li Jesus naxb’eresiheb’ li karneer

Kim, Taaqehin, xb’aan laj Scott Sumner

24–30 octubre

Esekiel 1–3; 33–34; 36–37; 47

“Tink’e eere jun ak’ musiq’ej”

Moko taatz’aqloq ta aahoonal re xk’utb’al chixjunil li na’leb’ natawman sa’ Esekiel. Sik’ aab’eresinkil rik’in li Musiq’ej re naq taanaw k’a’ru taajayali wi’ aawib’ ut k’e xb’oqb’aleb’ li kok’al chi tzolok sa’ rochocheb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Patz’ reheb’ junjunq li kok’al naq te’xyiib’ xjalam-uuch junaq na’leb’ xe’xtzol sa’eb’ li loq’laj hu toje’. Lix komoneb’ chik li kok’al te’xq’ehi k’a’ru yookeb’ chixyiib’ankil sa’ jalam-uuch.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Esekiel 3:17

Eb’ li profeet neke’xye resil li xiwxiw qe.

Laj Esekiel kixye resil li xiwxiw li ink’a’ ke’ru chirilb’al laj Israelita. Tenq’aheb’ li kok’al chixk’eeb’al reetal chan ru naq eb’ li profeet re li qakutankil neke’xye resil li xiwxiw qe.

Kok’ k’anjel naru chi b’aanumank

• Yaab’asi reheb’ li kok’al li kixye li Qaawa’ re laj Esekiel sa’ Esekiel 3:17. Patz’ reheb’ naq te’reek’asi rib’ a’ yaal chan ru neke’xye li aatin, jo’ xk’utb’al li xsa’ uhej, li xik, ut li ehej naq taayaab’asi li aatin “k’aak’alenel,” “taawab’i,” ut “xtz’uumal e.”

• K’ameb’ xb’e li kok’al sa’ jun b’eek sa’ li tzoleb’aal. Ye resil li xiwxiw li taak’oxla naq maare te’xtaw sa’ li b’e, jo’ li roq ha’ li tento te’pisk’oq wi’, li ruq’ li che’ li tento te’xxulub’ wi’ rib’ re nume’k, ut li xul tento te’xk’e reetal. K’e xhoonaleb’ li kok’al re naq te’k’amoq b’e. Ch’olob’ chan ru naq li profeet naxye resil li xiwxiw qe li ink’a’ nokoru chirilb’al.

• K’ut jun xjalam-uuch li profeet re li qakutankil naq teeb’icha jun li b’ich na’aatinak chirix li profeet, maare lix raqik li b’ich “Jun li profeet” (B’ichleb’aal choq’ reheb’ li Kok’al, 58–59). Ch’olob’ chiruheb’ li kok’al k’a’ut naq li profeet a’an chanchan jun aj k’aak’alehom aawe.

Esekiel 37:15–19

Eb’ li loq’laj hu nikine’xtzol chirix li Jesukristo.

Laj Esekiel kixjuntaq’eeta laj Israel rik’in wiib’ li che’ li neke’wulak choq’ jun ajwi’. Eb’ li che’ a’an neke’reetali ajwi’ li Santil Hu ut lix Hu laj Mormon, li neke’xch’olob’ xyaalal li Kristo.

Kok’ k’anjel naru chi b’aanumank

• K’e reheb’ junjunq li kok’al lix Hu laj Mormon; ut reheb’ xkomon chik li kok’al k’e li Santil Hu. Re xk’osb’al ru Esekiel 37:15–19, ch’olob’ naq li Qaawa’ kixye re laj Esekiel naq taatz’iib’aq chiru wiib’ li che’ li neke’reetali li Santil Hu ut lix Hu laj Mormon. Yaab’asi li raqal 17 ut patz’ reheb’ li kok’al naq te’xtaw junaq ch’ina al li wan junaq xloq’laj hu jalan chiru li wankeb’ re a’an ut “te’xjunaji” re naq “junajaq aj chik chi che’ sa’ ruq’eb’.” Wotz chan ru naq li Santil Hu ut lix Hu laj Mormon nokohe’xtenq’a chixkawob’resinkil li qapaab’aal chirix li qaChoxahil Yuwa’ ut li Jesukristo.

• Rik’in roksinkileb’ jalam-uuch re Hu reheb’ li Jalam-uuch re li Evangelio malaj li hu re Kim, Taaqehin re li chihab’ xe’nume’, tenq’aheb’ li kok’al chixwotzb’al junjunq seraq’ chirix li Jesus sa’ li Santil Hu ut sa’ lix Hu laj Mormon. Patz’ reheb’ naq te’xwotz k’a’ut naq neke’xb’antioxiheb’ li wiib’ chi loq’laj hu a’an.

li chaqi ch’och’ ut li Palaw Kamenaq

Laj Esekiel kiril sa’ k’utb’esinb’il matk’ jun li nima’ li ki’el chalen chaq rik’in li santil ochoch ut kixk’irtesi li Palaw Kamenaq.

