Li Yu’am Wa, xb’aan laj Chris Young

14–20 noviembre

Amos; Abdias

“Sik’omaq li Qaawa’ ut taawanq eeyu’am”

Naq taajayali aawib’ chixk’utb’al li tzol’leb’ chi moko ch’a’aj ta, nakak’e xhoonal li Santil Musiq’ej naq tixch’olob’ xyaalal a’an reheb’ li kok’al. Oksiheb’ li kok’ k’anjel re li tusleb’ aatin a’in—malaj yoob’ laa we—re xk’utb’al li na’leb’ re li evangelio chi moko ch’a’aj ta.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz k’a’ru xe’xtzol toje’ sa’ kab’l malaj sa’ li iglees. Naru taapatz’ reheb’ ma xe’xtaw junaq ak’ raqal nawulak chiruheb’ sa’ li loq’laj hu malaj xe’rab’i junaq na’leb’ li neke’raj xwotzb’al sa’ li tzoleb’aal.

Xk’utb’al li tzol’leb’: Kok’al toj ka’ch’ineb’ xyu’am

Amos 3:7; 7:14–15

Eb’ li profeet a’aneb’ aj k’amol esil chirix li Jesukristo.

Jun na’leb’ aajel ru li naru neke’xnaw li kok’al, a’an naq eb’ li profeet a’aneb’ aj k’amol esil chirix li Jesukristo. Li na’leb’ wankeb’ arin naru nakate’xtenq’a chixk’utb’al chiruheb’ li kok’al li aajel ruhil na’leb’ a’in.

Kok’ k’anjel naru chi b’aanumank

• Hasb’a re jun reheb’ li kok’al jun esil choq’ reheb’ chixjunil li kok’al (maare taapatz’ reheb’ li kok’al naq te’xaqliiq rik’in jun ajwi’ li roqeb’ malaj naq te’xk’e jun li vuelt sa’ xna’ajeb’) ut patz’ re naq tixwotz li esil a’an rik’ineb’ li kok’al. K’iilasuti li ch’ina k’anjel a’an ut jalan jalanqeb’ chik li kok’al te’k’amoq re li esil. Tenq’aheb’ chixtawb’al ru naq li nak’amok re li esil sa’ li ch’ina k’anjel chanchan jun li profeet, li naxwotz qik’in li esil chirix li Dios. Wotz junjunqeb’ raatin li yo’yookil profeet li nakatxtenq’a chi nach’ok chi us rik’in li Jesukristo.

• Patz’ re jun ch’ina al naq taaxaqliiq chiruheb’ lix komon ut tixk’oxla naq a’an li profeet aj Amos. Naq yooqat chixwotzb’al junjunq li na’leb’ chirix laj Amos jo’ naxye sa’ Amos 7:14–15, k’e jalam-uuch malaj k’a’aq re ru re li ch’ina al chirix li k’a’ru yookat chirilb’al, maare xjalam-uuch junaq wakax, jun ru li che’, ut li Qaawa’. Ch’olob’ naq laj Amos a’an jun aj ilol wakax ut kib’oqe’ xb’aan li Qaawa’ re tixk’am li resilal. Chirix a’an k’uteb’ xjalam-uuch li Qaawa’ ut li yo’yookil profeet ut ch’olob’ naq li Qaawa’ toj naxb’oqeb’ ajwi’ aj k’amol esil sa’ li qakutankil. Yaab’asi Amos 3:7 ut patz’ reheb’ li kok’al naq te’xk’ut li jalam-uuch naq te’rab’i li aatin “Qaawa’ ” ut “profeet.” Wotz xnawom aach’ool naq, jo’ chaq sa’ xk’utankil laj Amos, li Jesukristo nokoraatina rik’ineb’ lix profeet.

• Wotz junaq seraq’ sa’eb’ li hu toje’ xe’puktesiman sa’ li Iglees chirix li yo’yookil profeet malaj chirix xnumsihom junaq komon re li Iglees naq naxtaaqe lix na’leb’ li profeet. (Chi’ilmanq ajwi’ “Conozca a los profetas y apóstoles actuales” sa’ ChurchofJesusChrist.org.)

