Li k’eeb’il reetal chi us ut li ink’a’ k’eeb’il reetal
Sa’ rilb’al naq li ruchich’och’ yoo chixsik’b’al ru li maa’usilal junelik, tento taqayal qaq’e rik’in metz’ew re naq tiikaq wanqo sa’ li b’e li nokoxk’am sa’ xyaalal rik’in li Kolonel.
Jun sut kiwil jun li eetalil wan sa’ xlemul jun k’ayib’aal li naxye, “Sahil ch’oolejil, $15.00.” Kichal ink’a’uxl chirix xnawb’al jo’ k’ihal li sahil ch’oolejil tinruuq raj chixloq’b’al rik’in $15, ut xin-ok chirilb’al. Li k’a’ru xintaw a’an naab’al chi k’a’aq re ru kub’enaq xtz’aq ut maak’a’ neke’ok wi’—maak’a’ li k’a’ru xwil naru raj xk’eeb’al we li sahil ch’oolej li naxyeechi’i’ li eetalil! Chiru xnumikeb’ li chihab’, naab’al sut nink’oxlak chirix li eetalil a’an ut chan ru naq moko ch’a’aj ta xsik’b’al li sahil ch’oolejil sa’ li kok’ k’a’aq re ru li maak’a’ neke’ok wi’ ut yal numeleb’. Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, wan qik’in li osob’tesihom re xnawb’al chan ru ut b’ar natawman li tz’aqal sahil ch’oolejil. Natawman sa’ xyu’aminkil chi k’eeb’il reetal chi us li evangelio xaqab’anb’il xb’aan li Qaawa’ ut li qaKolonel, Jesukristo, ut sa’ xyalb’al qaq’e chi wulak jo’ a’an.
Wan jun qaraarokil amiiw aj k’anjel sa’ li b’eleb’aal ch’iich’ tren. Sa’ jun kutan, naq yoo chixb’eresinkil li tren, kiril chi najt jun ch’ina b’eleb’aal ch’iich’ xaqxo sa’ xb’ehil li tren. Sa’ junpaat kixk’e reetal naq li ch’ina b’eleb’aal ch’iich’ t’ilt’o sa’ xb’ehil li tren, ut ink’a’ naru chi elk aran. Sa’ junpaat kixloch li esil re patz’ok tenq’ ut a’an ki’ok chixxaqab’ankil li junjunq xtasalil li tren, li naxq’ax jun kiloom li roq chirix lix motor, ut li riiq li naxk’am numenaq 6.500 toneladas (5.897 toneladas métricas). Maak’a’ junaq xna’leb’ li winq li taaruuq raj xxaqab’ankil li tren re naq ink’a’ tixten rib’ rik’in li ch’ina b’eleb’aal ch’iich’, ut jo’kan kik’ulman. Us tana’ choq’ reheb’ li li wankeb’ chi sa’ li ch’ina b’eleb’aal ch’iich’, ke’rab’i li lix yaab’ li tren naq yoo chaq chi chalk ut ke’eelelik chi sa’ naq b’ab’ay chik ma neke’xten rib’. Naq laj ch’e’ol tren yoo chi aatinak rik’in laj k’aak’alenel tenamit li yoo chaq chi patz’ok chirix li kik’ulman, kinach’ok chaq jun li ixq sa’ josq’il. Kixjap re chixyeeb’al naq kiril chixjunil li kik’ulman ut kixye naq laj ch’e’ol re li tren, chi moko kixyal ta xq’otb’al li b’e re naq ink’a’ raj tixten rib’ rik’in li ch’ina b’eleb’aal ch’iich’!
Jo’kan b’i’, wi laj ch’e’ol tren kiru raj chixq’otb’al rix ut elk chiru lix b’e re naq ink’a’ tixten rib’ rik’in li ch’ina b’eleb’aal ch’iich’, a’an ut chixjunileb’ li wankeb’ chi sa’ li tren ke’sach raj sa’ jun nimla toch’e’k ut li tren ki’oso’ raj naq kixaqli chi jwal kaw. Us tana’ choq’ re a’an, lix b’ehil li tren li yoo chi xik wi’ ink’a’ ke’eek’an ut chi jo’kan lix yantil ke’kana chi tiik toj reetal naq kiwulak sa’ xna’aj, maak’a’ naxye li k’a’ru xramok re xb’e. Choq’ re xsahil qach’ool, laa’o wanko ajwi sa’ jun li b’e, jun li b’e re sumwank li xqak’e wi’ qaatin naq xkub’e qaha’ choq’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Us ta naru taqataw li k’a’ru taaramoq li qab’e naq yooqo chi xik, li b’e a’in tooxk’am chi tiik toj reetal taqataw li chaq’al ru atawom li maak’a’ roso’jik wi nokowan chi tiik chi sa’ li b’e a’in.
