“3–9 octubre. Isaias 58–66: “Sa’ li tzuul Sion taachalq jun aj Kolonel,” ” Kim, Taaqehin—Choq’ reheb’ li komon ut li junkab’al: Li Najter Chaq’rab’ 2022 (2021)

“3–9 octubre. Isaias 58–66,” Kim, Taaqehin—Choq’ reheb’ li komon ut li junkab’al: 2020

Jalam-uuch

li Jesus nak’utuk sa’ jun li ch’utleb’aal kab’l

Li Jesus sa’ li ch’utleb’aal kab’l aran Nazaret, xb’aan laj Greg K. Olsen

3–9 octubre

Isaias 58–66

“Sa’ li tzuul Sion taachalq jun aj Kolonel”

Naq nakawil Isaias 58–66, k’oxla chan ru naq li raatin laj Isaias naxk’e xsahil aach’ool ut aayo’onihom chirix li chalel kutan.

Tz’iib’a li nakak’oxla

Sa’ xtiklajik lix k’anjel sa’ ruchich’och’, li Jesukristo ki’ok sa’ jun ch’utleb’aal kab’l aran Nazaret, li k’aleb’aal kiyo’la wi’. Aran kixaqli re xyaab’asinkil li raatin li loq’laj hu, kixte lix hu laj Isaias, ut kixyaab’asi li wan anajwan sa’ Isaias 61:1–2. Toja’ naq kixye, “Li tz’iib’anb’il aatin a’in li toja’ xerab’i, xtz’aqlok ru anajwan.” Sa’ li hoonal a’an li Kolonel kixye chi saqen ru naq a’an li Yulb’il, li tixk’irtesiheb’ li yot’b’ileb’ xch’ool ut “tixpuktesi resil li kob’a-ib’ reheb’ li wankeb’ sa’ tz’alam” (chi’ilmanq Lukas 4:16–21). Yaal naq kitz’aqlok ru li loq’laj hu sa’ li kutan a’an. Ut, jo’ xkomon chik lix profeetil aatin laj Isaias, toj yoo chi tz’aqlok ru sa’ li qakutankil. Li Kolonel toj naxk’irtesiheb’ li yot’b’ileb’ xch’ool li neke’chal rik’in. Toj wankeb’ naab’al sa’ li tz’alam li tento te’rab’i resil li kolb’a-ib’. Ut tento taqakawresi qib’ choq’ re li xchaq’al ru kutan toj chalel—naq li Qaawa’ “tixyo’ob’tesi jun ak’ choxa ut jun ak’ ruchich’och’ ” (Isaias 65:17) ut “tixk’e chi moqk li tiikilal ut chixjunileb’ li tenamit te’b’ichanq re” (Isaias 61:11). Rilb’al ru Iix hu laj Isaias naxk’ut chiqu li ak xb’aanuhom li Qaawa’, k’a’ru yoo chixb’aanunkil, ut li toj tixb’aanu choq’ re lix tenamit.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Isaias 58:3–12

Li kuyuk sa’ naxk’am li osob’tesiik.

Eb’ li raqal a’in neke’xk’ut naq choq’ re naab’aleb’ li najter aj Israelita, li kuyuk sa’ moko usilal ta, nimla iiq b’an. Wan naq naqak’oxla ajwi’ a’an. Wi taawaj xtawb’al xkomon li yaal ut li ajom sa’ li kuyuk sa’, il Isaias 58:3–12 re xtawb’al lix sumehom li Qaawa’ choq’ re li patz’om “K’a’ut naq naqakuy qasa’?” Sa’ laa yu’am, chan ru naq li kuyuk sa’ naru “chixk’ixb’al lix k’aamal li rahob’tesiik” ut “risinkil chixjunil li kawil taqlank”? (Isaias 58:6). Chan ru naq li kuyuk sa’ nakatrosob’tesi jo’ ch’olob’anb’il sa’ Isaias 58:8–12? Ma wan k’a’ru sa’ Isaias 58:3–12 li naxjal li nakak’oxla chirix li kuyuk sa’?

Sa’ li aatin, “Ma ink’a’ ta a’in li kuyuk sa’ sik’b’il ru inb’aan?” (Jolomil ch’utub’aj-ib’ re abril 2015), li Awa’b’ej Henry B. Eyring kixye resileb’ li kristiaan li ke’osob’tesiik xb’aan xkuyb’aleb’ xsa’ ut xtojb’al li mayej re li kuyuk sa’. Chan ru naq xawil li osobʼtesiik aʼan saʼ laa yuʼam?

Chi’ilmanq ajwi’ Temas del Evangelio, “Ayuno y ofrendas de ayuno” (topics.ChurchofJesusChrist.org).

Isaias 59:9–21; 61:1–3; 63:1–9

Li Jesukristo a’an laj Kolol we ut aj Tojol wix.

Sa’ Isaias 58–66 taataw k’iila na’leb’ chirix lix k’anjel li Jesukristo re xtojb’al qix. A’in junjunq reheb’, ut wiib’ oxib’ li patz’om li tate’xtenq’a chixtz’ilb’aleb’ rix.

Isaias 59:9–21. Chan ru taach’olob’ chi k’osb’il ru lix musiq’ejil wanjikeb’ li kristiaan sa’eb’ li raqal 9–15? K’a’ru naxtoch’ aach’ool sa’ lix ch’olob’ankil li ani “na’okenk chirixeb’ ” sa’eb’ li raqal 16–21 ut li sumwank na’ok wi’ rik’ineb’ li neke’paab’ank re.
Isaias 61:1–3. Chan ru naq li Jesukristo xatrosob’tesi jo’ ch’olob’anb’il sa’eb’ li raqal a’in? K’a’ru li “chaab’il esilal” li xk’e aawe? Chan ru naq xk’e li ch’ina-us aawe ruuchil li cha?
Isaias 63:7–9. Ma wan “ruxtaan li Qaawa’ ” li nakawil sa’ laa yu’am? K’a’ru nakaweek’a chirix li Kolonel chirix rilb’aleb’ li raqal a’in?

