“31 octubre–6 noviembre. Daniel 1–6: “Maak’a’ chik junaq Dios taaruhanq chi kolok,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)

“31 octubre–6 noviembre. Daniel 1–6,” Kim, Taaqehin—Choq’ reheb’ li komon ut li junkab’al: 2020

Jalam-uuch

laj Daniel naxtaw xyaalal lix matk’ li rey

Laj Daniel naxtaw xyaalal lix matk’ laj Nabukodonosor, xb’aan laj Grant Romney Clawson

31 octubre–6 noviembre

Daniel 1–6

“Maak’a’ chik junaq Dios taaruhanq chi kolok”

Li Elder Richard G. Scott kixye naq xtz’iib’ankil li k’utb’esinb’il na’leb’ “naxk’ut chiru li Dios naq naqak’e xloq’al li na’leb’ naxk’e qe. Xtz’iib’ankil li k’utb’esinb’il na’leb’ tixk’e ajwi’ naq taajultiko’q qe” (“Cómo obtener revelación e inspiración en tu propia vida,” Liahona, mayo 2012, 46).

Tz’iib’a li nakak’oxla

Maare maajun tixyeechi’i aakutb’al sa’ li k’atleb’aal malaj sa’ xna’ajeb’ li kaqkojl xmaak aapaab’aal chirix li Jesukristo A’b’an, maajun qe naxnumsi xyu’am chi maak’a’ xyalb’al rix lix paab’aal. Naru taqataw qana’leb’ rik’in lix b’aanuhom laj Daniel, laj Sidrak, laj Misak, ut laj Abednego, li ke’k’ame’ chi preexil naq toj saajeb’ xb’aan li nimla tenamit Babilonia (chi’ilmanq 2 Reyes 24:10–16). Eb’ li saaj winq a’in ke’sute’ rix xb’aan jun ak’ tenamit jalaneb’ xna’leb’, ut ke’aaleek chixkanab’ankil lix paab’aaleb’ ut li tiikil na’leb’ k’utb’il chiruheb’. A’b’anan, ink’a’ ke’xkanab’ xpaab’ankileb’ lix sumwank. Jo’ laj Jose re Egipto ut li xEster sa’ Persia, laj Daniel ut eb’ li ramiiw sa’ Babilonia ke’xpaab’ li Dios, ut li Dios kixk’anjelaheb’ li sachb’a-ch’oolej li toj neke’xtoch’ xch’ooleb’ laj paab’anel sa’ li kutan a’in.

Chan ru naq ke’xk’ul xkawilaleb’ xch’ool chi kaanak chi tiikeb’ chi paab’ank? Ke’xb’aanu li kok’ k’anjel naxpatz’ li Dios naq taqab’aanu chiqajunilo—tijok, kuyuk sa’, xsik’b’al chaab’il amiiw, xpaab’ankil li Dios, ut xwotzb’al li qasaqen rik’ineb’ li qas qiitz’in. Naq kawob’resinb’ilo xb’aan xb’aanunkil li kok’ k’anjel a’in, naru taqak’uleb’ li kaqkojl ut li k’atleb’aal re li qayu’am rik’in paab’aal.

Re xtzolb’al k’a’ru wan sa’ li hu Daniel, chi’ilmanq “Daniel” sa’ li K’utul Raqal reheb’ li Loq’laj Hu.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Daniel1; 3; 6

Naru ninpaab’ li Qaawa’ naq yalb’il rix inpaab’aal.

Chanchan naq chiqajunilo wanko sa’ Babilonia. Li ruchich’och’ nujenaq rik’in li aaleek re xq’etb’al li qachaq’rab’ ut xtz’eqtaanankil li qapaab’aal chirix li Jesukristo. Naq nakawil Daniel 1, 3, ut 6, k’e reetal chan ru naq laj Daniel, laj Sidrak, laj Misak, ut laj Abednego ke’reek’a naq minb’ileb’ ru chixb’aanunkil li k’a’ru ke’xnaw naq ink’a’ us. Ma wan jo’q’e naq xaweek’a naq minb’il aawu chixq’etb’al li nakapaab’? K’a’ru nakatzol rik’ineb’ li winq a’in li naru tatxtenq’a chixpaab’ankil li Qaawa’ us ta yalb’il aawix?

Lix hu laj Daniel ut xkomoneb’ chik li loq’laj hu neke’xye resil li nimla paab’aal li kixk’e chi uxk li ninqi sachb’a-ch’oolej. A’b’an, k’a’ru taqab’aanu wi li qapaab’aal ink’a’ naxk’e chi uxk li ninqi sachb’a-ch’oolej li naqaj? (chi’ilmanq, Alma 14:8–13). A’ yaal li nakawil sa’ Daniel 3:13–18, chan raj ru naq laj Sidrak, laj Misak, ut laj Abednego ke’xsume li patz’om a’in? Chan ru naq lix b’aanuhomeb’ naru tatxtenq’a sa’ lix yalb’al rix aapaab’aal? Re xtzolb’al xkomon chik chirixeb’ li raqal a’in, chi’ilmanq li raatin li Elder Dennis E. Simmons “Y si no…” (Liahona, mayo 2004, 73–75).

Lix hu laj Daniel naxk’ut ajwi’ chan ru naq lix tiikilal junaq naru tixnimob’resi xpaab’aaleb’ jalaneb’ chik. B’ar wan reetalil li na’leb’ a’in sa’ eb’ li ch’ol 1, 3, ut 6? K’oxla lix wankilal laa b’aanuhom sa’ xyu’ameb’ laa was aawiitz’in (chi’ilmanq Mateo 5:16).

