2–8 mayo

Exodo 35–40; Levitico 1; 16; 19

“Santilal re li Qaawa’ ”

Naq nakatzoleb’ li loq’laj hu, k’e reetal li na’leb’ naxk’e li Musiq’ej sa’ laa k’a’uxl chirix li taab’aanu re tatwulaq jo’ li qaChoxahil Yuwa’ ut li Jesukristo.

Tz’iib’a li nakak’oxla

Li elk chaq sa’ Egipto—us ta aajel ru ut sachb’a-ch’oolejil—ink’a’ kixtz’aqob’resi ru li rajom li Dios choq’ reheb’ li ralal xk’ajol laj Israel. Jo’kan ajwi’, li usaak ke’xk’ul moqon sa’ li yeechi’inb’il ch’och’ ink’a’ kixtz’aqob’resi ru li rajom li Dios choq’ reheb’. A’aneb’ yal kok’ raqal re li tz’aqal kiraj li Dios choq’ re lix tenamit: “Santaqex, xb’aan naq laa’in, li Qaawa’ lee Dios, santin” (Levitico 19:2). Chan ru naq li Dios kixsik’ xsantob’resinkil lix tenamit us ta wanjenaqeb’ chi preexil chiru k’iila chihab’? A’an kixtaqlaheb’ chixyiib’ankil jun na’ajej choq’ re xsantilal li Qaawa’—jun loq’laj muheb’aal sa’ li yamyookil ch’och’. A’an kixk’eheb’ li sumwank ut li chaq’rab’ li te’xb’eresi lix b’aanuhomeb’, ut li te’xjal xch’ooleb’. Ut naq ke’majelo’ sa’ xpaab’ankileb’ li chaq’rab’ a’an, a’an kixtaqlaheb’ chixmayejankil li xul jo’ reetalil lix tojb’al rix lix maakeb’. Chixjunil a’in kixjayali raj xk’a’uxleb’, xch’ooleb’, ut xyu’ameb’ rik’in li Kolonel ut li tojok-ix naxk’e a’an. A’an li tz’aqal b’e re santilal, choq’ reheb’ laj Israelita ut choq’ qe laa’o. Chiqajunilo wanjenaqo chi preexil xb’aan li maak, ut chiqajunilo b’oqb’ilo chixjalb’al qak’a’uxl—a’an xkanab’ankil li qamaak chiqix ut xtaaqenkil li Jesukristo, li kixyeechi’i “Laa’in naruhan chiwu xk’eeb’al eesantilal” (Tzol’leb’ ut Sumwank 60:7).

Re xtzolb’al k’a’ru wan sa’ li hu Levitico, chi’ilmanq “Levitico” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Exodo 35–40; Levitico 19

Li Qaawa’ naraj naq tinsantob’resiiq jo’ a’an.

Sa’ Exodo 25–31 li Qaawa’ kixye reheb’ laj Israelita chan ru te’xyiib’ li loq’laj muheb’aal, b’ar wi’ te’santob’resiiq li tenamit xb’aan li santil k’ojob’anb’il k’anjel. Sa’ Exodo 35–40 wan resil lix b’aanuhomeb’ laj Israelita re xpaab’ankil li k’a’ru kixye. Naq nakawileb’ li ch’ol 35–40, k’e reetal li kixpatz’ li Qaawa’ naq te’xk’e chi sa’ li loq’laj muheb’aal, ut k’oxla k’a’ru neke’reetali li k’a’aq re ru a’an chirix li k’iik sa’ santilal. K’oxla ajwi’ chan ru neke’xjayali laa k’a’uxl rik’in li Kolonel. Jun kaaxukuut jo’ a’in maare tatxtenq’a:

