Xjalam-uuch li muqleb’aal yamyo xsa’, xb’aan li xMaryna Kriuchenko

11–17 abril

Li Paswa

“Tixsach chi junajwa xwankil li kamk”

Naq taakawresi aawib’ re k’utuk, k’oxla chan ru taatenq’aheb’ li kok’al chixtawb’al ru ut chixtawb’al xnawomeb’ xch’ool chirix lix tojb’al rix li maak xb’aan li Jesukristo.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al k’a’ru neke’xb’aanu lix junkab’al re xninq’ehinkil li Paswa. K’a’ru neke’xb’aanu re xjultikankil lix waklijik li Jesukristo chi yo’yo?

Xk’utb’al li tzol’leb’: Kok’al toj ka’ch’ineb’ xyu’am

Li Jesukristo, a’an lin Kolonel.

Li domingo re Paswa a’an jun chaab’il hoonal re raatinankileb’ li kok’al chirix lix tojb’al rix li maak xb’aan li Kolonel sa’ Getsemani ut lix kamik chiru krus. A’an naru naxtenq’aheb’ chireek’ankil lix rahom li Jesus choq’ reheb’.

Kok’ k’anjel naru chi b’aanumank

• K’ut xjalam-uuch li Kolonel li wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj jalan chik xjalam-uuch lix mayej li Kolonel (chi’ilmanq Hu reheb’ li Jalam-uuch re li Evangelio, 56, 57, 58), ut kanab’eb’ li kok’al chixwotzb’al k’a’ru neke’xnaw chirix li kik’ulman. Seraq’i reheb’ li kok’al li rahilal kixk’ul li Jesus sa’ Getsemani ut chiru li krus (chi’ilmanq Mateo 26:36–46; 27:35–50; Lukas 22:39–46; Jwan 19:16–30; “Ch’ol 51: Li Jesus naxnumsi rahilal sa’ li Awimq Getsemani,” sa’ Eb’ li Esilal sa’ li Ak’ Chaq’rab’, 129–132). Wotz xnawom aach’ool naq li Jesus kiraj xnumsinkil li rahilal ut kamk sa’ qak’ab’a’ xb’aaan naq nokoxra. Patz’ reheb’ li kok’al naq te’xwotz k’a’ru neke’reek’a chirix li Jesukristo.

• Yaab’asi Jwan 10:9 reheb’ li kok’al, ut taajultika li raatin li Jesus “Laa’in li okeb’aal.” Xb’aan naq li Jesus kixk’ul rahilal sa’ xk’ab’a’ li qamaak, kikam chiru li krus, ut kiwakli chi yo’yo, kixk’e chi uxmank naq chiqajunilo tooruuq chi q’ajk chi wank rik’in li Dios. Oksi li okeb’aal re li tzoleb’aal re xk’utb’al naq li Jesus chanchan jun li okeb’aal li nokoxtenq’a chi q’ajk rik’in li qaChoxahil Yuwa’.

• Yaab’asi Isaias 53:6 reheb’ li kok’al, ut k’ut chiruheb’ xjalam-uuch jun li karneer. Patz’ re jun li ch’ina al naq tixk’e li jalam-uuch sa’ xxuk li tzoleb’aal. Ch’olob’ naq wi naqasik’ ru li ink’a’ us, nokonajto’ chiru li qaChoxahil Yuwa’ jo’ naq nasach jun li karneer. Chirix a’an, patz’ re li ch’ina al naq tixk’am wi’chik chaq li karneer ut tixwotz lix nawom xch’ool naq li Jesukristo kixk’ul rahilal ut kikam sa’ qak’ab’a’, ut naru nokoxk’am wi’chik rik’in li qaChoxahil Yuwa’. (Naru taak’ut xjalam-uuch li Jesus jo’ aj ilol karneer, maare li jalam-uuch 64 sa’ li Hu reheb’ li Jalam-uuch re li Evangelio.)

• B’ichahomaq jun li b’ich na’aatinak chirix li Jesukristo, jo’ “Ninnaw naq raab’ilin” (B’ichleb’aal choq’ reheb’ li Kok’al, 42─43). Tenq’aheb’ chixk’eeb’al reetal li tuqtuukilal ut li rahok li te’reek’a naq te’b’ichanq. Aatinan ajwi’ chirixeb’ li aatin neke’xch’olob’ lix rahom li Kolonel. Chan ru taqawotz lix rahom rik’ineb’ li qas qiitz’in?

