Loq’laj k’iche’, xb’aan laj Brent Borup

12–18 septiembre

Isaias 13–14; 24–30; 35

“Jun li sachb’a-ch’oolejil k’anjel ut jun li eetalil”

Chirix naq taatzol Isaias 13–14; 24–30; 35 rik’in tijok, k’uub’eb’ li kok’ k’anjel li taatenq’anq reheb’ li kok’al chi tzolok. Eb’ li na’leb’ a’in naru neke’oksiman maak’a’ naxye jarub’ chihab’ wan reheb’ li kok’al.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xaqliiq wi neke’raj xwotzb’al junaq na’leb’ xe’xtzol chirix li evangelio sa’ kab’l malaj sa’ li Iglees. K’e xhoonaleb’ li kok’al re naq te’wotzoq.

Xk’utb’al li tzol’leb’: Kok’al toj ka’ch’ineb’ xyu’am

Isaias 14:12–14

Kiwan jun li pleet saʼ choxa.

Rub’elaj naq kiyo’ob’tesiik li ruchich’och’, li qaChoxahil Yuwa’ kixsik’ ru li Jesukristo re naq taawanq choq’ qaKolonel. Sa’ Isaias 14:12–14 nach’olob’aman li kaqalil kixk’ut laj Satanas sa’ li ch’utam xwan sa’ choxa naq maji’ nokoyo’la.

Kok’ k’anjel naru chi b’aanumank

• Oksi “Introducción: El plan de nuestro Padre Celestial” (sa’ Relatos del Antiguo Testamento, malaj li b’ich “Sa’ li choxa chaq kinwan” (B’ichleb’aal choq’ reheb’ li Kok’al, 139) re aatinak rik’ineb’ li kok’al chirix li pleet kiwan sa’ choxa naq maji’ nokoyo’la. (Naq taab’aanu, oksiheb’ junjunq ch’ol aatin re Isaias 14:12–14 li na’aatinak chirix laj Satanas.) Chirix a’an patz’ reheb’ li kok’al naq sa’ komonil te’xye aawe li seraq’. Jultika naq li Jesukristo kixb’aanu li k’a’ru kixk’uub’ li qaChoxahil Yuwa’ ut ki’ok choq’ li qaKolonel.

• Yiib’ chiru li pizarron jun aamej chi tz’iib’anb’ilaq chi sa’ li aatin Satanas rik’in jun uhej ra xch’ool. Ch’olob’ naq laj Satanas kixye sa’ xch’ool: “Tink’ojob’ chaq lin k’ojarib’aal, toj sa’ xb’eeneb’ lix chahim li Dios” (Isaias 14:13), li naraj naxye naq kiraj wank chi nim wi’chik xwankil chiru li qaChoxahil Yuwa’. Patz’ re jun ch’ina al naq tixyiib’ junaq chik aamej chi tz’iib’anb’il chi sa’ li aatin Jesus ut jun uhej sa xch’ool. Tenq’aheb’ li kok’al chixtawb’al ru naq li Jesus kiraj xb’aanunkil li k’a’ru kixpatz’ li qaChoxahil Yuwa’ naq tixb’aanu (chi’ilmanq Moises 4:1–2). Chan ru taqataaqe li Jesus?

“Tixsach chi junajwa xwankil li kamk” (Isaias 25:8).

Isaias 25:8

Li Jesukristo kiwakli chi yo’yo.

Li Jesukristo naru naxk’ojob’ qach’ool naq nokoraho’ xb’aan li kamk. Sa’ xk’ab’a’ naq kinumta’ sa’ xb’een li kamk, laa’o toowakliiq ajwi’ chi yo’yo.

Kok’ k’anjel naru chi b’aanumank

• K’ut jun xjalam-uuch lix waklijik li Jesukristo chi yo’yo ut patz’ reheb’ li kok’al naq te’xye k’a’ru neke’xnaw chirix a’an. Wi na’ajman ru, wotz rik’ineb’ li seraq’ naq li Jesus kiwakli chi yo’yo (chi’ilmanq “Jesus resucita,” sa’ Relatos del Antiguo Testamento, 139–144). B’ichahomaq malaj ab’ihomaq jun li b’ich chirix li wakliik chi yo’yo, maare “Xwakli Jesus” (B’ichleb’aal choq’ reheb’ li Kok’al, 44), ut patz’ reheb’ li kok’al naq te’xye k’a’ru neke’reek’a rik’in xnawb’al naq li Jesus kiwakli chi yo’yo sa’ xyanqeb’ li kamenaq.

