Kim, Taaqehin, xb’aan laj Scott Sumner

24–30 octubre

Esekiel 1–3; 33–34; 36–37; 47

“Tink’e eere jun ak’ musiq’ej”

Laj Esekiel kib’oqe’ “chixtzekankil” li raatin li Dios—naq tixnujob’resi rib’ rik’in (chi’ilmanq Esekiel 2:9–3:3, 10). Chan ru taanujob’resi aawib’ rik’in li raatin li Dios chiru li xamaan a’in?

Tz’iib’a li nakak’oxla

Laj Esekiel, kiwan jo’ profeet sa’ preexil. Rochb’een lix komoneb’ aj Israelita, kichape’ ut kitaqlaak aran Babilonia wiib’ oxib’ chihab’ ma kisachman li tenamit Jerusalen. Sa’ Jerusalen, laj Esekiel kik’anjelak raj jo’ tij sa’ li santil ochoch. Sa’ Babilonia, “kiwulak wankeb’ wi’ li rech tenamitul” sa’ preexil, ut “kihilan sa’ xyanqeb’ ” (Esekiel 3:15), k’iila cient kiloom xnajtil rik’in li santil ochoch, ut maak’a’ xyo’onihom naq taaq’ajq sa’ lix santil ochoch li Dios. A’b’an, sa’ jun kutan laj Esekiel kiril jun k’utb’esinb’il matk’. Kiril “lix loq’al li Qaawa’ ” (Esekiel 1:28)—moko wan ta aran sa’ li santil ochoch sa’ Jerusalen, wan b’an aran Babilonia sa’ xyanqeb’ aj preex. Kixtzol naq k’a’jo’ xnimal li maa’usilal sa’ Jerusalen, jo’kan naq li Dios ink’a’ chik kiwan aran (chi’ilmanq Esekiel 8–11; 33:21).

Jun xk’anjel laj Esekiel, a’an xtijb’aleb’ laj Israelita chirix lix q’ajkamunkil lix po’jikeb’ xch’ool—jun tijom li moko ke’rab’i ta. A’ut kiwan xkomon chik sa’ li raatin laj Esekial: a’an kixye naq, us ta xnimal lix maakeb’, toj te’ruuq chi q’ajk. Wi lix tenamit li Dios “te’rab’i li raatin li Qaawa’ ” (Esekiel 37:4), li k’a’ru sachso truuq taa’ak’ob’resiiq wi’chik. “Jun ak’ ch’oolej” truuq taak’ehe’q sa’ xna’aj “lix kawil xjolomeb’ ” (Esekiel 36:26). “Twoksi lin musiq’ eerik’in,” chan li Qaawa’ reheb’, “ut texyo’yooq” (Esekiel 37:14). Ut sa’ roso’jikeb’ li kutan, li Qaawa’ tixxaqab’ jun ak’ santil ochoch ut jun ak’ Jerusalen, “ut chalen sa’ li kutan a’an li tenamit tixk’ab’a’in: Li Qaawa’ wank arin” (Esekiel 48:35).

Li na’leb’ re xtzolb’aleb’ li loq’laj hu aajunes

Esekiel 1–3

“Taaye reheb’ li waatin.”

Li resil lix b’oqb’al chi k’anjelak laj Esekiel sa’ Esekiel 1–3 maare tatxk’e chi k’oxlak chirix laa b’oqb’al xb’aan li Dios “chixyeeb’al li k’a’ru xye aawe” re anihaq (Esekiel 3:4). Sa’ Esekiel 2–3, k’e reetal li raatin re xk’ojob’ankil xch’ool ut xk’eeb’al xna’leb’ laj Esekiel. Maare ink’a’ po’jenaq xch’ooleb’ li kristiaan nakatk’anjelak wi’ jo’ xtenamit laj Esekiel, a’b’an k’e reetal chan ru naq li kixye li Dios re laj Esekiel naxjal chan ru nakawil laa k’anjel sa’ li Iglees, sa’ laa wochoch, ut b’araq chik.

Chi’ilmanq ajwi’ Esekiel 33:1–9; D.Todd Christofferson, “Li xyaab’ kuxej re tije’k,” Jolomil ch’utub’aj-ib’ re abril 2017.

Esekiel 33:10–19

Li Qaawa’ naraj naq tinkuyuq maak.

“Oso’jenaqo sa’ li maak,” ke’xye laj Israelita, “chan ta chik ru naq tookole’q?” (Esekiel 33:10). Re xsumenkileb’, li Qaawa’ kixk’ut chiruheb’ li xninqal ru na’leb’ chirix li jalb’a-k’a’uxlej ut li kuyuk maak. Eb’ li patz’om a’in naru tate’xtenq’a chixk’oxlankileb’ li na’leb’ a’an:

• K’a’ru naraj naxye “kole’k xb’aan li chaab’ilal xb’aanuhom chaq”? (chi’ilmanq Esekiel 33:12–13).

• K’a’ raj ru taaye re li ani nareek’a naq moko tiik ta li xb’aanuman re li winq tiik xch’ool ut li winq ink’a’ us xna’leb’ sa’ Esekiel 33:12–19? (chi’ilmanq ajwi’ Mateo 21:28–31; Lukas 18:9–14).

• Ma wan li aatin sa’eb’ li raqal a’in li nakatxtenq’a chixtawb’al ru k’a’ru naraj naxye xjalb’al qak’a’uxl? K’a’ chik ru nakataw sa’ Esekiel 36:26–27 ut Alma 7:14–16?

Esekiel 34

Li Qaawa’ nikinixb’oq chixch’olaninkileb’ lix karneer.