Li Jesus kikam ut kiwakli wi’chik chi yo’yo sa’ ink’ab’a’.

Chan ru taatenq’aheb’ li kok’al chixtzolb’al naq xb’aan lix waklijik chi yo’yo li Jesukristo, laa’o ut eb’ li kristiaan neke’qara toowakliiq ajwi’ chi yo’yo sa’ jun kutan?

Moymoy kutan re Golgota, xb’aan laj J. Kirk Richards

Kok’ k’anjel naru chi b’aanumank

• Seraq’i reheb’ li kok’al lix kamik ut lix waklijik chi yo’yo li Jesus (chi’ilmanq Markos 15–16). Oksi li jalam-uuch wan sa’ li tusleb’ aatin a’in, 57–60 sa’ li Hu reheb’ li Jalam-uuch re li Evangelio, malaj li “Ch’ol 54: Nawakli wi’chik chi yo’yo li Jesus” sa’ Eb’ li Esilal sa’ li Ak’ Chaq’rab’ (139–144) re xtenq’ankileb’ li kok’al chixk’oxlankil li seraq’.

• Tenq’aheb’ li kok’al chixtawb’al ru naq li wakliik chi yo’yo naraj naxye naq chirix li kamk taawanq wi’chik qatib’el qab’aqel tz’aqal re ru ut maajun wa chik tookamq. Wotz xnawom aach’ool chirix li wakliik chi yo’yo, ut kanab’eb’ li kok’al chi k’anjelak sa’ li perel re kok’ k’anjel re li xamaan a’in. Patz’ reheb’ li kok’al naq te’roksi re te’xwotz reheb’ lix junkab’al li seraq’ chirix lix waklijik chi yo’yo li Jesus.

• Yaab’asi Alma 40:23 reheb’ li kok’al. K’ut laa wuq’ chi wan aaguante. Ye reheb’ naq laa wuq’ a’an li musiq’ej ut li guante a’an li junxaqalil. Isi li guante chiru laa wuq’ re xk’utb’al chan ru naq li qamusiq’ naxkanab’ li qajunxaqalil naq nokokam. K’e wi’chik li guante chawuq’ re reetalinkil li wakliik chi yo’yo.

• B’ichahomaq jun li b’ich chirix lix waklijik chi yo’yo li Jesukristo, maare “Ma yaal naq li Jesus xwakli?” malaj “Xwakli Jesus” (B’ichleb’aal choq’ reheb’ li Kok’al, 45, 44). Ch’olob’ xyaalal naq sa’ xk’ab’a’ li Jesukristo taawanq wi’chik qayu’am ut li qajunxaqalil tz’aqal re ru chirix naq tookamq.

Xk’utb’al li tzol’leb’: Kok’al ak ninqeb’

Li Jesukristo kixk’ul rahilal sa’ ink’ab’a’ laa’in.

Naq tattzoloq chirix lix tojb’al rix li maak xb’aan li Kolonel, tz’il rix chan ru taatenq’aheb’ li kok’al chixtawb’al ru chan ru naq te’osob’tesiiq ut te’kawob’resiiq xb’aan li Kolonel.

Kok’ k’anjel naru chi b’aanumank

• K’eheb’ li kok’al sa’ oxib’ li ch’uut ut k’e reheb’ li raqal a’in sa’eb’ li loq’laj hu: Isaias 53:4–12; Alma 7:11–13; ut Tzol’leb’ ut Sumwank 19:16–19. Patz’ reheb’ li kok’al naq te’xsik’ aatin ut ch’ol aatin li neke’xye k’a’ru li rahilal kixk’ul li Jesukristo sa’ qak’ab’a’. Patz’ reheb’ naq te’xtz’iib’a a’an chiru li pizarron ut te’xwotz k’a’ru neke’reek’a chirix li Kolonel chirix naq xe’ril li raqal a’an sa’ li loq’laj hu.

• K’ameb’ kok’ perel hu. Chiru jun jachal re li kok’ hu, tz’iib’aheb’ raqal re li Najter Chaq’rab’ b’ar wi’ wankeb’ profeetil aatin chirix li Jesukristo. Chiru li jun jachal chik, tz’iib’aheb’ raqal re li Ak’ Chaq’rab’ li neke’xye chan ru naq ke’uxman li profeetil aatin a’an.. (Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al wankeb’ junjunq eetalil.) Patz’ reheb’ li kok’al naq te’rileb’ li raqal ut te’xtzol li profeetil aatin ut chan ru naq ke’uxman.

