Xjalam-uuch laj Moises naq naxk’ojob’ laj Josue, xb’aan laj Darrell Thomas

23–29 mayo

Josue 1–8; 23–24

“Yal aaq’e ut kawaq aach’ool”

Naq nakatzol lix hu laj Josue, k’oxla chan ru naq li nakatzol chirixeb’ laj Israelita naru tixnimob’resi laa paab’aal chirix li Jesukristo.

Tz’iib’a li nakak’oxla

Ak numenaq k’iila chihab’, a’b’an anajwan taatz’aqloq ru lix yeechi’ihom li Qaawa’: okeb’ re laj Israelita chireechaninkil li yeechi’inb’il ch’och’. A’b’an toj ki’ajman naq te’xq’ax ru li nima’ Jordan, lix xaqxookil tz’ak Jeriko, ut jun maa’usil tenamit kaw xmetz’ew li ke’xtz’eqtaana li Qaawa’ (chi’ilmanq 1 Nefi 17:35). Ut maak’a’ chik laj jolomihom reheb’, laj Moises. Xmaak a’an naq maare ke’wan laj Israelita li ke’wiib’an xch’ool ut ke’xuwuak, a’b’an li Qaawa’ kixye, “Yal aaq’e ut kawaq aach’ool.” K’a’ut naq te’reek’a jo’ kixye a’an? Moko xb’aan ta xmetz’eweb’ a’an—chi moko xmetz’ew laj Moises malaj laj Josue—a’ut xb’aan naq “li Qaawa’ laa Dios wanq aawik’in yalaq b’ar tatxik” (Josue 1:9). Naq wankeb’ li nima’ tento xq’axb’al ru ut li xaxqookil tz’ak tento xrumb’al sa’ li qayu’am, naru tootenq’aaq, xb’aan naq “li Qaawa’ tixb’aanu sachb’a-ch’oolej sa’ qayanq” (Josue 3:5).

Re xtzolb’al k’a’ru wan sa’ lix hu laj Josue, chi’ilmanq “Josue” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Josue 1:1–9

Li Dios taawanq wik’in wi tiikaqin chixpaab’ankil.

K’oxla li kireek’a laj Josue naq kib’oqe’ chi k’anjelak sa’ xna’aj laj Moises. K’e reetal k’a’ru kixye li Qaawa’ sa’ Josue 1:1–9 re xwaklesinkil xch’ool. K’oxlaheb’ laa ch’a’ajkilal; k’a’ru nakawil sa’eb’ li raqal a’in li naxk’e xkawilal aach’ool?

Us raj xnawb’al naq li k’ab’a’ej Josue (Yehoshua malaj Yeshua sa’ Hebreo) naraj naxye “li Jehova nakolok.” Ut li k’ab’a’ej Jesus nachal rik’in Yeshua. Chi jo’kan, naq nakawil resil laj Josue, k’oxla chan ru naq lix k’anjel re xb’eresinkileb’ li ralal xk’ajol laj Israel toj sa’ li yeechi’inb’il ch’och’ naxk’e chak’oxla lix k’anjel li Kolonel.

Chi’ilmanq ajwi’ Ann M. Dibb, “Sé valiente,” Liahona, mayo 2010, 114–116.

Josue 2

Li paabʼaal joʼ ajwiʼ li kʼanjel nekeʼajman ru re taaʼuxq li kolbʼa-ibʼ.

Li najter aj Kristiano ke’ril laj Rahab jo’ reetalil lix wankilal li paab’ank ut li k’anjelak (chi’ilmanq Hebreos 11:31; Santiago 2:25). Naq nakawil Josue 2, k’oxla chan ru naq lix paab’aal ut lix k’anjel xRahab ke’xkol a’an, lix junkab’al, ut eb’ laj k’ehol eetal aj Israelita. K’a’ru naxk’ut a’in chawu chirix lix wankilal laa paab’aal chirix li Kristo ut laa k’anjel sa’ laa yu’am ut sa’ xyu’ameb’ laa was aawiitz’in?

Us raj xnawb’al naq xRahab, a’an lix xe’toonil li rey aj David ut li Jesukristo (chi’ilmanq Mateo 1:5). K’a’ru naqatzol rik’in a’in?

Li xRahab chixk’atq li ventaan. Royb’eninkil li yeechi’ihom, xb’aan li xElspeth Young.

Josue 3–4

Naru nink’uleb’ lix “sachb’a-ch’oolej” li Dios wi wan inpaab’aal chirix li Jesukristo.

Li Qaawa’ naraj naq “chixjunileb’ li tenamit li wankeb’ sa’ ruchich’och’ te’xk’e reetal li ruq’ li Qaawa’, ut naq nim xmetz’ew” (Josue 4:24). Naq nakawil Josue 3–4, k’oxla chan ru nakanaw naq nim xmetz’ew li ruq’ li Qaawa’. Chan ru naq li Qaawa’ ak xb’aanu “sachb’a-ch’oolej” sa’ laa yu’am? (Josue 3:5). Chan ru taak’ul—malaj taak’e reetal—eb’ li sachb’a-ch’oolej a’in chi kok’ aj xsa’? (chi’ilmanq Josue 3:17).