Li k’utb’esinb’il matk’ chirix li che’ re li yu’am naxk’ut chiqu li nak’ulman naq ink’a k’eeb’il reetal li b’aanuhom ut chan ru naq a’an nokoxnajtob’resi chiru li b’e re li sumwank. K’oxlahomaq rix naq li b’arb’ookil ch’iich’ ut li b’e laatz’ ut ka’ch’in ru, malaj xb’ehil li sumwank, tiik nekek’amok toj chiru li che’ re li yu’am, b’ar wi’ chixjunil li osob’tesihom yeechi’inb’il xb’aan li qaKolonel ut lix tojb’al rix li maak kixb’aanu wankeb’ choq’ re li tiikeb’ xch’ool. Sa’ li k’utb’esinb’il matk’ kiwan ajwi’ jun li nima’ li naxk’utb’esi xtz’ajnil li ruchich’och’. Eb’ li loq’laj hu neke’xch’olob’ naq li nima’ a’in “yoo chi nume’k, ut nach’ wan rik’in li che’,” ut ink’a’ toj chiru a’an. Sa’ li ruchich’och’ wan naab’al li k’a’aq re ru nasachok ch’oolej li naru ajwi’ naxb’alaq’iheb’ toj reetal li sik’b’ileb’ ru, li naxb’aanu naq ink’a’ te’xk’e reetal lix b’aanuhom sa’ xyu’aminkil lix sumwank, ut naxk’ameb’ chi jo’kan chixk’atq li che’, a’b’an ink’a toj chiru a’an. Wi ink’a’ naqak’e reetal xyu’aminkil li qasumwank chi tz’aqal re ru, lix yalb’al qaq’e chi ink’a’ k’eeb’ilaq reetal, naru nokoxk’am sa’eb’ li b’e moko us ta ru, malaj taqajunaji qib’ rik’ineb’ li ak xe’ok sa li kab’l li nim ut paapo xsa’. Wi ink’a’ naqak’e reetal, naru toob’ut’irq sa’ xchamal ut xtz’ajnil ru li nima’.1
Wan jun na’leb’ k’eeb’il reetal chi us ut jun ink’a’ k’eeb’il reetal re xb’aanunkilatq chixjunil, jo’ ajwi’ re xyu’aminkil li evangelio. Naq naqak’oxla naq xqak’e qib’ sa’ aatin rik’in li qaKolonel, ma naqak’e reetal chi us malaj ink’a’ naqak’e reetal? Xb’aan naq wanko sa’ ruchich’och’, wan naq ma ink’a’ tab’i’ naqakol rix li qab’aanuhom, rik’in xyeeb’al naq a’an jo’ wank sa’ li choql ruhil na’ajej, malaj xyuhinkil ru li us rik’in li ink’a’ jwal us? Rajlal naq naqaye, “maare,” “wi,” malaj “a’b’an” chirix xtaaqenkil li na’leb’ neke’xk’e li neke’k’amok qab’e, eb’ li profeet, malaj xk’eeb’al reetal xyu’aminkil li evangelio, naraj naxye naq yooko chixyeeb’al, “Li na’leb’ a’an moko choq’ we ta.” Naru naqakol qix chirix chixjunil, a’b’an li yaal a’an naq maak’a’ junaq chaab’il na’leb’ re xb’aanunkil li ink’a’ us!
Li ch’ol aatin reheb’ li li saaj winq ut saaj ixq choq’ re li chihab’ 2019 isinb’il chaq sa’ Jwan 14:15, b’ar wi’ li Qaawa’ naxtaqla: “Wi nikineera, chepaab’eb’ lin taqlahom.” Wi tzaqal yaal naq naqara jo’ naqaye, ma ink’a’ naru taqak’utb’esi li rahok a’an rik’in rilb’al ut xyu’aminkil chi us lix taqlahom?
