Li Yu’am Wa, xb’aan laj Chris Young

14–20 noviembre

Amos; Abdias

“Sik’omaq li Qaawa’ ut taawanq eeyu’am”

Li Santil Musiq’ej naru tixte laa k’a’uxl ut laa ch’ool re taak’ul li raatin li Dios li tz’aqal taak’anjelaq aawe. K’a’ru nakaweek’a naq li Dios naraj naq taatzol chiru li xamaan a’in?

Tz’iib’a li nakak’oxla

Li Dios kixsik’eb’ ru li ralal xk’ajol laj Israel choq’ re lix tenamit re sumwank re naq “osob’tesinb’ilaqeb’ ” chixjunil li kristiaan sa’ xk’ab’a’eb’ (chi’ilmanq Genesis 12:2–3). A’b’anan, naq kiwulak xq’ehil lix k’anjel laj Amos, naab’aleb’ sa’ li tenamit re sumwank yookeb’ chixtawasinkileb’ li neb’a’ ut chixtz’eqtaanankileb’ li profeet, chi jo’kan naq li loq’onink neke’xb’aanu maak’a’ xyaalal (chi’ilmanq Amos 2:6–16). Yaal ajwi’ naq ninqeb’ lix maakeb’ li tenamit chixsutameb’ (chi’ilmanq Amos 1; 2:1–5), a’b’an a’in ink’a’ kirisi xmaak lix tenamit li Dios (chi’ilmanq Amos 3:2). Chi jo’kan naq li Dios kixtaqla jun aj k’aak’alehom ketomq aj Juda, a’an aj Amos xk’ab’a’, re xjultikankil li jalb’a-k’a’uxlej chiru li Awa’b’ejihom re Israel. Moqon, li Dios kixye rik’in xtz’uumal re li profeet aj Abdias naq us ta sachb’il li Awa’b’ejihom re Juda, li Qaawa’ tixch’utub’ ut taarosob’tesi wi’chik lix tenamit. Li wiib’ chi profeet ke’xye naq us ta ke’sach xb’e li tenamit re sumwank chiru li Qaawa’, ink’a’ te’isiiq chi junelik. Naq li Dios naxk’utb’esi lix na’leb’ chiruheb’ lix moos, eb’ li profeet (chi’ilmanq Amos 3:7), a’an naxk’ut xyaalal naq toj naraj qatenq’ankil chixpaab’ankileb’ li sumwank okenaqo wi’ chaq rik’in a’an.

Re xtzolb’al k’a’ru wan sa’ lix hu laj Amos ut lix hu laj Abdias, chi’ilmanq “Amos” ut “Abdias” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Amos 3:1–8; 7:10–15

Li Qaawa’ naxk’utb’esi li yaal rik’in xtz’uumaleb’ reheb’ lix profeet.

Sa’ Amos 3:3–6, li profeet aj Amos kixk’ut wiib’ oxib’ li seraq’: naq li kaqkojl naxtaw xtzakemq, li kaqkojl nawo’te’ek; naq nak’eeman li ra’al re xchapb’al li xik’anel xul, nachape’ li xik’anel xul. Sa’eb’ li raqal 7–8, laj Amos naxjuntaq’eeta li na’leb’ a’in rik’ineb’ li profeet. K’a’ut naq jun li profeet naxye profeetil aatin? K’a’ chik ru nakatzol chirixeb’ li profeet naq yookat chirilb’al ru Amos 7:10–15? K’a’uxt naq nakab’antioxi naq li Qaawa’ toj naxk’utb’esi lix na’leb’ chiruheb’ lix moos, eb’ li profeet (chi’ilmanq Amos 3:7). K’a’ru naxk’ut li na’leb’ a’in chawu chirix li Dios?

Chi’ilmanq ajwi’ Tzol’leb’ ut Sumwank 1:38; 21:4–8; 35:13–14.

Amos 4–5

“Sik’omaq li Qaawa’ ut taawanq eeyu’am”

Naq nakawil Amos 4:6–13, k’e reetal li raqb’a-aatin kixk’e li Qaawa’ sa’ xb’een lix junkab’al laj Israel. K’a’ru neke’xye li raqal a’in chirix li kiraj li Qaawa’ naq taak’ulmanq chirixeb’ li raqb’a-aatin a’an? (chi’ilmanq ajwi’ Helaman 12:3). K’oxla jun xyalb’al aawix toje’ xanumsi. Maare maawa’ li Dios li kitaqlank re, a’b’an k’oxla chan ru naq lix yalb’al aawix truuq tatxtenq’a chixsik’b’al li Dios.

Il Amos 5:4, 14–15, ut k’oxla chan ru naq li Qaawa’ “naruxtaana aawu” (raqal 15) naq nakapatz’ xk’ab’a’ a’an, sa’ ajwi’ li ch’a’ajkilal.

Chi’ilmanq ajwi’ Donald L. Hallstrom, “Volverse al Señor,” Liahona, mayo 2010, 78–80.

Amos 8:11–12

Li raatin li Qaawa’ naru taarisi chaq li tz’okaak ut chaqi-eel sa’ musiq’ej.