• Tenq’aheb’ li kok’al chixkanab’ankil sa’ xk’a’uxleb’ li rox xraqalil li paab’aal. K’a’ru naxk’ut chiqu li raqal a’in chirix lix tojb’al rix li maak xb’aan li Jesukristo ut lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol?

• Patz’ reheb’ li kok’al chan raj ru te’xch’olob’ lix tojb’al rix li maak chiru junaq kristiaan? Waklesi xch’ooleb’ chiroksinkileb’ li loq’laj hu, li b’ich, malaj jalam-uuch re te’xwotz k’a’ru naraj naxye choq’ reheb’ a’an lix tojb’al rix li maak xb’aan li Kolonel. Chan ru naq osob’tesinb’ilo xb’aan lix tojb’al rix li maak xb’aan li Kolonel?

Li Jesus kikam ut kiwakli wi’chik chi yo’yo sa’ ink’ab’a’.

Lix waklijik wi’chik chi yo’yo li Jesukristo naru naxk’am chaq oyb’enihom ut sahil ch’oolejil mas wi’chik naq nakam anihaq li naqara. Chan ru taatenq’aheb’ li kok’al chixtawb’al xk’ojob’ankil xch’ooleb’ sa’ li wakliik chi yo’yo?

Kok’ k’anjel naru chi b’aanumank

• K’uteb’ li jalam-uuch 57–59 sa’ li Hu reheb’ li Jalam-uuch re li Evangelio. Patz’ reheb’ li kok’al naq te’rileb’ li jalam-uuch rik’ineb’ li raqal a’in : Mateo 27:29–38; Mateo 27:59–60; ut Jwan 20:10–18. Chirix a’an patz’ reheb’ li kok’al naq te’xwotz li seraq’ chirix lix kamik, lix muqik, ut lix waklijik chi yo’yo li Jesus rik’in li raatin.

• Il Job 14:14 rik’ineb’ li kok’al. Patz’ reheb’ li kok’al naq te’xwotz chan raj ru te’xsume lix patz’om laj Job. Tenq’aheb’ chixtawb’aleb’ raqal sa’ li loq’laj hu li te’xch’olob’ xyaalal li wakliik chi yo’yo (chi’ilmanq li K’utul Raqal reheb’ li Loq’laj Hu, “Wakliik chi yo’yo.”

• Yaab’asi Moises 1:39 reheb’ li kok’al. Patz’ reheb’ ma neke’xnaw k’a’ru li “kole’k chiru li kamk” ut li “junelik yu’am.” Patz’ reheb’ naq te’xsik’ xsumenkil sa’ li xb’een raqal sa’ “Vida Eterna” (Temas del Evangelio, topics.ChurchofJesusChrist.org). Ani taak’uluq re li kole’k chiru li kamk? K’a’ru na’ajman ru re xk’ulb’al li junelik yu’am? Wotz xnawom aach’ool chirixeb’ li wiib’ chi xchaq’al ru maatan a’in li naru neke’k’ulman b’antiox re lix tojb’al rix li maak xb’aan li Jesukristo.

• B’ichahomaq jun li b’ich chirix li Paswa, maare “Kixtaqla li Ralal” (B’ichleb’aal choq’ reheb’ li Kok’al, 20–21) malaj “Ak xwakli!” (Eb’ li B’ich, 121). Patz’ reheb’ li kok’al naq te’xwotz k’a’ru neke’reek’a naq neke’xb’icha li b’ich a’in. K’a’ru neke’xk’ut li b’ich a’in chirix li qaChoxahil Yuwa’ ut li Jesukristo? Patz’ reheb’ li kok’al naq te’xtz’iib’a lix nawom xch’ooleb’ chirix li Kolonel re te’xwotz reheb’ lix junkab’al.

Xb’oqb’aleb’ chi tzolok sa’ kab’l

Re xtenq’ankileb’ li kok’al chixwotzb’al reheb’ lix junkab’al li xe’xtzol, waklesi xch’ooleb’ chixb’ichankil sa’ kab’l jun li b’ich chirix lix tojb’al rix li maak xb’aan li Jesukristo.

Xkawresinkil qib’ jo’ aj k’utunel

Eb’ li kok’al naru neke’xnaw ru lix wankil li Musiq’ej. K’ut chiruheb’ li kok’al naq li neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal chaq rik’in li Santil Musiq’ej ut naq naru neke’xkawob’resi lix nawom xch’ooleb’.