Laj Daniel naxtaw xyaalal lix matk’ laj Nabukodonosor, xb’aan laj Grant Romney Clawson

31 octubre–6 noviembre

Daniel 1–6

“Maak’a’ chik junaq Dios taaruhanq chi kolok”

Naq taawil Daniel 1–6, tz’iib’a li na’leb’ li nakaweek’a naq taatenq’anq’ reheb’ li kok’al chi tzolok.

Tz’iib’a li nakak’oxla

Xkanab’ankileb’ chi wotzok

K’uteb’ jalam-uuch chirix li kik’ulman sa’ Daniel 1–6 (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj Hu reheb’ li Jalam-uuch re li Evangelio, 23, 24, 25, 26). Patz’ reheb’ li kok’al naq te’xwotz k’a’ru neke’xnaw chirixeb’ li jalam-uuch a’an. Patz’ reheb’ naq te’aatinaq chirix junaq hoonal b’ar wi’ ke’xsik’ ru xtaaqenkil li Kolonel, jo’ kixb’aanu laj Daniel ut eb’ li ramiiw.

Xk’utb’al li tzol’leb’: Kok’al toj ka’ch’ineb’ xyu’am

Daniel 1:1–17

Lin Choxahil Yuwa’ naraj naq twil chi chaab’il lin junxaqalil.

Laj Daniel ut eb’ li ramiiw ink’a’ ke’xk’ulub’a li tib’ ut li viin kixyeechi’i li rey reheb’ xb’aan naq ke’raj xpaab’ankileb’ lix taqlahom li Dios ut rilb’al chi us lix junxaqalileb’. Sa’ qakutankil, li Aatin re Chaab’il Na’leb’ nokoxtenq’a chixramb’al qib’ chiroksinkil li k’a’aq re ru naxrahob’tesi qajunxaqalil.

Kok’ k’anjel naru chi b’aanumank

• Wotz rik’ineb’ li kok’al “Daniel y sus amigos” (sa’ Relatos del Antiguo Testamento), malaj wotz Daniel 1:1–17 chi k’osb’il ru. Patz’ reheb’ naq te’xk’utb’esi li seraq’. Tenq’aheb’ chixtawb’al ru chan ru naq li Qaawa’ kirosob’tesi laj Daniel ut eb’ li ramiiw xb’aan naq ke’xsik’ ru ab’ink chiru (chi’ilmanq li raqal 17). K’a’ chi osob’tesiik naqak’ul rik’in li Dios naq naqasik’ ru li us?

• K’ut chiruheb’ li kok’al xjalam-uuch li naxk’ut chiqu li Aatin re Chaab’il Na’leb’ naq taqatzeka ut taqoksi ut re li naxye naq ink’a’ taqatzeka ut taqoksi (chi’ilmanq Tzol’leb’ ut Sumwank 89). Patz’ reheb’ naq te’xk’oxla naq chaab’il neke’tzekan ut neke’xtz’eqtaana li k’a’ru ink’a’ us. Ch’olob’ xyaalal naq li Qaawa’ nokorosob’tesi naq naqil chi us li qajunxaqalil. B’ichahomaq jun li b’ich li na’aatinak chirix rilb’al li qajunxaqalil, maare “Jun santil ochoch k’eeb’il we” (B’ichleb’aal choq’ reheb’ li Kok’al, 73). K’a’ru naxk’ut chiqu li b’ich a’an?

Xjalam-uuch laj Daniel ut eb’ li ramiiw naq ke’xtz’eqtaana xtzakemq li rey, xb’aan laj Brian Call

Daniel 1; 3; 6

Li Dios tinrosob’tesi naq tintaaqe li Jesukristo.

Sa’ lix hu laj Daniel wankeb’ seraq’ chirixeb’ kristiaan li ke’xsik’ ru xpaab’ankil lix taqlahom li Dios us ta ch’a’aj xb’aanunkil. Chan ru taatenq’aheb’ li kok’al chi tzolok chirixeb’ li eetalil a’an?

Kok’ k’anjel naru chi b’aanumank

Daniel 6

Lin Choxahil Yuwa’ naraj naq tintijoq chi kok’ aj xsa’.

Laj Daniel kiwan xch’ool chixk’eeb’al lix yu’am sa’ xiwxiw re tijok chiru li qaChoxahil Yuwa’ wulaj wulaj. Chan ru taatenq’aheb’ li kok’al chixtawb’aleb’ rajom re tijok chi jo’kan?

Kok’ k’anjel naru chi b’aanumank

• Wotz li seraq’ natawman sa’ Daniel 6 (chi’ilmanq “Daniel y el foso de los leones” sa’ Relatos del Antiguo Testamento), ut patz’ reheb’ li kok’al naq te’xyiib’ xjalam-uuch li seraq’. Patz’ reheb’ naq te’roksi lix jalam-uuch re naq te’xwotz li seraq’ chirib’ileb’ rib’. K’a’ut naq li qaChoxahil Yuwa’ naraj naq tootijoq chiru? Wotz k’a’ut naq li tijok aajel ru choq’ aawe.

• Aatinan rik’ineb’ li kok’al chirix jo’q’e naru neke’tijok, maare naq te’ok xxiw, naq neke’xk’ul li sachk, malaj naq neke’raj xtenq’ankil sa’ li eskweel. K’a’ut naq us li tijok sa’eb’ li hoonal a’an? K’ut chiruheb’ li kok’al naq maak’a’ na’ajman re b’ar wankeb’, junelik naru neke’tijok sa’ xch’ooleb’.

