Lix wankilal li paab’aal aj xaqab’anel

Xb’aan li Awa’b’ej Henry B. Eyring

Xkab’ aj tenq’ aj k’ehol na’leb’ sa’ li Xb’eenil Awa’b’ejil

Naq nakataqsi laa wuq’ re xxaqab’ankil xwankileb’, nakayeechi’i re li Dios, li nataqlan reheb’ li moos a’an, naq taaxaqab’eb’ xwankil.

K’iila sut wab’ihomeb’ laj jolominel re li tijonelil chi b’antioxink xb’aan xpaab’aaleb’ li b’eresinb’ileb’ xb’aaneb’, ut li xaqab’anb’il wi’ xwankileb’. Xb’aan li reek’ahomeb’ na’ab’iman sa’ xyaab’eb’ xkux, naru xnawb’al naq cham ut yaal lix b’antioxihomeb’. Anajwan nawaj xk’utb’al lix b’antioxihom li Qaawa’ choq’ eere xb’aan xaqab’ankil xwankileb’ lix moos sa’ lix Iglees. Ut nawaj ajwi’ xwaklesinkil eech’ool chixk’anjelankil ut ut chi k’iik sa’ li wankilal a’an re xxaqab’ankileb’ xwankil jalan rik’in lee paab’aal.

Naq maji’ nekexyo’la, xek’ut naq wan eerik’in li wankilal a’an. K’oxlahomaq li k’a’ru naqanaw chirix li na’ajej reheb’ li musiq’ej naq maji’ nokoyo’la. Li qaChoxahil Yuwa’ kixk’ut jun xk’uub’anb’il na’leb’ choq’ reheb’ li ralaj xk’ajol. Laa’o koowan chaq aran. Laj Lucifer, li qas sa’ musiq’ej, kixka’pak’ali li k’uub’anb’il na’leb’ li tixxk’e qe lix taql qach’ool. Li Jehova, lix Raarookil Alal li qaChoxahil Yuwa’, kixxaqab’ xwankil li k’uub’anb’il na’leb’. Laj Lucifer kixtikib’ jun po’ok ch’oolej. Lix yaab’ xkux li Jehova kiq’axok-u, ut a’an kixk’e rib’ chi wanq choq’ aj Kolol qe.

Rik’in naq xatyo’la sa’ ruchich’och’ nanawman naq laa’at xaxaqab’ xwankil li Yuwa’b’ej ut li K’ajolb’ej. Ki’ajman ru li paab’aal chirix li Jesukristo re xxaqab’ankil xwankil li k’uub’anb’il na’leb’ re sahil ch’oolejil ut lix k’anjel li Kristo sa’ a’an, rik’in naq b’ab’ay ajwi’ aanawom chaq chirix li ch’a’ajkilal tatnume’q wi’ sa’ ruchich’och’.

Laa paab’aal re xxaqab’ankileb’ xwankil lix moos li Dios aajel ajwi’ ru choq’ re lix sahilal aach’ool sa’ li yu’am a’in. Naq xak’ulub’a li raatin jun li misioneer re tijok re xnawb’al ma raatin li Dios lix Hu laj Mormon, xwan laa paab’aal re xxaqab’ankil xwankil jun xmoos li Qaawa’. Naq xak’ulub’a li b’oqok re taakub’eeq aaha’, xaxaqab’ xwankil jun xtuulanil moos li Dios.

Naq xakanab’ jun winq chixk’eeb’al li ruq’ sa’ xb’een laa jolom ut chixyeeb’al, “Chak’ul li Santil Musiq’ej,” xaxaqab’ xwankil a’an jo’ jun aj k’amol re li Tijonelil re Melkisedek.

Chalen chaq li kutan a’an, rik’in k’anjelak sa’ tiikilal, laa’at xaxaqab’ xwankil li junjunq kristiaan li xk’ojob’ li tijonelil sa’ aab’een ut li junjunq li xatxk’ojob’ sa’ jun opiis sa’ li tijonelil a’an.

