Xjalam-uuch laj Moises ut laj Aaron sa’ rochochil laj Farahon, xb’aan laj Robert T. Barrett

28 marzo–3 abril

Exodo 7–13

“Chijultiko’q eere li kutan a’in, li kex’el wi’ chaq sa’ Egipto”

Naq yooqat chirilb’al Exodo 7–13, k’oxla chan ru naq li na’leb’ sa’eb’ li raqal a’in naxkawob’resi laa paab’aal chirix li Jesukristo. Chan ru taatenq’aheb’ li kok’al chixk’ulb’al ajwi’ a’an?

Tz’iib’a li nakak’oxla

Xkanab’ankileb’ chi wotzok

K’eheb’ wiib’ oxib’ jalam-uuch li te’reetali li k’a’aq re ru naxye sa’ Exodo 7–13 (maare jun amoch, li suq, ut jun karneer) rub’el junaq li t’ikr sa’ xb’een li meex. Patz’ re junjunqeb’ li kok’al naq te’xchap jun reheb’ li jalam-uuch, ut patz’ reheb’ naq te’xwotz k’a’ru xe’xtzol chirix li jalam-uuch sa’ kab’l.

Xk’utb’al li tzol’leb’: Kok’al toj ka’ch’ineb’ xyu’am

Exodo 7–11

Li Qaawa’ wan xwankil sa’ xb’een chixjunil.

Eb’ laj Israel wankeb’ chaq chi preexil ut ink’a’ keru chirach’ab’ankil rib’, a’b’an li Qaawa’ kixk’ut lix wankil ut kirach’ab’eb’. Chan ru taawoksi li seraq’ a’in re xtenq’ankileb’ li kok’al chixkanab’ankil rib’eb’ sa’ ruq’ li Qaawa’ ut lix wankilal?

Kok’ k’anjel naru chi b’aanumank

• Ileb’ junjunq raqal sa’ Exodo 7–11 re xk’utb’al chiruheb’ li kok’al li seraq’ chirixeb’ li lajeeb’ chi rahilal kixtaqla li Qaawa’ sa’ xb’eeneb’ laj Egipto (chi’ilmanq ajwi’ “El Profeta Moises,” sa’ Relatos del Antiguo Testamento). Patz’ reheb’ li kok’al naq te’xyiib’ jalam-uuch li te’reetaliheb’ li rahilal. Patz’ reheb’ li kok’al naq te’xtaqsi lix jalam-uucheb’ naq taaye wi’chik xk’ab’a’eb’ li rahilal. Ileb’ li ch’ol aatin sa’ Exodo 7:5 ut 9:14 re xch’olob’ankil k’a’ut naq li Qaawa’ kixtaqla li rahilal aran Egipto.

• Wotz rik’ineb’ li kok’al chan ru naq li Qaawa’ naxk’utb’esi “Naq maajun wank sa’ ruchich’och’ jo’ a’an” (Exodo 9:14). Patz’ reheb’ li kok’al naq te’xwotz chan ru neke’xnaw naq li Qaawa’ nim xwankil.

Exodo 12:1–13; 13:10

Li loq’laj wa’ak naru nikinixtenq’a chixjultikankil li Jesus.

Li Paswa kixtzoleb’ laj Israel chirix li Kolonel ut li mayej li tixb’aanu moqon choq’ qe. Anajwan naqatzeka li loq’laj wa’ak re xjultikankil lix mayej li Jesus.

Li loq’laj wa’ak nokoxtenq’a chixjultikankil li Jesukristo.

Kok’ k’anjel naru chi b’aanumank

• Rik’in roksinkil Exodo 12:1–13, ye reheb’ li kok’al naq li Qaawa’ kixye reheb’ laj Israel k’a’ru tento te’xb’aanu re naq te’kole’q chiru li xch’otik li rahilal (chi’ilmanq ajwi’ “La Pascua,” sa’ Relatos del Antiguo Testamento). K’ut xjalam-uuch li Jesus naq kiriiqa li karneer sachenaq (Hu reheb’ li Jalam-uuch re li Evangelio, 64), ut ye k’a’ru xjuntaq’eetil li karneer ki’oksiman sa’ li Paswa ut li Jesukristo, lix karneer li Dios.

