jun sumal sa’ xsutam li santil ochoch

7–13 noviembre

Oseas 1–6; 10–14; Joel

“Q’axal tinra chi anchal inch’ool”

B’oq li Musiq’ej naq taatzol lix hu laj Oseas ut lix hu laj Joel. Tz’iib’a li na’leb’ naxk’e li Musiq’ej sa’ laa ch’ool ut sa’ laa k’a’uxl.

Tz’iib’a li nakak’oxla

Ki’ajman naq lix sumwank laj Israel rik’in li Qaawa’ q’axal nim xloq’al, jo’kan naq li Qaawa’ kixjuntaq’eeta rik’in li sumlaak. Sa’ li sumwank, jo’ li sumlaak, ki’ajman li yeechi’ink-ib’, li wotzok, xmaak’a’il li b’alaq’, ut sa’ xb’een chixjunil, li rahok-ib’. K’a’jo’ li napatz’man sa’ li sumwank a’an—ut jwal ra xq’ajkamunkil li ani naq’etok re. Rik’in xtz’uumal re li profeet aj Oseas, li Dios kixch’olob’ k’a’ru te’xk’ul laj Israelita xb’aan xq’etb’al lix sumwank. A’b’an, moko kixye ta, “Texintz’eqtaana chi junelik xb’aan naq moko tiikeb’ ta chi paab’ank.” Kixye b’an, “Texinb’oq chi q’ajk” (chi’ilmanq Oseas 2:14–15). “Laa’ataq li wixaqil sa’ tiikilal,” kixye li Qaawa’ (Oseas 2:19). “Twisi chixjunil lix q’etq’etil laj Israel, ut q’axal tinra chi anchal inch’ool” (Oseas 14:4). A’an ajwi’ li naxye qe sa’ li kutan a’in naq naqasik’ xyu’aminkil li qasumwank rik’in rahok ut tiikilal.

Laj Joel kixwotz ajwi’ li esil a’an: “Sutq’inqex wi’ chik rik’in li Qaawa’ lee Dios, xb’aan naq A’an aj uxtaan ut q’un xch’ool, ink’a’ najosq’o’ chi junpaat ut q’axal narahok” (Joel 2:13). “Li Qaawa’ a’an lix muheelahom lix tenamit, li neke’xkol wi’ rib’eb’ laj Israel” (Joel 3:16). Naq nakawil xhu laj Oseas ut xhu laj Joel, k’oxla chan ru wankat rik’in li Qaawa’. K’oxla chan ru naq lix tiikilal nakatxmusiq’a chixpaab’ankil.

Re xtzolb’al k’a’ru wan sa’ lix hu laj Oseas ut laj Joel, chi’ilmanq “Oseas (Oseas)” ut “Joel” sa’ li K’utul Raqal reheb’ li Loq’laj Hu.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Oseas 1–3; 14

Li Qaawa’ junelik nikinixb’oq chi sutq’iik rik’in.

Li rixaqil laj Oseas kixmux xsumlajikeb’, ut li Dios kiroksi li na’leb’ a’an re xk’utb’al chiruheb’ laj Israelita chan ru nareek’a chirixeb’ ut lix sumwankeb’ rik’in. Naq nakawil Oseas 1–3, k’oxla chan ru naq li Qaawa’ naril li sumwank wan wi’ rik’in lix tenamit. Naru taak’oxla jun sutaq naq laa’at, jo’eb’ laj Israelita, ink’a’ xatwan chi tiik chiru li Qaawa’, ut chan ru naq xye’ li ruq’ aawe. K’a’ru nakatzol sa’ Oseas 2:14–23 ut Oseas 14 chirix lix rahom ut li ruxtaan li Qaawa’? Chan ru naq nakak’ut laa rahom choq’ re ut laa wajom chixpaab’ankil?

Chi’ilmanq ajwi’ Dieter F. Uchtdorf, “El punto de retorno seguro,” Liahona, mayo 2007, 99–101.

jun winq naxk’e li ruq’ sa’ xb’een xjolom jun ixq

Kimaakob’k li xGomer, li nareetali Israel, a’b’an li Qaawa’ kixyeechi’i xkolb’al rix. Jalam-uuch xb’aan li xDeb Minnard, k’eeb’il xliceens xb’aan goodsalt.com

Oseas 6:4–7; Joel 2:12–13

Li qaloq’onihom choq’ re li Dios tento naq yo’yooq sa’ li qach’ool, ink’a’ yal taak’utunq sa’ li qab’aanuhom.

Li Qaawa’ kixtaqla reheb’ lix tenamit naq te’xmayeja li xul. Us ta li tenamit sa’ xkutankil laj Oseas neke’xpaab’ li chaq’rab’ a’an, yookeb’ chixq’etb’aleb’ li chaq’rab’ li ninqeb’ xwankil chiru a’an (chi’ilmanq Oseas 6:4–7). K’a’ru naraj naxye li kixye li Qaawa’: “Li nawoyb’eni eerik’in, a’an naq tineera, ut maawa’ junes mayejak”? (Oseas 6:6). K’a’ru naraj naxye naq li tiikilal chanchanaq raj li choql malaj li k’ajob’? Chan ru naq taawanq li qatiikilal chi paab’ank? (chi’ilmanq Isaias 48:18; 1 Nefi 2:9–10).

