Xk’eeb’aleb’ chi eek’ank li qamusiq’ejil ich’mul
Jo’ naq li ilok ru hu ut li tzolok chirixeb’ li ich’mul moko tz’aqal ta re naq te’kawuq xmetz’ew, li ilok ru hu ut tzolok chirix li paab’aal chi maak’a’ li k’anjelak moko tz’aqal ta re xkawob’resinkil li paab’aal.
Ninb’antioxin xb’aan naq wan jun injunxaqalil, a’an jun k’a’jo’ xchaq’al ruhil maatan xk’ehom li qaChoxahil Yuwa’. Sa’ li qajunxaqalil wan numenaq 600 li ich’mul. Tento naq te’eek’asimanq li ich’mul a’an rajlal kutan a’an re naq te’xb’aanu lix k’anjel k’ojob’anb’il chaq. Naru raj naqak’e chixyalb’al xq’e li qak’a’uxleb’aal chi ilok ru hu ut chi tzolok chirixeb’ li ich’mul, a’b’an taaraho’q raj qach’ool wi naqak’oxla naq taakawuq qametz’ew chixb’aanunkil a’an. Eb’ li qich’mul neke’k’i ka’ajwi’ naq neke’qoksi.
Ninwulak chixk’eeb’al reetal naq eb’ li musiq’ejil maatan, kama’an ajwi’ naq neke’wan. Neke’raj ajwi’ ru eek’asiik re naq te’k’iiq. Li musiq’ejil maatan re li paab’aal moko ka’ajwi’ ta a’an jun eek’ahom malaj junaq xyaalal li wank; a’an jun na’leb’ re k’anjelak li junelik neke’qil sa’eb’ li loq’laj hu chi junajinb’il ru rik’in jun chik aatin eek’asink. Jo’ naq li ilok ru hu ut li tzolok chirixeb’ li ich’mul moko tz’aqal ta re naq te’kawuq xmetz’ew, li ilok ru hu ut tzolok chirix li paab’aal chi maak’a’ li k’anjelak moko tz’aqal ta re xkawob’resinkil li paab’aal.
Naq wan chaq we waqlaju chihab’, li was aj Ivan, li wan chaq re wiib’ xkak’aal sa’ li hoonal a’an, xwulak sa’ ochoch jun kutan ut kixwotz jun li esil rik’in li qajunkab’al. Kixsik’ ru naq taakub’eeq xha’ sa’ Lix Iglees li Jesukristo Reheb’ laj Santil Paab’anel sa’ Roso’jikeb’ li Kutan. Eb’ li qana’ qayuwa’ ke’kana chirilb’al chi ink’a’ ke’xpaab’, ut jultik we naq ink’a’ kintaw ru chi us li yoo chi k’ulmank. B’ab’ay chi ma jun chihab’ chirix a’an, kixk’e jun siir chik esil li kixsachb’esi qach’ool, a’an kixsik’ ru xik sa’ jun li mision choq’ re li Iglees, li naraj naxye naq taa’elq sa’ li ochoch ut ink’a’ taqil ru chiru wiib’ chihab’. Jultik we naq eb’ li qana’ qayuwa’ moko jwal saheb’ ta xch’ool chirix a’an; a’b’anan, kiwil sa’ ru jun kawil ch’oolej li kixnimob’resi lin chaab’ilal kiwil rik’in a’an ut xb’aan ajwi’ li k’a’ru kixsik’ ru xb’aanunkil.
Wiib’ oxib’ po chik chirix a’an, naq laj Ivan wan chaq sa’ xmision, kiwan inhoonal chixk’uub’ankil inhilaal rik’ineb’ li wochb’een sa’ li eskweel. Kiqaj raj xninq’ehinkil lix raqik li tzolok, ut xb’aan a’an naq tooxik raj wiib’ oxib’ kutan sa’ li palaw.
Kintz’iib’a jun hu re li was, li wan sa’ xmision, re xseraq’inkil re li k’a’ru raj tinb’aanu sa’ li saq’ehil a’an. Sa’ lin sumenkil kixk’e chaq, kixye we naq li tenamit b’ar wi’ yoo chi k’anjelak wan sa’ li b’e tinnume’q raj wi’ re wulak b’ar wi’ tinxik. Kink’oxla naq tz’aqal chaab’ilaq raj rilb’al ru junpaataq naq tinnume’q aran. Toj chirix chik a’an kinnaw naq moko naru ta te’ula’aniiq li misioneer xb’aaneb’ lix junkab’al.
Kinkawresi wib’ choq’ re rula’aninkil. Jultik we naq yookin chi xik sa’ li b’eleb’aal ch’iich’ yookin chixk’oxlankil chan raj ru taqanumsi lix chaq’al ru saq’ehil kutan a’an. Xb’een wa, toowa’aq raj, chirix a’an, too’aatinaq, chirix a’an toob’atz’unq raj sa’ li samahib’ ut toohilanq sa’ li saq’e—k’a’jo’ raj xchaq’al ru li kutan taqanumsi!