Sa’ xtiklajik laa wanjik sa’ li tijonelil, naq xaxaqab’ xwankil anihaq, a’an yal xkanab’ankil aawib’ chiru jun xmoos li Dios. Anajwan, naab’al eere ak wankex sa’ jun na’ajej b’ar wi’ wan chik xkomon li na’ajman ru re xxaqab’ankil xwankil.

Nakasik’ ru ma taaxaqab’ xwankileb’ chixjunil li b’oqb’ileb’ xb’aan li Qaawa’—sa’ yalaq k’anjel b’oqb’ileb’ wi’ xb’aan li Qaawa’. Li k’anjel a’an nak’ulman sa’eb’ li ch’utub’aj-ib’ chiru chixjunil li ruchich’och’. Ak xk’ulman sa’ li ch’utub’aj-ib’ a’in. Sa’eb’ li ch’utam a’an, neke’yaab’asiik xk’ab’a’eb’ li winq ut li ixq—eb’ lix moos li Dios—ut b’oqb’ilat chixtaqsinkil laa wuq’ re xxaqab’ankil xwankileb’. Naru naq ink’a’ taaxaqab’eb’ xwankil, malaj naru taayeechi’i laa paab’aal aj xaqab’anel. Rik’in xtaqsinkil laa wuq’ re xxaqab’ankil xwankil junaq, wan li k’a’ru nakayeechi’i. Nakayeechi’i re li Dios, li nataqlan reheb’ li moos a’an, naq taaxaqab’eb’ xwankil.

Moko tz’aqaleb’ ta re ru a’an, jo’ naq moko tz’aqal ta aawe aawu laa’at. Re xpaab’ankileb’ laa yeechi’ihom, na’ajman ru li paab’aal li ink’a’ naru reek’asinkil, naq a’an li Dios li xb’oqok reheb’. Xpaab’ankileb’ li yeechi’ihom a’in tixk’am ajwi’ chaq li junelikil sahil ch’oolejil. Xq’etb’aleb’ li yeechi’ihom a’in tixk’am chaq li rahil ch’oolejil aawe ut reheb’ ajwi’ li raarookeb’ aab’aan—jo’ ajwi’ li sachk li ink’a’ naru xk’oxlankil.

Maare ak xpatz’man aawe, malaj taa’patz’manq aawe, ma taaxaqab’ xwankil laa obiisp, li awa’b’ej re li oqech, eb’ li jolomil aj b’eresinel, ut eb’ li jolomil aj k’anjel re li Iglees. Naru na’ux naq patz’b’il aawe naq taaxaqab’ xwankileb’ laj k’anjel ut laj jolominel sa’ jun li ch’utub’aj-ib’. Wan naq na’ux naq yookat chi aatinak rik’in li obiisp malaj li awa’b’ej re oqech.

Li na’leb’ nink’e, a’an naq chi rub’elaj taapatz’ aawib’ eb’ li na’leb’ a’an, chi k’oxlanb’il ut rik’in tijok sa’ laa k’a’uxl. Sa’ xb’aanunkil a’an, maare taatz’ileb’ rix laa k’oxlahom, laa waatin, ut laa b’aanuhom. K’e aach’ool chixjultikankileb’ ut chixtusub’ankileb’ li sumehom taak’e naq li Qaawa’ tatraatina, rik’in xnawb’al naq sa’ junaq kutan a’an tixb’aanu chi jo’kan. Naru taakawresi aawib’ rik’in xpatzb’al aawib’ eb’ li na’leb’ jo’eb’ a’in:

Ma xink’oxla malaj xin’aatinak chirix xmajelaleb’ li kristiaan a’in li xinye naq tinxaqab’eb’ xwankil?
Ma xinsik’ reetalil naq li Qaawa’ yoo chixk’amb’aleb’ xb’e?
Ma xintaaqe chi anchal inch’ool lix b’eresihomeb’ a’an?
Ma xin’aatinak chirix li eetalil li nawil naq a’aneb’ xmoos li Dios?
Ma nintijok chirixeb’ chi kok’ aj xsa’ rik’in xk’ab’a’eb’ ut rik’in rahok?

