Xsik’b’al li qanawom rik’in li Musiq’ej

Xb’aan li Elder Mathias Held

Re li Setenta

Tento taqatzol xtz’ilb’al rix li yaal ut moko ka’aj ta wi’ ta rik’in li k’a’uxl, jo’kan ajwi’ rik’in li ch’ina xyaab’ xkux li Santil Musiq’ej li q’un na’aatinak.

Ex inraarookil was wiitz’in, li Qaawa’ kooxtaqla rajlal sut, “Chesik’ xk’ulb’al eenawom rik’in li tzolok ut rik’in ajwi’ li paab’aal.”¹ Nokoru chixk’ulb’al li saqen ut nawom moko ka’aj ta wi’ rik’in lix na’leb’ahom li qak’a’uxl, a’b’an rik’in ajwi’ lix b’eresihom ut lix musiq’ahom li Santil Musiq’ej.

Lix yo’leb’aal xtz’aqob’ qanawom moko junelik ta kiwan chaq wik’in.

Lin raarookil ixaqil xIrene ut laa’in xqajunaji qib’ sa’ li Iglees chiru junlaju xkaʼk’aal chihab’ anajwan, naq toja’ xoosumla. Sa’ kab’ichal kook’i chaq aran Colombia, a’b’an chiru xnumik wiib’ oxib’ po chirix li qasumlajik, lin k’anjel kooxk’am chi wank aran Alemania. Wanko sa’ qasaajil ut nim ru li qayo’onihom ut li qajom; k’a’jo’ xnimal ru li naqeek’a chaq ut sahil ch’oolejil choq’ qe.

Jalam-uuch

Li Hermana ut Elder Held

Naq toj yookin chaq chixk’eeb’al inq’e chi tzolok, li xIrene nareek’a naq taqak’ul junaq choxahil esil, us ta ink’a’ naqanaw chan ru malaj jo’q’e. Jo’kan naq kixkanab’eb’ chi ok sa’ li qochoch chixjunil li k’iila paay aj k’ay, li neke’xk’ayi li hu, li mesunel ch’iich’, li ch’iich’ na’oksiman sa’ li k’uub’leb’aal wa, ut k’a’aq re ru chik, junelik yoo chiroyb’eninkil li esil a’an.

Sa’ jun q’ojyin, kixye we naq wiib’ saaj winq li neke’roksi li korb’aat ut xsaqi kamiis ke’xtoch’ li okeb’aal, ut naq kireek’a naq kitoch’e’ xch’ool chi saqen ut kixnaw naq us xkanab’ankileb’ chi ok. Ke’xye re naq neke’raj aatinak rik’in chirix li Dios, a’b’an naq te’sutq’iiq wi’chik naq wanqin ajwi’ laa’in sa’ li wochoch. Ma a’an tana’ li esil oyb’eninb’il?

Ke’ok chiqula’aninkil ut rik’ineb’ lix tenq’ xqil ruheb’ li loq’laj hu ut xqataw ru lix aajelil ru li Jesukristo jo’ qaKolonel ut aj Tojol qix. Moqon kiraho’ qach’ool xb’aan li qakub’iha’ naq toj k’uula’alo chaq, ut a’an moko jun ta sumwank k’oxlanb’il. A’b’anan, xkub’sinkil qaha’ wi’chik naraj ajwi’ xyeeb’al wulak chi okenk sa’ li ak’ Iglees a’in, jo’kan naq xb’een wa tento taqataw ru chi yaal chixjunil chirix a’an.