Chi’ilmanq ajwi’ Dieter F. Uchtdorf, “Matxiwak, ka’ajwi’ naq wan aapaab’aal,” Jolomil ch’utub’aj-ib’ re octubre 2015, 76–79; David R. Stone, “Sión en medio de Babilonia,” Liahona, mayo 2006, 90–93.

Xjalam-uuch laj Daniel ut eb’ li ramiiw naq ke’xtz’eqtaana xtzakemq li rey, xb’aan laj Brian Call

Daniel 2

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an li rawa’b’ejihom li Dios sa’ ruchich’och’.

Chi k’utb’esinb’il chiru, laj Daniel kiril naq lix matk’ laj Nabukodonosor kixye resil li ruchich’och’il awa’b’ejihom li te’wanq, jo’ ajwi’ lix awa’b’ejihom li Dios, li “maajun wa taajuk’manq” (Daniel 2:44). Li Iglees, a’an ”li awa’b’ejihom a’an sa’ roso’jikeb’ li kutan,” kixye li Elder D. Todd Christofferson, “li ink’a’ yiib’anb’il xb’aan li winq, xaqab’anb’il b’an xb’aan lix Dios li Choxa, ut yoo chi tololnak jo’ jun pek “k’okb’il chaq sa’ li tzuul moko xb’aan ta uq’ej”, re xnujob’resinkil li ruchich’och’ ” (“K’a’ut naq wan li Iglees,” Jolomil ch’utub’aj-ib’ re octubre 2015). K’oxlan chirix lix awa’b’ejihom li Dios sa’ roso’jikeb’ li kutan naq nakawil lix ch’olob’ankil li pek sa’ Daniel 2:34–35, 44–45. K’a’ru nakawil rik’in li pek li chanchan li awa’b’ejihom? Chan ru naq lix awa’b’ejihom li Dios yoo chixnujob’resinkil li ruchich’och’ sa’ li kutan a’in?

Chi’ilmanq ajwi’ Gordon B. Hinckley, “La piedra cortada del monte,” Liahona, noviembre 2007, 83–86; L.Whitney Clayton, “Vendrá el día,” Liahona, noviembre 2011, 11–13.

Daniel 3:19–28

Li Kolonel tinixtenq’a sa’ lix yalb’al wix.

K’a’ru li na’leb’ nakak’ul naq nakawil resil li xkaa winq li kik’utun sa’ li k’atleb’aal rochb’een laj Sidrak, laj Misak, ut laj Abednego? Chan ru naq li seraq’ a’in naru tatxtenq’a sa’ lix yalb’al aawix? Naru taataw xkomon chik laa na’leb’ sa’ Mosiah 3:5–7; Alma 7:11–13; Tzol’leb’ ut Sumwank 61:36–37; 121:5–8.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Daniel 1–2.Naq nekeril Daniel 1 ut 2 jo’ junkab’al, naru teesik’ li osob’tesinb’ileb’ wi’ laj Daniel ut eb’ li ramiiw naq ke’xtz’eqtaana lix tzakemq ut lix viin li rey. (Chi’ilmanq li video “Dios les dio conocimiento,” ChurchofJesusChrist.org.) Naru taajuntaq’eetaheb’ li osob’tesiik a’an rik’in li naxyeechi’i qe li Qaawa’ naq naqapaab’eb’ lix taqlahom, jo’ li Aatin re Chaab’il Na’leb’ (chi’ilmanq Tzol’leb’ ut Sumwank 89:18–21). Chan ru naq li Qaawa’ nokorosob’tesi sa’ xyu’aminkil li Aatin re Chaab’il Na’leb’?

Daniel 3.Chan ru taatenq’a laa junkab’al chixtzolb’al li seraq’ sa’ Daniel 3? “Sadrac, Mesac, ut Abed-Nego” sa’ Relatos del Antiguo Testamento naru texxtenq’a. K’a’ru ke’xb’aanu laj Sidrak, laj Misak, ut laj Abednego li nawulak chiqu? K’a’ru li naqak’ul laa’o li naxyal rix li qapaab’aal ut naxpatz’ naq taqak’ut li qapaab’aal chirix li Dios?

Daniel 6:1–23.Maare taawulaq chiru laa junkab’al xk’utb’esinkil li seraq’ sa’ Daniel 6:1–23 (maare eb’ li raqal 10–12 malaj 16–23). K’a’ru naqatzol rik’in li kixb’aanu laj Daniel? K’a’ru naru taqab’aanu re naq chanchanaqo a’an?

Daniel 6:25–27.Jo’ naxye sa’eb’ li raqal a’in, chan ru naq kijala xna’leb’ li rey aj Dario naq li Qaawa’ kixkol laj Daniel chiruheb’ li kaqkojl? Naru ajwi’ teeril sa’ Daniel 2:47; 3:28–29 resil laj Nabukodonosor ut chan ru naq kijala ajwi’ xna’leb’ a’an. Chan ru naq taawanq qawankil chixjalb’aleb’ li qas qiitz’in? Aatinanqex chirix lix paab’aaleb’ li kristiaan, jo’ ajwi’ li komon sa’ lee junkab’al, li ke’ru chixchaab’ilob’resinkileb’ li ras riitz’in.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinpaab’ li evangelio,” B’ichleb’aal choq’ reheb’ li Kok’al, 72.

Xkawresinkil qib’ jo’ aj k’utunel

Taakʼut li tzolʼlebʼ. Lix evangelio li Qaawa’ ch’ina us xb’aan naq saqen ru (chi’ilmanq Tzol’leb’ ut Sumwank 133:57). Li aatinak chirix li tzol’leb’ naru tixb’oq li Musiq’ej chixk’amb’al li evangelio sa’ xch’ooleb’ laa junkab’al.