B’ar tatxik laa’at, xb’aan li xSandy Freckleton Gagon

6–12 junio

Rut; 1 Samuel 1–3

“K’a’jo’ naq nasaho’ lin ch’ool rik’in li Qaawa’ ”

Naq nakattzolok chirix xyu’am xRut, xNoemi, xAna, ut xkomoneb’ chik chiru li xamaan a’in, ab’i li naxye li Musiq’ej aawe ut tz’iib’a li na’leb’ nakak’oxla. K’a’ru eek’asinb’ilat chixb’aanunkil?

Tz’iib’a li nakak’oxla

Wan naq naqak’oxla naq saqen raj ru xb’ehil li qayu’am, chalen xtiklajik toj sa’ roso’jik. Jun li b’e li tiik, a’an li nawulak sa’ junpaat, pe’ yaal? A’b’anan, wan naq nujenaq li yu’am rik’in li b’ayk ut li jalb’ehink li nokoxk’am sa’ jalan chik na’ajej. Maare taqak’e reetal naq jwal jalan li qayu’am rik’in li xqaj.

Relik chi yaal naq xRut ut xAna ke’xtaw ru a’in. Li xRut maawa’ aj Israelita, a’b’an kisumlaak rik’in jun aj Israelita, ut naq kikam xb’eelom, kiwan wiib’ xb’e. Ma taasutq’iiq rik’in xjunkab’al ut lix junxil yu’am, malaj taa’ok sa’ xpaab’aaleb’ laj Israelita ut taakanaaq rik’in xna’ xb’eelom? (chi’ilmanq Rut 1:4–18). Li xAna kiraj wank xkok’al, a’b’an ink’a’ kiru, jo’kan naq “k’a’jo’ xrahil lix ch’ool” (chi’ilmanq 1 Samuel 1:1–10). Naq nakattzolok chirix xRut ut xAna, k’oxla xpaab’aaleb’ naq ke’xq’axtesi rib’ sa’ ruq’ li Qaawa’ ut ke’b’eek chiru li b’e moko nawb’il ta ru. Toja’ naq taak’oxla xb’ehil laa yu’am. Moko juntaq’eet ta rik’in xb’eheb’ xRut ut xAna—chi moko yalaq chik ani. A’b’an chiruheb’ li ch’a’ajkilal ut li sachb’a-ch’oolej taak’ul sa’ xb’ehil aayu’am, naru taatzol xyeeb’al jo’ kixye xAna, “K’a’jo’ naq nasaho’ lin ch’ool rik’in li Qaawa’ ” (1 Samuel 2:1).

Re xtzolb’al k’a’ru wan sa’ li hu Rut ut 1 Samuel, chi’ilmanq “Rut” ut “Samuel, profeet sa’ li Najter Chaq’rab’ ” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Li xRut

Li Kristo naru tixjal li rahilal choq’ sahilal.

Naq kikam xb’eelom xRut, jwal ninqeb’ wi’chik li ch’a’ajkilal li kixk’ul chiru li tixk’ul raj jun xmalka’an sa’ li qakutankil. Sa’ xyanqeb’ laj Israelita junxil, jun ixq li maak’a’ xb’eelom malaj xkok’al teelom ink’a’ kiru chixloq’b’al li ch’och’ chi moko chixtawb’al xtrab’aaj. Naq nakawil ru li seraq’ chirix xRut, k’e reetal chan ru naq li Qaawa’ kixjal li rahilal choq’ nimla osob’tesink. K’a’ru nakawil rik’in xRut li maare kixtenq’a? K’a’ru kixb’aanu laj Bohos re xtenq’ankil li xRut sa’ xch’a’ajkilal? (chi’ilmanq Rut 4:4–7). K’a’ruheb’ lix na’leb’ li Kristo nakawil rik’in xRut ut laj Bohos?

Rut; 1 Samuel 1

Naru tinpaab’ naq li Dios tixk’am inb’e ut tinixtenq’a us ta wan inch’a’ajkilal.

Ma naru nakawil aawib’ sa’eb’ li seraq’ chirix xRut, xNoemi, ut xAna? Maare xak’ul jun nimla rahilal jo’ xRut ut xNoemi (chi’ilmanq Rut 1:1–5). Malaj ut, jo’ xAna, nakawoyb’eni jun aawosob’tesinkil maji’ nakak’ul (chi’ilmanq 1 Samuel 1:1–10). K’oxla li na’leb’ naru taatzol rik’ineb’ li chaab’il ixq a’in. Chan ru naq xRut ut xAna ke’xk’ut xpaab’aaleb’ chirix li Dios? K’a’ruheb’ li osob’tesink ke’xk’ul? Chan ru naru taataaqe li ke’xb’aanu eb’ a’an? K’oxla chan ru xat-ok chixpaab’ankil li Qaawa’ (chi’ilmanq Rut 2:12) us ta ch’a’aj laa yu’am.

Chiʼilmanq ajwiʼ Reyna I. Aburto, “Saʼ choql ut saʼ saqen, chatwanq wikʼin,” Jolomil ch’utub’aj-ib’ re octubre 2019.