A’b’an, chan raj ru tooruuq chixnawb’al ma yaal tab’i’ chixjunil li xe’xye qe li misioneer chirix Lix Hu laj Mormon, laj Jose Smith, ut li k’uub’anb’il na’leb’ re li kolb’a-ib’? Jo’kan b’i’, rik’in li raatin li Qaawa’ xqataw ru naq tooruuq “chixnawb’aleb’ ru rik’in li neke’uuchin wi’.”² Jo’kan ut, xqak’e qach’ool chixtz’ilb’al rix chan ru li Iglees, chixsik’b’al li ruuchinihom rik’in xsa’ ru li qak’a’uxl. K’a’ru xqil? Jo’kan b’i’, xqil:

Chaab’il kristiaan li saheb’ xch’ool, ut sachb’a-ch’oolejil junkab’al li neke’xtaw ru naq k’eeb’il qe chireek’ankil li sahil ch’oolejil sa’ li qayu’am, ut moko ka’aj ta wi’ xnumsinkil rahilal ut li rahil ch’oolejil.
Jun iglees li moko tojb’ileb’ ta li neke’jolomin, ut eb’ li komon neke’xsume xb’aanunkil chixjunil li k’anjel k’eeb’ileb’ re.
Jun iglees b’ar wi’ li Jesukristo ut eb’ li junkab’al wankeb’ sa’ xyi chixjunil li neke’xb’aanu, b’ar wi’ eb’ li komon neke’xkuy xsa’ jun sut sa’ li po ut neke’xk’e xtumin re xtenq’ankileb’ li neb’a’ ut li ani neke’ajok tenq’aak; b’ar wi’ nak’ute’ li chaab’il na’leb’ chirix xkawilal li qajunxaqalil, li naxk’ut qe ink’a’ roksinkil li k’a’ru narahob’tesink.

Jo’kan ajwi’:

Kiwulak chiqu naq neke’xk’e xch’ool chirix li chaab’ilo’k sa’ junjunqal, li tzolok, ut li k’anjelak chi kaw ut li wentinink-ib’.
Xqanaw ajwi’ chirix li sachb’a-ch’oolejil k’uub’anb’il k’anjel re xtenq’ankileb’ li tenamit.
Ut kitoch’e’ qach’ool sa’eb’ li jolomil ch’utub’aj-ib’, rik’in lix chaq’al ru b’ich ut lix chamal ru li musiq’ejil na’leb’ li nawotzman aran.

Rik’in rilb’al chixjunil a’an, moko xooru ta chixtawb’al junaq majelal sa’ li iglees. K’a’jo’ b’an naq kiwulak chiqu chixjunil li k’a’ru xqil. A’b’anan, ut toj chi jo’kan ink’a’ xooru chixk’eeb’al qach’ool chixkub’sinkil qaha’, xb’aan naq naqaj xnawb’al chixjunil xb’een wa.

A’b’anan, us ta nawiib’an qach’ool, li Qaawa’ yoo chiqakawresinkil rik’in xkuyum, yoo chaq chiqapak’b’al ut yoo chiqatenq’ankil chirilb’al naq tento taqatzol xtz’ilb’al rix li yaal ut moko ka’aj ta wi’ ta rik’in li k’a’uxl, jo’kan ajwi’ rik’in li ch’ina xyaab’ xkux li Santil Musiq’ej li q’un na’aatinak, li q’axal wi’chik naraatina li qaam.

Li xyaab’ kuxej a’an ut li xqeek’a xb’aan kichal sa’ qab’een sa’ jun q’ojyin, chirix xtzolb’al li evangelio chiru lajeeb’ po, naq xqil ru Mosiah 18: “Jo’ wan eerajom … chixk’amb’al eeriiq cherib’il eerib’, … ut … xk’ojob’ankileb’ xch’ool li neke’ajok k’ojob’aak xch’ool, … wi a’in li rajom lee ch’ool, k’a’ b’i’ ru texch’a’ajko’q wi’ naq taakub’eeq eeha’ sa’ lix k’ab’a’ li Qaawa’?”³

Li raqal a’an sa’ Lix Hu laj Mormon ki’ok sa’ li qach’ool ut li qaam, ut sa’ junpaat xqeek’a ut xqanaw naq maak’a’ k’a’ru tooxram re naq ink’a’ taakub’eeq qaha’. Xqataw ru naq li ajom li nayeeman chaq sa’eb’ li raqal a’an, a’an ajwi’ li rajom li qaam, ut naq a’an li k’a’ru na’ajman ru chi yaal. A’an nanumta xnimal ru chiru xtawb’al ru chixjunil, xb’aan naq ak tz’aqal li naqanaw. Junelik xqakanab’ qib’ sa’ ruq’ li qaChoxahil Yuwa’ aj rahonel li nak’amok b’e, ut k’ojk’o qach’ool naq toj yooq chixk’amb’al qab’e.