K’a’ut naq ki’ajman naq eb’ laj Israelita te’xsantob’resi rib’ naq maji’ neke’xq’ax ru li nima’ Jordan. K’a’ut naq li nima’ kixjach rib’ ka’ajwi’ chirix naq “li roqeb’ laj tij ke’xch’e’ li ha’ chire li nima’ ”? (Josue 3:13, 15).

Re xtzolb’al xkomon chik chirix li kik’ulman chire li nima’ Jordan, chi’ilmanq 2 Reyes 2:6–15; 5:1–14; ut Markos 1:9–11. Naq nakatz’ileb’ rix li raqal a’in, chan ru naq neke’xk’am rib’?

Chi’ilmanq ajwi’ Gérald Caussé, “Ma toj chaq’al ru choq’ eere?” Jolomil-ch’utub’aj-ib’ re 2015; “Ejerza fe en Cristo” (video), ChurchofJesusChrist.org.

Josue 6–8

Naq nin’ab’in chiru li Dios nink’ul wankilal sa’ inyu’am.

Sa’eb’ li ch’ol a’in wan resileb’ li pleet re reechaninkileb’ li tenamit Jeriko ut Ay. Naq nakawileb’, k’oxla chan ru nakatz’eqtaana li aaleek sa’ laa yu’am (chi’ilmanq Josue 7:10–13). K’a’ru nakatzol chirix li Dios, chirix lix tenq’ choq’ aawe, ut chirix roksinkil lix wankilal? K’a’ru nawulak chawu chirix li raatin li Qaawa’ chirix reechaninkil Jeriko? (chi’ilmanq Josue 6:1–5). Maare li seraq’ sa’ Josue 7 tatreek’asi chixtz’ilb’al rix ma wan “li tz’i’b’eetalil” sa’ laa yu’am li tento taawisi (Josue 7:13).

Josue 23–24

“Chexjiloq rik’in li Qaawa’ lee Dios.”

Chirix xjachb’al ru li yeechi’inb’il ch’och’ sa’ xyanqeb’ li kab’laju xteepal laj Israel (chi’ilmanq Josue 13–21), laj Josue kixk’ut jun siir chik li na’leb’ chiruheb’. Naq nakawil lix na’leb’ sa’ Josue 23–24, naru taatz’iib’aheb’ li q’usum, li tijom, ut li yeechi’ihom nakataw. Rik’in chixjunil li ke’xnumsi eb’ laj Israelita, k’a’ut naq laj Josue kiraj xyeeb’al li k’a’aq re ru a’in reheb’ sa’ xraqik lix yu’am? K’a’ru nakataw li nareek’asi aach’ool “chi jilok rik’in li Qaawa’ ”? (Josue 23:8).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Josue 1:8.K’a’ru naxye li raqal a’in chirix xtzolb’aleb’ li loq’laj hu, sa’ junesal ut jo’ junkab’al? Chan ru naq eb’ li loq’laj hu nokohe’xk’e chi “usaak” ut “elk chi chaab’il”?

Josue 4:3, 6–9.Chirix rilb’al li kiraj li Qaawa’ naq te’xb’aanu laj Israelita rik’ineb’ li pek sa’ li nima’ Jordan, naru tex’aatinaq jo’ junkab’al chirix li xninqal ru xb’aanuhom li Qaawa’ choq’ eere. Toja’ naq taak’e jun pek re chixjunileb’ sa’ laa junkab’al, ut taapatz’ reheb’ naq te’xtz’iib’a malaj te’xyiib’ xjalam-uuch li k’a’ru xb’aanuhom li Qaawa’ choq’ reheb’.

Josue 6:2–5.Maare taawulaq chiru laa junkab’al xk’utb’esinkil li kixye li Qaawa’ reheb’ laj Israelita re naq te’numtaaq sa’ xb’een Jeriko. K’a’ru naraj li Qaawa’ naq taqatzol rik’in li seraq’ a’in?

Josue 24:15.Chirix rilb’al ru li raqal a’in, naru teewotz resil naq xesik’ ru k’anjelak chiru li Qaawa’ us ta ch’a’aj. K’a’ut naq aajel ru xsik’b’al ru k’anjelak chiru li Qaawa’ “anajwan” ut ink’a’ b’ayk toj reetal naq taa’ajmanq xsik’b’al ru? Chan ru taqatenq’aheb’ li komon sa’ li “qajunkab’al” naq yooko chixyalb’al qaq’e “chi k’anjelak chiru li Qaawa’ ”?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sik’ li us,” Eb’ li B’ich, 151.

Xkawresinkil qib’ jo’ aj k’utunel

Ye xnawom aach’ool chi kok’ aj xsa’. Wi taaye chi anchal aach’ool laa nawom chirix li yaal, naru taawanq xnimal xwankil choq’ re laa junkab’al. Ink’a’ na’ajman ru naq utz’u’ujinb’ilaq ru laa waatin malaj naq najt tat-aatinaq. Q’axal wi’chik nim xwankil jun xnawom ch’oolej naq k’eeb’il chi tiik ut rik’in x’anchalil li ch’oolej. (Chi’ilmanq Li k’utuk jo’ li Kolonel, 11.)

Li Qaawa’ kixk’eheb’ chi t’ane’k lix xaqxookil tz’ak Jeriko. © Providence Collection/licensed from goodsalt.com