Lix yaab’ xkux li profeet aj Jeremias, re jun tz’iib’ahom xb’aan li Escuela Nazarena

17–23 octubre

Jeremias 30–33; 36; Lamentaciones; 3

“Tinsutq’isi lix rahilaleb’ choq’ sahilal”

Maare ch’a’ajaq chiruheb’ li kok’al xtawb’al ruheb’ li hu Jeremias ut Lamentaciones, a’b’an naru neke’xtzol kok’ na’leb’ neke’k’utman sa’eb’ li hu a’an. K’a’ru nakaweek’a naq tento taawotz?

Tz’iib’a li nakak’oxla

Xkanab’ankileb’ chi wotzok

Numsi jun Santil Hu sa’ xyanqeb’ li kok’al. Naq te’xchap li hu, patz’ reheb’ naq te’xwotz junaq na’leb’ nawulak chiruheb’ sa’ li Najter Chaq’rab’, maare junaq na’leb’ malaj junaq seraq’ xe’xtzol sa’ kab’l malaj sa’ li iglees.

Xk’utb’al li tzol’leb’: Kok’al toj ka’ch’ineb’ xyu’am

Jeremias 31:3

Li qaChoxahil Yuwa’ ut li Jesus nikine’xra.

Reek’ankil lix “rahom wank chi junelik” li qaChoxahil Yuwa’ ut li Jesukristo tixtenq’aheb’ li kok’al chi nach’ok rik’ineb’ a’an.

Kok’ k’anjel naru chi b’aanumank

• K’ut chiruheb’ li kok’al junjunq k’a’aq re ru (malaj xjalam-uucheb’) li neke’b’ay k’iila chihab’ ut li ink’a’ neke’b’ay, maare junaq tumin malaj junaq ru che’. Patz’ reheb’ b’ar wan reheb’ a’an nab’ay chi us, ut tz’ilomaq rix k’a’ut naq wan neke’b’ay ut wan li ink’a’ neke’b’ay. Yaab’asi Jeremias 31:3, ut tenq’aheb’ li kok’al chixtawb’al ru naq lix rahom li qaChoxahil Yuwa’ ut li Jesukristo choq’ reheb’ “nawan chi junelik.”

• Patz’ reheb’ li kok’al naq te’xwotz chan ru naq “neke’uxtaanaak ru” xb’aan li qaChoxahil Yuwa’ ut li Jesukristo (Jeremias 31:3). Re xk’eeb’aleb’ xna’leb’, b’ichahomaq jun li b’ich li na’aatinak chirix lix rahom a’an choq’ qe, maare “Ninnaw naq raab’ilin” malaj “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 42–43, 16–17). Wi naru, k’uteb’ xjalam-uuch li naxye li b’ich. K’a’ru naqeek’a naq naqak’oxla lix rahom li qaChoxahil Yuwa’ ut li Jesukristo?

Li loq’laj hu naru tooxmusiq’a chixjalb’al qak’a’uxl ut chixsik’b’al li Qaawa’.

Jeremias 36:1–4

Eb’ li loq’laj hu a’an raatin li Dios.

Li Qaawa’ kixye re laj Jeremias naq tixtz’iib’a li raatin, ut li k’a’ru kixtz’iib’a li profeet natawman choq’ qe anajwan sa’ xhu laj Jeremias. Tenq’aheb’ li kok’al chixnimob’resinkil lix rahomeb’ chirixeb’ li loq’laj hu, b’ar wi’ naqataw li raatin li Dios.

Kok’ k’anjel naru chi b’aanumank

• Patz’ re junaq ch’ina al naq tixk’oxla naq a’an laj Jeremias ut patz’ reheb’ lix komon naq te’xk’oxla naq a’aneb’ laj Baruk. Tenq’a li ch’ina al nareetali laj Jeremias chixyeeb’al junjunq re li aatin wan sa’ Jeremias 36:3 ut eb’ lix komon li kok’al te’xpak’ tz’iib’ak, jo’ kixb’aanu laj Baruk. Ch’olob’ xyaalal naq eb’ li loq’laj hu wankeb’ qik’in anajwan a’an “raatin li Qaawa’ ” (Jeremias 36:4) li kixpatz’ reheb’ li profeet naq te’xtz’iib’a.