Naq naqak’e reetal chi us xyu’aminkil li evangelio moko naraj ta naxye naq q’es too’iloq malaj ka’ajwi’ li najter na’leb’ nawulak chiqu. Li naraj naxye, a’an naq k’ulub’ej li qak’a’uxl ut li qab’aanuhom jo’ xtzolom li Jesukristo. Sa’ xtz’ilb’al rix li jalanil wan rik’in li k’eeb’il reetal chi us rik’in li ink’a’ k’eeb’il reetal sa’ xyu’aminkil li evangelio, qilaq jun siir chi na’leb’:
Ma naqak’e reetal chi us li oxloq’ink sa’ li hilob’aal kutan ut xkawresinkil qib’ re tz’aqonk sa’ li loq’laj wa’ak rajlal xamaan?
Ma naru raj naq taqak’e b’ayaq chik reetal li qatij ut xtzolb’aleb’ li loq’laj hu malaj naq nokotz’aqon chi tzolok sa’ Kim, Taaqehin—Choq’ reheb’ li komon ut li junkab’al?
Ma naqak’e reetal chi us naq noko’oxloq’ink sa’ li santil ochoch, ut ma naqayu’ami chi k’eeb’il reetal li sumwank li kiqab’aanu chaq naq kikub’e qaha’ ut li kiqab’aanu sa’ li santil ochoch? Ma naqak’e reetal chan ru naq naqatiqib’ qib’ ut naq li t’ikr naqoksi naxram chi us li qatib’el, ut jwal wi’chik sa’eb’ li santil k’anjel ut sa’eb’ li santil na’ajej? Ma naqak’e reetal chi us chan ru naq naqoksi li loq’laj aq’ej re li santil ochoch? Malaj lix yeechi’ihom li ruchich’och’ naxjal li qak’a’uxl chi ink’a’ k’eeb’il reetal?
Ma naqak’e reetal chi us chan ru naq nokok’anjelak choq’ reheb’ li ani wankeb’ xmajelal ut chan ru naq naqab’aanu li qak’anjel b’oqb’ilo wi’ sa li Iglees, malaj maak’a’ qaweent chirix ut ink’a’ naqake’ reetal chi us li qak’anjel li b’oqb’ilo wi’ chi tenq’ank?
Ma naqak’e reetal chi us malaj ink’a’ naqak’e reetal li k’a’ru naqil sa’ li kaxmu malaj sa’eb’ li qacelular? Ma naqak’e reetal chi us li aatin naqoksi naq noko’aatinak? Malaj yal naqaq’alu li maajo’il k’a’aq re ru ut li k’a’ru tz’aj ru?
Sa’ li ch’ina hu Choq’ re Xkawilaleb’ li Saaj wankeb’ xtusulal li wank, li te’xk’e chi naab’al qosob’tesinkil ut toohe’xtenq’a chi wank sa’ xb’eheb’ li sumwank, wi neke’qataaqe chi k’eek’o reetal. Li na’leb’ wan chi sa’, us ta tz’iib’anb’il choq’ reheb’ li saaj, moko naraqe’ ta xwankil naq na’ux li elk sa’ xyanqeb’ li saaj winq malaj sa’ xyanqeb’ li saaj ixq. Neke’k’anjelak qe a’an, chiru chixjunil li hoonal. Rik’in xtz’ilb’aleb’ rix li na’leb’ a’an naru te’xk’e jalan chik qana’leb’ re taqak’e reetal chan ru naq taqayu’ami li evangelio.
Miqakub’si ru li qachaab’il na’leb’ re naq k’ulub’ejaqo sa’ junaq ch’uut, malaj re naq sa taawanq anihaq chik. Laa’o xtzolom li Jesukristo, jo’kan b’i’ li qak’anjel a’an xtaqsinkileb’ xwanjik li komon, xterq’usinkileb’ ru sa’ junaq na’ajej taqenaq ut santaq chik, b’ar wi’ te’ruuq ajwi’ chixq’olb’al xninqal ru osob’tesihom.
Nekexinb’oq chi junjunqal re xsik’b’al lix b’eresihom li Santil Musiq’ej re xnawb’al k’a’ru li jale’k aajel ru xb’aanunkil sa’ li qayu’am re xk’eeb’al reetal naq tiikaq wanqo sa’eb’ li qasumwank. Jo’kan ajwi’ nintz’aama eere naq meetz’ileb’ rix Ii kristiaan li yooqeb’ ajwi’ chixb’aanunkil li k’anjel a’in. “We laa’in li raqok aatin, chan li Qaawa’.”2 Chiqajunjunqal wanko sa’ xhoonal li k’iik ut li jalaak.