• Patz’ reheb’ li kok’al naq te’xye k’a’ru naqab’aanu re xjultikankil junaq ch’utam aajel ru, maare li ketok chihab’ ut jalaneb’ chik ninq’e. Yaab’asi Exodo 13:10, ut ch’olob’ naq li Qaawa’ kixpatz’ reheb’ li ralal xk’ajol laj Israel naq te’xninq’ehi li Paswa rajlal chihab’ re xtenq’ankileb’ chixjultikankil naq ke’kole’ xb’aan li Jesus sa’ ruq’eb’ laj Egipto. Chan ru taqajultika naq li Jesus kooxkol chiru li maak ut li kamk?

• Wi naru, ayuqex wan wi’ li meex re li loq’laj wa’ak ut wotz chan ru naq li loq’laj wa’ak nokoxtenq’a chixjultikankil li Jesukristo. B’ichahomaq “Li loq’laj wa’ak” (B’ichleb’aal choq’ reheb’ li Kok’al, 146) malaj jalan chik li b’ich chirix li Jesukristo. Tenq’aheb’ li kok’al chixk’eeb’al reetal li tuqtuukilal neke’reek’a naq neke’xk’oxla li Kolonel ut patz’ reheb’ naq te’xsik’ li eek’ahom a’an naq neke’tz’aqon sa’ li loq’laj wa’ak.

• K’eheb’ kok’ hu reheb’ li kok’al chi tz’iib’anb’il “Naru tinjultika li Jesukristo sa’ li loq’laj wa’ak” chiru. Patz’ reheb’ naq te’xyiib’eb’ jalam-uuch li naru te’ril sa’ xhoonalil li loq’laj wa’ak re te’xjultika li Jesus.

Xk’utb’al li tzol’leb’: Kok’al ak ninqeb’

Exodo 7–11

Li Qaawa’ wan xwankil re tinrach’ab’.

Eb’ li kok’al neke’xtaw xch’a’ajkilal ut neke’raj ru naq te’tenq’aaq xb’aan li Qaawa’. Li seraq’ chirix li lajeeb’ chi rahilal kixtaqla chaq li Qaawa’ re rach’ab’ankileb’ laj Israel naru naxtenq’aheb’ li kok’al chixtawb’al ru naq a’aneb’ ajwi’ naru neke’tenq’aak xb’aan li Qaawa’.

Kok’ k’anjel naru chi b’aanumank

• K’e junjunq li hu yiib’anb’il lajeeb’ chi juch’ chiru reheb’ li kok’al ut patz’ reheb’ naq te’xyiib’ xjalam-uucheb’ li rahilal neke’yeeman sa’: Exodo 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. K’a’ru neke’xk’ut chiqu li rahilal chirix lix wankil li Dios? K’a’ut naq aajel ru xnawb’al ru lix wankil?

• Patz’ reheb’ li kok’al jo’q’e xe’reek’a naq te’raj ru xtenq’ li Qaawa’. Chan ru tooxtenq’a sa’eb’ li hoonal a’an? Waklesi xch’ooleb’ chixwotzb’al resileb’ li hoonal b’ar wi’ xe’reek’a xwankil li Qaawa’ sa’ xyu’ameb’. Wotz xnawom aach’ool naq li Qaawa’ wan xwankil re qatenq’ankil.

Exodo 8:28–32; 9:7

Li Qaawa’ naru nikinixtenq’a chixq’unob’resinkil li waam.

Laj Farahon kixkawob’resi li raam naq li Qaawa’ kixpatz’ re naq taarach’ab’eb’ li ralal xk’ajol laj Israel. Chan ru taawaklesi xch’ooleb’ li kok’al chixsik’b’al ru xq’unob’resinkil li raameb’ re naq te’k’anjelaq chiru li Qaawa’ ut te’xb’aanu li naraj a’an?