Jo’kan naq, sa’ ajwi’ li kutan a’an, xqaye jo’q’e taab’aanumanq li kub’iha’ ut b’ab’ay chik chirix a’an toj reetal naq xkub’e qaha’.

Jalam-uuch

Lix kub’iha’ li Elder ut Hermana Held

K’a’ru xqatzol rik’in li k’a’ru xqak’ul?

Xb’een, xqataw ru naq nokoru chixkanab’ankil qib’ chiru li qaChoxahil Yuwa’ aj rahonel, li rajlal naraj qatenq’ankil chi wank jo’ a’an naxnaw naq nokoru chi wank. Xqanaw chi tz’aqal lix yaalalil li raatin naq kixye, “Laa’in tink’e reheb’ li ralal xk’ajoleb’ li winq chi junjunqil li raqal, chi junjunqil li na’leb’, b’ab’ay arin ut b’ab’ay aran; ut osob’tesinb’ileb’ li neke’ab’ink chiru lin na’leb’, … xb’aan naq eb’ a’an te’xtzol xchaab’ilal li na’leb’, xb’aan naq re li ani nak’uluk, wan chik li k’a’ru tink’e.”⁴

Ut xkab’, xqatzol naq chirix xk’oxlankil sa’ qach’ool, wan jun chik na’leb’ chirix lix tawb’al nawom li naxk’e xk’amb’al qab’e ut qatawom ru. A’an li ch’ina xyaab’ kuxej li q’un na’aatinak re lix Santil Musiq’ej, li nokoraatina sa’ li qaam ut jo’kan ajwi’ sa’ li qak’a’uxl.

Nawulak chiwu xjuntaq’eetankil li na´leb’ a’an rik’in li qawankilal chi ilok. Li qaChoxahil Yuwa’ moko kixk’e ta qe jun ajwi’ chi uhej, kixk’e b’an wiib’. Naru noko’ilok rik’in jun ajwi’ chi uhej, a’b’an li xkab’ naxk’e qe jalan chik k’utb’esihom. Naq li wiib’ k’utb’esihom neke’xjunaji rib’ sa’ li k’a’uxleb’aal, naxk’e jun jalam-uuch chirix li k’a’ru nokoxsuti.

Jo’kan ajwi’, keeb’il qe wiib’ xyo’leb’aal chaq li esil, rik’in lix wankilal qajunxaqalil ut lix wankilal li qamusiq’. Li qak’a’uxl naxtaw ru k’a’ru na’uxman xb’aan li k’a’ru nareek’a li qajunxaqalil re tz’ejwalej ut li qana’leb’ahom. A’b’anan, rik’in li matan re li Santil Musiq’ej, li Yuwa’b’ej naxk’e ajwi’ jun xkab’ qilob’aal, a’an li jwal nim ru ut tz’aqal lix yaalalil, xb’aan naq nachal chaq rik’in a’an. A’b’anan, xb’aan naq eb’ lix hasb’ li Musiq’ej rajlal q’un ru reek’ankil, naab’aleb’ li kristiaan moko neke’xk’e ta reetal lix yo’leb’aal na’leb’ jun chik.

