Xjalam-uuch xRebeka, xb’aan li xDilleen Marsh

21–27 febrero

Genesis 24–27

Xk’ojob’ankil wi’chik li sumwank

Naq yooqat chixtzolb’al Genesis 24–27 ut chixkawresinkil aawib’ re k’utuk, k’oxlaheb’ li kok’al. K’a’ru li tento te’xtzol? B’ar wan reheb’ li kok’ k’anjel a’in taawanq xyaalal choq’ reheb’? A’ yaal k’a’ru li neke’raj ru, naru nakawoksiheb’ li kok’ k’anjel wankeb’ arin malaj li wankeb’ sa’ Kim, Taaqehin—Choq’ reheb’ li komon ut li junkab’al.

Tz’iib’a li nakak’oxla

Xkanab’ankileb’ chi wotzok

Rub’el lix chunleb’aaleb’ li kok’al, k’e jun li patz’om chirix junaq seraq’ malaj na’leb’ re Genesis 24–27. Patz’ reheb’ li kok’al naq te’xsume li patz’om wi neke’ru, malaj patz’ reheb’ naq te’rab’i xsumenkil sa’ li tzolok.

Xk’utb’al li tzol’leb’: Kok’al toj ka’ch’ineb’ xyu’am

Genesis 24:10–21

Naru ninraheb’ li was wiitz’in.

Lix moos laj Abraham kisach xch’ool xb’aan lix chaab’ilal xRebeka naq kixyeechi’i ruk’a’ a’an ut eb’ ajwi’ lix lajeeb’ chi kameey. A’an naru nak’anjelak reheb’ li kok’al re te’xjultika naq tento te’xraheb’ li ras riitz’in.

Jun xjulel li ha’ sa’ li najter Berseba, b’ar wi’ laj Abraham ut laj Isaak ke’xpik li jul.

Kok’ k’anjel naru chi b’aanumank

• K’ut xjalam-uuch li xRebeka wan sa’ li perel re kok’ k’anjel re li xamaan a’in. Aatinan chirix li jalam-uuch rik’in xk’osb’al ru li seraq’ wan sa’ Genesis 24:10–21, b’ar wi’ li xRebeka kixk’ut xchaab’ilal chiru lix moos laj Abraham. Ye naq li raatin ut lix chaab’ilal kixk’ut naq li xRebeka a’an li naraj li Dios naq taasumlaaq rik’in laj Isaak, li ralal laj Abraham. Patz’ reheb’ li kok’al naq te’xk’oxla naq a’aneb’ li moos neke’wulak rochb’eeneb’ lix kameey malaj naq li xRebeka naxk’e ruk’a’eb’. K’eheb’ ch’ol aatin reheb’ re naq te’xka’suti, maare “Si b’ayaq wuk’a’ ” (raqal 17) ut “Tinxok ajwi’ chaq xha’eb’ laa kameey” (raqal 19). K’a’ut naq aajel ru naq taqaraheb’ li qas qiitz’in?

• Wotz chan ru naq li Kolonel kixk’ut xchaab’ilal chiru li ras riitz’in. Patz’ reheb’ junjunq li kok’al naq te’xwotz ajwi’ chan ru neke’rahok.

• Ye jo’q’e naru neke’rahok li kok’al, maare sa’ li b’atz’unk rik’ineb’ li ramiiw malaj sa’ xnawb’al ru junaq kristiaan sa’ li eskweel. Patz’ reheb’ li kok’al k’a’ raj ru te’xb’aanu re naq te’xk’ut xrahom sa’eb’ li hoonal a’an.

• B’ichahomaq jun li b’ich chirix li chaab’ilal, maare “Wik’in laa’in natikla li chaab’ilal” malaj “Chinwanq raj jo’ li Jesus” (B’ichleb’aal choq’ reheb’ li Kok’al, 83, 41–42). Patz’ reheb’ li kok’al naq te’rab’il li aatin “chaab’ilal” (malaj chanchan a’an) ut te’xaqliiq naq te’rab’i. Chan ru taqak’ut qachaab’ilal chiruheb’ li qas qiitz’in? Li perel re kok’ k’anjel re li xamaan a’in naru natenq’an sa’ li aatinak a’in.