Naq li b’eleb’aal ch’iich kiwulak b’ar wi’ naxaqli, kiwil laj Ivan rochb’een jun chik li saaj, wankeb’ xsaqi kamiis ut xkorbaat sa’ wiib’al. Kin’el chaq sa’ li b’eleb’aal ch’iich’, kiqaq’alu qib’ ut kixye we xk’ab’a’ li rochb’een. Sa’ junpaat, kinseraq’i re li was li xink’oxla xb’aanunkil chiru li kutan a’an, a’b’an maak’a’ xinnaw chirix li yoo chaq chixk’oxlankil laj Ivan choq’ we. Kinril, kise’ek ut kixye, “Us! A’b’anan, toj wan junjunq li k’anjel tento taqab’aanu xb’een wa. Ma naru toohaawochb’eeni? Us, chankin re, xink’oxla naq taawanq raj naab’al li qahoonal re xik chire li palaw chirix li k’anjel taqab’aanu.
Chiru li kutan a’an, maara lajeeb’ hoor, kinb’eek chiruheb’ li b’e sa’ li tenamit a’an rik’in li was ut li rochb’een. Kinse’ek rik’ineb’ kristiaan chiru chixjunil li kutan. Kink’e xsahileb’ xch’ool li kristiaan maajun sut wilom ru. Koo’aatinak rik’ineb’ chixjunil li neke’qak’ul sa’ li b’e, kiqatoch’ rokeb’aaleb’ li kristiaan li ink’a’ neke’qanaw ru, ut ke’qula’ani li ani yookeb’ chaq chi tzole’k xb’aan li was ut li rochb’een.
Chiruheb’ li ula’anink a’an, li was ut li rochb’een yookeb’ chi k’utuk chirix li Jesukristo ut li k’uub’anb’il na’leb’ re li kolb’a-ib’. Sa’ junpaat, laj Ivan kixaqli ut kinril. Kisach inch’ool naq rik’in chaab’ilal kixpatz’ we naq tinwotz li nink’oxla chirix li yookeb’ chixk’utb’al. Kookana sa’ memil, chixjunileb’ yookeb’ chinka’yankil. Rik’in b’ayaq inxiw, kintaweb’ li aatin ut kinwotz li week’ahom chirix li Kolonel. Ink’a’ kinnaw ma us li kinwotz malaj ink’a’. Li was maajun wa kixye we ma us malaj ink’a’; kixb’antioxi b’an we naq xinwotz li nink’oxla ut li week’ahom.
Chiruheb’ li k’iila hoor a’an naq xinwan chaq rik’in li was ut li rochb’een, moko ke’roksi ta junaq k’asal re xk’utb’al junaq na’leb’ chiwu laa’in, a’ut, kintaw naab’al innawom chiru li kintzol naq ninseraq’ik chaq rik’in a’an rub’elaj. Kiwil chan ru naq li rilob’aaleb’ li kristiaan neke’jala naq neke’xk’ul li saqen sa’eb’ lix yu’am. Kiwil chan ru naq junjunq reheb’ a’an ke’xtaw royb’enihomeb’ sa’eb’ li esil, ut kintzol chan ru k’anjelak chiruheb’ li qas qiitz’in ut xkanab’ankil chi ixb’ej li k’a’ru nawulak chiwu ut li wajom. Yookin chaq chixb’aanunkil li kixk’ut li Kolonel: “Wi ani naraj intaaqenkil, mixra rib’, chixchapaq lix krus ut chinxtaaqehaq.”
Naq nin’ilok chi ixb’ej, nink’e reetal naq sa’ li kutan a’an kiniman lin paab’aal xb’aan naq li was kixk’e inhoonal re xk’anjelankil. Kiweek’asi naq yooko chaq chirilb’aleb’ ru li loq’laj hu, kiqasik’ ani te’qatzol, kiqawotz xnawom qach’ool, kook’anjelak chiruheb’ li qas qiitz’in, ut chi jo’kan. Ink’a’ xkoho chi hilank sa’ li saq’e chiru li kutan a’an, a’b’an li waam kixk’ul xsaqen nachal chaq sa’ choxa. Maajun li samahib’ kiwil ru, a’b’an kiweek’a naq lin paab’aal kik’i jo’ jun t’orol li mostaas. Moko xkohin ta chi b’eek sa’ li kutan a’an re saq’ehil, a’b’an chi ink’a’ kink’e reetal xchaq’al ru li kinnumsi, kinwan jo’ jun misioneer—chi moko laa’in ta komon sa’ li Iglees!