K’a’ru li k’a’aq re ru xataw?	K’a’ru nareetali?
K’a’ru li k’a’aq re ru xataw? Kaax re li sumwank (Exodo 37:1–9; 40:20–21)	K’a’ru nareetali? Xwanjik li Dios; lix sumwank ut lix taqlahom
K’a’ru li k’a’aq re ru xataw? Li artal re sununkil incienso (Exodo 40:26–27; chi’ilmanq ajwi’ Exodo 30:1, 6–8)	K’a’ru nareetali? Eb’ li tij li neke’taqe’ toj rik’in li Qaawa’
K’a’ru li k’a’aq re ru xataw? Li kandeel malaj xna’aj li xam (Exodo 37:17–24)
K’a’ru li k’a’aq re ru xataw? Li artal reheb’ li k’atb’il mayej (Exodo 38:1–7; chi’ilmanq ajwi’ Exodo 27:1; 29:10–14)
K’a’ru li k’a’aq re ru xataw? Li pila (Exodo 30:17–21)

Wi ak xak’ul li k’ojob’anb’il k’anjel re li santil ochoch, k’a’ru nakatzol chirix li loq’laj muheb’aal sa’ Exodo 35–40 li naxjultika aawe li k’a’ru xak’ul aran? (chi’ilmanq ajwi’ “Na’leb’ re xk’oxlankil: Li loq’laj muheb’aal ut li mayejak”). K’oxla chan ru naq eb’ li sumwank re li santil ochoch nakate’xtenq’a chi santob’resiik jo’ li qaChoxahil Yuwa’ ut li Jesukristo.

Yaal naq moko santob’resinb’ilo ta yal xb’aan li wank sa’ jun santil na’ajej. Sa’ Levitico 19 wankeb’ li chaq’rab’ ut taqlahom kixk’e li Qaawa’ reheb’ laj Israelita re te’tamq xsantilaleb’. K’a’ru nakataw sa’eb’ li taqlahom a’in li naru tatxtenq’a chi santob’resiik? K’a’ru nakaweek’a naq tento taab’aanu re xyu’aminkileb’ li taqlahom a’an?

Chi’ilmanq ajwi’ Carol F. McConkie, “Lix chaq’alil ru li santilal,” Jolomil ch’utub’aj-ib’ re abril 2017; “El tabernáculo” (video), ChurchofJesusChrist.org; K’utul Raqal reheb’ li Loq’laj Hu, “Santilal”; temples.ChurchofJesusChrist.org.

Exodo 35:4–36:7

Li Qaawa’ naxpatz’ naq tinq’axtesi lin mayej chi anchal inch’ool.

Jun chihab’ chirix relikeb’ sa’ Egipto, ink’a’ jwal chaab’il li komonil ke’wan wi’ laj Israelita rik’in li Jehova. A’ut, naq nakawil Exodo 35:4–36:7, k’e reetal naq eb’ laj Israelita ke’xpaab’ li taqlahom re xyiib’ankil li loq’laj muheb’aal. K’a’ru nakatzol rik’ineb’ laj Israelita li naru tatxtenq’a chi k’anjelak chiru li Qaawa’?

Li Awa’b’ej Bonnie L. Oscarson kixk’ut: “Chixjunjunqaleb’ li komon tento te’xnaw naq jwal aajeleb’ ru. Li junjunq wan rik’in ninqal ru eechej li naru tixyeechi’i ut maatan ut seeb’al ak re li neke’tenq’an chixtiikisinkil chi uub’ej li xnimal ru k’anjel a’in” (“Eb’ li saaj ixq sa’ li k’anjel,” Jolomil ch’utub’aj-ib’ re abril 2018). Naq nakawil Exodo 36:1–4, k’oxla k’a’ru “k’eeb’il” aawe xb’aan li Qaawa’. Naru taapatz’ re laa Choxahil Yuwa’ k’a’ru xk’e aawe re naq tatruuq chi tz’aqonk sa’ xk’anjel.