Choq’ re lix k’ihal qe, eb’ li patz’om a’in toohe’xk’e chi ch’a’ajkilank b’ayaq sa’ qak’a’uxl ut chirajb’al xjalb’al qak’a’uxl. Li Dios xtaqla naq ink’a’ taqaraq aatin chirix li qas qiitz’in chi moko tiik ta, a’b’an sa’ xb’aanunkil a’an, naqak’e reetal naq ch’a’aj a’an. Haye’ chixjunil li naqab’aanu naq nokok’anjelak rik’ineb’ li qas qiitz’in nokoxk’e chixtz’ilb’aleb’ rix. Ut sa’ haye’ chixjunil sa’ li qayu’am, naqajuntaq’eeta qib’ rik’ineb’ jalan. K’iila paay ru naq naqab’aanu a’an, ut wan naq aajel ru, a’b’an kok’ aj xsa’ nokoxk’am chi jitok.

Li Awa’b’ej George Q. Cannon kixk’e jun tijom li tinye jo’ intijom eere. Nink’oxla naq yaal li kixye: “Li Dios xsik’eb’ ru lix moos. A’an wan xwankil re xjtib’aleb’, wi neke’raj ru xjitb’al. Ink’a’ naxk’e qawankil re xq’usb’aleb’ ut xjitb’aleb’. Maajun winq, maak’a’ naxye jo’ nimal xkawilal sa’ li paab’aal, maak’a’ naxye jo’ nimal li ropiis sa’ li tijonelil, naru tixmajewaheb’ li ani yulb’il xb’aan li Qaawa’ ut tixsik’ xmaakeb’ li xe’k’uluk re lix wankil li Dios sa’ li ruchich’och’ chi ink’a’ tixb’oq sa’ xb’een lix josq’il. Li Santil Musiq’ej taarisi rib’ rik’in li winq a’an, ut taakanaaq sa’ q’ojyin. Rik’in naq yaal a’in, ma ink’a’ nekeril chan ru x’aajelil ru naq taqil qib’ chi us?”

Li nawil laa’in, a’an naq lix k’ihaleb’ li komon sa’ li Iglees chiru li ruchich’och’ neke’xra rib’ chirib’ileb’ rib’ ut neke’raheb’ li ani neke’jolomin sa’ xb’eeneb’. A’b’anan, wan li naru taqachaab’ilob’resi ut li tento taqachaab’ilob’resi. Tento naq toochaab’ilo’q sa’ xxaqab’ankil qawankil chiqib’il qib’. Na’ajman ru li paab’aal ut li yalok-qe’. Wahi’keb’ kaahib’ li na’leb’ tink’e re te’qak’anjela sa’ li ch’utub’aj-ib’ a’in.

Naru taqak’e reetal junjunqeb’ li b’oqok k’eeb’il xb’aaneb’ aj yehol aatin ut too’ok anajwan chixk’anjelankileb’. Wi naqab’aanu, taanimanq li qawankil chixxaqab’ankil wankileb’.
Naru tootijoq choq’ reheb’ naq neke’aatinak re naq li Santil Musiq’ej tixk’ameb’ li raatin sa’ xch’ool junjunqeb’ li ani raarookeb’ qab’aan. Moqon, naq naqataw naq kisumeek li qatij, taanimanq li qawankil chixxaqab’ankil wankileb’ laj jolominel a’an.
Naru taqapatz’ sa’ tij naq junjunqeb’ aj yehol aatin te’osob’tesiiq ut taak’ehe’q wankilal reheb’ naq neke’aatinak. Naq naqil naq kik’ehe’ wankilal reheb’, taanimanq li qapaab’aal re xxaqab’ankil xwankileb’, ut ink’a’ taalajq li paab’aal a’an.
Naru taqab’iheb’ li raatineb’ laj yehol aatin li neke’chal jo’ xsumenkil li qatij re xk’ulb’al qatenq’ankil. Naq neke’chal li sumehom, ut te’chalq chi yaal, taanimanq li qapaab’aal re xxaqab’ankil xwankileb’ chixjunileb’ lix moos li Qaawa’.