Xintz’aama naq tixk’e we li k’uula’al a’in, xb’aan li xElspeth Young

1 Samuel 2:1–10

Naru nasaho’ inch’ool rik’in li Qaawa’.

Chirix naq xAna kixk’am laj Samuel sa’ li santil ochoch, kixnima ru li Qaawa’, jo’ tz’iib’anb’il sa’ 1 Samuel 2:1–10. Li raatin jwal chaab’il wi’chik naq nakak’oxla naq moko junxil ta naq “k’a’jo’ xrahil lix ch’ool” (1 Samuel 1:10) ut k’a’jo’ naq nayaab’ak. Naq nakawileb’ li raqal a’in, k’a’ru nakataw li nakatreek’asi chixnimankil ru ut chixb’antioxinkil li Qaawa’? Maare lix b’ich xAna tatxmusiq’a chi b’antioxink chiru li Qaawa’—maare rik’in tijok, yiib’ank jalam-uuch, k’anjelak chiru laa was aawiitz’in, malaj yalaq k’a’ru li tixk’ut laa week’ahom chirix a’an.

Yaal naq moko chixjunileb’ ta li tij te’sumeeq jo’ kisumeek xtij li xAna. K’a’ru nakataw sa’ li raatin li Awa’b’ej Dieter F. Uchtdorf “Agradecidos en cualquier circunstancia” li naru tatxtenq’a naq moko sumenb’ileb’ ta laa tij jo’ nakawaj? (Liahona, mayo 2014, 70–77).

1 Samuel 3

Naru tinwab’i ut tinpaab’ lix yaab’ xkux li Qaawa’.

Jo’ chiqajunilo, laj Samuel tento kixtzol chan ru xk’eeb’al reetal lix yaab’ xkux li Qaawa’. Naq nakawil 1 Samuel 3, k’a’ru nakatzol rik’in li ch’ajom a’in chirix rab’inkil ut xpaab’ankil lix yaab’ xkux li Qaawa’? K’a’ru ak xak’ul sa’ laa yu’am rik’in rab’inkil lix yaab’ xkux? Ma naru, jo’ laj Eli, taatenq’aheb’ laa was aawiitz’in chixk’eeb’al reetal lix yaab’ xkux li Qaawa’? (chi’ilmanq 1 Samuel 3:7).

Chi’ilmanq ajwi’ Jwan 14:14–21; David P. Homer, “Rab’inkil xyaab’ xkux,” Jolomil ch’utub’aj-ib’ re abril 2019.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Rut 1:16–18; 2:5–8, 11–12.Jo’ junkab’al, naru teesik’ reetalil li chaab’il ch’oolej ut li oxloq’ink sa’eb’ li raqal a’in. Chan ru naqak’ut chaab’ilal chiru li qajunkab’al ut li qas qiitz’in, ut chan ru naqoxloq’i li Jesukristo? Li ch’ol “Rut y Noemi” (sa’ Relatos del Antiguo Testamento) naru tixtenq’a laa junkab’al chixtawb’al xna’leb’ rik’in xRut.

1 Samuel 1:15.Maare naru taahoy li ha’ li wan sa’ jun li sek’ re xtenq’ankil laa junkab’al chixtawb’al ru li kixye xAna, “Xinchoy li waam chiru li Qaawa’.” K’a’ut naq hoyok naxch’olob’ chi chaab’il chan raj ru tootijoq? Chan ru taqachaab’ilob’resi li qatij sa’ junesal ut jo’ junkab’al?

1 Samuel 2:1–10.Lix utz’u’ujinb’il aatin xAna re xnimankil ru li Qaawa’ maare texxk’e chixk’oxlankileb’ li b’ich nekeb’icha re xnimankil ru. Naru teeb’ichaheb’. Maare teek’oxla jalan chik paay li k’anjel re xk’utb’al eerahom choq’ re li Jesukristo. Maare teeyiib’ jalam-uuch li neke’xk’ut k’a’ut naq nekera li Kolonel.

1 Samuel 3:1–11.Maare taawulaq cheru xk’utb’esinkil li seraq’ naq li Qaawa’ kixb’oq laj Samuel, malaj naru teeril li video “Samuel y Elí” (ChurchofJesusChrist.org). Jo’ junkab’al, naru tex’aatinaq chirix hoonal naq xereek’a li Qaawa’ chi aatinak eerik’in, ut k’a’ru xeb’aanu re xb’aanunkil li xye.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Xkutankil saqʼe wan saʼ li waam,” Eb’ li B’ich, 146.

Xkawresinkil aawib’ chi tzolok

Kanab’ li Musiq’ej chixk’amb’al aab’e sa’ li tzolok. Tz’aama naq li Santil Musiq’ej tatxb’eresi rik’ineb’ li na’leb’ tento taatzol. Chawab’i lix hasb’, us ta nakatxb’eresi chirilb’al ru jun na’leb’ ink’a’ raj xak’oxla, malaj chi tzolok chi jalan.

Xjalam-uuch laj Samuel naq narab’i li Qaawa’, xb’aan laj Sam Lawlor