Nawulak chiwu li seraq’ wan sa’ lix Hu Laj Mormon chirixeb’ laj Amlicitas aj q’etoneleb’ paab’aal. Re xk’utb’al reheb’ li komon naq ink’a’ chik neke’xpaab’ li Jesukristo ut lix Iglees, ke’xk’e jun kaqil eetalil chiru xpeekemeb’ re naq chixjunileb’ te’iloq re.3 Sa’ xjunpak’alil, ut jo’ xtzolom li Jesukristo, k’a’ru li eetalil naqak’e chiqu chi junjunqal? Ma naru naq eb’ li komon te’ril sa junpaat li reetalil li Kristo sa’ li qilob’aal ut te’xnaw naq a’an naqak’utb’esi xb’aan chan ru naq nokowan sa’ li qayu’am sa’ xyaalalil?
Jo’ xtenamit li sumwank, moko k’eeb’il ta sa’ qab’een xjunajinkil qib’ rik’in xkomon li ruchich’och’. Yeeb’il qe naq b’oqb’ilo choq’ jun “tenamit reechanihom li Dios”4—k’a’jo’ xnimal ru li yehom a’an! Sa’ rilb’al naq li ruchich’och’ yoo chixsik’b’al ru li maa’usilal junelik, tento taqayal qaq’e rik’in metz’ew re naq tiikaq wanqo sa’ li b’e li nokoxk’am sa’ xyaalal rik’in li Kolonel, chi jo’kan xnimob’resinkil lix yanq li qayu’am re sumwank rik’in lix yeechi’ihom li ruchich’och’.
Sa’ xk’oxlankil chan raj ru xtawb’al li tz’aqal sahil ch’oolejil li maak’a’ roso’jik, nink’e reetal naq wan naq wanko sa’ li choql. Li q’ojyinal choql moko naru ta risinkil naq yooqo chi xik sa’ xb’ehil li sumwank. Li aaleek ut ink’a xk’eeb’al reetal chi us naru nokohe’xjeq chiru li b’e re xik sa’ li q’ojyinal choql li naxyeechi’i li ruchich’och’ ut najt qayanq nakana rik’in xb’ehil li sumwank. Wi nawulak li hoonal a’an, li qaraarookil profeet, li Awa’b’ej Russell M. Nelson, naxwaklesi qach’ool re naq toosutq’iiq sa’ xb’ehil li sumwank, ut naq taqab’aanu sa’ junpaat. K’a’jo’ ninb’antioxi li maatan re li jalb’a-k’a’uxlej ut xwankilal lix tojb’al rix li maak li kixb’aanu li qaKolonel.
Relik chi yaal li qayu’am moko tiik ta ru chi tz’aqal. Jun ajwi’ li winq kiwan chi tz’aqal re ru sa’ xb’een li teleestil ruchich’och’ a’in. A’an li Jesukristo. Us ta ink’a’ tz’aqal qe qu, ex was wiitz’in, naru toowanq chi k’ulub’ej, k’ulub’ej re okenk sa’ li loq’laj wa’ak, k’ulub’ej re xk’ulb’al li rosob’tesihom li santil ochoch, ut k’ulub’ej re xk’ulb’al k’utb’esinb’il na’leb’ sa’ junesal.
Li rey aj Benjamin kixch’olob’ xyaalal li osob’tesiik ut li sahil ch’oolejil li nachal rik’neb’ li neke’xtaaqe li Kolonel chi k’eek’o reetal: “Ut joʼkan wiʼchik, nawaj raj naq chekʼoxla li osobʼtesiik ut li sahoʼk chʼoolej wankebʼ wiʼ li nekeʼpaabʼank rehebʼ lix taqlahom li Dios. Xbʼaan naq kʼehomaq reetal, osobʼtesinbʼilebʼ saʼ chixjunil li kʼaʼaq re ru, re li yuʼam aʼin joʼ ajwiʼ re li musiqʼej; ut wi nekeʼkuyuk chi tiikebʼ chi paabʼank toj saʼ rosoʼjik, nekeʼkʼuleʼ chaq saʼ choxa, re naq chi joʼkan teʼruuq chi wank rikʼin li Dios saʼ sahil chʼoolejil li maajoʼqʼe naʼosoʼ.”5
Ma naru xloq’b’al li tz’aqal sahil ch’olejil rik’in $15? Ink’a’, ink’a’ naru. Li tz’aqal sahil ch’olejil cham ru ut maak’a’ roso’jik nak’ulman sa’ xyu’aminkil rik’in qajom ut chi k’eek’o reetal lix evangelio li Jesukristo. Sa’ xk’ab’a’ li Jesukristo, amen.