K’a’ chik ru nakataw chirix li Kolonel sa’ Isaias 58–66?

Chi’ilmanq ajwi’ Mosiah 3:7; Tzol’leb’ ut Sumwank 133:46–53.

Isaias 60; 62

Li Qaawa, a’an chik “laa saqenk chi junelik.”

Isaias 60 ut 62 neke’aatinak chirix li saqen ut li q’ojyin, li uhej ut li ilok, re xk’utb’al chan ru naq lix evangelio li Jesukirsto taarosob’tesi chixjunil li ruchich’och’ sa’ roso’jikeb’ li kutan. K’e reetaleb’ li na’leb’ a’in sa’ Isaias 60:1–5, 19–20; 62:1–2. Naq nakawileb’ li ch’ol a’in, k’oxla chan ru naq li Dios yoo chixch’utub’ankileb’ li ralal xk’ajol chalen li q’ojyin toj sa’ lix saqen. K’a’ru laa k’anjel sa’ lix k’anjel a’an?

Chi’ilmanq ajwi’ 1 Nefi 22:3–12; 3 Nefi 18:24; Tzol’leb’ ut Sumwank 14:9; Bonnie H. Cordon, “Re naq te’ril,” Jolomil ch’utub’aj-ib’ re abril 2020.

Isaias 64:1–5; 65:17–25; 66

Li Jesus taa’awa’b’ejinq sa’ xb’een li ruchich’och’ chiru jun mil chihab’.

Laj Isaias ki’aatinak chirix jun kutan naq “li rahilal li kik’ulman junxil taasachq sa’ inch’ool” (Isaias 65:16). Us ta natz’aqlok ru li profeetil aatin a’in chi k’iila paay ru, maji’ nachal chi tz’aqal li kutan a’an—naq li Jesukristo taasutq’iiq sa’ ruchich’och’ ut tixk’ojob’ li tuqtuukilal ut li tiikilal chiru jun mil chihab’. Laj Isaias ki’aatinak chirix li kutan a’an sa’ Isaias 64:1–5; 65:17–25; 66. K’e reetal jarub’ sut naroksiheb’ li aatin jo’ “sahil ch’oolej.” K’oxla k’a’ut naq lix sutq’ijik li Qaawa’, a’anaq sahil kutan choq’ aawe. K’a’ru naru taab’aanu re xkawresinkil aawib’ choq’ re lix sutq’ijik?

Chi’ilmanq ajwi’ Eb’ lix Raqalil li Paab’aal 1:10; Russell M. Nelson, “El futuro de la Iglesia: Preparar al mundo para la segunda venida del Salvador,” Liahona, abril 2020, 7–11.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Isaias 58:3–11.Laa junkab’al maare tixtaw ru chi us wi’chik li raatin laj Isaias chirix li kuyuk sa’ wi te’xk’utb’esi li kuyuk sa’ ch’olob’anb’il sa’ Isaias 58:3–5 ut li kuyuk sa’ ch’olob’anb’il sa’ Isaias 58:6–8. Chan ru naq lix kuyb’al qasa’ chanchanaq chik “li kuyuk sa’ naraj [li Dios]”? K’a’ru li usilal ak xqak’ul sa’ li kuyuk sa’?

Isaias 58:13–14.K’a’ru xjalanil li “xb’aanunkil li naqaj qajunes qib’,” ut xtawb’al “li sahil ch’oolejil” rik’in li Qaawa’ sa’ li hilob’aal kutan? K’a’ru taqab’aanu re naq “sahil kutan” li hilob’aal kutan?

Isaias 60:1–5.Naq nekeril Isaias 60:1–3, laa junkab’al truuq te’xloch li xam naq naxye saqen ut te’xchup li xam naq naxye q’ojyin. Chan ru naq lix evangelio li Jesukristo chanchan saqen choq’ qe? K’a’ru kiril laj Isaias naq taak’ulmanq naq lix tenamit li Dios te’xwotz lix saqenkil li evangelio? (chi’ilmanq Isaias 60:3–5).

Isaias 61:1–3.Chan ru naq li Kolonel kixtz’aqob’resi ru lix profeetil aatin laj Isaias sa’eb’ li raqal a’in? Naru taaye re laa junkab’al naq te’xsik’eb’ xjalam-uuch li Kolonel li neke’xk’ut li kixb’aanu re xtz’aqob’resinkil ru (naru xtawb’aleb’ li jalam-uuch sa’ li Liahona malaj li Hu reheb’ li Jalam-uuch re li Evangelio). Naru ajwi’ teeb’icha jun li b’ich li naxye chan ru li Kolonel nokorosob’tesi, maare “Ninnaw naq raab’ilin” (B’ichleb’aal choq’ reheb’ li Kok’al, 42–43).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Naq taak’ulunq li Kolonel,” B’ichleb’aal choq’ reheb’ li Kok’al, 46–47.

Xkawresinkil aawib’ chi tzolok

Kawresi li na’ajej wankat wi’. Wi chaab’il li wanko wi’, chaab’il wi’chik naq tootzoloq. Taw jun na’ajej re rilb’aleb’ li loq’laj hu, b’ar wi’ tatruuq chireek’ankil li Musiq’ej. (Chi’ilmanq Li k’utuk jo’ li Kolonel, 15.)