Rochb’een ajwi’ li chaab’ilo’k sa’ xxaqab’ankil xwankileb’ li ani neke’k’anjelak sa’ li Iglees, taqatzol naq wan junaq chik li na’ajej b’ar wi’ naru toochaab’ilo’q rik’in ajwi’ li wankilal a’an. Aran, q’axal wi’chik ninqeb’ ru li osob’tesink naru naqak’ul rik’in. A’an sa’ li ochoch ut li junkab’al.

Nin’aatinak re li saaj aj k’amol re li tijonelil li toj wan sa’ rochoch lix yuwa’. Inyehaq eere rik’in li k’a’ru xink’ul laa’in, k’a’ru naraj naxye choq’ re laa yuwa’ naq nareek’a naq xaqab’anb’il xwankil aab’aan. Maare q’axal kaw xch’ool laa yuwa’ jo’ nakawil. A’b’an k’iheb’ wi’chik lix ch’a’ajkilal chiru li nakanaw laa’at. Wan naq a’an ink’a’ naru chirilb’al chan ru xnumsinkileb’ li ch’a’ajkilal wankeb’ chiru.

Laa woxloq’ choq’ re tixtenq’a. Laa rahom choq’ re q’axal naq tixtenq’a. A’ut, li k’a’ru q’axal wi’chik taatenq’anq re, a’aneb’ li aatin jo’ a’in, yeeb’ileb’ chi anchal ch’oolej: “At yuwa’, xintijok chawix, ut xweek’a naq li Qaawa’ tatxtenq’a. Us taa’elq chixjunil. Ninnaw naq us taa’elq.”

Wankeb’ ajwi’ xwankileb’ li aatin chi junpak’al chik yeeb’il xb’aan li yuwa’b’ej re li alalb’ej. Naq jun li alalb’ej namaakob’, maare ajwi’ rik’in k’a’ruhaq re li musiq’ej, naru nareek’a naq xsach. Jo’ lix yuwa’, sa’ li hoonal a’an, chirix naq xattijok re xnawb’al li k’a’ru taab’aanu, maare taasachq aach’ool naq li Santil Musiq’ej naxk’eheb’ li aatin a’in sa’ xtz’uumal aawe: “At walal, wankin aawik’in toj’ sa’ roso’jik.” Li Qaawa’ nakatxra. Rik’in lix tenq’, naru tatsutq’iiq. Ninnaw naq nakatru chixb’aanunkil ut naq taab’aanu. Nakatinra.”

Sa’ li molam re li tijonelil ut sa’ li junkab’al, li nimob’resinb’il paab’aal re xaqab’ankil qawankil chiqib’il qib’, a’an chan ru naqakab’la li Sion li naraj li Qaawa’. Rik’in lix tenq’, nokoru chixb’aanunkil ut taqab’aanu. Taa’ajmanq ru xtzolb’al chan ru xraab’al li Qaawa’ chi anchal qach’ool, qakawilal, qak’a’uxl, ut qametz’ew, ut chan ru xraab’al qib’ chiqib’il qib’ naq naqara qib’ qajunes.

Naq yooko chi k’iik sa’ lix saq ruhil rahom li Kristo, naq’uno’ li qach’ool. Li rahok a’an tooxtuulanob’resi ut tooxk’am chixjalb’al qak’a’uxl. Taanimanq lix kawilal qach’ool chirix li Qaawa’ ut chiqib’il qib’. Toja’ naq yooqo chi xik sa’ xjayal li wank sa’ junajil, jo’ naxyeechi’i li Qaawa’ naq naru toowanq.

Ninch’olob’ xyaalal naq li qaChoxahil Yuwa’ naxnaw aawu ut nakatxra. Li Jesus a’an li yo’yookil Kristo. A’an a’in lix Iglees. Wan qik’in lix tijonelil. A’an taaroxloq’i xyalb’al qaq’e chi k’iik sa’ li qawankilal chixk’anjelankil a’an, ut chixxaqab’ankil qawankil chiqib’il qib’. Ninch’olob’ a’in sa’ xk’ab’a’ li Jesukristo, amen.