Chiqajunilo nokonume’ chiru li tz’okaak ut chaqi-eel sa’ musiq’ej, a’b’an moko na’ajman ta naq “taqab’eeni qib’ chalen chire li palaw jun toj chire li jun chik” (Amos 8:12) re taqataw li taarisi a’an. Ak naqanaw k’a’ru taarisi li tz’okaak sa’ musiq’ej, ut osob’tesinb’ilo chi numtajenaq rik’in li raatin li Qaawa’. Naq nakawil Amos 8:11–12, k’oxla k’a’ut naq li we’ej nareetali chi us li yu’am chi maak’a’ li raatin li Dios. K’a’ chik ru li na’leb’ nakataw sa’ Mateo 5:6; Jwan 6:26–35; 2 Nefi 9:50–51; 32:3; Enos 1:4–8?

Chi’ilmanq ajwi’ Jeffrey R. Holland, “A los hambrientos colmo de bienes,” Liahona, enero 1998, 75–78; Temas del Evangelio, “Apostasía,” topics.ChurchofJesusChrist.org.

Noko’ok choq’ aj kolonel sa’ xb’een li Tzuul Sion naq naqab’aanu li k’anjel re li santil ochoch ut li resilal li junkab’al.

Abdias 1:21

Aniheb’ aj kolonel … sa’ xb’een li Tzuul Sion?

Li Awa’b’ej Gordon B. Hinckley kixye naq li aatin eb’ aj kolonel sa’ xb’een li Tzuul Sion maare yoo chi aatinak chirix li k’anjel re li santil ochoch ut li resilal li junkab’al: “[Sa’ li santil ochoch] noko’ok choq’ aj kolonel sa’ xb’een li Tzuul Sion. K’a’ru naraj naxye a’in? Jo’ naq laj Tojol qix kixk’e xyu’am choq’ mayej ruuchil chixjunileb’ li winq, ut chi jo’kan ki’ok choq’ laj Kolol qe, naq laa’o naqab’aanu li k’anjel chi uuchilej sa’ li santil ochoch, noko’ok choq’ aj kolol reheb’ li kamenaq li ink’a’ naru te’xik chi uub’ej wi ink’a’ b’aanunb’il xk’anjeleb’ xb’aaneb’ li toj yo’yookeb’ ” (“Comentarios finales,” Liahona, noviembre 2004, 105).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Amos 3:7.Naru teeril wiib’ oxib’ li aatin toje’ xye li Awa’b’ej re li Iglees, ut tex’aatinaq chirix li yoo chixk’utb’esinkil li Qaawa’ chiru lee junkab’al sa’ li raatin. K’a’ut naq aajel ru naq b’eresinb’il li Iglees xb’aan jun li profeet? Chan ru xqanaw naq a’an jun tz’aqal profeet? K’a’ru yooko chixb’aanunkil re xtaaqenkil lix na’leb’?

Amos 5:4.Maare taawulaq chiru laa junkab’al xtz’iib’ankil li raqal a’in chiru jun nimla perel re teet’uyub’ sa’ lee rochoch. K’a’ru naraj naxye xtaaqenkil li Qaawa’? Chan ru naqasik’? Chan ru nokorosob’tesi naq naqasik’? Naru taapatz’ re laa junkab’al naq te’xwotz ut te’aatinaq chirix xkomoneb’ chik li raqal chirix xsik’b’al li Qaawa’, maare Mateo 7:7–8; Eter 12:41; ut Tzol’leb’ ut Sumwank 88:63.

Amos 8:11–12.Li kok’al maare te’raj reek’asinkil rib’ re xk’utb’al li yeeb’il sa’eb’ li raqal a’in. Naq nokotz’okaak malaj nachaqik qe, k’a’ru naqab’aanu? Naq natz’okaak malaj nachaqik re li qamusiq’, k’a’ru naqab’aanu? Naru ajwi’ teeril li video “La Gran Apostasía” (ChurchofJesusChrist.org) ut teeye chan ru naq lix k’ojob’ankil wi’chik li evangelio narisi li tz’okaak sa’ qamusiq’.

Abdias 1:21.K’a’ru naraj naxye li wank choq’ aj kolonel sa’ xb’een li Tzuul Sion? (Re rilb’al jun xch’olob’ankil, chi’ilmanq li raatin li Awa’b’ej Gordon B. Hinckley in “Li na’leb’ re xtzolb’aleb’ li loq’laj hu aajunes.”) Ani reheb’ li qaxe’ qatoon neke’raj ru li k’ojob’anb’il k’anjel? K’a’ru taqab’aanu re xtenq’ankileb’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “B’antiox xaq aawe,” Eb’ li B’ich, 12.

Xkawresinkil aawib’ chi tzolok

Oksi li b’ich re xb’oqb’al chaq li Musiq’ej ut re xtzolb’al li tzol’leb’. Rab’inkil malaj rilb’al ru raatinul jun li b’ich naru tatxtenq’a chixtzolb’al li evangelio. Naru taawil malaj taawab’i li b’ich “B’antiox xaq aawe,” (Eb’ li B’ich, 12) re taanimanq laa paab’aal chirixeb’ li yo’yookil profeet. (Chi’ilmanq Li k’utuk jo’ li Kolonel, 22.)

li santil ochoch re Santo Domingo Republica Dominicana