Eb’ li ralal xk’ajol laj Israel ke’xq’axtesi xmayejeb’ choq’ re li loq’laj muheb’aal chi anchaleb’ xch’ool (chi’ilmanq Exodo 35:5). Jalam-uuch xb’aan laj Corbert Gauthier, © Lifeway Collection/licensed from goodsalt.com

Levitico 1:1–9; 16

Sa’ xk’ab’a’ lix tojb’al rix li maak xb’aan li Jesukristo, naru taakuye’q inmaak.

Maare jwal jalan choq’ qe lix k’ihal li hu Levitico—eb’ li k’atb’il mayej, eb’ li santil k’anjel rik’in kik’ ut ha’, ut eb’ li chaq’rab’ chirix chixjunil li tento te’xb’aanu wulaj wulaj. A’b’anan, eb’ li santil k’anjel ut chaq’rab’ a’in ke’wan re xk’utb’aleb’ li na’leb’ li naqanaw laa’o—li jalb’a-k’a’uxlej, li santilal, ut lix tojb’al rix li maak xb’aan li Kolonel. Re xtawb’aleb’ li na’leb’ a’in naq nakawil Levitico 1:1–9; 16, naru taak’oxlaheb’ li patz’om a’in: K’a’ru naru tintzol rik’ineb’ li mayej a’in chirix li Jesukristo ut lix mayej a’an re xtojb’al qix? Ma yookin chixq’axtesinkileb’ li mayej a’an? Naru taatz’il rix “Na’leb’ re xk’oxlankil: Li loq’laj muheb’aal ut li mayejak ” sa’ li hu a’in ut “Mayejak” sa’ li K’utul Raqal reheb’ li Loq’laj Hu).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 36:1–7.Sa’ Exodo 36:1–7, k’a’ru naqatzol chirix lix b’aanuhomeb’ laj Israelita sa’ xpaab’ankil li taqlahom re xyiib’ankil li loq’laj muheb’aal? Jo’ junkab’al, naru teek’oxla chan ru naq li Qaawa’ ak xexxb’oq chi tz’aqonk sa’ lix k’anjel. Chan ru taqataaqe xb’aanuhomeb’ laj Israelita?

Exodo 40.Naq nakeril Exodo 40 sa’ komonil, naru taapatz’ re laa junkab’al naq te’xtaqsi li ruq’ naq te’rab’i li aatin “jo’ kitaqlaak wi’ xb’aan li Qaawa’.” K’a’ru naqatzol sa’ li ch’ol a’in chirix ab’ink chiru li Qaawa’?

Exodo 40:1–34.Naq nekeril resil lix yiib’ankil li loq’laj muheb’aal sa’ Exodo 40, naru teeye chixjunileb’ lix cha’al li loq’laj muheb’aal li nekeril sa’ li jalam-uuch li wan sa’ li tusleb’ aatin a’in. Re aatinak chirix li loq’onink sa’ li santil ochoch sa’ li qakutankil, naru teeril sa’ komonil “Por qué los Santos de los Últimos Días construyen templos” (temples.ChurchofJesusChrist.org) malaj teeril li video “Templos” (ChurchofJesusChrist.org).

Levitico 19.Chixjunileb’ sa’ laa junkab’al naru te’xsik’ ut te’xwotz jun raqal sa’ li ch’ol a’in li neke’reek’a naq tixtenq’aheb’ chi santob’resiik (chi’ilmanq Levitico 19:2).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “K’e insantilal,” Eb’ li B’ich, 74.

Xkawresinkil aawib’ chi tzolok

Sik’ li Jesukristo. Chixjunileb’ li loq’laj hu, jo’ li Najter Chaq’rab’, neke’xch’olob’ xyaalal li Jesukristo. Naq nakawil ru li Najter Chaq’rab’, k’oxla k’a’ru neke’xk’ut li eetalil, li tenamit, ut li na’leb’ chawu chirix li Kolonel.

Li najter loq’laj muheb’aal, xb’aan laj Bradley Clark