• Naq eb’ li kok’al yooqeb’ chixk’anjelankil li perel re kok’ k’anjel re li xamaan a’in, b’ichahomaq malaj ab’ihomaq jun li b’ich na’aatinak chirixeb’ li profeet, maare “Jun li profeet” (B’ichleb’aal choq’ reheb’ li Kok’al, 58–59). K’uteb’ li ch’ol aatin chiruheb’ li kok’al li neke’xye chan ru naq eb’ li profeet neke’xk’ut lix b’e li Jesukristo chiqu.

Amos 5:14

Wi tinsik’ ru li us, li Qaawa’ taawanq wik’in.

Laj Amos kixb’oqeb’ laj Israelita “chixsik’b’al li chaab’ilal ut maawa’ li ink’a’ us” ut kixyeechi’i naq wi neke’xb’aanu “li Nimajwal Dios twanq eerik’in.” Chan ru taatenq’aheb’ li kok’al chixsumenkil li b’oqom a’an ut chixk’ulb’al li yeechi’ihom a’an?

Kok’ k’anjel naru chi b’aanumank

• K’eheb’ chi kutankil xjalam-uucheb’ kok’al naq neke’xb’aanu li k’a’ru chaab’il, maare naq neke’tenq’an malaj naq neke’xk’ul li loq’laj wa’ak. Patz’ reheb’ li kok’al naq sa’ junjunqal te’xch’olob’ jun reheb’ li jalam-uuch ut eb’ lix komon te’xq’ehi b’ar wan reheb’ li jalam-uuch naxch’olob’. Il Amos 5:14 ut tenq’aheb’ li kok’al chixk’oxlankil chan ru “te’xsik’ li chaab’ilal” wulaj wulaj.

• Patz’ reheb’ li kok’al naq te’xyiib’ xjalam-uucheb’ naq neke’xb’aanu li k’a’ru chaab’il. Yaab’asi Amos 5:14 ut jultika lix yeechi’ihom li Qaawa’ naq taawanq qik’in naq naqasik’ li chaab’ilal. Ye reheb’li kok’al naq te’xk’e chiru lix jalam-uuch xe’xyiib’ jun xjalam-uuch li Jesus.

Xk’utb’al li tzol’leb’: Kok’al ak ninqeb’

Li Qaawa’ naxk’utb’esi li yaal chiruheb’ lix profeet.

Amos 3:7

Eb’ li profeet a’aneb’ aj k’amol esil chirix li Jesukristo.

Amos 3:7 a’an jun xchaq’al ru raqal sa’ li loq’laj hu re xtenq’ankileb’ li kok’al chixk’eeb’al reetal naq wi naqab’i li profeet, yooko chirab’inkil jun aj k’amol esil chirix li Jesukristo.

Kok’ k’anjel naru chi b’aanumank

• Tenq’aheb’ li kok’al chixtzolb’al sa’ xk’a’uxleb’ chixjunil li raqal Amos 3:7 malaj jun raqalaq ajwi’. K’e junjunq k’asal reheb’ re naq te’ril li raqal k’iila sut ut laa’at taatz’iib’a chiru li pizarron jun li aatin re li ch’ol aatin ut jun ink’a’ taatz’iib’a. Patz’ reheb’ naq te’xtz’ap lix loq’laj hu ut te’xyaab’asi li raqal sa’ komonil, te’xtenq’a rib’ rik’in li tz’iib’anb’il chiru pizarron. Chirix a’an isi junjunq li aatin toj reetal naq eb’ li kok’al te’ruuq chixyeeb’al chixjunil li raqal chi ink’a’ te’ril. K’a’ru naxk’ut chiqu li raqal a’an chirixeb’ li profeet? Chan ru naq li qayo’yookil profeet nokoxtenq’a chixnawb’al k’a’ru naraj li qaKolonel naq taqab’aanu?

• Tz’iib’a naab’al li patz’om chirixeb’ li profeet chiru kok’ hu, maare jo’ a’in: K’a’ut naq wankeb’ li profeet? K’a’ru neke’xb’aanu li profeet? K’a’ut naq nakataaqe li profeet? K’a’ru neke’xk’ut li profeet? Patz’ reheb’ li kok’al naq te’wanq sa’ ka’kab’il, ut patz’ re jun reheb’ li ch’ina al naq tixsik’ ru jun li patz’om ut li jun chik tixsume. Wi neke’raj xtenq’ankil re xsumenkil junaq patz’om, naru neke’xsik’ “Profeet” sa’ li K’utul Raqal reheb’ li Loq’laj Hu. Naq eb’ li kok’al te’xsume li patz’om, naru neke’xjal rib’ ut te’xsik’ ru junaq chik li patz’om.