Sa’ Esekiel34, “aj k’aak’alenel” naxk’ab’a’iheb’ laj jolominel re lix tenamit xb’aan li Qaawa’. Naq yookat chirilb’al ru, k’oxla k’a’ru naraj naxye li aatin a’in chirix li jolomink. Aniheb’ li “karneer” naraj li Qaawa’ naq taach’olani? Chan ru taataaqe li Qaawa’ sa’ xb’aanuhom jo’ aj k’aak’alehom qe? (che’ilmanq li raqal 11–31).

Chi’ilmanq ajwi’ Jwan 21:15–17.

Laj Esekiel kiril sa’ k’utb’esinb’il matk’ jun li nima’ li ki’el chalen chaq rik’in li santil ochoch ut kixk’irtesi li Palaw Kamenaq

Esekiel 37

Li Qaawa’ yoo chixch’utub’ankil lix tenamit ut chixk’eeb’al li ak’ yu’am reheb’.

Na’eetaliman lix ch’utub’ankil Israel sa’ Esekiel 37 rik’in wiib’ li eetalil. Naq nakatzol li xb’een—xk’eeb’al wi’chik xyu’am li chaqi b’aq (che’ilmanq li raqal 1–14)—k’oxla k’a’ru nakatzol chirix xch’utub’ankil Israel li yo’yookeb’ jo’eb’ ajwi’ li kamenaqeb’ (chi’ilmanq Esekiel 36:24–30).

Li xkab’ eetalil (che’ilmanq li raqal 15–28) na’aatinak chirix wiib’ li che’. Naab’aleb’ aj tzolonel neke’xye naq a’aneb’ li perel che’ junajinb’ileb’ rik’in jun ch’ina sutleb’. Li perel che’ re Juda nareetali li Santil Hu (lix k’ihal li Santil Hu tz’iib’anb’il xb’aaneb’ li riyajil laj Juda), ut li perel che’ re Efrain nareetali lix Hu laj Mormon (lix junksb’al laj Lehi, a’aneb’ li riyajil laj Jose re Egipto). Rik’in a’an sa’ aak’a’uxl, k’a’ru neke’xk’ut li raqal a’in chawu chirix xk’anjeleb’ li loq’laj hu sa’ xch’utub’ankil Israel? K’a’ chik li na’leb’ nakataw sa’ 2 Nefi 3:11–13 (jun profeetil aatin chirix laj Jose Smith ut lix Hu laj Mormon)?

Chi’ilmanq ajwi’ 2 Nefi 29:14; “El Libro de Mormón recoge al Israel disperso” (video, ChurchofJesusChrist.org).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Esekiel 33:1–5.Re xk’utb’esinkil li wan sa’ li raqal a’in, jun komon naru taa’iloq sa’ ventaan chanchan jun “aj k’aak’alenel,” ut tixye re li junkab’al k’a’ru yoo chi k’ulmank chirix kab’l. Chan ru naq li qayo’yookil profeet chanchan aj k’aak’alenel choq’ qe?

Esekiel 33:15–16.K’a’ru neke’xk’ut li raqal a’in chiqu chirix lix kuyb’al li qamaak naru naqak’ul rik’in li Jesukristo?

Esekiel 36:26–27.Ch’olob’ chiru laa junkab’al k’a’ru naraj naxye “xkawil li jolomej.” Kanab’eb’ chixyeeb’aleb’ li aatin li neke’xch’olob’ li “ak’ ch’oolej” ut li “ak’ musiq’ej” li naxk’e li Kolonel qe (chi’ilmanq Mosiah 3:19; 5:2).

Esekiel 37:15–28.Jo’ junkab’al, naru teetaw wiib’ li che’ ut teetz’iib’a chiru jun Choq’ re Juda (Santil Hu), ut chiru li jun chik Choq’ re laj Jose (Lix Hu laj Mormon) (che’ilmanq li raqal 16–19). Toja’ naq teewotz li seraq’ malaj raqal sa’ li Santil Hu ut lix Hu laj Mormon li neke’tenq’ank eere chireek’ankil naq nach’ wankex rik’in li Kolonel ut naq wankex jo’ “lix tenamit” (raqal 23).

Esekiel 47:1–12.Eb’ li raqal a’in neke’xye resil lix k’utb’esinb’il matk’ laj Esekiel chirix li nima’ li na’el chalen chaq rik’in li santil ochoch ut naxk’irtesi li Palaw Kamenaq—jun palaw li k’a’jo’ xk’ihal li ratz’am, jo’kan naq maajun kar maajun q’een wan chi sa’. Maare li kok’al te’raj xyiib’ankil xjalam-uuch li k’utb’esinb’il matk’ a’in. K’a’ru nareetali li nima’ li na’el chalen chaq rik’in li santil ochoch? (chi’ilmanq li video “Y el río aumentará,” ChurchofJesusChrist.org). Chan ru naq li santil ochoch nokoxk’irtesi? (chi’ilmanq Esekiel 47:8–9, 11).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Saʼ raam laj Ilol KarneerEb’ li B’ich, 142.

Xkawresinkil qib’ jo’ aj k’utunel

Ink’a’ na’ajman ru xk’utb’al chixjunil. Maare ink’a’ naru taatz’il rix chixjunil li wan sa’ Esekiel rik’in laa junkab’al. Patz’ re li Musiq’ej naq tatxtenq’a chixnawb’al k’a’ru taak’ut. (Chi’ilmanq Li k’utuk jo’ li Kolonel, 7.)

“Rub’el li okeb’aal yoo chi elk li ha’. … A’ yaal b’ar toxwulaq li roq ha’ a’in, taawanq xyu’am li k’iila paay chi xul” (Esekiel 47:1,9). Xliceens li jalam-uuch, a’an re shutterstock.com.