li Jehova naxk’ut rib’ chiru laj Moises ut eb’ li xb’eenil aj Israel

Xjalam-uuch li Jehova naq naxk’ut rib’ chiru laj Moises ut 70 chi xb’eenil aj Israel, xb’aan laj Jerry Harston

25 abril–1 mayo

Exodo 24; 31–34

“Laa’in tin’ochb’eeninq aawe”

Ink’a’ naru xch’olob’ankil chixjunileb’ li chaab’il na’leb’ reheb’ li loq’laj hu sa’ li tusleb’ aatin a’in. Ab’i li Musiq’ej re naq tatxtenq’a chixk’eeb’al reetal li na’leb’ nakawaj ru.

Tz’iib’a li nakak’oxla

Kiyo’oniman naq eb’ li ralal xk’ajol laj Israel te’kanaaq chi tiik chiru li Dios chirix naq a’an kixk’utb’esi lix chaq’rab’ chiruheb’ (chi’ilmanq Exodo 20–23). Us ta ke’wech’ok ut ke’laj xpaab’aaleb’ junxil, naq laj Moises kiril ru li chaq’rab’ sa’ roq li Tzuul Sinai, ke’ok sa’ li sumwank a’in: “Taqapaab’ ut taqab’aanu chixjunil li xye li Qaawa’ ” (Exodo 24:7). Toja’ naq li Dios kixb’oq laj Moises chi tzuul, b’ar wi’ kixtaqla xkab’lankil jun santil na’ajej “re naq tinhilanq sa’ xyanqeb’ ” (Exodo 25:8; che’ilmanq li ch’ol 25–30).

A’b’an naq wan laj Moises chi tzuul chixtzolb’al chan ru truuq naq li Dios taawanq sa’ xyanqeb’ laj Israelita, eb’ a’an yookeb’ chixyiib’ankil jun pak’b’il dios oor sa’ roq li tzuul re naq te’xloq’oni. Toje’ ke’xye naq “maajun chik Dios taawanq rik’ineb’,” a’ut “sa’ junpaat xe’risi rib’ ” chiru lix taqlahom li Dios (Exodo 20:3; 32:8; chi’ilmanq ajwi’ Exodo 24:3). Nasach qach’ool xb’aan xjalajikeb’ xch’ool, a’b’an ak naqanaw naq li paab’aal ut li xaqxookilal naru taanumtaaq xb’aan li xuwak, li wiib’ank ch’oolej, ut xmaak’a’il li kuyum. Naq naqasik’ li Qaawa’ sa’ li qayu’am, sa qach’ool naq li Qaawa’ ink’a’ kixkanab’eb’ li najter aj Israel, chi moko tooxkanab’ laa’o—xb’aan naq a’an “aj uxtaan ut tuulan, nab’ayk chi josq’o’k, ut maaka’ch’in lix rahom ut lix tiikilal xch’ool” (Exodo 34:6).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Exodo 24:1–11

Eb’ lin sumwank neke’xk’ut li rajom inch’ool chixpaab’ankil lix taqlahom li Dios.

Naq nakawil sa’ Exodo 24:3–8 naq eb’ laj Israelita ke’ok sa’ sumwank chixpaab’ankil lix chaq’rab’ li Dios, maare taak’oxlaheb’ li sumwank xat-ok wi’ rik’in li Dios. Jalan jalanq li k’anjel li kib’aanuman sa’ xsumwankeb’ laj Israelita rik’in li k’anjel naxpatz’ li Dios anajwan, a’b’an naru taak’e reetal xjuntaq’eetileb’ wi taak’oxlaheb’ li junelikil na’leb’ li eetalinb’ileb’ xb’aaneb’ li k’anjel a’an.

Sa’eb’ li raqal 4, 5, ut 8 nayeeman resil li altar, li mayejak xul, ut li kik’. K’a’ru neke’reetali li k’a’aq re ru a’in, ut k’a’ru neke’xye chirixeb’ laa sumwank? Chan ru naq eb’ laa sumwank nakate’xtenq’a chixb’aanunkil “chixjunil li xye li Qaawa’ ”? (raqal 7).

Chi’ilmanq ajwi’ Moises 5:4–9; Becky Craven, “Li k’eeb’il reetal chi us ut li ink’a’ k’eeb’il reetal,” Jolomil ch’utub’aj-ib’ re abril 2019.

Exodo 32–34

Li maakob’k, a’an li elk chaq chiru li Dios, a’b’an a’an naxyeechi’i jun b’e re sutq’iik.

Wi naqatz’il rix chan ru naq eb’ laj Israelita sa’ junpaat “ke’maak’ob’k” (Exodo 32:7) naq ke’xq’et lix sumwank, naru tookawresiiq re naq ink’a’ taqab’aanu a’an. Naq nakawil Exodo 32:1–8, k’oxla naq katwan raj sa’ xyanqeb’ laj Israelita—wankat sa’ li yamyookil ch’och’, maak’a’ laj Moises chiru 40 kutan, ink’a’ nakanaw ma taasutq’iiq chaq, ut taa’ajmanq naq tatpleetiq rik’ineb’ laj Kanahanita re tat-ok sa’ li yeechi’inb’il ch’och’ (chi’ilmanq ajwi’ Exodo 23:22–31). K’a’ut naq eb’ laj Israelita ke’raj ru jun pak’b’il dios oor? K’a’ut naq k’a’jo’ xnimal lix maakeb’ laj Israelita? Eb’ li raqal a’in maare tate’xtenq’a chixk’oxlankil ma wan li k’a’ru malaj ani nakakanab’ wi’ aawib’ ruuchil li Kolonel. Ma wan li k’a’ru eek’asinb’ilat chixb’aanunkil re naq taak’e li Dios jo’ li jwal aajel ru sa’ laa yu’am? K’a’ru nawulak chawu chirix lix tz’aam laj Moises chiru li Qaawa’ sa’ Exodo 33:11–17?