Naru ajwi’ nakawil Mateo 9:10–13; 12:1–8 re xk’eeb’al reetal chan ru naq li Kolonel kiroksi Oseas 6:6 sa’ lix k’anjel. Chan ru naq eb’ li raqal a’in nakate’xtenq’a chixtawb’al ru li raatin laj Oseas?

Naq nakawil Joel 2:12–13, us xnawb’al naq xpejb’al li aq’ej, a’an reetalil li tz’uyink malaj xutaan (chi’ilmanq 2 Kronikas 34:14–21,27). Chan ru naq xteeb’al qach’ool jalan rik’in xpejb’al li aq’ej?

Chi’ilmanq ajwi’ Isaias 1:11–17; Mateo 23:23; 1 Jwan 3:17–18.

Joel 2

“Tinhoy lin musiq’ sa’ xb’eeneb’ chixjunil.”

Naq laj Joel kixye profeetil aatin chirix “xkutankil li Qaawa’,” a’an kixye naq a’an “xk’utankil li aak’ab’ ut li q’ojyin,” ut “xuwajelaq” (Joel 2:1–2, 11). Eb’ laj Israel ke’xnumsi k’iila kutan xuwajeleb’, ut lix tenamit li Dios re sumwank toj te’xnumsi xkomoneb’ chik. K’a’ru nawulak chawu chirix li aatin kixye li Qaawa’ sa’ Joel 2:12–17? K’e reetaleb’ li osob’tesiik naxyeechi’i sa’ Joel 2:18–32. K’a’ut naq li osob’tesiik li yeechi’inb’il sa’eb’ li raqal 27–32 nim xloq’al sa’eb’ li kutankil li ch’olob’anb’ileb’ sa’ Joel 2, jo’ li qakutankil?

K’a’ru naraj naxye naq li Qaawa’ “tixhoy lix musiq’ sa’ xb’een chixjunil”? (Joel 2:28). Chan ru naq yoo chi tz’aqlok ru li profeetil aatin sa’ Joel 2:28–29? (Chi’ilmanq Hechos 2:1–21; Jose Smith—Resilal 1:41.)

Naru taak’oxla li aatin a’in kixye li Awa’b’ej Russel M. Nelson: “Sa’ li kutankil chalel, tookamq raj sa’ musiq’ej chi maak’a’ li b’eresink, li k’amok b’e, li k’ojob’ank ch’oolej, ut li ochb’eeniik chi rajlal xb’aan li Santil Musiq’ej” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018). K’a’ut naq aajel ru li k’utb’esinb’il na’leb’ choq’ re li qakolb’al sa’ musiq’ej? Chan ru naq taak’ul xkomon chik li k’utb’esinb’il na’leb’ choq’ re laa yu’am?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Oseas 2:19–20.Li Qaawa’ kiroksi li sumlaak re xch’olob’ankil lix sumwank rik’in Israel (chi’ilmanq ajwi’ K’utul Raqal reheb’ li Loq’laj Hu, “B’eelomej”). Jo’ junkab’al, naru teeye k’a’ut naq li sumlaak nareetali chi us li qasumwank rik’in li Dios. Chan ru naq Oseas 2:19–20 nokoxtenq’a chixtawb’al ru li nareek’a li Dios chiqix? K’a’ru taqab’aanu re toowanq chi tiik chixpaab’ankil li qasumwank rik’in a’an?

Oseas 10:12.Maare taawulaq chiruheb’ li kok’al xyiib’ankil xjalam-uuch jun li reloj ut xk’oxlankil chan ru te’xsik’ li Qaawa’ chiru li kutan.

Joel 2:12–13.Re xtenq’ankil laa junkab’al chi aatinak chirix Joel 2:12–13, naru taak’e xjalam-uuch li Kolonel sa’ jun pak’al re li ochoch, ut li aatin maak sa’ li jun pak’al chik. Patz’ re laa junkab’al naq te’iloq wan wi’ li aatin maak, toja’ naq te’iloq wan wi’ li Kolonel ut te’xye k’a’ru nokoxtenq’a chi chalk rik’in a’an “chi anchal qach’ool.” Waklesi xch’ooleb’ laa komon chixk’oxlankil chixjunil li neke’xb’aanu sa’ xyu’ameb’.

Joel 2:28–29.K’a’ru naraj naxye naq li Musiq’ej “taahoymanq” sa’ qab’een? Naru taak’ut xyaalal a’in rik’in xhoyb’al naab’al li ha’, toja’ naq taahoy yal junjunq tz’uqul.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Chalqex rik’in li Kolonel,”Eb’ li B’ich, 68.

Xkawresinkil qib’ jo’ aj k’utunel

Taakʼut li tzolʼlebʼ. “Maakanab’ chi nume’k li hoonal taaruuq wi’ taach’utub’eb’ li kok’al re te’xtzol li tzol’leb’ chirix li Jesukristo. Moko k’iheb’ ta li hoonal a’an, ut k’a’jo’ naq k’eek’o xch’ool li xik’ na’ilok qe“ (Henry B. Eyring, “El poder del enseñar la doctrina,” Liahona, julio 1999, 87).

li Jesus sa’ li okeb’aal

Chalqex wik’in, xb’aan laj Kelly Pugh