Hoonal re xkawob’resinkileb’ li musiq’ejil ich’mul
Sa’ xk’ab’a’ lix k’ojob’ankil wi’chik li evangelio, naru nokowulak chixtawb’al ru chan ru naq li qaChoxahil Yuwa’ nokoxtenq’a chixchaab’ilob’resinkileb’ li musiq’ejil maatan. Maare mas usaq wi’chik naq tixk’e chaq qahoonal re xsik’b’aleb’ li maatan a’an, sa’ xna’aj naq yal tixk’e chaq qe chi ink’a’ naqayal qaq’e sa’ tib’elej ut sa’ musiq’ej. Wi wanko sa’ lix b’e lix Musiq’, taqatzol xk’eeb’al reetaleb’ li hoonal a’an ut chirix a’an k’anjelak rik’ineb’.
Wi naqasik’ xkomon qakuyum, taqak’e reetal naq ajb’ilaq ru choq’ qe naq taqayal xtawb’al qajunes naq yooqo chiroyb’eninkil jun qasumenkil. Wi naqaj ru xnimob’resinkil li qarahom choq’ re li qas qiitz’in, naru naqataw naq nokochunla chixk’atq junaq li ak’ kristiaan sa’ li iglees. Kama’an ajwi’ rik’in li paab’aal: naq te’chalq xkab’ rix ch’oolej sa’ li qak’a’uxl, aajelaq ru naq taqakanab’ qib’ sa’ ruq’eb’ lix yeechi’ihom li Qaawa’ re xik chi uub’ej. Chi jo’ka’in neke’qeek’asi li qamusiq’ejil ich’mul ut neke’qachaab’ilob’resi re naq a’anaqeb’ xyo’leb’aal li kawilal sa’ li qayu’am.
Maare ch’a’ajaq sa’ xtiklajik, maare ajwi’ nawulak chi wank jo’ jun nimla yalok q’e. Li raatin li Qaawa’, kixye laj Moroni, neke’k’anjelak choq’ qe anajwan: “Ut wi te’chalq li winq wik’in tink’ut chiruheb’ lix q’unaleb’ xmetz’ew. Ninkʼe xqʼunalebʼ xmetzʼew li winq re taaruuq teʼwanq chi tuulanebʼ xchʼool; ut tzʼaqal li wusilal choqʼ re chixjunilebʼ li winq li nekeʼxtuulanobʼresi ribʼ chiwu; xbʼaan naq wi nekeʼxtuulanobʼresi ribʼ chiwu, ut nekeʼpaabʼank we, chirix aʼan tinkʼe li kʼaʼru qʼun xmetzʼew choqʼ kawilal chiruhebʼ.”
Ninb’antioxin chirix li was laj Ivan, li moko ka’ajwi’ ta kixwotz li evangelio wik’in, kinixb’oq b’an ajwi’ chixyu’aminkil ut chixk’eeb’aleb’ reetal lix q’unal inmetz’ew. A’an kinixtenq’a chixk’ulb’al lix b’oqom li Qaawa’: “Kim, taaqehin”—chi b’eek jo’ kib’eek li Kolonel, chi sik’ok jo’ kisik’ok li Kolonel, ut chi rahok jo’ nokoxra li Kolonel. Naab’al po chik chirix li xinnumsi chaq sa’ lix mision li was, kikub’e inha’ ut xkohin sa’ lin mision.
Qak’ulub’aq lix b’oqom li Awa’b’ej Russell M. Nelson ut chi anchal ch’oolej chooxik rik’in li Kolonel rik’in xk’eeb’al reetaleb’ li ich’mul li neke’raj ru musiq’ejil eek’asiik, ut qatikib’aq reek’asinkileb’. A’in jun li nimla alinak mas nim roq, ink’a’ b’aanunb’il sa’ junpaat, jo’kan naq me’sach sa’ aach’ool li kok’, a’b’an aajel ru musiq’ejil k’anjel li te’kawob’resinq re li aajelil ru ich’mul a’an. Wi naqaj naq taak’iiq li qapaab’aal, qab’aanuhaq li k’a’ru naraj ru li paab’aal.
Ninch’olob’ xyaalal naq laa’o ralal xk’ajol jun Choxahil Yuwa’b’ej aj rahonel. Li Jesukristo, li Ralal, nokoxra. Kichal sa’ li ruchich’och a’in chixk’utb’al chiqu li b’e ut chirix a’an rik’in xtaql xch’ool kixk’e lix yu’am re xk’eeb’al qoyb’enihom. Li Kolonel nokoxb’oq chixtaaqenkil lix b’aanuhom tz’aqal re ru, chixk’anjelankil li qapaab’aal chirix a’an ut chirix lix tojb’al rix li maak, ut chixnimob’resinkileb’ li qamusiq’ejil maatan li rosob’tesihomo wi’. A’an li b’e. A’an a’in lix nawom inch’ool sa’ xk’ab’a’ li Jesukristo, amen.