• Wotz rik’ineb’ li kok’al wiib’ oxib’ li na’leb’ chirix junaq profeet re li Najter Chaq’rab’ li xatzol chiru li chihab’ a’in (maare laj Noe, laj Moises, malaj laj Isaias). Patz’ reheb’ naq te’xq’ehi ani li profeet yookat chi aatinak wi’. K’iilasuti li ch’ina k’anjel a’an rik’ineb’ jalan jalanq profeet.

Amos 5:4–15

Wi tinsik’ ru li us, li Qaawa’ taawanq wik’in.

Eb’ li kok’al wankeb’ naab’al xhoonal re xsik’b’al ru li us ut li ink’a’ us. K’oxla chan ru taawaklesi xch’ooleb’ “chixsik’b’al li chaab’ilal ut maawa’ li ink’a’ us” (raqal 14).

Kok’ k’anjel naru chi b’aanumank

• Patz’ reheb’ li kok’al naq te’xsik’ sa’ Amos 5:4–15 li aatin “sik’omaq.” K’a’ru naraj li Qaawa’ naq taqasik’ ut k’a’ru naxyeechi’i reheb’ li te’b’aanunq re? Chan ru naqasik’ li Qaawa’?

• Tenq’aheb’ li kok’al chixtzolb’al sa’ xk’a’uxleb’ lix raqik li roxlajuhil lix raqalil li paab’aal. Chan ru naq “naqasik’ li k’a’aq re ru a’in”?

Amos 8:11–12

Lix k’ojob’ankil wi’chik li evangelio kixraq li q’etok paab’ank.

Xtawb’al ru li kixk’ut laj Amos chirix li q’etok paab’ank naru naxtenq’aheb’ li kok’al chixb’antioxinkil lix k’ojob’ankil wi’chik li evangelio.

Kok’ k’anjel naru chi b’aanumank

• Patz’ reheb’ li kok’al naq te’ril Amos 8:11–12 ut te’aatinaq chirix li nak’ulman naq maak’a’ li raatin li Qaawa’ rik’ineb’ li kristiaan. Tenq’aheb’ chixtawb’al ru li aatin q’etok paab’ank ut tz’okaak rik’in roksinkil li K’utul Raqal reheb’ li Loq’laj Hu. Chan ru naq li q’etok paab’ank chanchan chik lix kutankil li tz’okaak?

• Re xtenq’ankileb’ li kok’al chixtawb’al ru li Nimla Q’etok Paab’ank, il wi’chik rik’ineb’ “Despues del Nuevo Testamento” (sa’ Relatos del Nuevo Testamento, 167–170). Chirix a’an aatinanqex chirixeb’ li patz’om jo’ a’in: K’a’ut naq kiwan jun q’etok paab’ank? K’a’ru kixk’am chaq li q’etok paab’ank? K’a’ut naq li Qaawa’ kixk’ojob’ wi’chik lix evangelio? (chi’ilmanq ajwi’ “Lix K’ojob’ankil Wi’chik lix Tz’aqalil lix Evangelio li Jesukristo: Jun jek’inb’il aatin re wiib’ cient chihab’ choq’ re li ruchich’och’,” ChurchofJesusChrist.org). Waklesi xch’ooleb’ li kok’al chixtz’iib’ankileb’ li patz’om ut lix sumenkileb’ ut te’xwotz rik’ineb’ lix junkab’al sa’ kab’l.

Xb’oqb’aleb’ chi tzolok sa’ kab’l

K’e xhoonaleb’ li kok’al re te’xk’oxla junaq na’leb’ xe’xtzol anajwan li neke’raj xwotzb’al rik’in junaq komon sa’ lix junkab’aleb’. Waklesi xch’ooleb’ chixsik’b’al ani te’xwotz wi’ ut chan ru naq te’xb’aanu.

Xkawresinkil qib’ jo’ aj k’utunel

K’eheb’ li b’oqom li te’roxloq’i li xtaql ch’oolej. Oksiheb’ li patz’om li tixtenq’aheb’ li kok’al chixk’oxlankil chan ru te’xk’anjela li xe’xtzol. Naru taapatz’, “K’a’ru nekereek’a naq teeb’aanu xb’aan li xoo’aatinak wi’ anajwan?”