• K’e chi kutankil jun li hu reheb’ li kok’al ut jun loq’laj hu ut patz’ reheb’ li kok’al naq te’xch’olob’ k’a’ru xjalanileb’ li hu neke’ril. K’a’ut naq k’a’jo’ xchaq’aleb’ ru li loq’laj hu? Tenq’aheb’ li kok’al chixtawb’al ru naq eb’ li loq’laj hu a’aneb’ raatin li Dios tz’iib’anb’il xb’aaneb’ li profeet, jo’ lix hu laj Jeremias a’an li kixye li Dios re laj Jeremias naq tixtz’iib’a.

Jeremias 36:4–10

Naru ninwotz li yookin chixtzolb’al sa’eb’ li loq’laj hu.

Eb’ li kok’al naru neke’xmusiq’aheb’ li wankeb’ sa’ xsutam. Jo’ ajwi’ laj Baruk, naru neke’xwotz rik’ineb’ li ras riitz’in li yookeb’ chixtzolb’al sa’eb’ li loq’laj hu.

Kok’ k’anjel naru chi b’aanumank

• Patz’ reheb’ li kok’al naq te’reek’asi rib’ rik’ineb’ li aatin yooqat chirilb’al ru laa’at sa’ Jeremias 36:4–10, maare te’xpak’ naq yookeb’ chixtz’iib’ankil jun li hu (chi’ilmanq li raqal 4), maare te’xpak’ naq wankeb’ sa’ tz’alam (chi’ilmanq li raqal 5) ut te’xyaab’asi li loq’laj hu reheb’ li tenamit (chi’ilmanq li raqal 8, 10). Jultika naq laj Baruk kiwan xkawil xch’ool chixyaab’asinkil li raatin laj Jeremias reheb’ li kristiaan us ta eb’ laj jolominel re Jerusalen ink’a’ ke’raj naq tixb’aanu. Tenq’aheb’ li kok’al chixjultikankil junaq na’leb’ xe’xtzol sa’ li Najter Chaq’rab’ ut te’xk’oxla chan ru naq te’xwotz rik’ineb’ li ras riitz’in.

• B’ichahomaq jun li b’ich na’aatinak chirix li loq’laj hu, maare “Tintzol, tink’oxla, tintijoq” (B’ichleb’aal choq’ reheb’ li Kok’al, 66). Wotz lix nawom aach’ool chirixeb’ li loq’laj hu ut waklesi xch’ooleb’ li kok’al chixb’aanunkil ajwi’ a’an.

Xk’utb’al li tzol’leb’: Kok’al ak ninqeb’

Jeremias 31:31–34; 32:38–41

Naru tinpaab’ lin sumwank rik’in li Dios.

Lix k’utum laj Jeremias chirix li ak’ ut junelik sumwank re li Qaawa’ naru naxtenq’aheb’ li kok’al chixkawob’resinkil li rajomeb’ chixpaab’ankil li sumwank ak xb’aanuhomeb’.

Kok’ k’anjel naru chi b’aanumank

• Yiib’ jun aamej chiru li pizarron ut patz’ reheb’ jun jachal li kok’al naq te’ril Jeremias 31:31–34 ut li jun jachal chik te’ril Jeremias 32:38–41. Patz’ reheb’ li junjunq chi ch’uut naq te’xtz’iib’a sa’ li aamej li k’a’aq re ru neke’xtzol sa’eb’ li raqal chirix li qasumwank rik’in li Dios. K’a’ru xjalanil naq taawanq chi tz’iib’anb’il lix chaq’rab’ li Dios sa’ li qaam (chi’ilmanq Jeremias 31:33) rik’in ka’ajwi’ rilb’aleb’ li loq’laj hu? K’a’ut naq naqaj ok sa’ sumwank rik’in li Qaawa’? K’a’ut naq a’an naraj ok sa’ sumwank qik’in laa’o?

• Re xjultikankil li sumwank naqab’aanu naq nakub’e qaha’, patz’ reheb’ li kok’al chixiyiib’ankil jun kaaxukuut chi jachjo ru chi wiib’ sa’ jun li hu ut tz’iib’anb’ilaq sa’ li junjunq chi jachal Lin yeechi’ihom ut Xyeechi’ihom li Dios. Patz’ reheb’ naq te’xnujob’resi li kaaxukuut rik’in roksinkil li raqal “El convenio bautismal” sa’ li perel “Bautismo” sa’ Temas del Evangelio (topics.ChurchofJesusChrist.org) malaj Mosiah 18:10, 13; Tzol’leb’ ut Sumwank 20:37. Patz’ reheb’ li kok’al chixk’eeb’al li hu chi kutankil sa’ rochocheb’ re naq te’xjultika xpaab’ankileb’ li sumwank okenaqeb’ wi’.