Genesis 25:29–34

Naru ninsik’eb’ ru li k’a’aq re ru jwal aajeleb’ ru.

Xb’aan naq laj Esau a’an li xb’een alalb’ej sa’ lix junkab’al, a’an raj taak’uluq re li teneb’ahom ut li eechanihom, a’an xk’ulub’il li xb’een alalb’ej. Sa’ jun kutan naq laj Esau kitz’oka, kixjal ru xk’ulub’il li xb’een alalb’ej rik’in laj Jakob, li riitz’in, ruuchil b’ayaq li wa. Li seraq’ a’in naru naxk’ut chiruheb’ li kok’al naq tento taqasik’ ru li k’a’ru nakana chi junelik sa’ xna’aj li yal numel.

Kok’ k’anjel naru chi b’aanumank

• K’am li k’a’aq re ru sa’ li tzoleb’aal li tatxtenq’a chixwotzb’al li seraq’ chirix laj Esau naq kixk’ayi xk’ulub’il li xb’een alalb’ej, maare jun li sek’ ut xjalam-uuch junaq kristiaan naq naxk’ul jun osob’tesiik rik’in li tijonelil. Patz’ reheb’ li kok’al naq te’roksi li k’a’aq re ru re te’xwotz li neke’xnaw chirix li seraq’. “Jacob y Esau” (sa’ Relatos del Antiguo Testamento) naru na’oksiman. Ilomaq ru Genesis 25:34 sa’ komonil, ut ch’olob’ naq li xb’een alalb’ej taawanq rosob’tesinkil ut xteneb’ankil chirilb’al li junkab’al.

• K’ut wiib’ jalam-uuch chiruheb’ li kok’al: jun li naxk’ut li k’a’ru nim xloq’al sa’ musiq’ej (jo’ jun santil ochoch) ut jun chik li naxk’ut li k’a’ru yal numel (jo’ jun li b’atz’unk, jun b’atz’uul, malaj jun li kab’). Patz’ reheb’ naq te’xsik’ ru b’ar wan reheb’ a’an li tooxtenq’a chi q’ajk rik’in li qaChoxahil Yuwa’. B’aanu a’an rik’in jalan jalanqeb’ jalam-uuch.

• B’ichahomaq jun li b’ich na’aatinak chirix xsik’b’al ru li us, maare “Tinsik’ ru li us” (B’ichleb’aal choq’ reheb’ li Kok’al, 82–83) Ch’olob’ xyaalal naq noko’osob’tesiik ut nasaho’ qach’ool naq naqasik’ ru li us.

Xk’utb’al li tzol’leb’: Kok’al ak ninqeb’

Genesis 24:1–28

Tin’osob’tesiiq naq taawanq inpaab’aal ut tink’ut inchaab’ilal chiruheb’ li was wiitz’in.

Lix moos laj Abraham kixpaab’ naq li Dios tixk’am xb’e re tixtaw junaq rixaqil laj Isaak. Li xRebeka kixk’ut xchaab’ilal chiru lix moos laj Abraham. Chan ru taatenq’aheb’ li kok’al chixtaaqenkil li kixb’aanu li moos ut li xRebeka?

Kok’ k’anjel naru chi b’aanumank

• Ilomaq Genesis 24:1–28 sa’ komonil ut tenq’aheb’ li kok’al chixk’eeb’al reetal li paab’aal ut li chaab’ilal (che’ilmanq li raqal 12–14 ut 17–20). Chan ru ki’osob’tesiik li moos ut li xRebeka xb’aan naq ke’xk’ut xpaab’aaleb’ ut xchaab’ilaleb’? Tz’iib’a chiru li pizarron Naru naqak’ut qapaab’aal … ut Naru naqak’ut qachaab’ilal … , ut patz’ reheb’ li kok’al naq te’xye chan raj ru te’qachoy li ch’ol aatin a’an.

• Chiru kok’ hu, tz’iib’a li kixb’aanu malaj kixye lix moos laj Abraham ut li k’a’aq re ru kixye malaj kixb’aanu xRebeka sa’ Genesis 24:1–28. Patz’ reheb’ li kok’al naq te’xchap jun ch’ina hu ut te’k’anjelaq sa’ ch’uut re te’xq’ehi ani xyehok re malaj xb’aanunk re li wan chiru li ch’ina hu (naru te’ril sa’ li loq’laj hu wi neke’raj). K’a’ru naxk’ut li seraq’ a’in chiqu chirix li chaab’ilal? K’a’ru naxk’ut chiqu chirix li paab’aal? Wankeb’ chik xkomon reetalil li chaab’ilal ut li paab’aal sa’ Genesis 24:29–33, 58–61.