Esekiel 47:1–12

Sa’ li santil ochoch neke’el chaq xninqal ru osob’tesiik.

Li k’utb’esinb’il matk’ kiril laj Esekiel b’ar wi’ jun aj k’irtesinel ha’ na’el chaq sa’ li santil ochoch naru naxtenq’aheb’ li kok’al chixtzolb’al naq eb’ li santil ochoch neke’rosob’tesi qayu’am.

Kok’ k’anjel naru chi b’aanumank

• K’ut chiruheb’ li kok’al jun sek’ li ha’. Chan ru naq nokorosob’tesi li ha’? Wotz lix k’utb’esinb’il matk’ laj Esekiel chirix li ha’ na’el chaq sa’ li santil ochoch (chi’ilmanq Esekiel 47:1–12). Oksi li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al (chi’ilmanq ajwi’ li video “Y el rio aumentará,” ChurchofJesusChrist.org). Aatinan rik’ineb’ li kok’al chirix li osob’tesiik nakak’ul laa’at, jo’ naq li nima’ kiril laj Esekiel, na’el chaq sa’ li santil ochoch.

• Kanab’eb’ li kok’al chixyiib’ankil xjalam-uucheb’ naq yookeb’ chi xik sa’ li santil ochoch. B’ichahomaq jun li b’ich li tixch’olob’ li rosob’tesihom li santil ochoch, maare “Taaruuq toowanq aran sa’ choxa” (B’ichleb’aal choq’ reheb’ li Kok’al, 98). K’a’ru naxk’ut chiqu li b’ich a’in chirix li rosob’tesihom li santil ochoch choq’ qe?

reetalil li k’utuk

Xk’utb’al li tzol’leb’: Kok’al ak ninqeb’

Esekiel 2:3–4; 3:7; 36:26–27

Li Jesukristo naru nikinixtenq’a chixjalb’al lin ch’ool.

Laj Esekiel kiroksi ch’ol aatin jo’ “ak’ ch’oolej” ut “ak’ musiq’ej” re xk’utb’al li jalaak naxb’aanu li Qaawa’ sa’ li qayu’am.

Kok’ k’anjel naru chi b’aanumank

• Patz’ reheb’ li kok’al naq te’xsik’ aatin chirixeb’ laj Israelita sa’ Esekiel 2:3–4; 3:7. Chirix a’an patz’ reheb’ naq te’ril Esekiel 36:26–27 re te’xsik’ chan ru naq li Qaawa’ kixyeechi’i xtenq’ankileb’ chi jalaak. K’a’ chi aatinul li “ak’ ch’oolej” ut li “ak’ musiq’ej” naxk’e qe a’an? (chi’ilmanq, Mosiah 3:19; 5:2).

• Patz’ reheb’ li kok’al naq te’xk’oxla k’a’ru maare neke’xb’aanu li kristiaan “jipeb’ xch’ool” malaj li “q’axal kaw lix jolomeb’ ” (Esekiel 2:4; 3:7). K’a’ raj ru te’xk’oxla wi ta taak’ehe’q xna’leb’ xb’aaneb’ lix na’ xyuwa’ malaj xb’aan li profeet? K’a’ raj ru te’xb’aanu naq wi ta te’ril junaq kristiaan wan rajom ru? Chan ru naq najala li qab’aanuhom naq li Kolonel naxq’unob’resi li qach’ool?

Esekiel 37:19–23

Li Santil Hu ut lix Hu laj Mormon nokohe’xtenq’a chi “ch’utub’aak” rik’in li Jesukristo.

Lix “che’ laj Juda” (li Santil Hu) ut lix “che’ laj Jose” (lix Hu laj Mormon) neke’k’anjelak sa’ wiib’al re xch’utub’ankil Israel rik’in li Kolonel (chi’ilmanq Esekiel 37:19).

Kok’ k’anjel naru chi b’aanumank

• Chap chi kutankil jun Santil Hu ut lix Hu laj Mormon, ut patz’ reheb’ li kok’al k’a’ut neke’xk’oxla naq chaab’il naq wankeb’ li hu a’an qik’in. Yaab’asi Esekiel 37:19 reheb’ ut ch’olob’ naq “lix che’ laj Jose” a’an lix Hu laj Mormon, li kitz’iib’aman xb’aaneb’ li ralal xk’ajol laj Jose re Egipto, ut naq “lix che’ laj Juda” a’an li Santil Hu, li kitz’iib’aman lix k’ihal xb’aaneb’ laj Judio. Chirix a’an ilomaqeb’ li raqal 21–23 ut 2 Nefi 3:12 ut tz’iib’ahomaq li osob’tesiik neke’k’ulman xb’aaneb’ li wiib’ chi hu a’an.