Jeremias 36

Eb’ li loq’laj hu a’an raatin li Dios.

Li seraq’ natawman sa’ Jeremias 36 naru naxtenq’aheb’ li kok’al chi tzolok chirixeb’ li kristiaan ke’xk’ulub’a li raatin li Qaawa’ sa’eb’ li loq’laj hu.

Kok’ k’anjel naru chi b’aanumank

• Tz’iib’aheb’ li patz’om a’in chiru li pizarron: K’a’ut? Ani ke’oxloq’ink re li loq’laj hu? Ani ink’a’ ke’oxloq’ink re li loq’laj hu? Ilomaq Jeremias 36:1–3 sa’ komonil, ut patz’ reheb’ li kok’al k’a’ut naq li Qaawa’ kiraj naq laj Jeremias tixtz’iib’a li raatin. Chirix a’an patz’ reheb’ naq te’k’anjelaq sa’ ka’kab’il re te’ril Jeremias 36:5–8, 20–25 ut te’xk’e reetal ani ke’oxloq’ink re li loq’laj hu ut ani ink’a’. Wotz k’a’ut naq nakawoxloq’iheb’ li loq’laj hu laa’at. Wotz jun raqal malaj seraq’ reheb’ li loq’laj hu li wan xyaalal choq’ aawe. Patz’ reheb’ li kok’al naq te’xwotz ajwi’ li reheb’.

• Patz’ reheb’ li kok’al naq te’roksi li perel re kok’ k’anjel re li xamaan a’in re te’xtzol chan ru naru te’xwotz li seraq’ re Jeremias 36 reheb’ li ras riitz’in. Patz’ reheb’ naq te’xwotz xnawom xch’ooleb’.

Lamentaciones 1:1–2, 16; 3:22–26

Li Kolonel kixk’e chi uxmank naq tink’ul xkuyb’aleb’ lin maak.

Jo’ naxye li hu Lamentaciones chi utz’u’ujinb’il ru, wan naq naraho’ qach’ool naq nokomaakob’k. Eb’ li eek’ahom a’an naru nokohe’xmusiq’a chi jalaak ut chixpatz’b’al xkuyb’al qamaak chiru li qaChoxahil Yuwa’.

Kok’ k’anjel naru chi b’aanumank

• Ch’olob’ chiruheb’ li kok’al naq xb’aan naq eb’ laj Israelita ink’a’ ke’xjal xk’a’uxl, Jerusalen ut li santil ochoch ke’sache’. Patz’ reheb’ naq te’xye k’a’ raj ru ke’reek’a wi ta ke’wan chaq Jerusalen sa’ li kutankil a’an. Ilomaq Lamentaciones 1:1–2, 16. K’a’ chi aatinul ut ch’ol aatin reheb’ li raqal a’an nokohe’xtenq’a chixtawb’al ru k’a’ ta wi’ ru ke’reek’a laj Israelita? Chan ru naq li aatin wan sa’ Lamentaciones 3:22–26 maare kixk’e royb’enihomeb’?

• Patz’ reheb’ li kok’al naq te’xk’oxla junaq hoonal b’ar wi’ kiraho’ xch’ooleb’ xb’aan naq ink’a’ us li ke’xb’aanu. K’a’ru neke’xtaw sa’ Lamentaciones 3:22–26 li natenq’ank reheb’ chixnawb’al naq li Qaawa’ wan xch’ool chixkuyb’al xmaakeb’?

Xb’oqb’aleb’ chi tzolok sa’ kab’l

B’oqeb’ li kok’al chixpatz’b’al reheb’ li komon sa’ lix junkab’aleb’ naq te’xwotz xnumsihomeb’ chirix li na’leb’ xe’xtzol sa’ li tzoleb’aal. Wi xex’aatinak chirix li loq’laj hu, eb’ li kok’al naru neke’xpatz’ reheb’ li komon sa’ lix junkab’aleb’ naq te’xwotz chan ru neke’xnaw naq tz’aqal yaaleb’ li loq’laj hu.

Xkawresinkil qib’ jo’ aj k’utunel

Sik’ chan ru tatk’utuq re naq eb’ li kok’al te’ab’inq. Maare aajelaq ru naq taak’oxla chan ru naru taak’eheb’ chi ab’ink li kok’al toj ka’ch’ineb’ xyu’am. Oksiheb’ jalam-uuch, b’ich, b’atz’unk, ut wank chik xkomon li kok’ k’anjel.