• Aatinan rik’ineb’ li kok’al chirix anihaq nakanaw ru li xkam. K’a’ru naqeek’a naq nakam junaq kristiaan li naqara? Patz’ reheb’ li kok’al naq te’xyiib’ xjalam-uuch junaq kristiaan li yoo chi yaab’ak. Chirix a’an yaab’asi Isaias 25:8 reheb’. K’a’ru tixb’aanu li Jesus rik’in lix ya’al qu naq naqajultika junaq kristiaan li xkam? Patz’ reheb’ li kok’al naq te’xyiib’ junaq uhej sa xch’ool. Wotz xnawom aach’ool naq, sa’ xk’ab’a’ naq li Jesukristo kiwakli chi yo’yo, naru nak’ojla qach’ool naq nakam junaq qakomon ut naqanaw naq chiqajunilo toowakliiq chi yo’yo sa’ jun kutan.

Isaias 29:12, 14

Li Qaawa’ kixk’ojob’ wi’chik li Iglees rik’in xtenq’ laj Jose Smith.

Lix k’ojob’ankil wi’chik li evangelio a’an “jun li sachb’a-ch’oolejil k’anjel ut jun li eetalil” (Isaias 29:14). Wotz rik’ineb’ li kok’al junjunq reheb’ li sachb’a-ch’oolejil k’anjel kixb’aanu li Qaawa’—ut li toj yoo chixb’aanunkil—re xk’ojob’ankil lix evangelio sa’ li qakutankil.

Kok’ k’anjel naru chi b’aanumank

• Patz’ reheb’ li kok’al naq te’xye k’a’ru neke’xnaw chirix laj Jose Smith. Wi na’ajman ru, wotz rik’ineb’ “Li Xb’een K’utb’esink re laj Jose Smith” (sa’ Eb’ li Esilal sa’ li Tzol’leb’ ut Sumwank, 9–12). Il Isaias 29:12 ut ch’olob’ naq, us ta naab’aleb’ li kristiaan neke’xk’oxla naq laj Jose Smith “ink’a’ na’ilok ru hu,” li Jesukristo kixk’ojob’ li evangelio rik’in lix tenq’ a’an.

Xk’utb’al li tzol’leb’: Kok’al ak ninqeb’

Isaias 24:3–5; 29:7–10; 30:8–14

Li q’etok paab’ank a’an xnajtob’resinkil qib’ rik’in li Qaawa’ ut rik’ineb’ lix profeet.

Rilb’al lix tijom laj Isaias chirix lix xiwxiwil li q’etok paab’ank naru naxtenq’aheb’ li kok’al chixk’ojob’ankileb’ xch’ool chi wank chi tiik chiru li Qaawa’ ut chixtaaqenkileb’ lix profeet.

Kok’ k’anjel naru chi b’aanumank

• Tz’iib’a li aatin q’etok paab’ank chiru li pizarron. Patz’ reheb’ li kok’al naq te’xsik’ k’a’ru naraj naxye “Q’etok paab’ank” sa’ li K’utul Raqal reheb’ li Loq’laj Hu. Patz’ reheb’ naq te’ril Isaias 24:5; 30:9–11 ut te’xtz’iib’a k’a’ru ke’xb’aanu li kristiaan sa’ xkutankil laj Isaias li kik’amok reheb’ sa’ li q’etok paab’ank. Chirix a’an patz’ reheb’ naq te’xjal li k’a’aq re ru xe’xtz’iib’a rik’in li k’a’ru naru naqab’aanu re wank chi tiik chiru li Qaawa’.

• K’eheb’ li kok’al sa’ wiib’ ch’uut ut k’e reheb’ li junjunq chi ch’uut jun reheb’ li raqal a’in: Isaias 24:3–5; Isaias 29:7–10 malaj Isaias 30:8–14. Patz’ reheb’ naq te’xyiib’ xjalam-uuch li xe’ril. Naq yooqeb’ chixwotzb’al lix jalam-uuch, tenq’aheb’ chixtz’ilb’al rix k’a’ru neke’xk’ut li raatin laj Isaias chirix k’a’ut naq tento toowanq chi tiik chiru li Qaawa’.

Isaias 29:13–15, 18, 24

Lix k’ojob’ankil wi’chik li evangelio a’an jun “sachb’a-ch’oolejil k’anjel.”