• B’ichahomaq jun li b’ich li na’aatinak chirix li Jesus, jo’ “Ninmutz’ li wu” (B’ichleb’aal choq’ reheb’ li Kok’al, 18). Ye reheb’ li kok’al k’a’ru naru naqapatz’ naq nokotijok.

Xk’utb’al li tzol’leb’: Kok’al ak ninqeb’

Daniel 1; 3; 6

Naru ninb’aanu li us, us ta ch’a’aj.

Li seraq’ neke’tawman sa’ Daniel 1, 3, ut 6 naru neke’xk’e xkawileb’ xch’ool ut xpaab’aaleb’ li kok’al re te’xsik’ ru li us, us ta neke’reek’a naq xjuneseb’ wankeb’.

Kok’ k’anjel naru chi b’aanumank

• Yiib’ chiru li pizarron k’iila tzimaj li te’iloq sa’ jun ajwi’ li na’ajej, ut chirix a’an yiib’ jun tzimaj li taa’iloq junpak’al chik. Chan ru naq laj Daniel ut eb’ li ramiiw chanchaneb’ chik li tzimaj a’in? Patz’ reheb’ li kok’al naq te’xwotz k’a’ru juntaq’eet rik’ineb’ li seraq’ wankeb’ sa’ Daniel 1, 3 ut 6 (chi’ilmanq “Daniel y sus amigos,” “Sadrac, Mesac y Abed-nego” ut “Daniel y el foso de los leones” sa’ Relatos del Antiguo Testamento). Patz’ reheb’ li kok’al k’a’ut naq maare ch’a’aj kiwan choq’ re laj Daniel ut eb’ li ramiiw xsik’b’al ru li us. Chan ru naq ke’osob’tesiik xb’aan li Qaawa’ xb’aan naq ke’xsik’ ru li us?

• Tenq’aheb’ li kok’al chixk’oxlankil jo’q’e maare te’mine’q ru chixsik’b’al ru li k’a’ru ink’a’ us. Patz’ reheb’ naq te’xwotz xnumsihomeb’ naq neke’osob’tesiik xb’aan xsik’b’al ru li us, us ta ch’a’aj. B’ichahomaq jun li b’ich chirix li na’leb’ a’an, maare “Sik’ li us” (Eb’ li B’ich, 151).

Daniel 2

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an li rawa’b’ejihom li Dios sa’ ruchich’och’.

Naq laj Daniel kixch’olob’ k’a’ru naraj naxye lix matk’ laj Nabukodonosor, kiril naq “li pek kitolk’ok chaq sa’ li tzuul chi maajun kitoch’ok chaq re” (Daniel 2:45). Li pek a’an nareetali Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, li naraj xnujob’resinkil li ruchich’och’.

Kok’ k’anjel naru chi b’aanumank

• Il Daniel 2:31–35, 44–45 rik’ineb’ li kok’al ut patz’ reheb’ naq te’xyiib’ xjalam-uuch li k’a’ru kiril laj Nabukodonosor sa’ lix matk’. Patz’ reheb’ k’a’ru neke’xtzol sa’eb’ li raqal a’an chirix li pek sa’ li matk’. Ch’olob’ naq li pek a’an nareetali Lix Iglees li Jesukristo reheb’ laj Santil Paab’aanel sa’ Roso’jikeb’ li Kutan. Patz’ reheb’ li kok’al naq te’xye junjunq li k’a’aq re ru xb’aanu li qaChoxahil Yuwa’ re xk’ojob’ankil wi’chik lix Iglees sa’ roso’jikeb’ li kutan. Re xk’eeb’al xna’leb’eb’, k’uteb’ xjalam-uuch li kik’ulman sa’ lix k’ojob’ankil wi’chik li Iglees (chi’ilmanq Hu reheb’ li Jalam-uuch re li Evangelio, 90–95).

• K’e reheb’ chixjunileb’ li kok’al jun li hu chi t’ort’o re reetalinkil li pek sa’ lix matk’ laj Nabukodonosor. Patz’ reheb’ naq te’xwotz chan ru neke’xnaw naq tz’aqal yaal lix Iglees li Dios li k’ojob’anb’il wi’chik. Naq eb’ li kok’al yooqeb’ chi wotzok, patz’ reheb’ naq te’xk’e aawe lix “pekeb’.” B’ot rixeb’ li pek a’an rik’in cinta malaj noq’ re naq taakanaaq jo’ jun ajwi’ nimla pek. Ch’olob’ xyaalal naq wi naqakawob’resi lix nawom qach’ool ut naqawotz li evangelio rik’ineb’ li qas qiitz’in, naqajunaji li qapaab’aal re tenq’ank naq li rawa’b’ejihom li Dios “tixram ru chixjunil li ruchich’och’ ” (Daniel 2:35).

Xb’oqb’aleb’ chi tzolok sa’ kab’l

Patz’ reheb’ li kok’al naq te’xb’aanu junaq k’anjel chiru li xamaan a’in li tixk’ut lix paab’aaleb’ chirix li Jesukristo.

Xkawresinkil qib’ jo’ aj k’utunel

Tenq’aheb’ li kok’al chixk’eeb’al reetal li Musiq’ej. Naq taawanq aamusiq’ejil numsihom rik’ineb’ li kok’al, tenq’aheb’ chixk’eeb’al reetal lix wankil li Santil Musiq’ej.