• K’e xjalam-uuch li Jesus sa’ xyi li tzoleb’aal ut patz’ reheb’ li kok’al chireek’asinkil lix chunleb’aaleb’ chire lix tz’akil li tzoleb’aal. Chirix a’an patz’ reheb’ naq te’roksi li K’utul Raqal reheb’ li Loq’laj Hu re naq te’xtaw raqal sa’ li Santil Hu ut sa’ lix Hu laj Mormon li neke’k’utuk chirix li Jesukristo (wi na’ajman ru, k’ut chiruheb’ chan ru xb’aanunkil). Chirix naq chixjunileb’ li kok’al te’xwotz junaq raqal re li loq’laj hu, patz’ reheb’ naq te’xnach’ob’resi lix chunleb’aaleb’ chixk’atq lix jalam-uuch li Jesus. B’aanu a’an toj reetal naq chixjunileb’ “te’ch’utub’aaq” wi’chik rik’in a’an.

Esekiel 47:1–12

Li rosob’tesihom li santil ochoch naru naxk’irtesi li aamej ut eb’ li junkab’al.

Li ha’ na’el chaq sa’ li santil ochoch sa’ lix k’utb’esinb’il matk’ laj Esekiel kixk’e xyu’am chixjunil li kinume’ wi’. Chi jo’kan ajwi’, li osob’tesiik na’el chaq sa’ li santil ochoch naru nokoxk’irtesi sa’ musiq’ej ut naru naxk’e qayu’am chi junelik.

Kok’ k’anjel naru chi b’aanumank

• Tz’iib’a chiru li pizarron junjunq aatin ut ch’ol aatin li naxk’am rib’ rik’in Esekiel 47:1–12, maare santil ochoch, nima’, yamyookil ch’och’, Palaw Kamenaq, k’iila kar ut che’ naxk’e li ru. Patz’ reheb’ li kok’al naq te’xsik’ ru junaq reheb’ li k’a’aq re ru a’an ut te’xyiib’ xjalam-uuch. Chirix a’an ilomaqeb’ sa’ komonil li raqal ut patz’ reheb’ li kok’al naq te’xwotz lix jalam-uucheb’ naq teeyaab’asi xk’ab’a’ li xe’xyiib’ xjalam-uuch. K’a’ chi osob’tesiik neke’chal chaq sa’ li nima’ sa’ li k’utb’esinb’il matk’ a’in? (chi’ilmanq li raqal 8–9, 12). Tenq’aheb’ li kok’al chixk’eeb’al reetal naq eb’ li osob’tesiik a’an chanchaneb’ li osob’tesiik neke’xyeechi’i li qaChoxahil Yuwa’ ut li Kolonel reheb’ li neke’xpaab’ lix sumwank re li santil ochoch.

• K’ut li video “Y el rio aumentará” (ChurchofJesusChrist.org). Malaj ut, ilomaq sa’ komonil li raatin li Elder Dale G. Renlund chirix lix k’utb’esinb’il matk’ laj Esekiel sa’ “Li k’anjel re li santil ochoch ut li resilal li junkab’al: Tz’ape’k sa’ junajil ut k’irtesink” (Jolomil ch’utub’aj-ib’ re abril 2018). Wotz rik’ineb’ li kok’al chan ru naq li santil ochoch ut li k’anjel re resilal li junkab’al neke’xk’e aawe lix k’irtesihom li Kolonel. Patz’ reheb’ naq te’xwotz li reek’ahomeb’ chirix li santil ochoch.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al junaq na’leb’ xe’xtzol anajwan ut junaq na’leb’ li neke’raj xtzolb’al chi us.

Xkawresinkil qib’ jo’ aj k’utunel

Xtenq’ankil li tzolok sa’ kab’l. “Jun reheb’ li na’leb’ tento taasik’ jo’ jun aj k’utunel, a’an xwaklesinkileb’ xch’ool li ani tzolb’ileb’ aab’an re te’xsik’ xna’leb’ li loq’laj hu—xjuneseb’ rib’ jo’ ajwi’ rik’in xjunkab’aleb’ ” (Li k’utuk jo’ li Kolonel, 36).

perel re kok’ k’anjel: Eb’ li loq’laj hu nikine’xtzol chirix li Jesukristo