Kok’ k’anjel naru chi b’aanumank

• K’am junaq k’a’aq re ru kaw sa’ li tzoleb’aal, maare jun li pek, ut jun chik li q’un, maare jun esponj. Yaab’asi reheb’ li kok’al junjunq raqal li neke’xye k’a’ru kixb’aanu laj Farahon rik’ineb’ li rahilal kixtaqla li Qaawa’ (chi’ilmanq Exodus 8:28–32; 9:7), ut patz’ reheb’ li kok’al b’ar wan reheb’ li k’a’aq re ru nareetali li raam malaj lix na’leb’ laj Farahon. K’a’ru naraj naxye naq q’un xch’ool junaq? (chi’ilmanq Mosiah 3:17).

• Tz’iib’ahomaqeb’ li k’a’aq re ru neke’xk’ut naq kaw li qaam (maare li pleetik rik’in junaq li asb’ej malaj naq ink’a’ nokotijok). Chan ru taqak’ut chiru li Qaawa’ naq naqaj naq q’unaq li qaam?

Exodo 11:5–6; 12:1–13

Li Paswa nareetali lix wankil lix mayej li Jesukristo.

Li Paswa kixk’ut chiruheb’ li ralal xk’ajol laj Israel naq li Qaawa’ ki’ach’ab’an chaq reheb’ sa’ Egipto. Li Paswa a’an ajwi’ jun reetalil lix mayej aj tojol-ix li Jesukristo, li nokorach’ab’ chiru li maak ut li kamk. Anajwan, li loq’laj wa’ak nokoxtenq’a chixjultikankil lix mayej li Jesukristo choq’ qe. Raatinankileb’ li kok’al chirix li Paswa naru naxtenq’aheb’ chixtawb’al ru chi us xyaalal li loq’laj wa’ak.

Kok’ k’anjel naru chi b’aanumank

• Patz’ reheb’ junjunq li kok’al naq te’ril Exodo 11:5–6 re te’tzoloq chirix xch’otik li rahilal kixtaqla li Qaawa’ sa’ xb’eeneb’ laj Egipto. Patz’ reheb’ lix komon li kok’al naq te’ril Exodo 12:3, 5–7, 13 re te’xnaw chan ru naq li ralal xk’ajol laj Israel ke’kole’ chiru li rahilal a’an.

• Re xtenq’ankileb’ li kok’al chixtawb’al ru naq li Kolonel a’an li Karneer li nakolok qe, k’ut xjalam-uuch jun karneer. Patz’ reheb’ li kok’al naq te’ril Exodo 12:3–7 re te’xsik’ k’a’ru chi karneeril kiraj li Dios naq te’roksi li kristiaan choq’ re xtib’el wa sa’ li Paswa. Chan ru naq li karneer a’an chanchan chik li Jesukristo? (Li Jesus tz’aqal re ru ut li Jesus kixhoy lix kik’el re qakolb’al). K’a’ chik ru natenq’ank qe chixjultikankil li Jesukristo?

• Ilomaqeb’ li rosob’tesinkil li loq’laj wa’ak (chi’ilmanq Tzol’leb’ ut Sumwank 20:77, 79), ut ilomaq li video “Recordarle siempre” (ChurchofJesusChrist.org). Chan ru naq li loq’laj wa’ak chanchan chik li Paswa? K’a’ru taqab’aanu re naq taqajultika li Jesus sa’ li loq’laj wa’ak?

• Wotz rik’ineb’ li kok’al jun reheb’ li b’ich re li loq’laj wa’ak nawulak chawu (chi’ilmanq Eb’ li B’ich, 169–196), ut ye chan ru naq nakatxtenq’a chixjultikankil lix mayej li Kolonel. Patz’ reheb’ li kok’al naq te’xwotz junaq li b’ich nawulak chiruheb’ li natenq’an reheb’.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz reheb’ lix junkab’al junaq na’leb’ xe’xtzol chirix li Jesukristo sa’ li Tzoleb’aal reheb’ li Kok’al sa’ li kutan a’in.

Xkawresinkil qib’ jo’ aj k’utunel

Tenq’aheb’ li kok’al chixk’oxlankil li seraq’. Naq eb’ li kok’al neke’xk’oxla li yookeb’ chixtzolb’al, mas taajultiko’q wi’chik reheb’. Tenq’aheb’ li kok’al chirilb’aleb’ li seraq’ re li loq’laj hu sa’ xk’a’uxleb’ rik’in roksinkileb’ li jalam-uuch, li video, li kok’ muñeek, malaj k’utb’esink.