Chan ru taatenq’aheb’ li kok’al chixtawb’al ru naq a’aneb’ ajwi’ neke’tz’aqon sa’ lix “sachb’a-ch’oolejil k’anjel” (Isaias 29:14) li Qaawa’ sa’ roso’jikeb’ li kutan?

Kok’ k’anjel naru chi b’aanumank

• K’uteb’ xjalam-uuch junjunq reheb’ li sachb’a-ch’oolej ke’k’ulman naq yoo chaq chi k’ojob’amank wi’chik li evangelio (chi’ilmanq Hu reheb’ li Jalam-uuch re li Evangelio, 90–95, malaj li perel re kok’ k’anjel re li xamaan a’in). Ilomaq Isaias 29:14, 18, 24 sa’ komonil ut patz’ reheb’ li kok’al chixtawb’aleb’ aatin ut ch’ol aatin li naxk’am rib’ rik’ineb’ li jalam-uuch. Patz’ reheb’ chan ru naru neke’tenq’an sa’ lix “sachb’a-ch’oolejil k’anjel” (raqal 14) li Qaawa’.

• Wotz junaq aach’ina numsihom re xtenq’ankileb’ li kok’al chixtawb’al ru k’a’ru naraj naxye k’ojob’ank wi’chik. Maare taawotz rik’ineb’ naq xsach k’a’ruhaq chawu ut chan ru naq xataw. Tenq’aheb’ chixjuntaq’eetankil a’an rik’in lix k’ojob’ankil wi’chik li evangelio. Jo’ naxye Isaias 29:13–15, k’a’ut naq naqaj ru li k’ojob’ank wi’chik? K’a’ru li sachb’a-ch’oolejil k’anjel kixb’aanu li Qaawa’ re xkojob’ankil wi’chik lix evangelio?

Isaias 14:3; 25:8; 28:16

Lix k’utum laj Isaias naxk’am inb’e rik’in li Jesukristo.

Lix k’utum laj Isaias naru naxk’ameb’ xb’e li kok’al rik’in li Kolonel ut naru naxtenq’aheb’ chixjultikankil k’a’ru xb’aanuhom a’an choq’ reheb’.

Kok’ k’anjel naru chi b’aanumank

• Tz’iib’aheb’ li raqal a’in reheb’ li loq’laj hu chiru kok’ hu: Isaias 14:3; Isaias 25:8; Isaias 28:16; Mateo 11:28–30; 1 Korintios 15:53–57; Helaman 5:12. K’eheb’ li hu reheb’ li kok’al ut patz’ reheb’ naq te’xtz’iib’a chiru eb’ li yaal neke’xtzol sa’eb’ li raqal a’an ut naq te’k’anjelaq sa’ komonil re xsik’b’aleb’ chik li raqal li neke’xk’ut ajwi’ li yaal a’an. Jo’ neke’xye li raqal a’an, k’a’ru li xninqal k’a’aq re ru xb’aanuhom li Qaawa’ choq’ qe?

• Patz’ reheb’ li kok’al naq te’xsik’ junaq ch’ol aatin sa’ Isaias 14:3; 25:8; malaj 28:16 li tixjultika li Jesukristo reheb’. Patz’ reheb’ naq te’xtz’iib’a li ch’ol aatin a’an chiru jun li hu ut te’xyiib’ xjalam-uuch li Kolonel li naru neke’xk’e chi kutankil sa’ kab’l.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xtz’iib’a chiru jun ch’ina hu jun na’leb’ xe’xtzol anajwan, malaj ut, te’xyiib’ xjalam-uuch. Waklesi xch’ooleb’ chixwotzb’al a’an rik’ineb’ lix junkab’al malaj rik’in junaq chik ch’ina al ink’a’ xwulak sa’ li tzoleb’aal anajwan.

Xkawresinkil qib’ jo’ aj k’utunel

Oksiheb’ li kok’ k’anjel re xk’eeb’aleb’ chi tz’aqonk li kok’al wankeb’ xpaaltil. Lix sik’b’al chan ru roksinkileb’ li kok’ k’anjel naru natenq’an re naq chixjunileb’ li kok’al te’tzoloq. Qayehaq, wi junaq li ch’ina k’anjel naxye naq taak’ut jun jalam-uuch, naru teeb’icha jun li b’ich na’aatinak chirix ajwi’ a’an re naq te’tz’aqonq li kok’al ink’a’ neke’ilok.