• Patz’ reheb’ li kok’al naq te’xk’oxla junaq hoonal b’ar wi’ xe’ril li chaab’ilal. Patz’ reheb’ naq te’xtz’iib’a ut te’xwotz sa’ li tzoleb’aal malaj rik’ineb’ lix junkab’al sa’ kab’l. K’a’ru naqeek’a naq jun kristiaan nawan xrahom qik’in?

Genesis 25:21–34

Tinraheb’ li k’a’aq re ru neke’kana chi junelik sa’ xna’aj li yal numel.

Laj Esau kixsik’ ru xjalb’al ru li k’a’ru nim xloq’al, xk’ulub’il li xb’een alalb’ej, rik’in li k’a’ru yal b’ab’ay xloq’al, b’ab’ay li kaxlan wa ut li soop. Naq nakawileb’ li raqal a’in, tz’il rix chan ru taatenq’aheb’ li kok’al chixsik’b’aleb’ ru li k’a’aq re ru aajeleb’ ru sa’ li junelik q’e kutan.

Kok’ k’anjel naru chi b’aanumank

• Ilomaq sa’ komonil li seraq’ chirix laj Jakob ut laj Esau sa’ Genesis 25:21–34. Naq yooqex chirilb’al, patz’ reheb’ li kok’al naq te’xsik’ ru junaq na’leb’ sa’ li seraq’ re te’xyiib’ xjalam-uuch. Chirix a’an patz’ reheb’ naq te’roksi lix jalam-uucheb’ re xwotzb’al li seraq’ rik’ineb’ li raatin. Wi neke’raj xtenq’ankil re te’xtaw ru k’a’ru naraj naxye li xb’een alalb’ejil, ye reheb’ naq te’ril “Xb’een alalb’ejil” sa’ li K’utul Raqal reheb’ li Loq’laj Hu. Patz’ reheb’ li kok’al naq te’xk’oxla naq laj Esau kixpatz’ xna’leb’ qe chirix ma tixjal ru li xb’een alalb’ejil rik’in li wa; k’a’ raj ru taqaye re?

• Seraq’i junaq hoonal b’ar wi’ xakanab’ junaq k’a’aq re ru ka’ch’in xloq’al xb’aan junaq chik nim xloq’al. Malaj k’ut li video “Continuemos con paciencia” (ChurchofJesusChrist.org). Chan ru naq juntaq’eet laa seraq’ malaj li seraq’ sa’ li video rik’in li k’a’ru kixsik’ ru laj Esau sa’ Genesis 25:29–34? Tenq’aheb’ li kok’al chixk’oxlankileb’ li osob’tesiik naraj xk’eeb’al li qaChoxahil Yuwa’ reheb’ (jo’ xnawomeb’ xch’ool chi kaw, li rosob’tesihom li santil ochoch, malaj li junelik yu’am rik’in a’an). Waklesi xch’ooleb’ chixk’oxlankileb’ li k’a’aq re ru te’xkanab’ re naq te’xk’ul li xninqal ru osob’tesiik.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla junaq xmeta chirix jun na’leb’ xe’xtzol sa’ li Tzoleb’aal reheb’ li Kok’al anajwan. Maare te’xk’ojob’ naq te’xk’ut xrahom chiruheb’ li komon sa’ rochocheb’.

Xkawresinkil qib’ jo’ aj k’utunel

Eb’ li kok’al nawulak chiruheb’ xwotzb’al li k’a’ru yookeb’ chixtzolb’al. Us ta toj kok’eb’, naru neke’xkawob’resiheb’ li komon sa’ lix junkab’aleb’. Waklesi xch’ooleb’ chixwotzb’al rik’ineb’ lix junkab’al junaq na’leb’ xe’xtzol sa’ li Tzoleb’aal reheb’ li Kok’al. (Chi’ilmanq Li k’utuk jo’ li Kolonel, 30.)