Naq li wiib’ chi na’leb’ a’in neke’xjunaji rib’ sa’ li qaam, li tz’aqal nak’utman chiqu naxk’ut lix yaalal li k’a’aq re ru jo’ chanruheb’ chi yaal. Relik chi yaal, rik’in li ilob’aal jun chik naxk’e li Santil Musiq’ej, li junjunq chi “yaalalil,” jo’ chanru na’ilman ka’ajwi’ sa’ li k’a’ru naxtaw ru li qak’a’uxl, maare te’k’utunq jo’ aj b’alaq’ malaj ink’a’ yaal. Chijultikoq’ eere li raatin laj Moroni: “Rik’in lix wankil li Santil Musiq’ej naru teenaw li yaal chirix chixjunil li k’a’aq re ru.”⁵

Chiru lin junlaju xkaʼk’aal chihab’ jo’ komon sa’ li Iglees, naab’al sut wilom naq wi naqakanab’ qib’ ka’ajwi’ chiru li k’a’ru naqak’oxla, ut naqatz’eqtaana xyaalal malaj naqil chi yal jo’ maajo’ li qamusiq’ejil nawom li nokoru chixk’ulb’al rik’in lix hasb’ ut lix musiq’ahom li Santil Musiq’ej, chanchan naq yooko chi xik sa’ li yu’am rik’in ajwi’ jun xsa’ uhej. A’b’an, chi aatinak rik’in jaljookil ru aatin, kik’ehe’ qe wiib’ xsa’ uhej. Ka’ajwi’ rik’in roksinkil sa’ xkab’ichal li uhej naru taak’ehe’q qe li tz’aqal yaal k’utb’esihom ut lix tz’aqalil chixjunileb’ li yaal ut chixjunil li naqak’ul sa’ li yu’am, jo’ ajwi’ li tz’aqal tawom u chirix aniho ut li qajom jo’ ralal xk’ajol li yo’yookil Choxahil Yuwa’b’ej.

Najultiko’ we li kixye li Awa’b’ej Russell M. Nelson jun chihab’ chaq naq kixye: “Sa’ li kutankil chalel, tookamq raj sa’ musiq’ej chi maak’a’ li b’eresink, li k’amok b’e, li k’ojob’ank ch’oolej, ut li ochb’eeniik chi rajlal xb’aan li Santil Musiq’ej.”⁶

Nikinwulak chixnawb’al tz’aqal xyaalal naq:

Wan jun qaChoxahil Yuwa’ aj rahonel, ut naq chiqajunilo kiqak’ulub’a chalk sa’ ruchich’och’ jo’ chanru li choxahil k’uub’anb’il na’leb’.
Li Jesus a’an li Kristo; a’an yo’yo, ut a’an lin Kolonel ut aj Tojol wix.
Laj Jose, jun saaj winq tuulan xch’ool, kib’oqe’ ut kiwulak chi wank jo’ li nimla profeet li kixtikib’ a’in, lix kʼojlajik lix tz’aqlojik ru li kutan, rik’in chixjunil lix laawil, xwankilal, ut xwankil lix santil tijonelil li Dios.
Lix Hu laj Mormon a’an jun xkab’il ch’olob’anb’il esil chirix li Jesukristo, ut li rajom li junkab’al a’an naq te’wanq chi junajinb’il chi maak’a roso’jik.
Li Qaawa’ Jesukristo naxb’eresi a’in, lix iglees k’ojob’anb’il wi’chik, rik’in li qayo’yookil profeet, li Awa’b’ej Russell M. Nelson sa’ li kutan a’in.

Eb’ a’in ut naab’al chik li loq’laj yaalalil wulajenaqeb’ chi wank jo’ musiq’ejil roqechal re chan ru tinwanq chi tenq’anb’il xb’aan li Dios. Ut nawoyb’eni li k’iila ak’ k’utum li toj naraj a’an naq laa’in—ut laa’ex ajwi’—taqak’ul naq yooko chixnumsinkil li sachb’a-ch’oolejil yu’am a’in, “rik’in li tzolok ut rik’in ajwi’ li paab’aal.”

Ninnaw naq tz’aqal yaal a’in ut ninch’olob’ xyaalal sa’ xk’ab’a’ li Jesukristo, amen.