Abraham chixmajeyankil li ralal, “a’ li wan choq’ reetalil li Dios ut li Ralal Junaj Chirib’il” (Jakob 4:5). Naq nakak’e reetal lix juntaq’eetil lix yalb’al rix laj Abraham rik’in li rajom xch’ool li Dios Yuwa’b’ej chixmayejankil li Ralal choq’ qe, k’a’ru nakaweek’a chirix laa Choxahil Yuwa’?
Wan ajwi’ xjuntaq’eetil laj Isaak rik’in li Kolonel. Naru taawil wi’chik Genesis 22:1–19 re xsik’b’al xjuntaq’eetileb’.
Chi’ilmanq ajwi’ “Akedah (La atadura)” (video), ChurchofJesusChrist.org.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Genesis 18:14.Ma wanqeb’ li esil sa’ li loq’laj hu, sa’ li resilal laa junkab’al, malaj sa’ laa yu’am li naru taawotz, b’ar wi’ xatzol naq maak’a’ li k’a’ru ch’a’aj chiru li Qaawa’?
-
Genesis 18:16–33.K’a’ru naqatzol chirix laj Abraham sa’eb’ li raqal a’in? Chan ru taqataaqe xb’aanuhom? (Chiʼilmanq ajwiʼ Alma 10:22–23.)
-
Genesis 19:15–17.Eb’ li raqal a’in naru te’xtenq’a laa junkab’al chixkawresinkil rib’ naq taa’ajmanq eelelik chaq chiru li maa’usilal. K’a’ru li maare too’eeleliq chaq wi’? Naru tex’aatinaq chirix rilb’al ut rab’inkil li k’a’ru ink’a’ us, malaj li yoob’ank aatin. Chan ru too’eeleliq chiruheb’ li k’a’aq re ru a’in?
-
Genesis 21:9–20.K’a’ru naxtoch’ xch’ool laa junkab’al chirix li kixb’aanu li Dios rik’in li xAgar ut laj Ismael chirix naq li xSara ut laj Abraham ke’risiheb’ chaq?
-
Genesis 22:1–14.Chan ru taatenq’a laa junkab’al chirilb’al xjuntaq’eetil li esil naq li Dios kixtaqla laj Abraham chixmayejankil laj Isaak rik’in li resil lix mayej li Kolonel re xtojb’al qix? Naru taak’ut xjalam-uuch laj Abraham ut laj Isaak ut xjalam-uuch lix kamik li Qaawa’ chiru krus (chi’ilmanq “Abraham y el sacrificio de Isaac,” sa’ Relatos del Antiguo Testamento), ut laa junkab’al taa’aatinaq chirix xjuntaq’eetileb’ li esil a’an. Naru ajwi’ teeb’icha jun li b’ich chirix lix mayej li Kolonel, maare “Kixtaqla li Ralal” (B’ichleb’aal choq’ reheb’ li Kok’al, 20–21), ut teesik’ li aatin li naxch’olob’ lix mayej li Kolonel.
K’a’ru xpatz’man qe naq taqamajeya jo’ junkab’al? Chan ru xooxjilosi li mayej a’in rik’in li Dios?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Koxra li Dios, ut li Ralal,” Eb’ li B’ich, 112.
Xkawresinkil aawib’ chi tzolok
Ab’i li Musiq’ej. Naq yookat chi tzolok, k’e reetal li nakak’oxla ut nakaweek’a, us ta maare jalan wi’ rik’in li aatin li yookat chirilb’al. Naru naq li na’leb’ li nakak’ul chi jo’kan, a’an ajwi’ li taaraj li Dios naq taanaw.
Xjalam-uuch laj Abraham ut laj Isaak, xb’aan laj Jeff Ward