Us ta nim lix maakeb’ laj Israelita, li seraq’ naxk’ut ajwi’ li ruxtaan li Dios ut li rajom chixkuyb’aleb’ xmaak. K’a’ru nakatzol sa’ Exodo 34:1–10 chirix li Kolonel? Chan ru naq lix b’aanuhom laj Moises sa’ xk’ab’a’eb’ laj Israelita nakatxk’e chixk’oxlankil lix b’aanuhom li Jesukristo sa’ qak’ab’a’ chiqajunil? (chi’ilmanq Exodo 32:30–32; Mosiah 14:4–8; 15:9; Tzol’leb’ ut Sumwank 45:3–5).

Lix jaltesinkil ru li Santil Hu xb’aan laj Jose Smith, Exodo 34:1–2

K’a’ru xjalanileb’ li wiib’ chi perpookil pek kixyiib’ laj Moises?

Naq laj Moises kikub’e chaq sa’ xb’een li tzuul, a’an kixk’am chaq li chaq’rab’ chi tz’iib’anb’il chiru perpookil pek. Naq kixk’e reetal naq eb’ laj Israelita ke’xq’et lix sumwank, laj Moises kixpuk’iheb’ li perpookil pek (chi’ilmanq Exodo 31:18; 32:19). Moqon, li Dios kixtaqla naq laj Moises tixyiib’eb’ wi’chik li perpookil pek ut naq tixk’ameb’ wi’chik chi tzuul (chi’ilmanq Exodo 34:1–4). Lix jaltesinkil ru li Santil Hu xb’aan laj Jose Smith, Exodo 34:1–2 naxch’olob’ naq chiru li xb’een perpookil pek ke’tz’iib’aman li k’ojob’anb’il k’anjel re “lix santil k’anjelil,” a’an li Tijonelil re Melkisedek. Chiru li xkab’ kitz’iib’aman “xchaq’rab’il jun tz’ejwalejil taqlahom.” A’in jun chaq’rab’ kub’enaq xwankil li kik’anjelaak xb’aan “lix ka’ch’inal ru tijonelil” (chi’ilmanq Tzol’leb’ ut Sumwank 84:17–27), li ki’ajman re xkawresinkileb’ laj Israelita chixk’ulb’al li chaq’rab’ ut li tijonelil li taqenaqeb’ re naq te’ruuq chi ok chiru rilob’aal li Dios.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 31:12–13, 16–17.Chirix rilb’aleb’ li raqal a’in, jo’ junkab’al naru tex’aatinaq chirix lix patz’om li Awa’b’ej Russell M. Nelson chirix li naqab’aanu sa’ li hilob’aal kutan: “K’a’ru li eetalil teek’e re li Qaawa’ re xk’utb’al chiru a’an naq nekera?” (“Li hilob’aal a’an sahil kutan,” Jolomil ch’utub’aj-ib’ re abril 2015). Jo’ junkab’al naru teeyiib’ li eetalil li teek’e sa’ lee rochoch re xjultikankil eere chan ru teek’ut lee rahom choq’ re li Qaawa’ sa’ li hilob’aal kutan.

eb’ li kristiaan chirix li iglees

Naq naqoxloq’i li hilob’aal kutan, naqak’ut li qarahom choq’ re li Qaawa’.

Exodo 32:1–8.Re xtenq’ankil laa junkab’al chi aatinak chirix li ke’xb’aanu laj Israelita re xtz’eqtaanankil li Dios, naru taayiib’ jun b’e chiru ch’och’ (malaj taw junaq li nach’ rik’in laa wochoch). Naq yookex chi b’eek sa’ li b’e, naru tex’aatinaq chirix li aaleek naqak’ul re “risinkil qib’ sa’ li b’e kixk’ut [li Qaawa’].” Chan ru tookanaaq sa’ li b’e? Wi ak xoo’el sa’ li b’e, chan ru toosutq’iiq? Chan ru nokoxtenq’a li Kolonel?

Exodo 32:26.Chirix naq kixtaweb’ laj Israelita chixloq’oninkil li pak’b’il dios, laj Moises kixpatz’, “Ani taataaqenq re li Qaawa’?” Chan ru naqak’ut naq taqataaqe li Qaawa’?

Exodo 33:14–15.Sa’ junkab’al naru teeye ma eereek’ahom li k’a’ru kixyeechi’i li Dios re laj Moises: “Laa’in tin’ochb’eeninq aawe ut tatink’e chi hilank.” Naru teebʼicha jun li bʼich chirix li Dios, maare “Chatwanq wikʼin!” (Ebʼ li Bʼich, 99).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ani taataaqenq re li Qaawa’ Dios?” Eb’ li B’ich, 168.

Xkawresinkil qib’ jo’ aj k’utunel

B’oq li Musiq’ej. K’oxla chan ru naq eb’ li santil b’ich, jalam-uuch, ut li rahok naxb’oq li Musiq’ej sa’ laa wochoch naq nakatzol laa junkab’al (chi’ilmanq Li k’utuk jo’ li Kolonel, 15).

laj Moises kixpuk’iheb’ li perpookil pek

Xloq’oninkil li wakax, xb’aan laj W. C. Simmonds